గ్రామీణ నైపుణ్యాభివృద్ధి తీసుకొస్తున్న పరివర్తనాత్మక ప్రభావాన్ని గుర్తిస్తూ దీన్ దయాళ్ ఉపాధ్యాయ గ్రామీణ కౌశల్య యోజన (డీడీయూ–జీకేవై) యువ లబ్ధిదారులు ఆరుగురుకి 2026 ఆగస్టు 15న న్యూఢిల్లీలో జరిగే భారత దేశ 80వ స్వాతంత్ర్య దినోత్సవ వేడుకలకు ప్రత్యేక అతిథులుగా ఆహ్వానం లభించింది. వీరంతా పశ్చిమ బెంగాల్, చత్తీస్‌గఢ్, మధ్యప్రదేశ్, ఒడిశా, మిజోరాం, నాగాలాండ్‌కు ప్రాతినిధ్యం వహిస్తున్నారు.

ఎర్రకోటలో జరిగే స్వాతంత్ర్య వేడుకలకూ, రాష్ట్రపతి భవన్‌లో రాష్ట్రపతి ఆతిథ్యమిచ్చే ప్రతిష్ఠాత్మక ‘ఎట్ హోం’ విందుకూ హాజరయ్యేందుకు అధికారిక ఆహ్వాన పత్రాలను... ఎంపికయిన యువ లబ్ధిదారులు ఇండియా పోస్ట్ ద్వారా అందుకున్నారు. ఇది వ్యక్తిగత విజయాలకు లభించిన గుర్తింపు మాత్రమే కాదు. ఇది నైపుణ్యాలు, స్థిరమైన జీవనోపాధి, గౌరవప్రదమైన ఉపాధి ద్వారా డీడీయూ–జీకేవై సాధించిన పరివర్తనకు జాతీయ స్థాయిలో లభించిన గుర్తింపు కూడా.

ఎంపికయిన వారు ఎర్రకోటలో జరిగే జాతీయ వేడుకలను వీక్షిస్తారు. రాష్ట్రపతి భవన్‌లో జరిగే విందుకు హాజరవుతారు. ఇలాంటి ప్రతిష్ఠాత్మక జాతీయ కార్యక్రమాల్లో వారి భాగస్వామ్యం.. గ్రామీణ నైపుణ్య వ్యవస్థకూ, డీడీయూ–జీకేవై ద్వారా యువ విజేతలుగా నిలిచిన వారికి గర్వకారణంగా నిలుస్తుంది.

కేంద్ర గ్రామీణాభివృద్ధి మంత్రిత్వ శాఖ ఆధ్వర్యంలోని దీన్‌దయాళ్ అంత్యోదయ యోజన – జాతీయ గ్రామీణ జీవనోపాధి మిషన్ (డీఏవై–ఎన్ఆర్ఎల్ఎం) పరిధిలో ఉపాధి కల్పనతో అనుసంధానమై  ఉన్న కార్యక్రమమే డీడీయూ–జీకేవై. పరిశ్రమలకు తగిన నైపుణ్యాలను, దేశవ్యాప్తంగా గుర్తింపు పొందిన సర్టిఫికేషన్లను, సుస్థిరమైన, గౌరవప్రదమైన ఉపాధి అవకాశాలను ఈ కార్యక్రమం గ్రామీణ పేద యువతకు అందిస్తుంది.

డీడీయూ–జీకేవై ద్వారా దేశవ్యాప్తంగా లక్షలాది గ్రామీణ యువతకు దీర్ఘకాలిక జీవనోపాధి అవకాశాలు లభించాయి. ఈ కార్యక్రమం ఆర్థిక సాధికారతనూ, స్వావలంబననూ సాధించేలా చేసి, భారత దేశ వృద్ధి ప్రయాణంలో చురుకైన భాగస్వాములుగా వారిని మార్చింది.

నైపుణ్యంతో కూడిన శ్రామిక శక్తిని సృష్టించడంలో, స్థిరమైన జీవనోపాధిని ప్రోత్సహించడంలో ఈ పథకం సాధించిన విజయానికి ఈ ఆరుగురు లబ్ధిదారులకు అందిన ఆహ్వానం జాతీయ గుర్తింపుగా నిలుస్తోంది. ఉపాధి కల్పనకు మాత్రమే పరిమితం కాకుండా.. నైపుణ్యాభివృద్ధి ద్వారా గ్రామీణ యువతకు గౌరవప్రదమైన కెరీర్లు, ఆర్థిక స్వాతంత్ర్యం, మరింత సురక్షితమైన భవిష్యత్తు లభిస్తుందని ఈ విజయం తెలియజేస్తోంది.

ఎంపికయిన లబ్ధిదారుల పట్టుదల, కృషితో పాటు సంబంధిత రాష్ట్ర గ్రామీణ జీవనోపాధి మిషన్ (ఎస్ఆర్ఎల్ఎం)లు, ప్రాజెక్టు అమలు సంస్థ (పీఐఏ)లు, గ్రామీణాభివృద్ధి మంత్రిత్వ శాఖ చేపట్టిన సమష్టి ప్రయత్నాలను ఈ విజయం ప్రతిబింబిస్తుంది.

దేశవ్యాప్తంగా లక్షలాది మంది గ్రామీణ యువతకు ఈ గౌరవం స్ఫూర్తిదాయకంగా నిలుస్తుంది. అదేవిధంగా నైపుణ్యాలు అవకాశాలను సృష్టిసాయనీ, సుస్థిర జీవనోపాధి స్వావలంబనను అందిస్తుందనీ, సాధికారత సాధించిన యువత దేశ వికసిత్ భారత్ దిశగా దేశ ప్రయాణాన్ని వేగవంతం చేస్తుందనే దార్శనికతను ఈ గౌరవం మరింత బలోపేతం చేస్తుంది.

***