প্রধান্ মন্ত্রী শ্রী নরেন্দ্র মোদীগী লুচিং মখাদা সাইন্স, তেক্নোলোজি অমসুং ইনোবেসনগী লমদা ভারতকি মালেমগী ওইনা চাওখৎলক্লিবা অসিগী মতাংদা ৱা ঙাংখিবা সাইন্স, তেক্নোলোজি অমসুং আর্থ সাইন্সকী রাজ্য মন্ত্রী (ইন্দিপেন্দেন্ত চার্জ) অমসুং পি.এম.ও.গী রাজ্য মন্ত্রী, পর্সোনেল, পব্লিক গ্রীভান্সেস, পেন্সন, এতোমিক ইনর্জী অমসুং স্পেসকী এম.ও.এস.কী কেন্দ্র মন্ত্রী দা. জিতেন্দ্র সিংহনা হৌদোকপগী ৱারোল থম্লদুনা ১৪সুবা ব্রীক্স সাই্ন্স, তেক্নোলোজি অমসুং ইনোবেসন (এস.তি.আই.)গী মিনিস্ত্রীগী মীফম অসি মফম অসিদা হৌদোকখ্রে।

ব্রীক্স মেম্বর লৈবাকশিংগী মিহুৎ কাঙবুশিংবু তরাম্না ওক্লদুনা দা. জিতেন্দ্র সিংহনা হায়খি ভারতনা ২০২৬তা ব্রীক্সকী প্রসিদেন্ত ওইবগী থিম ওইনা “বিল্দিং ফোর রেজিলিয়েন্স, ইনোবেসন, কোওপরেসন অমসুং সস্তেনেবিলিতি” খনখ্রে। থিম অসিনা সাইন্স, তেক্নোলোজি অমসুং ইনোবেসন্না রেজিলিয়েন্স হেনগৎহন্দুনা, ইনক্লুসিব গ্রোথ থৌগত্তুনা, সস্তেনেবল দিবেলপমেন্ত প্রমোত তৌদুনা অমদি লৈবাকশিংগী মরক্তা মান্নবা পার্ত্নরশিপ য়োকখত্তুনা মীওইবগী সেবা তৌগদবনি হায়বগী সেয়র তৌরবা থাজবা অদু উৎলি।

আর্তিফিসিএল ইনতেলিজেন্স, ক্বান্তম তেক্নোলোজিশিং, অহোঙবা মচাকশিং, বাইওতেক্নোলোজি, ফোতোনিক্স, জিওস্পেসিএল তেক্নোলোজিশিং অমসুং হায়-পর্ফোরমেন্স কম্প্যুতিংগুম্বা অনৌবা তেক্নোলোজিশিংনা থৌগত্‍‌পা মালেম অসি য়াম্না থুনা ত্রান্সফোর্মেসন চত্থরি হায়না দা. জিতেন্দ্র সিংহনা হায়খি। তেক্নোলোজিশিং অসিনা খুমাং চাওশিনবগী মমাঙদা অমুক্তা ওইখিদ্রিবা মওংদা খুদোংচাবশিং শেমগৎ‌লিবা মতম অসিদা, অনৌবা পুথোকপা অসি য়ৌবা ঙম্বা, মমল হোঙবা, থাজবা য়াবা অমসুং তুং কোয়না চৎকদবা মওংদা লৈহন্নবা ইন্তর্নেস্নেল কোলাবোরেসন হেন্না কনখৎহন্নবসু হায়খি।

মহাক্না হায়খি মদুদি ব্রীক্স অসি মসিগী য়াম্লবা মীশিং, সাইন্তিফিক তেলেন্ত অমসুং হেনগৎলক্লিবা রিসর্চকি তৌবা ঙম্বশিং অসিগা লোয়ননা কোওপরেতিব, রেশ্পোনসিবল অমসুং তুংগী ওইবা ইনোবেসন ইকোসিস্তেম অমা য়োকখৎনবা য়াম্না ফৈ। দা. জিতেন্দ্র সিংহনা এস.তি.আই.গী স্তিয়রিং কম্মীতি, সেনিয়র ওফিসিএলশিং অমসুং তোঙান তোঙানবা এস.তি.আই.গী ৱার্কিং গ্রুপশিংনা ৱারি শানবা অসি লেংদনা থম্বদা অমসুং মশিবু প্রেক্তিকেল কোওপরেসন অমসুং তেঞ্জিএবল আওতকমশিংদা ওন্থোকপদা মতেং পাংবদসু থাগত্‍‌পা ফোঙদোকখি।

মন্ত্রীনা হায়খি ব্রীক্স এস.তি.আই.গী মতেং পিনবা অসি রিশর্চ কোলাবোরেসন, ইনোবেসন পার্ত্নরশিপ্, নহা ওইরিবা সাইন্তিস্ত একচেঞ্জশিং, রিশর্চ ইনফ্রাস্ত্রকচরশিং অমসুং থিমেতিক ৱার্কিং গ্রুপশিং য়াওবা অচেৎপা প্লেৎফোর্ম্ অমা ওইনা শেমগত্‍‌লে। ভারতকি রাস্ত্রপতি ওইরিঙৈ মতমদা ব্রীক্স এস.তি.আই.গী মরু ওইবশিং মপূঙ ফানা য়েংশিনবগী থবক পায়খত্তুনা থোরক্লিবা সাইন্তিফিক অমসুং তেক্নোলোজিগী ঙমখৈশিং অমসুং খুন্নাইশিংগী চাওখৎ-থৌরাংগী অপাম্বশিংগা লোয়ননা তেংবাং পিনবগী থবক পায়খৎলম্মী।

দা. জিতেন্দ্র সিংহনা হায়খি ভারতনা সাই্ন্স অমসুং ইনোবেসনগী মতাংদা অমুক্তং, ইনক্লুশিব অমসুং হ্যুমেন-সেন্ত্রিক এপ্রোচ অমা মাংলোমদা পুখৎনবা লেপ্লি । মহাক্না নেস্নেল ক্বান্তম মিসন, নেস্নেল সুপরকম্প্য়ুতিং মিসন, বাইওই৩ পোলিশি, নেস্নেল জিওশ্পেসিএল পোলিশি অমসুং চাওখৎলকলিবা দিজিতেল পব্লিক ইনফ্রাস্ত্রকচর ইকোসিস্তেম য়াওনা ভারতকি ইনিসিয়েতিবশিংগী মতাংদা পনখি, মখোয়শিং অসিনা ইনোবেসন্না অরোয়বদা মীয়ামগী পুন্সীদা অহোঙবা পুরকপা, খুন্নাইগী রেজিলিয়েন্স মপাঙ্গল কনখৎহনবা অমসুং সস্তেনেবল ইকোনোমিক ত্রান্সফোর্মেসন্দা মতেং পাংলিবা এপ্রোচ অমা উৎলি।

মন্ত্রীনা ব্রীক্স পার্ত্নরশিংদা ফ্রন্তিয়র রিশর্চ, ইনোবেসন ফাইনান্সিং, তেলেন্ত মোবিলিতি, রিশর্চ ইনফ্রাস্ত্রকচর সেয়র তৌবা, স্তার্তঅপ্ পার্ত্নরশিপ্ অমসুং কেপাসিতি বিল্দিংদা হেননা নিংথিনা পুন্না থবক তৌমিন্ননবা এম্বিসিয়স অদুম ওইনমক প্রেক্তিকেল ওইবা লম্বিশিং খঙদোক্নবা হায়খি। মহাক্না হায়খি অসিগুম্বা তেংবাং পিনবনা মালেমগী শিংনবশিংদা পাউখুম পিবা ঙম্বা অমসুং গ্লোবেল সাওথকি অপাম্বশিংদা মতেং পাংবা তুংদা শেম শাবা ব্রীক্স এস.তি.আই. আর্কিতেকচর অমা শেমগৎপদা মতেং পাংবা ঙমগনি হায়না ফোংদোকখি৷

দা. জিতেন্দ্র সিংহনা চেন্নাইদা খন্ন-নৈনবশিং অসিনা ব্রীক্স পার্ত্নরশিপকি ৱাখল্লোন অদু হেন্না মপাঙ্গল কনখৎহনগনি অমসুং হেন্না ইনোবেতিব, রেজিলিয়েন্ত অমসুং তুং কোয়না চৎকদবা মালেম অমা শেমগৎপদা অর্থ লৈনা মতেং পাংগনি হায়না থাজবা ফোঙদোকখি৷

***