ਕੇਂਦਰੀ ਯੁਵਾ ਮਾਮਲੇ ਅਤੇ ਖੇਡ ਮੰਤਰੀ ਡਾ. ਮਨਸੁਖ ਮਾਂਡਵੀਆ ਨੇ ਅੱਜ ਭਾਰਤ ਦੇ ਰਾਸ਼ਟਰਮੰਡਲ ਖੇਡਾਂ 2026 ਦੇ ਵੇਟਲਿਫਟਿੰਗ ਮੁਕਾਬਲੇ ਦੇ ਮੈਡਲ ਜੇਤੂਆਂ ਨੂੰ ਸਨਮਾਨਿਤ ਕੀਤਾ ਅਤੇ ਗਲਾਸਗੋ ਵਿੱਚ ਉਨ੍ਹਾਂ ਦੇ ਇਤਿਹਾਸਕ ਪ੍ਰਦਰਸ਼ਨ ਦੀ  ਸ਼ਲਾਘਾ ਕੀਤੀ। ਭਾਰਤੀ ਵੇਟਲਿਫਟਰਸ ਨੇ 11 ਭਾਰ ਵਰਗਾਂ ਵਿੱਚ ਹਿੱਸਾ ਲਿਆ ਅਤੇ ਇੱਕ ਸੋਨ, ਛੇ ਚਾਂਦੀ ਅਤੇ ਇੱਕ ਕਾਂਸੀ ਤਗਮੇ ਸਮੇਤ ਅੱਠ ਮੈਡਲ ਜਿੱਤੇ। ਭਾਰਤੀ ਟੀਮ ਨੇ ਕਈ ਰਾਸ਼ਟਰਮੰਡਲ ਖੇਡਾਂ ਅਤੇ ਰਾਸ਼ਟਰਮੰਡਲ ਦੇ ਰਿਕਾਰਡ ਬਣਾਏ, ਜਦਕਿ ਕਈ ਐਥਲੀਟਾਂ ਨੇ ਆਪਣਾ ਸਰਵੋਤਮ ਨਿੱਜੀ ਪ੍ਰਦਰਸ਼ਨ ਵੀ ਹਾਸਲ ਕੀਤਾ।

ਡਾ. ਮਨਸੁਖ ਮਾਂਡਵੀਆ ਨੇ ਰਾਸ਼ਟਰਮੰਡਲ ਖੇਡਾਂ ਵਿੱਚ ਸ਼ਾਨਦਾਰ ਸਫਲਤਾ ਲਈ ਸੋਨ ਤਗਮਾ ਜੇਤੂ ਨੂੰ 30 ਲੱਖ ਰੁਪਏ, ਚਾਂਦੀ ਤਗਮਾ ਜੇਤੂ ਨੂੰ 20 ਲੱਖ ਰੁਪਏ ਅਤੇ ਕਾਂਸੀ ਤਗਮਾ ਜੇਤੂ ਨੂੰ 10 ਲੱਖ ਰੁਪਏ ਦਾ ਨਕਦ ਇਨਾਮ ਦਿੱਤਾ, ਜਿੱਥੇ ਭਾਰਤੀ ਵੇਟਲਿਫਟਰਸ ਨੇ ਦੇਸ਼ ਦਾ ਸਭ ਤੋਂ ਉੱਤਮ ਪ੍ਰਦਰਸ਼ਨ ਕੀਤਾ।

ਵੇਟਲਿਫਟਰਸ ਨੂੰ ਵਧਾਈ ਦਿੰਦੇ ਹੋਏ ਡਾ. ਮਾਂਡਵੀਆ ਨੇ ਕਿਹਾ ਕਿ ਪੂਰੇ ਦੇਸ਼ ਨੇ ਉਨ੍ਹਾਂ ਦੀ ਕਾਮਯਾਬੀ ਦਾ ਜਸ਼ਨ ਮਨਾਇਆ। ਉਨ੍ਹਾਂ ਕਿਹਾ, "ਸੰਸਦ ਵਿੱਚ ਵੀ ਹਰ ਵਾਰ ਜਦੋਂ ਤੁਸੀਂ ਤਗਮੇ ਜਿੱਤੇ ਤਾਂ ਐਲਾਨ ਕੀਤਾ ਗਿਆ। ਉਨ੍ਹਾਂ ਪਲਾਂ ਨੇ ਹਰ ਭਾਰਤੀ ਨੂੰ ਮਾਣ ਮਹਿਸੂਸ ਕਰਵਾਇਆ।"

ਡਾ. ਮਾਂਡਵੀਆ ਨੇ ਕੋਚਾਂ ਦੀ ਸ਼ਲਾਘਾ ਕੀਤੀ, ਜਿਨ੍ਹਾਂ ਵਿੱਚ ਦ੍ਰੋਣਾਚਾਰਿਆ ਪੁਰਸਕਾਰ ਨਾਲ ਸਨਮਾਨਿਤ ਵਿਜੇ ਸ਼ਰਮਾ ਵੀ ਸ਼ਾਮਲ ਸਨ, ਜੋ ਸੋਮਵਾਰ ਨੂੰ ਸਨਮਾਨ ਸਮਾਗਮ ਵਿੱਚ ਮੌਜੂਦ ਸਨ। ਉਨ੍ਹਾਂ ਨੇ ਚੈਂਪੀਅਨ ਬਣਾਉਣ ਵਿੱਚ ਉਨ੍ਹਾਂ ਦੀ ਜ਼ਰੂਰੀ ਭੂਮਿਕਾ ਤੋਂ ਜਾਣੂ ਕਰਵਾਇਆ। ਉਨ੍ਹਾਂ ਕਿਹਾ, "ਇੱਕ ਐਥਲੀਟ ਦੇ ਸਫ਼ਰ ਵਿੱਚ ਗੁਰੂ ਦੀ ਸਭ ਤੋਂ ਵੱਡੀ ਭੂਮਿਕਾ ਹੁੰਦੀ ਹੈ। ਚੈਂਪੀਅਨ ਬਣਾਉਣ ਵਿੱਚ ਕੋਚ ਦੇ ਯੋਗਦਾਨ ਤੋਂ ਵੱਡਾ ਕੁੱਝ ਨਹੀਂ ਹੈ।"

ਓਲੰਪਿਕ ਚਾਂਦੀ ਤਗਮਾ ਜੇਤੂ ਮੀਰਾਬਾਈ ਚਾਨੂ ਨੇ ਲਗਾਤਾਰ ਤਿੰਨ ਰਾਸ਼ਟਰਮੰਡਲ ਖੇਡਾਂ ਵਿੱਚ ਸੋਨ ਤਗਮਾ ਜਿੱਤਣ ਵਾਲੀ ਪਹਿਲੀ ਭਾਰਤੀ ਵੇਟਲਿਫਟਰ ਬਣ ਕੇ ਇਤਿਹਾਸ ਰਚ ਦਿੱਤਾ, ਜਦੋਂ ਕਿ ਰਿਸ਼ੀਕਾਂਤ ਸਿੰਘ ਅਤੇ ਵੱਲੂਰੀ ਅਜੇ ਬਾਬੂ ਨੇ ਸਨੈਚ ਵਿੱਚ ਨਵੇਂ ਰਾਸ਼ਟਰਮੰਡਲ ਖੇਡਾਂ ਦੇ ਰਿਕਾਰਡ ਬਣਾਏ। ਗਿਆਨੇਸ਼ਵਰੀ ਯਾਦਵ ਅਤੇ ਹਰਜਿੰਦਰ ਕੌਰ ਸਮੇਤ ਕਈ ਵੇਟਲਿਫਟਰਸ ਨੇ ਨਿੱਜੀ ਸਰਵੋਤਮ ਪ੍ਰਦਰਸ਼ਨ ਦਿੱਤੇ।

ਜਿਨ੍ਹਾਂ 11 ਵੇਟਲਿਫਟਰਸ ਨੇ ਹਿੱਸਾ ਲਿਆ, ਉਨ੍ਹਾਂ ਵਿੱਚੋਂ ਛੇ ਖੇਲੋ ਇੰਡੀਆ ਐਥਲੀਟ (ਕੇਆਈਏ) ਹਨ। ਤਗਮਾ ਜਿੱਤਣ ਵਾਲਿਆਂ ਵਿੱਚ ਗਿਆਨੇਸ਼ਵਰੀ ਖੇਲੋ ਇੰਡੀਆ ਐਥਲੀਟ ਹੈ, ਜਦੋਂ ਕਿ ਬਿੰਦਿਆਰਾਣੀ ਦੇਵੀ, ਹਰਜਿੰਦਰ ਅਤੇ ਹੋਰ ਲੋਕ ਪਟਿਆਲਾ ਵਿੱਚ ਭਾਰਤੀ ਖੇਡ ਅਥਾਰਟੀ ਦੇ ਰਾਸ਼ਟਰੀ ਉੱਤਮਤਾ ਕੇਂਦਰ (ਐੱਨਸੀਓਈ) ਵਿੱਚ ਸਿਖਲਾਈ ਲੈਂਦੇ ਹਨ, ਜੋ ਭਾਰਤ ਦੇ ਜ਼ਮੀਨੀ ਅਤੇ ਸ਼ਾਨਦਾਰ ਐਥਲੀਟ ਵਿਕਾਸ ਈਕੋਸਿਸਟਮ ਦੀ ਸਫਲਤਾ ਵਿੱਚ ਅਹਿਮ ਭੂਮਿਕਾ ਨਿਭਾਉਂਦਾ ਹੈ।

ਐਥਲੀਟਾਂ ਨੂੰ ਖੇਡਾਂ ਦੇ ਅੰਬੈਸਡਰ ਬਣਨ ਦੀ ਅਪੀਲ ਕਰਦੇ ਹੋਏ, ਡਾ. ਮਾਂਡਵੀਆ ਨੇ ਵੇਟਲਿਫਟਰਸ ਨੂੰ ਵੀ ਸਕੂਲਾਂ ਅਤੇ ਕਾਲਜਾਂ ਵਿੱਚ ਜਾ ਕੇ ਨੌਜਵਾਨਾਂ ਨੂੰ ਖੇਡਾਂ ਨੂੰ ਅਪਣਾਉਣ ਲਈ ਪ੍ਰੇਰਿਤ ਕਰਨ ਦੀ ਅਪੀਲ ਕੀਤੀ। ਉਨ੍ਹਾਂ ਕਿਹਾ, "ਤੁਹਾਡੀਆਂ ਕਹਾਣੀਆਂ ਹਜ਼ਾਰਾਂ ਬੱਚਿਆਂ ਨੂੰ ਵੱਡੇ ਸੁਪਨੇ ਦੇਖਣ ਲਈ ਪ੍ਰੇਰਿਤ ਕਰ ਸਕਦੀਆਂ ਹਨ। ਅਸੀਂ ਸਾਰੇ ਮਿਲ ਕੇ ਇੱਕ ਸੱਚਾ ਖੇਡ ਪ੍ਰੇਮੀ ਦੇਸ਼ ਬਣਾਉਣ ਦੀ ਦਿਸ਼ਾ ਵਿੱਚ ਅਹਿਮ ਕਦਮ ਚੁੱਕ ਰਹੇ ਹਾਂ।"

ਡਾ. ਮਾਂਡਵੀਆ ਨੇ ਵੇਟਲਿਫਟਰਸ ਨਾਲ ਉਨ੍ਹਾਂ ਦੇ ਸੰਘਰਸ਼ਾਂ, ਪੋਡੀਅਮ ਤੱਕ ਦੇ ਸਫ਼ਰ ਅਤੇ ਭਵਿੱਖ ਦੇ ਮੁਕਾਬਲਿਆਂ, ਖਾਸ ਕਰਕੇ ਏਸ਼ੀਆਈ ਖੇਡਾਂ 2026 ਲਈ ਉਨ੍ਹਾਂ ਦੀਆਂ ਉਮੀਦਾਂ ਬਾਰੇ ਗੱਲਬਾਤ ਕੀਤੀ। ਐਥਲੀਟਾਂ ਨੇ ਮੁਸ਼ਕਲਾਂ ਤੋਂ ਉੱਭਰਨ, ਰਾਸ਼ਟਰੀ ਸਿਖਲਾਈ ਕੈਂਪ ਤੋਂ ਮਿਲੇ ਸਮਰਥਨ, ਅੰਤਰਰਾਸ਼ਟਰੀ ਤਜਰਬੇ ਅਤੇ ਵਿਗਿਆਨਕ ਸਿਖਲਾਈ ਦੇ ਨਾਲ-ਨਾਲ ਦੇਸ਼ ਲਈ ਲਗਾਤਾਰ ਜਿੱਤ ਹਾਸਲ ਕਰਨ ਦੇ ਆਪਣੇ ਪੱਕੇ ਇਰਾਦੇ ਦੀਆਂ ਕਹਾਣੀਆਂ ਸਾਂਝੀਆਂ ਕੀਤੀਆਂ।

ਜੋ ਲੋਕ ਪੋਡੀਅਮ 'ਤੇ ਪਹੁੰਚਣ ਤੋਂ ਵਾਲ-ਵਾਲ ਖੁੰਝ ਗਏ, ਉਨ੍ਹਾਂ ਨੂੰ ਸੰਬੋਧਨ ਕਰਦੇ ਹੋਏ ਡਾ. ਮਾਂਡਵੀਆ ਨੇ ਹਿੰਮਤ ਨਾ ਹਾਰਨ ਦਾ ਹੌਸਲਾ ਦਿੱਤਾ। "ਇੱਕ ਖਿਡਾਰੀ ਕਦੇ ਸੱਚਮੁੱਚ ਹਾਰਦਾ ਨਹੀਂ ਹੈ। ਜੋ ਮਾਇਨੇ ਰੱਖਦਾ ਹੈ, ਉਹ ਹੈ ਲਗਾਤਾਰ ਬਿਹਤਰ ਕਰਨ ਦਾ ਜਨੂਨ। ਮੇਰਾ ਮੰਨਣਾ ਹੈ ਕਿ ਮਾਨਯੋਗ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਦਾ ਅਸ਼ੀਰਵਾਦ ਅਤੇ 140 ਕਰੋੜ ਭਾਰਤੀਆਂ ਦਾ ਸਮਰਥਨ ਹਮੇਸ਼ਾ ਤੁਹਾਡੇ ਨਾਲ ਹੈ।"

ਭਾਰਤੀ ਖੇਡਾਂ ਲਈ ਸਰਕਾਰ ਦੇ ਲੰਬੇ ਸਮੇਂ ਦੇ ਵਿਜ਼ਨ ਬਾਰੇ ਦੱਸਦੇ ਹੋਏ ਡਾ. ਮਾਂਡਵੀਆ ਨੇ ਕਿਹਾ ਕਿ ਕਈ ਮੈਡਲ ਜੇਤੂ ਖੇਲੋ ਇੰਡੀਆ ਵਰਗੀਆਂ ਪਹਿਲਕਦਮੀਆਂ ਤੋਂ ਉੱਭਰੇ ਹਨ, ਜੋ ਨੌਜਵਾਨ ਐਥਲੀਟਾਂ ਨੂੰ ਵਿਸ਼ਵ ਪੱਧਰੀ ਸਿਖਲਾਈ, ਵਿਗਿਆਨਕ ਸਮਰਥਨ ਅਤੇ ਪ੍ਰਤੀਯੋਗੀ ਤਜਰਬਾ ਦਿੰਦਾ ਹੈ। ਉਨ੍ਹਾਂ ਕਿਹਾ, "ਦੇਸ਼ ਨੇ ਤੁਹਾਡੇ 'ਤੇ ਨਿਵੇਸ਼ ਕੀਤਾ ਹੈ ਕਿਉਂਕਿ ਉਸ ਨੂੰ ਤੁਹਾਡੀ ਸਮਰੱਥਾ 'ਤੇ ਭਰੋਸਾ ਹੈ। ਹਰ ਸੰਭਵ ਸਹੂਲਤ ਤਿਆਰ ਕੀਤੀ ਜਾ ਰਹੀ ਹੈ ਤਾਂ ਜੋ ਭਾਰਤੀ ਐਥਲੀਟ ਦੁਨੀਆ ਦੇ ਸਰਵੋਤਮ ਐਥਲੀਟਾਂ ਨਾਲ ਮੁਕਾਬਲਾ ਕਰ ਸਕਣ।"

****

ਆਯੁਸ਼ਮਾਨ ਕੁਮਾਰ