প্রধান মন্ত্রী শ্রী নরেন্দ্র মোদীনা লাল কিলাদগী মহাক্কী ৮০শুবা নিংতম্বা নুমিৎকী ৱারোলদা, ২০৪৭ দা বিকসিত ভারত অমা ওইনবা মাইকৈদা চঙশিল্লিবা খোঙচৎ য়াংখৎহন্নবা তকশিনখ্রে। লৈবাক অসিগী থবক শুবগী চৎনবী, ৱাখল্লোন অমসুং থাজবগী পাক-চাউবদা অহোংবা অমা পুরক্নবা তকশিল্লদুনা, প্রধান মন্ত্রীনা হায়খি মদুদি মীয়াম, সরকারশিং, উদ্যোগ, লৌমীশিং, নহারোল অমসুং খুন্নাইগী অতোপ্পা কাংলুপশিংগী অপুনবা থবক দরকার ওই।

প্রধান মন্ত্রীগী ৱারোলদা য়াওখিবা মরুওইবা ৱাফমশিংদি:

1. মথংগী অওনবশিং: অওনবশিং পুরকপগী খোঙজেল য়াংখৎহন্নবা প্রধান মন্ত্রীনা তকশিনখি, ভারতকী অওনবশিং অসি নমদুনা পাংথোকপা নত্ত্রগা মানহনবা ৱাহৈ অমা খক নত্তে, মসি থাজবগী মচাক অমনি। প্রধান মন্ত্রীনা হায়খি মদুদি সরকার, খুন্নাই, উদ্যোগ, পোৎথোক পুথোক্লিবশিং অমসুং লৌমীশিংনা মমাংঙৈগী থবকশিং, ৱাখল্লোন অমসুং পান্দমশিং অওনবা পুরক্কদবনি। কেন্দ্র, রাজ্যশিং অমসুং উদ্যোগ পুন্না চৎমিন্নগদবনি অমসুং ২০৪৭ গী পান্দমশিং ফংনবা থবকশিং, থৌশিলসিং অমসুং নিয়মশিং শেমদুনা লেপ্তনা অওনবশিং পুরক্কদবনি।

2. লাক্লিবা চহি ৭ দা ভারত অনৌবা থাকশিংদা পুখৎনবা অমসুং লৈবাক অসিদা অনৌবা খোঙজেল অমা লৈনবা “সাপ্ত ধারা”, পাঙ্গলগী ইচেল ৭গীমক লাল কিলাদাগী প্রধান মন্ত্রীনা তকশিনখ্রে। ইচেল ৭ অদুদি :

•        মেনুফেকচরিংগী শক্তি: কম্পোনেন্তশিং অমসুং দিজাইন্দগী হৌরগা পোৎথোকশিং শাবা ফাওবদা, ভারতনা মপুংফারবা ভেলু চেন শেমগৎকদবনি অমসুং মালেমগী সপ্লাই চেনগী থাজবা লৈরবা মফম অমা ওইহনগদবনি। শেন চঙবা, মগুন লৈহনবা অমসুং পাক-চাউবা, চাংদম্নবা ঙম্বা ফেক্তরিশিং, শীজিন্নবদা নুংঙাইবা পোৎথোকশিং, অফবা পেকেজিং অমসুং অশোই-অঙাম য়াওদবা মেনুফেকচরিংদা পুক্নিং চঙগদবনি। ভারতকী মেনুফেকচরিংদা “মগুন লৈহনবা, মগুন লৈহনবা, মগুন লৈহনবা” অসি লাইৱা ওইগদবনি।

•        লৌউ-শিংউ অমসুং চীঞ্জাক পুথোকপা: লৌবুক্তগী মপান্দা থাদোক্নবা কৈথেল ফাওবা য়ৌনবা অমসুং ভারতকী মমাংঙৈগী চীঞ্জাকশিং, মিল্লেতশিং, মচলশিং, উহৈশিং অমসুং লৈশিং মালেমগী ব্রান্দশিং ওইহন্নবা প্রধান মন্ত্রীনা ফোঙদোকখি। মালেমগী লৈবাকশিংনা পাম্লিবশিং ফংহন্নবা কেমিকেল য়াওদবা লৌউ-শিংউ অমসুং লৌউ-শিংউগী পোৎথোকশিং পুথোক্নবসু মহাক্না তকশিনখি।

•        তেক্নোলোজি অমসুং ইন্নোবেসন: নৌনা থোক্লকপা হিরমশিং হায়বদি এ.আই, ক্বান্তম, স্পেস, রোবোতিক্স অমসুং দেতা সেন্তরশিং পল্লদুনা, প্রধান মন্ত্রীনা হায়খি মদুদি ভারত মালেমগী কৈথেল অমা ওইরোইদবনি, ইন্নোবেসনগী মফম অমা ওইগদবনি। মেদ-ইন-ই্ন্দিয়া ৬জি মফম খুদিংদা য়ৌহনবা হায়বসি  লৈবাক অসিগী পান্দম ওইগদবনি।

•        গতি শক্তি: অয়াংবা রেলনা সহরশিং শম্নদুনা, অনৌবা হায়ৱেশিং, কংফালগী ঈশিং লম্বীশিং, এয়রপোর্তশিং অমসুং মল্তিমোদাল লোজিষ্টিক্সকী খুৎথাংদা অপনবা লৈতনা অমসুং য়াংনা চৎথোক-চৎশিন য়াহন্নবা প্রধান মন্ত্রীনা তকশিনখি। মহাক্না হায়খি মদুদি হিথাংফমসিং পোৎ-চৈশিং হাপকৎপা অমসুং লৌথবা খক ওইরোইদবনি অমসুং হিথাংফম্না লমজিংদুনা চাউখৎপা পুরক্কদবনি।

•        দিফেন্স শক্তি: ঙাক-শেন্দা অত্মনির্ভর ওইনবা তকশিল্লদুনা, প্রধান মন্ত্রীনা হায়খি অনৌবা দিফেন্স তেক্নোলোজিশিং শেমগৎতুনা মালেমগী সপ্লাইয়ার অমা ওইরক্নবা মাইকৈদা ভারত চঙশিনগদবনি। দ্রোনশিং অমসুং কাউন্তর-দ্রোন সিষ্টেমশিং শেমগৎকদবনি অমসুং হায়পরসোনিক দিফেন্স তেক্নোলোজিশিংদা মাংজিল থাগদবনি। ভারত অমসুং মালেমগীদমক সাইবর সেকুরিতিগুম্বা হিরমশিংদা ভারতকী নহারোলশিংগী তৌবা ঙম্বশিং শীজিন্নগদবনি।

•        গ্রিন ইকোনোমি অমসুং ব্লু ইকোনোমি: গ্রিন হায়দ্রোজেন, রিন্যুএবল ইনর্জি, ইনর্জি ষ্টোরেজ, গ্রিন মোবিলিতি অমসুং গ্রিন মেনুফেকচরিংদা মালেমগী থাক্ত মাইপাকপা পুরক্নবা প্রধান মন্ত্রীনা তকশিনখি। ঙা য়োকপা, কোষ্টেল তুরিজম, ওসিন তেক্নোলোজি অমসুং ব্লু ইকোনোমিগী অতোপ্পা হিরমশিংদা ভারতকী সমুদ্র মপানশিংনা খুদোংচাবা কয়া পীরি।

•        ভারতকী সোফ পৱার: য়োগ, অয়ুর্বেদ, অনা-লাইয়েং অমসুং ভারত্ত লাইয়েংবদা ভারতকী তৌবা ঙম্বশিং মালেমদা য়ৌহন্নবা প্রধান মন্ত্রীনা তকশিনখি। হেন্দিক্রাফশিং, নাৎ, ফিল্মশিং, ভি.এফ.এক্স, এনিমেসন, গেমিং অমসুং দিজিতেল কন্তেন্তগুম্বা হিরমশিংদা ভারতনা লৈবাক অসিগী তৌবা ঙম্বশিং মালেমদা উৎকদবনি হায়না মহাক্না ফোঙদোকখি। মহাক্না হায়খি মদুদি মপানগী লমকোয়বা মীওইশিং হেন্না লাক্নবা, মালেমগী শান্নবগী থৌরমশিং অমসুং কন্সর্তশিং ভারত্ত পাংথোক্নবা হেন্না কন্নবা হোৎনবা দরকার ওইরি।

3. ভারতকী পান্দমশিংগী পাক-চাউবা হেনগৎহনবা: হেন্না চাউনা ৱাখল খন্নবা লৈবাক অসিদা তকশিল্লদুনা, লাক্লিবা চহি ১০ দা ফোর্চুন ৫০০ গী মনুংদা করিগীদমক ভারতকী কম্পেনি ৫০ য়াওরোইদৌরিবনো হায়না প্রধান মন্ত্রীনা হংখি। মহাক্না হায়খি মদুদি মালেমগী অচৌবা বেঙ্ক ৫ গী মনুংদা ভারতকী বেঙ্কশিং য়াওগদবনি অমসুং মালেমগী খ্বাইদগী চাউবা ফার্মা কম্পেনি মঙাগী মনুংদা ভারতকী হিদাক-লাংথক শুংবা কম্পেনি অমা নত্ত্রগা অনি য়াওগদবনি। ভারতকী লো ফার্মশিং, রেতিং এজেন্সিশিং, কন্সলতিং ফার্মশিং অমসুং একাউন্তিং ফার্মশিং মালেমগী অচৌবা ফার্মশিংগী মনুংদা য়াওগদবনি অমসুং ভারতকী তেক্নোলোজি কম্পেনিশিং মালেমগী লুচিংবশিং ওইগদবনি অমসুং ভারতকী ব্রান্দশিং লৈবাক অসি মশক তাকপা ব্রান্দশিং ওইগদবনি।

4. ভারতকী মগুনশিং মালেমগী শক্তম অমা ওইহনবা: মালেমগী কৈথেলশিংদা ভারতকী পোৎথোকশিং অফবা অমসুং মগুন লৈবদা মশক তাক্নবা মেনুফেকচররশিং, ওন্ত্রেপ্রেন্যুরশিং অমসুং এম.এস.এম.ইশিংদা প্রধান মন্ত্রীনা তকশিনখ্রে। মহাক্না হায়খি মদুদি কোষ্ট, মগুন অমসুং পাক-চাউবদা ভারতনা মালেমগী থাক য়ৌগদবনি অমসুং মালেমগী কৈথেলশিংদা মাইপাক্না চাংদম্নবা ঙম্নবা পোৎথোকশিং পুথোক্কদবনি। ভারতকী ত্রেদ এগ্রিমেন্তশিংনা পীরিবা খুদোংচাবশিং এম.এস.এম.ইশিংনা লৌগদবনি অমসুং মগুন অমসুং চাংদম্নবদা মালেমগী থাকশিং য়ৌবগা লোয়ননা ভারতকী পোৎথোকশিং মালেমগী কৈথেলশিংদা য়ৌহনগদবনি।

5. থবক শুবগী চৎনবী হোংদোকপা অমসুং ভারতকী পান্দমশিংগা চুনহনবা: প্রধান মন্ত্রীনা হায়খি মদুদি চহিচা অসিগী মথংগী ক্বাতর অসি ভারতকী ওইনা য়াম্না মরুওই অমসুং লৈবাক অসিনা মসিগী খোঙজেল তপথহল্লোইদবনি। লৈবাক অসিগী থবক শুবগী চৎনবী,ৱাখল খনবা অমসুং থবক শুবগী খোঙজেল অহোংবা পুরক্কদবনি অমসুং হৌখিবা চহি ৭০ দা লোইশিনবা ঙমখিদবা থবকশিং লাক্লিবা চহি ৫-৭ দা লোইশিনগদবনি।

6. নশা মুক্ত ভারত- ইমুং খুদিংমক শরুক য়াগদবনি: প্রধান মন্ত্রীনা হায়খি মদুদি দ্রগ লান্না শীজিন্নবা অসি ভারতকী নহারোলশিংগী অচৌবা অৱাবা অমনি। দ্রগ শীজিন্নদবা ভারত অমা ওইহনবা হায়বসি খুদিংমক্কী থৌদাংনি। মাই  ভারত ভোলুন্তিয়ারশিং, এন.জি.ওশিং, মীয়ামগী লুপশিং অমসুং অধ্যাতিক্কী লুচিংবশিং য়াওনা চয়োল ১০০ গী নশা মুক্ত ভারত অভিয়ান পাংথোক্লে অমসুং ইমুং খুদিংমক অভিয়ান অসিদা শরুক য়াগদবনি অমসুং নশা মুক্ত ভারত অমগী মঙলান মঙফাওনবা ঙম্নবা মতেং পাংগদবনি।

7. নুপীশিংগী সিত খাকপা: প্রধান মন্ত্রীনা হায়খি মদুদি নুপীশিং সিত খাকপা ঙম্নবা রাজনিতি দল খুদিংমক পুন্না চৎমিন্নগদদবনি। লোক সভা অমসুং ষ্টেৎ এশেমব্লিশিংদা নুপীশিংগী সিত চাদা ৩৩ খাক্নবা রাজনিতি দল খুদিংমক্না থৌদাং লৌগদবনি অমসুং মসিনা ভারতকী থৌশিলশিং শেম্বদা মতেং পাংবা ঙমগনি।

8. মীকোক থিবদা নহারোলশিংনা লমজিংদুনা শরুক য়াবা: থৌশিলশিং, স্কিমশিং অমসুং লৈবাক্কী তুংগী শেম-শাবদা চপ চাবা ই-পাউ দরকার ওই হায়না পল্লদুনা, প্রধান মন্ত্রীনা হায়খি মদুদি হৌজিক পাংথোক্লিবা মীকোক থিবদা মখোয়গী ইমুংশিং নহারোলশিংনা মতেং পাংগদবনি। নহারোলশিংনা মখোয়গী ইমুংশিংগা ফম্মিন্নগদবনি, ফোর্ম মশক খঙদবনি অমসুং অচুম্বা পাউ পীগদবনি অমসুং মীকোক থিবগী থবক থৱায় য়াওনা শরুক য়াগদবনি।

9. লনাইদগী লৈবাক্না হেন্না লুম্মী; থৌদাংনা মশক তাক্কদবনি: পঞ্চ প্রান নিংশিংলদুনা, প্রধান মন্ত্রীনা হায়খি মদুদি মীয়াম্না মীনাই ওইবগী ৱাখল্লোন থাদোক্কদবনি অমসুং লনাই থবক্তগী লৈবাক্কী থবক্না হেন্না মরুওইনা লৌনবা অমসুং থৌদাং পাংথোকপনা ঐখোয়গী শক্তম ওইনবা অমুক হন্না ৱারেপ লৌগদবনি।

10. মঙলানশিং ৱাশক ওন্থোকপা অমসুং ৱাশক ঙাকপা: বিকসিত ভারতকী মাইকৈদা লৈবাক অসি অপুনবা থবক পাংথোক্নবা তকশিল্লদুনা, প্রধান মন্ত্রীনা হায়খি মতম, খুদোংচাবা অমসুং ৱাশক অসি ভারতকীনি। মীয়াম্না মঙলানশিং ৱাশক ওন্থোক্কদবনি, ৱাশক্না মপাঙ্গল ওইহনগদবনি অমসুং মপাঙ্গল অসিনা মাইপাকপা ওইহনগদবনি, খোঙথাং খুদিংমক চাউখৎপগী মাইকৈদা থাংজিনগদবনি, বিকসিত ভারত অমা শেমগৎনবা পুন্না চঙশিনগদবনি।

***