صدرجمہوریہ ہند محترمہ دروپدی مرمو نے آج (13 اگست 2026) نئی دہلی میں منعقدہ تقریب میں سال 2024 اور 2025 کے لیے ممتاز فن کاروں کو سنگیت ناٹک اکادمی فیلوشپس اور سنگیت ناٹک اکادمی ایوارڈز پیش کیے۔

اس موقع پر خطاب کرتے ہوئے صدرجمہوریہ  ہندنے کہا کہ آج اعزاز سے نوازے جانے والے فنکار اجتماعی طور پر ہندوستان کا ایک ایسا ثقافتی نقشہ پیش کرتے ہیں جو اس سرزمین کی مقامی کہانیوں اور گیتوں سے بُنا ہوا ہے؛ ایک ایسا نقشہ جس میں اس متنوع ملک کے رقص اور تہوار سمائے ہوئے ہیں اور جس میں صدیوں کے دوران پروان چڑھنے والی اس کی زبانوں اور بولیوں کی یادیں محفوظ ہیں۔

صدرجمہوریہ نے کہا کہ ہمارے پاس موسیقی کی بے شمار روایات، رقص کے متنوع انداز اور لوک تھیٹر کی لاتعداد اصناف موجود ہیں۔ ہندوستانی ثقافت اپنی سرزمین سے گہری جڑیں رکھتی ہے۔ یہاں کے متنوع کھانوں، ملبوسات، رقص کی مختلف اصناف اور موسیقی سبھی فطرت سے متاثر ہیں۔ فنکار چہچہاتے ہوئے پرندوں، بل کھاتے اور شور مچاتے آبشاروں، درختوں اور ہری بھری نباتات، بادلوں اور دریاؤں سے تحریک حاصل کرکے اپنے رقص اور موسیقی کے ذریعے فن کا اظہار کرتے ہیں۔ تنوع اور اتحاد کا یہ رشتہ ہمارے فنون کی سب سے بڑی طاقتوں میں سے ایک ہے۔

صدر جمہوریہ نے کہا کہ ہندوستان کے متنوع فنون کی روایت کو آگے بڑھانے میں گرو-ششیہ روایت نے اہم کردار ادا کیا ہے۔ ہمارے فنون کے لیے گرو سب سے اہم کتاب کی حیثیت رکھتے ہیں۔ آج کے تیزی سے بدلتے دور میں ہمارے بہت سے لوک فنون کے معدوم ہونے کا خطرہ لاحق ہے۔ یہ نہایت ضروری ہے کہ ایسے فنون کو صرف دستاویزی شکل دینے تک محدود نہ رکھا جائے بلکہ انہیں زندہ اور برقرار رکھنے کے لیے بھی خصوصی کوششیں کی جائیں۔ انہوں نے اس بات پر خوشی کا اظہار کیا کہ سنگیت ناٹک اکادمی اسی مقصد کے تحت ‘کلا دکشا’ پروگرام کا انعقاد کر رہی ہے۔ انہوں نے سینئر فنکاروں پر زور دیا کہ وہ نئی نسل کی تربیت اور رہنمائی کے لیے منظم اور باقاعدہ کوششیں کریں۔

صدرِ جمہوریہ نے کہا کہ فن کی اقدار اور حساسیت کے ذریعے زندگی کو مالا مال کرنے کے لیے فطرت کو سب سے فطری تربیت گاہ سمجھا جاتا ہے۔ لوک اور قبائلی فنون زندگی کے لیے فطری جوش و جذبے اور فطرت کے ساتھ گہرے رشتے کی عکاسی کرتے ہیں۔ ان فنون میں برادری کی یادداشت اور اجتماعی شعور کا بے ساختہ اظہار ہوتا ہے۔ یہی وجہ ہے کہ لوک فنون ہندوستان کی ثقافتی شناخت کی ایک اہم بنیاد ہیں۔

صدرِ جمہوریہ نے سنگیت ناٹک اکادمی فیلوشپس اور سنگیت ناٹک اکادمی ایوارڈز حاصل کرنے والے تمام فنکاروں کو مبارک باد پیش کرتے ہوئے کہا کہ ہندوستانی روایت کے علم بردار کی حیثیت سے وہ ہماری اجتماعی یادداشت کے محافظ اور مستقبل کے وژن کے تخلیق کار ہیں۔

صدرجمہوریہ نے کہا کہ سنگیت ناٹک اکادمی کو ہندوستان کی سافٹ پاور کا ایک اہم مرکز سمجھا جاتا ہے۔ انہوں نے اعتماد کا اظہار کیا کہ آنے والے وقتوں میں بھی یہ ادارہ ہندوستان کی ثقافتی توانائی سے پوری دنیا کو مالا مال کرتا رہے گا۔

صدر جمہوریہ کی تقریر دیکھنے کے لیے براہ کرم یہاں کلک کریں

***

ش ح۔ ش آ۔ت ع

U-2025