గౌరవ సమాచార, ప్రసార శాఖ సహాయమంత్రి డాక్టర్ ఎల్. మురుగన్ అధ్యక్షతన న్యూఢిల్లీలోని కర్తవ్య భవన్-2లో ఆగస్టు 21, 2026న 57వ భారత అంతర్జాతీయ చలనచిత్రోత్సవం (ఇఫి) స్టీరింగ్ కమిటీ మొదటి సమావేశం జరిగింది. చలన చిత్రోత్సవ రాబోయే ఎడిషన్‌కు సంబంధించిన ఏర్పాట్లను సమీక్షించేందుకు, ప్రపంచ స్థాయి అంతర్జాతీయ చలన చిత్రోత్సవంగా ఇఫి స్థానాన్ని మరింత బలోపేతం చేయటానికి తీసుకోవాల్సిన చర్యలపై ఈ సమావేశంలో చర్చించారు.

57వ అంతర్జాతీయ భారత చలన చిత్రోత్సవం (ఇఫి) నవంబర్ 20 నుంచి 28, 2026 వరకు గోవాలో జరుగుతుంది.

ఈ సమావేశం సందర్భంగా డాక్టర్ ఎల్. మురుగన్ మాట్లాడుతూ... 57వ ఇఫి వేడుకపై దృక్పథాన్ని వివరించారు. యువ విద్యార్థులకు, నూతన సినీ రూపకర్తలకు భారత చలనచిత్ర పరిశ్రమలో వెలుగులోకి రాని ప్రతిభావంతులకు మరిన్ని అవకాశాలు కల్పించటంపై ఆయన ప్రత్యేకంగా మాట్లాడారు. యువ ప్రతిభావంతుల సృజనాత్మకతను ప్రదర్శించేందుకు, నిపుణులైన సినీ రూపకర్తల నుంచి నేర్చుకునేందుకు, ప్రపంచ చలనచిత్ర వర్గాలతో అనుసంధానమయ్యేందుకు వేదికగా ఇఫి నిలవాలని తెలిపారు. ప్రపంచవ్యాప్తంగా ఉన్న అత్యుత్తమ చిత్రాలను, ప్రముఖ సృజనాత్మక ప్రతిభను భారత్‌లో ప్రదర్శించటం ద్వారా అంతర్జాతీయ స్థాయిలో ఉనికిని మరింత బలోపేతం చేయాలని ఆయన ఆకాంక్షించారు.

భారతదేశంలో ఆరెంజ్ ఎకానమీని ప్రోత్సహించటానికి, దేశంలోని సృజనాత్మక పరిశ్రమలను బలోపేతం చేయటానికి శ్రీ అశ్విని వైష్ణవ్ నాయకత్వంలోని మంత్రిత్వ శాఖ నూతన కార్యక్రమాలను చేపడుతోందని డాక్టర్ మురుగన్ స్పష్టం చేశారు. ఇది ప్రతిభకు, ఆవిష్కరణలకు, ప్రపంచ స్థాయి భాగస్వామ్యాలకు అద్భుతమైన అవకాశాలను సృష్టిస్తోందని పేర్కొన్నారు. అంతర్జాతీయ సహకారం, వృత్తిపరమైన మార్పిడికి తగిన మార్గాలను బలోపేతం చేస్తూ భారతీయ సినీ వైవిధ్యాన్ని, శక్తిని ప్రపంచానికి చాటిచెప్పాల్సిన ప్రాముఖ్యతను తెలిపారు.

ఇఫి అభివృద్ధిలో, దాని నిరంతర విజయంలో గోవా ప్రభుత్వ కీలక పాత్రను గుర్తించిన మంత్రి... గోవా మాజీ ముఖ్యమంత్రి దివంగత శ్రీ మనోహర్ పారికర్ వారసత్వాన్ని స్మరించుకున్నారు. అంతర్జాతీయ చలన చిత్రాలకు గోవాను ప్రపంచ స్థాయి గమ్యస్థానంగా మార్చటంలో ఆయన దూరదృష్టి ఎంతగానో దోహదపడిందని కొనియాడారు. ఇఫిని అత్యుత్తమ ప్రపంచ స్థాయి సాంస్కృతిక వేదికగా తీర్చిదిద్దేందుకు నిరంతరం మద్దతిస్తున్న గోవా గౌరవ ముఖ్యమంత్రి శ్రీ ప్రమోద్ సావంత్ కృషినీ ఆయన అభినందించారు.

ఈ వేడుక సందర్భంగా సమాచార, ప్రసార మంత్రిత్వ శాఖ కార్యదర్శి శ్రీ చంచల్ కుమార్ మాట్లాడుతూ... అభివృద్ధి చెందుతున్న భారత సృజనాత్మక ఆర్థిక వ్యవస్థకు ప్రచారం కల్పించేందుకు, భారత, అంతర్జాతీయ సృజనాత్మక వర్గాల మధ్య సహకారాన్ని మరింత పెంపొందించేందుకు ఇఫిని ప్రధాన వేదికగా వినియోగించుకోవాలన్నారు. ఈ చిత్రోత్సవానికి హాజరయ్యే సినీ రూపకర్తలు, సినీ ప్రియులు, ప్రతినిధులు, అతిథులకు ఎటువంటి ఇబ్బంది కలగకుండా అత్యుత్తమ, నాణ్యమైన అనుభూతిని అందించాల్సిన ప్రాముఖ్యతను ఆయన తెలియజేశారు.

57వ ఇఫి ఏర్పాట్లు, చేపడుతున్న వివిధ కార్యక్రమాలపై ఎన్‌ఎఫ్‌డీసీ ఎండీ శ్రీ ప్రకాశ్ మగ్దుమ్ ప్రజెంటేషన్ ఇచ్చారు. స్టీరింగ్ కమిటీ సిఫార్సులను ఇఫి ఫెస్టివల్ డైరెక్టర్ శ్రీ అశుతోష్ గోవారికర్ స్వాగతించారు. మాస్టర్ క్లాసులను బలోపేతం చేయటం, యువ సినీ రూపకర్తలకు అవకాశాలు కల్పించటం, భారత్, విదేశాల నుంచి అత్యుత్తమ చిత్రాలను ఎంపిక చేయటం, భారత్, ప్రపంచవ్యాప్తంగా ఉన్న ప్రముఖ సినీ రూపకర్తలు, సృజనాత్మక ప్రముఖుల భాగస్వామ్యాన్ని పెంపొందించాల్సిన ప్రాముఖ్యతను ఆయన స్పష్టం చేశారు.

గోవా ప్రభుత్వం చేస్తున్న ఏర్పాట్ల గురించి కమిటీకి ఆ రాష్ట్ర ప్రభుత్వ ఐపీఆర్ కార్యదర్శి వివరించారు. అవసరమైన అన్ని కార్యక్రమాలను నిర్ణీత సమయంలో పూర్తి చేసేందుకు, 57వ ఇఫి ఏర్పాట్లు సజావుగా సాగేలా అన్ని ప్రయత్నాలు చేస్తామని హామీ ఇచ్చారు.

ఇఫికి విస్తృతమైన అంతర్జాతీయ ప్రచారం కల్పించేందుకు, ప్రపంచవ్యాప్తంగా ఉన్న అత్యుత్తమ చిత్రాలను ఎంపిక చేసేందుకు, వివిధ దేశాల నుంచి ప్రముఖ సినీ రూపకర్తలు, కళాకారులు, సృజనాత్మక నిపుణులను ఆహ్వానించేందుకు స్టీరింగ్ కమిటీ సభ్యులు అత్యంత ప్రాధాన్యతనిచ్చారు. ఈ చిలన చిత్రోత్సవం కేవలం సినిమా వేడుకగా మాత్రమే కాకుండా సృజనాత్మక మార్పిడికి, సహకారానికి, అభివృద్ధి చెందుతున్న సృజనాత్మక భారత ఆర్థిక వ్యవస్థను ప్రోత్సహించేందుకు వేదికగా నిలుస్తుంది.

సమాచార, ప్రసార మంత్రిత్వ శాఖ, ఎన్‌ఎఫ్‌డీసీ, గోవా ప్రభుత్వం, సంబంధిత భాగస్వాములందరి మధ్య పటిష్ఠమైన సమన్వయం ఉండాలని స్టీరింగ్ కమిటీ స్పష్టం చేసింది. సినిమా, సృజనాత్మకత, సాంస్కృతిక మార్పిడి, ప్రపంచ సహకారానికి సంబంధించి ప్రముఖ అంతర్జాతీయ వేదిక స్థానాన్ని 57వ ఇఫి సుస్థిరం చేసుకుంటుందని కమిటీ విశ్వాసాన్ని వ్యక్తం చేసింది. భారత సినీ రూపకర్తలు, సృజనాత్మక నిపుణులు ప్రపంచంతో అర్థవంతంగా మమేకం అయ్యేందుకు ఇది మరింత మెరుగైన అవకాశాలను సృష్టిస్తుందని భావిస్తుంది.

ఈ సమావేశంలో సమాచార, ప్రసార మంత్రిత్వ శాఖ కార్యదర్శి శ్రీ చంచల్ కుమార్, ప్రఖ్యాత చలనచిత్ర దర్శకుడు, ఇఫి ఫెస్టివల్ డైరెక్టర్ శ్రీ అశుతోష్ గోవారికర్, నేషనల్ ఫిల్మ్ డెవలప్‌మెంట్ కార్పొరేషన్ (ఎన్ఎఫ్‌డీసీ) మేనేజింగ్ డైరెక్టర్ శ్రీ ప్రకాష్ మగ్దుమ్, గోవా ప్రభుత్వ ఐపీఆర్ కార్యదర్శి, ప్రముఖ స్టీరింగ్ కమిటీ సభ్యులు శ్రీమతి భావనా ఖేర్, రామ్ సంపత్, అపర్ణా పురోహిత్, ప్రేరణ సింగ్, నమిత, సుహాసిని మణిరత్నం, అభిషేక్ జైన్, సంతోష్ శివన్, గౌరవ్ బెనర్జీ, ఆదిత్య భట్, ప్రశాంత్ చోథాని, ధరం గులాటి పాల్గొన్నారు.

***