નશા મુક્ત ભારત અને વિકસિત ભારત 2047ના વિઝનને સાકાર કરવા તરફના એક મહત્વપૂર્ણ પગલા તરીકે પ્રધાનમંત્રી શ્રી નરેન્દ્ર મોદી 2 ઓગસ્ટ, 2026ના રોજ "નશા મુક્ત યુવા ફોર વિકસિત ભારત સંકલ્પ અભિયાન" નો પ્રારંભ કરશે. આ અભિયાન દ્વારા દેશના યુવાનોને જનભાગીદારીની ભાવના સાથે નશાખોરી સામે જનઆંદોલનનું નેતૃત્વ કરવા માટે આહ્વાન કરવામાં આવશે.

પ્રધાનમંત્રીના આહ્વાનને પ્રતિસાદ આપતાં, આ ઝુંબેશ દેશભરના યુવાનોની સક્રિય ભાગીદારી સાથે માય ભારતના નેતૃત્વ હેઠળ દેશવ્યાપી જન આંદોલન તરીકે શરૂ કરવામાં આવશે. આ પહેલનો ઉદ્દેશ્ય જાગરૂકતા, સમુદાય સહભાગિતા અને સતત જાહેર ભાગીદારીને પ્રોત્સાહન આપીને નશા મુક્ત ભારતનું નિર્માણ કરવાના સામૂહિક રાષ્ટ્રીય મિશનમાં યુવા નાગરિકોને એકજૂથ કરવાનો છે.

પ્રધાનમંત્રીના સંબોધનથી પ્રેરિત થઈને, દેશભરમાં લગભગ 10,000 સ્થળોએ એક સાથે શપથ ગ્રહણ સમારોહનું આયોજન કરવામાં આવશે, જેમાં એક કરોડથી વધુ યુવાનો નશા મુક્તિના શપથ લેશે, નશા મુક્ત સમાજ તરફ તેમની પ્રતિબદ્ધતા પુનઃવ્યક્ત કરશે અને નશા મુક્ત યુવા સ્વયંસેવકો તરીકે રાષ્ટ્ર નિર્માણ માટે પોતાને સમર્પિત કરશે.

આ અભિયાનમાં માય ભારત સ્વયંસેવકો, નેશનલ સર્વિસ સ્કીમ (NSS)ના સ્વયંસેવકો, યુથ ક્લબ, શાળાઓ, કોલેજો, યુનિવર્સિટીઓ, બિન-સરકારી સંસ્થાઓ, ઔદ્યોગિક એસોસિએશનો અને 125થી વધુ આધ્યાત્મિક સંસ્થાઓની અસાધારણ ભાગીદારી જોવા મળશે, જે તેને નશાખોરી સામે દેશના સૌથી મોટા યુવા-સંચાલિત જાહેર આંદોલનોમાંનું એક બનાવશે.

પરંપરાગત જાગૃતિ કાર્યક્રમથી અલગ, "નશા મુક્ત યુવા ફોર વિકસિત ભારત સંકલ્પ અભિયાન"ને 100 અઠવાડિયા સુધી ચાલનારા સતત જનભાગીદારી આંદોલન તરીકે તૈયાર કરવામાં આવ્યું છે. આગામી 100 અઠવાડિયા સુધી દર રવિવારે, સ્વસ્થ જીવનશૈલીને પ્રોત્સાહિત કરવા, સમુદાય ભાગીદારીને મજબૂત કરવા અને યુવાનોની ઊર્જાને રચનાત્મક રાષ્ટ્ર નિર્માણ તરફ વાળવા માટે દેશભરમાં યુવા-સંચાલિત પ્રવૃત્તિઓનું આયોજન કરવામાં આવશે.

સાપ્તાહિક પ્રવૃત્તિઓમાં રમતગમત સ્પર્ધાઓ, વોકાથોન, ધ્યાન સત્રો, સાંસ્કૃતિક કાર્યક્રમો, કલા અને સર્જનાત્મક સ્પર્ધાઓ, નુક્કડ નાટક (શેરી નાટકો), જાગરૂકતા ડ્રાઇવ અને અન્ય સામાજિક ભાગીદારીની પહેલોનો સમાવેશ થશે, જેનો ઉદ્દેશ્ય હકારાત્મક સામાજિક મૂલ્યોને પ્રોત્સાહન આપવાની સાથે નશાખોરીની હાનિકારક અસરો વિશે સમાજને સંવેદનશીલ બનાવવાનો છે.

સતત ભાગીદારીને પ્રોત્સાહિત કરવા અને અનુકરણીય પ્રયાસોને માન્યતા આપવા માટે, ઝુંબેશમાં ઉત્કૃષ્ટ યોગદાન આપનારા સ્વયંસેવકો અને સંસ્થાઓને 50મા, 75મા અને 100મા સપ્તાહના સીમાચિહ્નો પર સન્માનિત કરવામાં આવશે, જે જાહેર સેવા અને સામૂહિક જવાબદારીની ભાવનાને મજબૂત કરશે.

કેન્દ્રીય યુવા બાબતો અને રમતગમત મંત્રી શ્રી મનસુખ માંડવિયાએ રાષ્ટ્રીય હિતમાં આદરણીય પ્રધાનમંત્રીના આહ્વાનમાં જોડાવા અને આ ઐતિહાસિક આંદોલનમાં સક્રિય ભાગીદાર બનવા માટે દેશભરના યુવાનો અને સામાજિક સંસ્થાઓને અપીલ કરી છે. લાખો યુવાનો, સંસ્થાઓ અને સામાજિક સંગઠનોના સામૂહિક પ્રયાસો દ્વારા, આ ઝુંબેશનો ઉદ્દેશ્ય એક દેશવ્યાપી સામાજિક આંદોલન ઊભું કરવાનો છે જે લોકોને નશાખોરીનો અસ્વીકાર કરવા અને તંદુરસ્ત, મજબૂત અને વધુ વિકસિત ભારતના નિર્માણમાં યોગદાન આપવા માટે પ્રેરણા આપે.

"નશા મુક્ત યુવા ફોર વિકસિત ભારત સંકલ્પ અભિયાન" માનનીય પ્રધાનમંત્રીના એ વિઝનને પ્રતિબિંબિત કરે છે, જેમાં નશા સામેની લડાઈને નાગરિકોની સક્રિય ભાગીદારીથી સંચાલિત એક જનઆંદોલનમાં પરિવર્તિત કરવાનો સંકલ્પ છે. "નશા મુક્ત યુવા એ વિકસિત ભારતની સૌથી મોટી શક્તિ છે" ના સંદેશથી માર્ગદર્શિત થઈને, આ ઝુંબેશ આ રાષ્ટ્રીય સંકલ્પને દરેક ગામ, શહેર અને નગર સુધી પહોંચાડવા માટે પ્રયત્નશીલ છે, જે વિકસિત ભારત 2047 તરફની ભારતની યાત્રાને વધુ મજબૂત બનાવે છે.

SM/BS/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com