প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত বিজ্ঞান, প্ৰযুক্তি আৰু উদ্ভাৱনৰ ক্ষেত্ৰত বিশ্বত ভাৰতৰ বৰ্ধিত প্ৰসাৰক সংজ্ঞায়িত কৰা কেন্দ্ৰীয় বিজ্ঞান আৰু প্ৰযুক্তি তথা ভূবিজ্ঞান বিভাগৰ ৰাজ্য মন্ত্ৰী (স্বতন্ত্ৰ দায়িত্ব) আৰু প্ৰধানমন্ত্ৰীৰ কাৰ্যালয়, কৰ্মচাৰী, ৰাজহুৱা ওজৰ-আপত্তি, পেন্সন, পাৰমাণৱিক শক্তি আৰু মহাকাশ বিভাগৰ ৰাজ্য মন্ত্ৰী ড^০ জিতেন্দ্ৰ সিঙৰ উদ্বোধনী ভাষণৰে চতুৰ্দশ ব্ৰিকছ বিজ্ঞান, প্ৰযুক্তি আৰু উদ্ভাৱন (এছ টি আই) মন্ত্ৰী পৰ্যায়ৰ বৈঠক আৰম্ভ হয়।

ব্ৰিকছ সদস্য ৰাষ্ট্ৰসমূহৰ প্ৰতিনিধিসকলক আদৰণি জনাই ড^০ জিতেন্দ্ৰ সিঙে কয় যে ভাৰতে ২০২৬ চনত ব্ৰিকছৰ অধ্যক্ষতাৰ বিষয়বস্তু হিচাপে ‘স্থিতিস্থাপকতা, উদ্ভাৱন, সহযোগিতা আৰু বহনক্ষমতাৰ বাবে নিৰ্মাণ’ক বাছনি কৰিছে। বিষয়বস্তুটোৱে এই অংশীদাৰী বিশ্বাসক প্ৰতিফলিত কৰে যে বিজ্ঞান, প্ৰযুক্তি আৰু উদ্ভাৱনে স্থিতিস্থাপকতা বৃদ্ধিৰ জৰিয়তে সামগ্ৰিক বিকাশ চালিত কৰি, বহনক্ষম উন্নয়নৰ প্ৰচাৰ কৰি আৰু ৰাষ্ট্ৰসমূহৰ মাজত ন্যায়সংগত অংশীদাৰিত্ব গঢ়ি তুলি মানৱতাৰ সেৱা কৰিব লাগিব।

ড^০ জিতেন্দ্ৰ সিঙে কয় যে কৃত্ৰিম বুদ্ধিমত্তা, কোৱাণ্টাম প্ৰযুক্তি, উন্নত সামগ্ৰী, জৈৱ প্ৰযুক্তি, ফটোনিক্স, ভূস্থানিক প্ৰযুক্তি আৰু উচ্চ-কাৰ্য্যকৰী কম্পিউটাৰৰ দৰে উদীয়মান প্ৰযুক্তিৰ দ্বাৰা চালিত বিশ্বই দ্ৰুত পৰিবৰ্তনৰ মাজেৰে পাৰ হৈছে। যদিও এই প্ৰযুক্তিসমূহে প্ৰগতিৰ বাবে অভূতপূৰ্ব সুযোগ সৃষ্টি কৰিছে, সেইসমূহে উদ্ভাৱন যাতে সুলভ, বহনসাধ্য, বিশ্বাসযোগ্য আৰু বহনক্ষম হৈ থাকে সেয়া নিশ্চিত কৰিবলৈ উন্নত আন্তঃৰাষ্ট্ৰীয় সহযোগিতাৰ বাবেও আহ্বান জনাইছে।

তেওঁ কয় যে বিশাল জনসংখ্যা, বৈজ্ঞানিক প্ৰতিভা আৰু বৰ্ধিত গৱেষণা ক্ষমতাৰ সৈতে, এক সহযোগিতামূলক, দায়িত্বশীল আৰু ভৱিষ্যতমুখী উদ্ভাৱন পৰিবেশতন্ত্ৰ গঢ়ি তোলাৰ বাবে ব্ৰিকছ সুন্দৰ স্থিতিত আছে। ড^০ জিতেন্দ্ৰ সিঙে এছ টি আই পৰিচালনা সমিতি, জ্যেষ্ঠ বিষয়াসকল আৰু বিভিন্ন এছ টি আই কাৰ্যকৰী গোটৰ আলোচনা অব্যাহত ৰখা তথা ইয়াক ব্যৱহাৰিক সহযোগিতা আৰু স্পষ্ট ফলাফললৈ ৰূপান্তৰিত কৰাৰ ক্ষেত্ৰত আগবঢ়োৱা অৱদানকো স্বীকাৰ কৰে।

মন্ত্ৰীগৰাকীয়ে কয় যে ব্ৰিকছ এছ টি আই সমন্বিত গৱেষণা সহযোগিতা, উদ্ভাৱন অংশীদাৰিত্ব, যুৱ বিজ্ঞানীৰ আদান-প্ৰদান, গৱেষণা আন্তঃগাঁথনি আৰু বিষয়ভিত্তিক কাৰ্যকৰী গোটসমূহক সামৰি লোৱা এখন শক্তিশালী মঞ্চলৈ বিকশিত হৈছে। ভাৰতৰ অধ্যক্ষতাৰ সময়ত উদীয়মান বৈজ্ঞানিক আৰু প্ৰযুক্তিগত সীমা আৰু সমাজৰ উন্নয়নমূলক আকাংক্ষাৰ সৈতে সহযোগিতা একত্ৰিত কৰিবলৈ ব্ৰিকছ এছ টি আইৰ অগ্ৰাধিকাৰৰ এক বিস্তৃত পৰ্যালোচনা কৰা হৈছিল।

ড^০ জিতেন্দ্ৰ সিঙে কয় যে বিজ্ঞান আৰু উদ্ভাৱনৰ ক্ষেত্ৰত এক মুক্ত, সামগ্ৰিক আৰু মানৱ-কেন্দ্ৰিক দৃষ্টিভংগীৰ অগ্ৰগতিৰ বাবে ভাৰত প্ৰতিশ্ৰুতিবদ্ধ। তেওঁ ৰাষ্ট্ৰীয় কোৱাণ্টাম মিছন, ৰাষ্ট্ৰীয় ছুপাৰকম্পিউটিং মিছন, বায়’ই৩ নীতি, ৰাষ্ট্ৰীয় ভূস্থানিক নীতি আৰু সম্প্ৰসাৰিত ডিজিটেল ৰাজহুৱা আন্তঃগাঁথনি পৰিবেশতন্ত্ৰকে ধৰি ভাৰতৰ পদক্ষেপসমূহৰ কথা উল্লেখ কৰে, যিয়ে এনে এক দৃষ্টিভংগী প্ৰতিফলিত কৰে, য’ত উদ্ভাৱনে মানুহৰ জীৱন উন্নত কৰি সামাজিক স্থিতিস্থাপকতা শক্তিশালী কৰাৰ লগতে বহনক্ষম অৰ্থনৈতিক সংস্কাৰক সমৰ্থন কৰে।

মন্ত্ৰীগৰাকীয়ে ব্ৰিকছ অংশীদাৰসকলক সীমান্ত গৱেষণা, উদ্ভাৱন বিত্তীয় যোগান, প্ৰতিভাৰ গতিশীলতা, গৱেষণা আন্তঃগাঁথনিৰ আদান-প্ৰদান, ষ্টাৰ্টআপ অংশীদাৰিত্ব আৰু সামৰ্থ্য নিৰ্মাণৰ ক্ষেত্ৰত ব্যাপক সহযোগিতাৰ বাবে উচ্চাভিলাষী তথা ব্যৱহাৰিক পথ চিনাক্ত কৰিবলৈ আমন্ত্ৰণ জনায়। তেওঁ কয় যে এনে সহযোগিতাই ভৱিষ্যতৰ বাবে সাজু ব্ৰিকছ এছ টি আই গাঁথনি গঢ়ি তোলাত সহায় কৰিব পাৰে, যি গোলকীয় প্ৰত্যাহ্বানৰ প্ৰতি সঁহাৰি আৰু গ্লোবেল ছাউথক সমৰ্থন কৰে।

ড^০ জিতেন্দ্ৰ সিঙে আস্থা প্ৰকাশ কৰে যে চেন্নাইত অনুষ্ঠিত আলোচনাসমূহে ব্ৰিকছ অংশীদাৰিত্বৰ মনোভাৱ অধিক শক্তিশালী কৰিব আৰু এখন অধিক উদ্ভাৱনীমূলক, স্থিতিস্থাপক আৰু বহনক্ষম বিশ্বৰ বাবে অৰ্থপূৰ্ণ অৱদান আগবঢ়াব।

*****

NKR/AK/NB