ভাৰতৰ ৰাষ্ট্ৰপতিয়ে ২০২৪ আৰু ২০২৫ বৰ্ষৰ বাবে সংগীত নাটক অকাডেমিৰ ফেল'শ্বিপ আৰু সংগীত নাটক অকাডেমি বঁটা প্ৰদান কৰে
 

ভাৰতীয় পৰম্পৰাৰ বাহক হিচাপে শিল্পীসকল হৈছে আমাৰ সামূহিক স্মৃতিৰ ৰক্ষক আৰু ভৱিষ্যতৰ দৃষ্টিভংগীৰ স্ৰষ্টা: ৰাষ্ট্ৰপতি দ্ৰৌপদী মুৰ্মু

ভাৰতৰ ৰাষ্ট্ৰপতি শ্ৰীমতী দ্ৰৌপদী মুৰ্মুৱে আজি (১৩ আগষ্ট, ২০২৬) নতুন দিল্লীত বিশিষ্ট শিল্পীসকলক ২০২৪ আৰু ২০২৫ বৰ্ষৰ বাবে সংগীত নাটক অকাডেমিৰ ফেল'শ্বিপ আৰু সংগীত নাটক অকাডেমি বঁটা প্ৰদান কৰে।

এই উপলক্ষে ভাষণ প্ৰদান কৰি ৰাষ্ট্ৰপতিগৰাকীয়ে কয় যে আজি সন্মানিত হোৱা পৰিৱেশ্য কলাৰ শিল্পীসকলে সামূহিকভাৱে ভাৰতৰ এখন সাংস্কৃতিক মানচিত্ৰ উপস্থাপন কৰিছে— যিখন মানচিত্ৰ এই মাটিৰ সুবাসিত কাহিনী আৰু গীতৰ দ্বাৰা বৈ উলিওৱা হৈছে; যিখন মানচিত্ৰই এই বৈচিত্ৰ্যপূৰ্ণ ভূমিৰ নৃত্য আৰু উৎসৱসমূহক সামৰি লৈছে আৰু শতিকা শতিকা ধৰি গঢ় লৈ উঠা ইয়াৰ ভাষা আৰু উপভাষাসমূহৰ স্মৃতিক ধৰি ৰাখিছে।

ৰাষ্ট্ৰপতিগৰাকীয়ে কয় যে আমাৰ মাজত অলেখ সংগীতৰ পৰম্পৰা, নৃত্য শৈলী আৰু অসংখ্য লোক-নাট্যৰূপ আছে। ভাৰতীয় সংস্কৃতি এই ভূমিৰ সৈতে গভীৰভাৱে শিপাই আছে। ইয়াৰ বৈচিত্ৰ্যপূৰ্ণ ৰন্ধন পৰম্পৰা, সাজ-পাৰ, নৃত্যৰূপ আৰু সংগীত আদি সকলোবোৰ প্ৰকৃতিৰ দ্বাৰা অনুপ্ৰাণিত। শিল্পীসকলে তেওঁলোকৰ নৃত্য আৰু সংগীত প্ৰদৰ্শন কৰিবলৈ চৰাইৰ মাত, কুলু-কুলু সুৰত বৈ যোৱা জলপ্ৰপাত, গছ-লতিকা, ডাৱৰ আৰু নদীৰ পৰা অনুপ্ৰেৰণা লাভ কৰে। বৈচিত্ৰ্য আৰু একতাৰ মাজৰ এই বান্ধোনেই হৈছে আমাৰ কলাৰ অন্যতম বৃহৎ শক্তি।

ৰাষ্ট্ৰপতিগৰাকীয়ে কয় যে ভাৰতৰ বৈচিত্ৰ্যপূৰ্ণ কলাৰ ক্ষেত্ৰত গুৰু-শিষ্য পৰম্পৰাই এক গুৰুত্বপূৰ্ণ ভূমিকা পালন কৰি আহিছে। গুৰুৱে আমাৰ কলাসমূহৰ বাবে আটাইতকৈ গুৰুত্বপূৰ্ণ গ্ৰন্থ হিচাপে কাম কৰে। বৰ্তমানৰ দ্ৰুত পৰিৱৰ্তিত সময়ত, আমাৰ বহুতো লোক কলা বিলুপ্তিৰ ভাবুকিৰ সন্মুখীন হৈছে। এনে কলাসমূহ কেৱল লিপিবদ্ধ কৰাই নহয়, বৰঞ্চ সেইবোৰক জীয়াই ৰাখিবলৈ বিশেষ প্ৰচেষ্টা গ্ৰহণ কৰাটোও অতিকৈ প্ৰয়োজনীয়। তেওঁ এই কথা উল্লেখ কৰি আনন্দিত হয় যে সংগীত নাটক অকাডেমিয়ে ঠিক এই উদ্দেশ্যৰেই 'কলা-দীক্ষা' কাৰ্যসূচীৰ আয়োজন কৰিছে। তেওঁ জ্যেষ্ঠ শিল্পীসকলক পৰৱৰ্তী প্ৰজন্মক গঢ়ি তুলিবলৈ প্ৰণালীবদ্ধ প্ৰচেষ্টা হাতত ল'বলৈ আহ্বান জনায়।

ৰাষ্ট্ৰপতিগৰাকীয়ে কয় যে কলাৰ মূল্যবোধ আৰু সংবেদনশীলতাৰ জৰিয়তে জীৱনক সমৃদ্ধ কৰাৰ বাবে প্ৰকৃতিক আটাইতকৈ স্বাভাৱিক প্ৰশিক্ষণ ক্ষেত্ৰ বুলি গণ্য কৰা হয়। লোক আৰু জনজাতীয় কলাসমূহে জীৱনৰ প্ৰতি থকা এক স্বাভাৱিক উদ্যম আৰু প্ৰকৃতিৰ সৈতে এক গভীৰ সংযোগক প্ৰতিফলিত কৰে। এই কলাসমূহৰ মাজত সমাজৰ স্মৃতি আৰু সামূহিক চেতনাই স্বতঃস্ফূৰ্ত প্ৰকাশ লাভ কৰে। ঠিক সেইবাবেই লোককলাসমূহে ভাৰতৰ সাংস্কৃতিক পৰিচয়ৰ এক গুৰুত্বপূৰ্ণ ভেটি গঠন কৰে।

ৰাষ্ট্ৰপতিগৰাকীয়ে সংগীত নাটক অকাডেমি ফেল'শ্বিপ আৰু সংগীত নাটক অকাডেমি বঁটা প্ৰাপকসকলক অভিনন্দন জ্ঞাপন কৰে আৰু কয় যে ভাৰতীয় পৰম্পৰাৰ বাহক হিচাপে, তেওঁলোক হৈছে আমাৰ সামূহিক স্মৃতিৰ ৰক্ষক আৰু ভৱিষ্যতৰ দৃষ্টিভংগীৰ স্ৰষ্টা।

ৰাষ্ট্ৰপতিগৰাকীয়ে লগতে কয় যে সংগীত নাটক অকাডেমিক ভাৰতৰ 'চফ্ট পাৱাৰ' (soft power) ৰ এক গুৰুত্বপূৰ্ণ কেন্দ্ৰ হিচাপে গণ্য কৰা হয়। তেওঁ বিশ্বাস ব্যক্ত কৰে যে আগন্তুক দিনবোৰত ই ভাৰতৰ সাংস্কৃতিক শক্তিৰে সমগ্ৰ বিশ্বকে নিৰন্তৰভাৱে সমৃদ্ধ কৰি যাব।

ৰাষ্ট্ৰপতিৰ ভাষণটো চাবলৈ ইয়াত ক্লিক কৰক

***

MJPS/SS/PRK/RD