পাঙথোক্কদৌরিবা ফেস্তিবেল অসিগী শেম-শাবশিং য়েংশিন্নবা অমসুং মালেমগী থাক্কী ইন্তরনেসনেল ফিল্ম ফেস্তিবেল অমা ওইনা মসিবু হেন্না মপাঙ্গল হাপ্নবা পাম্বৈশিংগী মতাংদা খন্ন-নৈননবা, ইনফোর্মেসন অমসুং ব্রোদকাস্তিংগী ইকায়খুম্নরবা স্তেত মন্ত্রী দোক্তর এল. মুরুগনগী লুচিং মখাদা ৫৭শুবা ইন্তরনেসনেল ফিল্ম ফেস্তিবেল ওফ ইন্দিয়া (IFFI) গী স্তিরিং কমিতীগী অহানবা মীফম ২০২৬কী ওগস্ত ২১দা নই দিল্লীগী কর্তব্য ভবন-২দা পাঙথোকখ্রে।

৫৭শুবা ইন্তরনেসনেল ফিল্ম ফেস্তিবেল ওফ ইন্দিয়া (IFFI) অসি ২০২৬কী নবেম্বর ২০দগী ২৮ ফাওবা গোৱাদা পাঙথোক্নবা থৌরাং তৌরি।

মীফম অদুদা ৱা ঙাঙলদুনা, দোক্তর এল. মুরুগন্না নহা ওইরিবা মহৈরোয়শিং, অনৌবা ফিল্মমেকরশিং অমসুং ভারতকী ফিল্ম ইন্দস্ত্রীগী শকখঙবিদ্রবা হীরোশিংদা হেন্না চাউবা খুদোংচাবশিং পীবদা মিৎয়েং থমদুনা, IFFI গী ৫৭শুবা ইদিসনগীদমক মহাক্কী মঙলান মশক তাকখি। IFFI না নহা ওইরিবা হৈশিংবশিংদা মখোয়গী ক্রিয়েতিবিতী উৎনবা, মমিং চৎলবা ফিল্মমেকরশিংদগী তম্নবা অমসুং গ্লোবেল ফিল্ম কম্যুনিতীগা শম্ননবগী প্লেতফোর্ম অমা ফংহনগদবনি, লোয়ননা মালেম শিনবা থুংবদগী অখন্নবা ফিল্মশিং অমসুং মাংজিল থারিবা ক্রিয়েতিব হৈশিংবশিংবু ভারত্তা পুরক্তুনা মসিবু মালেম শিনবা থুংনা শন্দোকপদা মপাঙ্গল হাপ্নবা হোৎনগদবনি হায়না মহাক্না হায়খি।

শ্রী অশ্বিনী বৈষ্ণবকী লুচিং মখাদা মন্ত্রালয় অসিনা ভারতকী ওরেঞ্জ ইকনোমীবু হেনগৎহন্নবা অমসুং লৈবাক অসিগী ক্রিয়েতিব ইন্দস্ত্রীশিংবু শক্তি পীনবা, হৈশিংবা, অনৌবা ৱাখল্লোন অমসুং মালেমগী ওইবা পুন্না চৎমিন্নবগী খুদোংচাবশিং শেম্লদুনা অনৌবা খোংথাঙশিং লৌখৎলি হায়না দোক্তর মুরুগন্না পনখি।

দোক্তর মুরুগন্না নহা ওইরিবা অমসুং অনৌবা হৈশিংবশিংগীদমক মাস্তরক্লাসশিং পাকথোক-চাউথোকহনবা, মমিং চৎলবা ফিল্মমেকরশিংগা নীংথিনা শেম-শাদুনা তাথোক তাশিন তৌনবা অমসুং কান্নগদবা মেন্তরশিপকী খুদোংচাবশিং পীবগী তঙাইফদবশিংদসু অহেনবা মীৎয়েং থমখি। মহাক্না ইন্তরনেসনেল কোলাবোরেসন অমসুং প্রোফেস্নেল এক্সচেঞ্জকী লম্বীশিংবু হেন্না শক্তি পীরদুনা, ভারতকী সিনেমাগী তোঙান-তোঙানবা মওংশিং অমসুং মপাঙ্গলবু উৎপগী মরুওইবশিং অদুগী মতাংদসু পনখি।

IFFI গী চাওখৎলকপা অমসুং লেপ্পা লৈতনা মায় পাকপদা গোৱা লৈঙাক্কী মরুওইবা থৌদাংবু শকখঙলদুনা, গোৱাগী হান্নগী মুখ্য মন্ত্রী লৈখিদ্রবা শ্রী মনোহর পরিকরগী কৎথোকপদা মন্ত্রীনা শ্রদ্ধাঞ্জলি কৎখি, মহাক্কী মঙলান অসিনা গোৱাবু মালেমনা শকখঙলবা মালেমগী সিনেমাগী মফম অমা ওন্থোকপদা মরুওইবা থৌদাং লৌখি হায়খি। মহাক্না IFFI বু তশেংনা মালেমগী থাক্কী কলচরেল থৌরম অমা ওইহন্নবগীদমক লেপ্পা লৈতনা শৌগৎপিরকপা অমসুং হোৎনবিবগীদমক গোৱাগী ইকায়খুম্নরবা মুখ্য মন্ত্রী শ্রী প্রমোদ সাৱন্তপুসু থাগৎখি।

থৌরম অদুদা ইনফোর্মেসন অমসুং ব্রোদকাস্তিং মন্ত্রালয়গী সেক্রেতরী শ্রী চঞ্চল কুমারনা IFFI বু ভারতকী হেনগৎলক্লিবা ক্রিয়েতিব ইকনোমীবু য়োকখৎনবগী অমসুং ভারতকী লোয়ননা ইন্তরনেসনেল ক্রিয়েতিব কম্যুনিতীশিংগী মরক্তা পুন্না চৎমিন্নবগী থৌওং হেন্না চেৎশিলহন্নবগী ফ্লেগশিপ প্লেতফোর্ম অমা ওইনা শীজিন্নগদবনি হায়খি। মহাক্না ফেস্তিবেল অসিদা শরুক য়ারিবা ফিল্মমেকরশিং, সিনেফাইলশিং, দেলিগেৎশিং অমসুং মীথুংশিংগীদমক মতিং লৈবা, অয়েৎ-অপন লৈতবা এক্সপিরিএন্স অমা ফংহনবগী মরুওইবশিং অদুগী মতাংদসু পনখি।

NFDC গী MD শ্রী প্রকাশ মাগদুমনা ৫৭শুবা IFFI গীদমক শেম-শারিবশিং অমসুং লৌখৎলিবা তোঙান-তোঙানবা খোঙথাংশিংগী মতাংদা প্রজেন্তেসন অমা তৌখি। IFFI গী ফেস্তিবেল দাইরেক্তর শ্রী আশুতোশ গোৱারিকরনা স্তিরিং কমিতীগী রিকমেন্দেসনশিংবু তরাম্না ওকখি অমসুং মাস্তরক্লাসশিং শক্তি পীনবা, নহা ওইরিবা ফিল্মমেকরশিংগী খুদোংচাবশিং ফংহন্নবা, ভারত অমসুং মপান লৈবাকশিংদগী অখন্নবা ফিল্মশিং খনগৎনবা, লোয়ননা ভারত অমসুং মালেম শিনবা থুংবদগী মাংজিল থারিবা ফিল্মমেকরশিং অমসুং ক্রিয়েতিব মীওইশিংনা শরুক য়াহনবগী মরুওইবশিং অদুগী মতাংদা পনখি।

গোৱা লৈঙাক্কী সেক্রেতরী (IPR) না স্তেত লৈঙাক্না লৌখৎলিবা শেম-শারিবশিংগী মতাংদা কমিতীদা খঙহনখি অমসুং ৫৭শুবা IFFI গীদমক তঙাইফদবা থবক-থৌরমশিং মতম চানা লোইশিন্নবা অমসুং অয়েৎ-অপন লৈতনা শিন-লাংনবগীদমক মথৌ তাবা থৌরাং খুদিংমক লৌখৎকনি হায়না থাজবা পীখি।

স্তিরিং কমিতীগী মীওইশিংনা মালেম শিনবা থুংবদগী অখন্নবা ফিল্মশিং পুনশিন্নবা অমসুং তোঙান-তোঙানবা লৈবাকশিংদগী মাংজিল থারিবা ফিল্মমেকরশিং, আর্তিস্তশিং অমসুং ক্রিয়েতিব প্রোফেস্নেলশিংবু কৌনবগীদমক মীৎয়েং থমদুনা খোঙথাংশিং লৌখৎলগা, IFFI বু মালেম শিনবা থুংনা হেন্না শন্দোকপদা অচৌবা মীৎয়েং থমখি। ফেস্তিবেল অসি মমি-কুমহৈগী হরাও-তয়াম্বা থৌরম অমা ওইখিবখক্তা নত্তনা, ক্রিয়েতিব এক্সচেঞ্জ, পুন্না চৎমিন্নবা অমসুং ভারতকী হেনগৎলক্লিবা ক্রিয়েতিব ইকনোমীবু য়োকখৎনবগী মরুওইবা প্লেতফোর্ম অমসু ওইনা উরি।

ফেস্তিবেল অসি মায় পাক্না শিন-লাংনবগীদমক ইনফোর্মেসন অমসুং ব্রোদকাস্তিং মন্ত্রালয়, NFDC, গোৱা লৈঙাক অমসুং মরী লৈনবা স্তেকহোল্দর পুম্নমক্কী মরক্তা নকশিন্নবা অমসুং লেপ্পা লৈতনা চুংশিন্নবগী মরুওইবশিং অদু স্তিরিং কমিতীনা অমুক হন্না পনখি। ৫৭শুবা IFFI অসিনা ভারতকী ফিল্মমেকরশিং অমসুং ক্রিয়েতিব প্রোফেস্নেলশিংদা মালেমগা লোয়ননা কান্নগদবা মরী লৈননবগী হেন্না চাউবা খুদোংচাবশিং পীরদুনা, সিনেমা, ক্রিয়েতিবিতী, কলচরেল এক্সচেঞ্জ অমসুং গ্লোবেল কোলাবোরেসনগী মাংজিল থারিবা ইন্তরনেসনেল প্লেতফোর্ম অমা ওইনা মশাগী ফীভম হেন্না চেৎশিনহনগনি হায়বগী অপুনবা থাজবা অদু কমিতীনা ফোঙদোকখি।

মীফম অদুদা ইনফোর্মেসন অমসুং ব্রোদকাস্তিং মন্ত্রালয়গী সেক্রেতরী শ্রী চঞ্চল কুমার; মমিং চৎলবা ফিল্মমেকর অমসুং IFFI গী ফেস্তিবেল দাইরেক্তর শ্রী আশুতোশ গোৱারিকর; নেসনেল ফিল্ম দিবেলপমেন্ত কোরপোরেসন (NFDC) গী মেনেজিং দাইরেক্তর শ্রী প্রকাশ মাগদুম; গোৱা লৈঙাক্কী সেক্রেতরী (IPR); অমসুং মমিং লৈরবা স্তিরিং কমিতীগী মীওইশিং ওইরিবা শ্রীমতী ভাবনা খের, রাম সম্পত, অপর্ণা পুরোহিত, প্রেরনা সিংহ, নমিতা, সুহাসিনী মনি রত্নম, অভিষেক জৈন, সন্তোষ সিবান, গৌরব বেনর্জী, আদিত্য ভাত, প্রশান্ত চোথানী অমসুং ধরম গুলাতিনা শরুক য়াখি।

***