ভারত ইমানা য়াইফরে। ভারত ইমানা য়াইফরে।

হরিয়ানাগী রাজ্যপাল শ্রী অসিম ঘোশজী, মীয়াম্না পাম্নরবা অমসুং থৱাই য়াওরবা মুখ্য মন্ত্রী নায়ব সিংহ সৈনিজী, কেন্দ্রগী মন্ত্রী-মন্দলদা লৈরিবা ঐগী মরুপ অশ্বিনি ভৈষ্ণোজী, অতোপ্পা মীয়ামগী মীহুৎশিং, অমসুং তেক্নোলোজীগী খুত্থাংদা মফম কয়াদগী কন্নেক্ত তৌরিবা হরিয়ানাগী ঐগী নুংশিরবা ইচিল-ইনাও পুম্নমক!

মফম অসিদা ফোতো খরা পুরক্লে – মখোয় অদু লৌশিল্লু নত্ত্রবদি মনীংদা ফম্লিবশিংনা উবা ফংলরোই। এস.পি.জি. পর্নেল, চানবীদুনা মখোয় অদু লৌশিল্লু। ফজরবা লাই অদু পুরকপগীদমক থাগৎচরি ইনাও। অসিদা নুপীমচা অমনসু করিগুম্বা অমা পীরি – অসিসু অমুক্তা লৌশিনবীয়ু। অসিদসু নুপা অনি লেপ্পে। অমসুং হৌজিক মীপুম খুদিংমক্না নুংঙাইনা ফম্বীরো। অদোমগী মীনুংশিং, অদোমগী খুৎশা হৈরবা কালা অদুগীদমক ঐহাক্না পুম্নমকপু থাগৎচরি।

মরুপশিং,

জিন্দগী মতিক ময়াই লৈরবা লমদমদগী ঐহাক্কী রাম-রামগা লোয়ননা ময়ামদা য়াইফ পাউজেল পীজরি। মসি অচম্বা লমদম নত্তে – মসি পুৱারী, থৌনা, থাজবা অমসুং চাউথোকচবগী লমদমনি। শক্তি পীথ মাতা জয়েন্তিগী থৌজালশিংনা মতম চুপ্পদা সহর অসিবু থৌজানগনি। ঐহাক্কীদমক্তা জিন্দদা লাকপা অসি অরিবা মতমগী থোংনাও হাংদোকপগা মান্নৈ। ঙসি মফম অসিদা ঐহাক্না উখ্রবা মীওই কয়া লাক্লি। মীওই কয়ানা ঐহাক্না মফম অসিদা স্কুতরশিংদা তোংদুনা লাকলমখি হায়না ফোংদোক্লি। চহি তরাগী খুজিং কয়াগী মমাংদা ঐহাক্না অহানবা ওইনা ওর্গনাইজেসনগী থবক্কীদমক জিন্দদা লাকখি। ঐঙোন্দা নখোয়না উৎলিবা মীনুংশি অমসুং থৌজাল অদু ঐহাক্না কৈদৌনুংদা কাওরোই। মুরাহ ইরোইগী শঙ্গোম, শঙ্গোম অফম্বা অমসুং ঘী, জিন্দগী দেসি বুরা অমসুং মফম অসিগী ঘেবর – মসিগী মেমোরীশিং অসি জিন্দগা মতম চুপ্পদা শম্নরি।

মরুপশিং,

চহি খরা অসি জিন্দগী ঘী অমসুং ঘেবর অসি হোংদ্রি অদুবু জিন্দগী থৌনাদি হোংখ্রে। ঙসি জিন্দনা বি.জে.পি.-এন.দি.এ.গী গুদ গভর্নান্সকী মোদেলগী মমি ওইরি। হৌখিবা চহি খরা অসিদা হরিয়ানা পুম্বনা চাউখৎ থৌরাংগী অনৌবা লম্বীদা চংশিল্লে। ঙসিগী থৌরম অসিনা অনৌবা থৌনাগা লোয়ননা দবল-ইঞ্জিন বি.জে.পি. সরকারগী মিসন অদু থুংহল্লি।

মরুপশিং,

ঙসি, জিন্দ অমসুং হরিয়ানাগী মমিং অসি পুৱারীগী লমাইশিংদা ইরি। মফম অসিদগী লৈবাক অসিনা মাগী অহানবা হাইদ্রোজেন ত্রেন ফংখ্রে।

নখোয়না নীংশিংগনি, মরুপশিং,

ঐখোয় পুম্নমক্না হৌজিকসু ভারত্তা অহানবা ত্রেন বোম্বে অমসুং থানেগী মরক্তা হৌজিক্না মুম্বাই কৌরিবা অসিদা চেনখি হায়না পাই অমসুং তাই। চপ মান্নবা মওংদা তুংলমচৎতা হাইদ্রোজেন ত্রেনগী মতাংদা পল্লকপদা জিন্দ, সোনিপৎ অমসুং হরিয়ানাগী মমিংশিং অসি শোইদনা নীংশিংহৌরগনি। ময়াম পুম্নমক্তা, জাতি পুম্বদা ঐহাক্না ইন্দিয়ন রেলৱেজকী মোদর্নাইকেসনদা অচৌবা খোঙথাং অমা লৌখৎপগীদমক থাগৎপা ফোংদোকচরি।

মরুপশিং,

ঙসি লুপা করোর ১৪,০০০ হেনবগী প্রোজেক্তশিং হরিয়ানাদা পীখ্রে। মসিদা রেলৱেজ অমসুং হায়ৱেজ প্রোজেক্ত কয়া, ঐখোয়গী হেরিতেজকা মরী লৈনবা প্রোজেক্তশিং অমসুং হরিয়ানাগী শেবা তৌনবা দেদিকেতেদ তৌরবা অনৌবা মেদিকেল কোলেজ অনি য়াওরি। ভিৱানীদা পন্দিৎ নেকি শর্ম মেদিকেল কোলেজ, অমসুং নারনোলদা মহাঋসি চ্যবন মেদিকেল কোলেজ অমসুং রাও তুলারাম হোস্পিতাল – মসিনা হেরিয়ানাগী হেল্থকেয়র সর্ভিসশিং মপাঙ্গল কনখৎহল্লগনি। চপ মান্নবা মতমদা মখোয়না নহাশিংবু দোক্তর অমসুং অতোপ্পা মেদিকেল প্রোফেস্নেলশিং ওইনবগীদমক অনৌবা লম্বীশিং হাংদোক্লগনি। প্রোজেক্ত পুম্নমক অসিগীদমক ঐহাক্না হরিয়ানাগী ইচিল-ইনাও পুম্নমক্তা নুংঙাইবা ফোংদোকচরি।

মরুপশিং,

ঙসি ঐহাক্না জিন্দ অমসুং হরিয়ানাগী মীয়ামবু অতোপ্পা মরম অমগীদমক্তা ঐহাক্নসু থাগৎপা ফোংদোকচরি। অদোম্না স্বচ্ছতা সে স্বাগৎ ইনিসিএতিবপু লুম্না লৌবগী মওং, ঐহাক্না য়ৌরক্ত্রিঙৈগী মমাংদা অনৌবা থৌনাগা লোয়ননা লুনানবগী কেম্পেনদা মীয়াম্না শরুক য়াবগী মওং অসি থম্মোয় পেন্নীংঙাই ওই। ঐহাক্না হৌখিবা চয়োলদা উবা ফংখি মদুদি অদোমগী লুনানবগী কেম্পেন অসি সোসিএল মেদিয়াদা পাক শন্না খন্নরি। মীওই খরনা সোসিএল মেদিয়াদা হায় – “মোদীজী ঐখোয়গী জিন্দ অসি অদুমক লুনান্নদুনা লৈনবগীদমক চানবীদুনা অমুক হন্না লাকপীয়ু।” ঐহাক্না মসিগী ৱাফম অসি ফোংদোকখিবা মীওই অদুবু থাগৎচরি, অদুবু ঙসি ঐহাক্না জিন্দগী মীয়ামদা করিগুম্বা অমা হায়নবা লাক্লি। হায়বীয়ু, লুনান্না লৈনবগীদমক মোদীনা লাকপা মথৌ তাব্রা? করিগুম্বা জিন্দগী মীয়াম্না লেপ্বদি, করিগুম্বা হরিয়ানাগী মীয়াম্না লেপ্লবদি ঐখোয়না অমুক হন্না মোৎহল্লরোই, জিন্দ অসি অমুক হন্না মোৎশিনগদ্রা? হরিয়ানা অসি অমুক হন্না মোৎশিনগদ্রা? থবক অসি ইচম চম্মি – মোদী লাকপগী মথৌ তাদে। অদোম্না লুনানবা হায়বা অসি ঐখোয়গী মতৌ ওইহন্নবা, লুনানবা অসি ঐখোয়গী কলচর ওইহন্নবা অমসুং ঐখোয়গী নুংতিগী পুন্সিগী শরুক অমা ওইহন্নবা ৱারেপ লৌবা মথৌ তাই।

মরুপশিং,

করিগুম্বা ঐখোয়না রেলৱেজকী পুৱারীদা য়েংলবদি ঐখোয়না ১৯শুবা চহিচাগী রেলৱেজ অসি স্তীম ইঞ্জিনশিংনা মশক তাকপা উবা ফংগনি। ২০শুবা চহিচা অসি দিজল অমসুং ইলেক্ত্রিসিতীনা চল্লাইবা ত্রেনশিংনা মশক তাকই। অমসুং হৌজিক ২১শুবা চহিচাগী ওইনা হাইদ্রোজেন্না চেলহনবা ত্রেনশিংনা মশক তাকই। ঙসি ইন্দিয়ন রেলৱেজনা ২১শুবা চহিচাগী তেক্নোলোজীদা অচৌবা খোঙথাং অমা লৌখৎখ্রে। ঙসি জিন্দ অমসুং সোনিপৎ ফাওবা হাইদ্রোজেন ত্রেন চেনবা হৌখ্রে। হৌজিক্কী ওইনা মসিগী খোঙচৎ অসি কিলোমিতর ৯০ শাংই অদুবু তুংলমচৎতা মসি হেন্না পাকথোক চাউথোরকপগী ওইথোকপা য়াবা চাউনা লৈ। করম্না ঐখোয়না কোস্ত হন্থহন্নবা, করম্না ইফিসিএন্সী হেনগৎহনগনি হায়বগী মতাংদা মখা তানা রিসর্চ তৌগনি অমসুং কুপ্না থীজিল্লবা মতুং মথং-মথং ঐখোয়না মাংদা চংশিনগনি। হাইদ্রোজেন ত্রেনশিং অসি শুপ্নগী ৭-৮ অসিদা মালেমদা থোরকপদা ঙাইরি। হৌজিক লৈবাক ৩ নত্ত্রগা ৪ খক্তনা হাইদ্রোজেন ত্রেন চেলহনবা ঙম্মি। অমসুং হায়রিবা লৈবাকশিং অসিদসু হাইদ্রোজেন ত্রেনশিং অসি হৌজিকসু অঙনবা তাঙ্কক্তা লৈরি। অদুবু ভারতকী হাইদ্রোজেন ত্রেনগী তৌবা ঙম্বগী মতাংদা থাবদা অদোম্না চাউথোকপা পোক্কনি – ভারত মচা খুদিংমক্না চাউথোকচবা পোক্কনি।

মরুপশিং,

জিন্দ অমসুং সোনিপৎকী মরক্তা চেল্লিবা হাইদ্রোজেন ত্রেন অসি মালেমগী খ্বাইদগী শক্তি লৈবা হাইদ্রোজেন ত্রেননি। হাইদ্রোজেন ত্রেন অসিদা হোর্সপাৱর ৩,২০০ য়াওই। খ্বাইদগী শক্তি লৈবা খক্তা নত্তনা ভারতকী হাইদ্রোজেন ত্রেন অসি খ্বাইদগী শাংবসু ওইরি। অতোপ্পা লৈবাকশিংদা হাইদ্রোজেন ত্রেনশিং অসি কোচ অহুম নত্ত্রগা মরি ওই অদুবু ভারত্তা মাগী ইহান হানবা এতেম্পদা কোচ ১০গী হাইদ্রোজেন ত্রেন অমা চেলহন্দুনা মাগী ফিরাল মালেমদা য়ুংবা ঙমহল্লি।

মরুপশিং,

অদোমদা চাউথোকচনীংঙাই ওইবা অতোপ্পা ৱাফম অমা থমজগে। ভারতকী হাইদ্রোজেন ত্রেন অসি মৈখু চেন্দবা ওইবতা নত্তনা মসি মেক ইন ইন্দিয়াগী শীংথানীংঙাই ওইবা খুদমসু ওইরি। হাইদ্রোজেন ত্রেন অসি ইন্দিয়ন ইঞ্জিনীয়রশিংনা দিজাইন তৌখি অমসুং ভারতকী কম্পনীনা শাখি।

মরুপশিং,

মসিগী হাইদ্রোজেন ত্রেন অসি অতোপ্পা ত্রেনশিংদগী মপুং ফানা খেন্নৈ। মসিদা তোখাইবা সিস্তেম, তোখাইবা ইনফ্রাস্ত্রকচর অমা মথৌ তাই। জিন্দদা মথৌ তাবা এরেঞ্জমেন্ত পুম্নমক মফম অসিদা শাখি। অমসুং লাক্কদৌরিবা মতমদা হাইদ্রোজেন ত্রেনশিংগা মরী লৈনবা ইনফ্রাস্ত্রকচর কয়া মফম অসিদা শারগনি। অনৌবা ফেক্তরীশিং অসি হাইদ্রোজেন ত্রেন নেৎৱার্ক্কী মথৌ তাবশিং থুংহন্নবা লিংখৎলগনি। মসিনা তাক্লিবদি ত্রেন অসি হরিয়ানাগী নহারোলগীদমক অনৌবা থবক্কী খুদোংচাবা কয়া শেমলগনি।

মরুপশিং,

হৌখিবা চহি ১২দা ইন্দিয়ন রেলৱেজতা অচৌবা অহোংবশিং লাকপনা ভারত্তা অতোপ্পা খুদোংচাবা অমা পীখি। অদোম্না হৌখিবা থা খরা অসিদা ৱেস্ত এসিয়াদা – ইরান অমসুং গল্ফতা হোরমজকী অপুনবা রিজন – লান চত্থবা উবা ফংলি। ভারতনা পেত্রোল, দিজল, এল.পি.জি. গ্যাস অমসুং লৌমীশিংগীদমক হারশিং চাউনা পুশিল্লকপা হায়রিবা সমুদ্রগী লম্বেল অসিমক্তা লান থোক্লি, অৱাবনা কোইশিল্লি।

মরুপশিং,

করিগুম্বা ফিভম অসি ২০১৪দগী থোরকপা ওইরম্লবদু ভারতকী অপুনবা রেলৱে সিস্তেম অসি লেপলমগনি। মরমদি ২০১৪দ লৈবাক্কী ত্রেনগী অচৌবা শরুক অমদি দিজল খক্তনা চল্লাইরম্মি – করিগুম্বা দিজল অসি মপালদগী পুশিল্লকপা লেপ্পা তারবদি করম্না ত্রেনশিং অসি চেনগনি? লৈবক অসিনা অচৌবা অৱাবা অমা মায়োক্নরমগনি।

অদুবু মরুপশিং,

মসি ২০১৪গী মতম অদু নত্তে – মসি মোদীগী মতমনি। মহাক্না মতমগী ৱাংমদা খল্লি অমসুং গ্রাউন্দদা সোলুসনশিংসু পুরকই। খন্থদুনা য়েংবীয়ু: ইন্দিয়ন রেলৱেজকী ইলেক্ত্রিফিকেসন অসি ১৯২৫দা হৌখি, চহিচা অমরোমগী মমাংদা। ১৯২৫দগী ২০১৪ ফাওবা চহি ৯০ অসিদা শুপ্নগী রেলৱে নেৎৱার্ক্কী চাদা ৩০ খক্তা ইলেক্ত্রিফাইদ তৌখি – শরুক অহুম থোকপগী অমদগী তানা। চাদা ৭০না দিজলনা চেলহল্লি। খোঙজেল অসিদা মপুং ফানা ইলেক্ত্রিফিকেসন তৌবদা অতোপ্পা চহি ২০০-৩০০ চংগনি। রেলৱেজ অসি ইলেক্ত্রিফাইদ তৌরমদবসু য়াই অমসুং ত্রেশিং অসি মখা তানা দিজলনা চেলহল্লি। অদুবু হৌখিবা চহি ১২ অসিদা ভারতকী রেলৱেজ নেৎৱার্ক্কী চাদা ৯৯গী ময়াদা ইলেক্ত্রিফাইদ তৌখি। হরিয়ানাদা রেলৱেজ নেৎৱার্ক মপুং ফানা ইলেক্ত্রিফাইদ তৌখি। মরম অসিনা লান অমসুং থাওগী খুদোংচাদবা লৈরবসু ভারতকী রেলৱেজ অসি লেপখিদে। ভারতকী চাউখৎ-থৌরাংগী ইঞ্জিন লেপখিদে – ত্রেনশিং অসি মখা তানা চেল্লি।

মরুপশিং,

রেল নত্ত্রগা লম্বী ওইরো কন্নেক্তিবিতী প্রোজেক্তশিংনা খুদোংচাবা পীরি অমসুং দিবেলপমেন্তগী খোঙজেল য়াংখৎহল্লি। হায়ৱে কয়ানা শম্নহল্লিবা জিন্দদা ঙসি ফম্পাক অসিদগী অচৌবা প্রোজেক্ত অহুম হৌদোকপা উবা ফংলে। দিল্লী-অমৃতসর-কাত্রা এক্সপ্রেসৱেগী হরিয়ানা সেক্সন অসি শঙ্গাখ্রে। জিন্দ-গোহানা নেস্নেল হায়ৱে অসি জাতিদা কত্থোকখ্রে। মসিগী মথক্তা অম্বালা-কালা অম্ব ফোর-লেন রোদ অসিনা হরিয়ানা অমসুং হিমাচল অনিমক্কী মীয়ামদা চাউনা খুদোংচাবা পীরগনি।

মরুপশিং,

হৌজিক জিন্দ অসি নেস্নেল হায়ৱেজ মঙানা শম্নহল্লিবা জিলা অমা ওইরে। অসিগুম্বা কন্নেক্তিবিতীগা লোয়ননা লৌমীশিং অমসুং শা-শন লোইবশিংনা মখোয়গী পোত্থোক অদু অচৌবা কৈথেলশিংদা পুবদা লায়হল্লগনি অমসুং শেল চংহল্লরোই। ইন্দস্ত্রীশিং মপাঙ্গল কনখৎহল্লগনি. তুরিজম খুমাং চাউশিনগনি অমসুং মশিং য়াম্লবা থবকশিং শেম্লগনি।

মরুপশিং,

নুমিৎ খরনিগী মমাংদা ঐহাক্না ইন্দোনেসিয়া, ওস্ত্রেলিয়া অমসুং ন্যু জীলেন্দদগী হল্লকখি হায়বা নখোবনা খঙই। ভারতনা মফম অদুদা য়ানৱারোল কয়া খুৎয়েক পীনখি, মসি পাকশন্না খন্নরি। অদুবু ৱাফম অমদি কয়া য়াম্না ঙাংনদে। হীরম অসি ঐহাক্কী লৈবাক, মরু ওইনা হরিয়ানাগ নহারোলগা হকথেংননা শম্নরি – অমসুং হীরম অসি শান্ন-খোৎনবনি।

মরুপশিং,

ওস্ত্রেলিয়া অমসুং ন্যু জীলেন্দদা ঐহাক্না মখোয়গী সরকারশিংগা শান্ন-খোৎনবগী মতাংদা পাকশন্না খন্ন-নৈনখি। লাক্কদৌরিবা মতমদা ভারতনা লম কয়াদা লৈবাক অনি অসিগা লোয়ননা পুন্না থবক তৌগনি – স্পোর্তস ইন্দস্ত্রী, এথেলিৎ ত্রেনিং অমসুং অহেনবা কয়া। মসিনা হরিয়ানাগী নহারোলদা চাউনা কান্নবা পীগনি।

মরুপশিং,

ঙসি ভারত্তা স্পোর্তস অসি ফিৎনেস অমসুং এমপ্লোইমেন্তগী মরু ওইবা মীদিয়ম অমা ওইরে। ঐখোয়গী সরকারনা অনৌবা নেস্নেল স্পোর্তস পোলিসী অমসুং খেলো ভারত পোলিসী অমা শেম্লে। খেলো ইন্দিয়া কেম্পেনদগী তোপ্স স্কিমদা শান্নরোইশিং অসিনা মমাংদা অমুক্তা ওইখিদ্রিবা খুদোংচাবা অমসুং ফাইনান্সিএল সপোর্ত ফংলি। হরিয়ানাদু বি.জে.পি. সরকারনা স্পোর্তস অমসুং এথেলিৎশিং চাউনা পুক্নিং থৌগৎলি।

মরুপশিং,

ঙসি থৌরম অসি হাইদ্রোজেন ত্রেন অমসুং অতোপ্পা চাউখৎ-থৌরাংগী প্রোজেক্তশিংগী মরমদা ওইরম্বা য়াই অদুবু ঐহাক্না মফম অসিগী নহারোলদা করিগুম্বা খরা হায়জনীংই। ২০৩০দা ভারতনা কম্মনৱেল্থ গেম্সকী য়ুম্বু ওইগনি অমসুং ২০৩৬তা ভারতনা ওলিম্পিক গেম্সকী য়ুম্বু ওইনবা শেম শারি। মরম অদুনা শান্নরোই খুদিংমক্না কন্না শেম শাবা হৌগদবনি অমসুং মখোয়গী মপুং ফাবা পাঙ্গল উৎকদবনি। ঐহাক্না অদোমদা থাজবা পীরি মদুদি দবল-ইঞ্জিন বি.জে.পি. সরকারনা খুদোংচাবা খুদিংমক পীরগনি। অমসুং ২০৩৭ ওলিম্পিক্স য়েংবা পাম্বা – ঙসি চহি ৫দগী ১২-১৫গী মনুংদা লৈবা অঙাংশিংদা ঐখোয়না মীৎয়েং থমগদবনি। অদোমদা ৱাফম অমসু হায়জগে লাক্কদৌরিবা মতম অসিদা অহমদাবাদনা ৱার্ল্দ পুলিস অমসুং ফায়র গেম্সকী য়ুম্বু ওইগনি। ঐহাক্না হরিয়ানাদা লৈরিবা ঐহাক্কী মরুপশিংদা মসিগীদমক শেম শানবা হায়জরি। ঐহাক্না হরিয়ানাগী ইচানুপা অমসুং ইচানুপীশিংনা মতম চুপ্পদা গেমশিংদা মখোয়গী ফিরাল ৱাংনা পাইহনগনি হায়না থাজৈ।

মরুপশিং,

হরিয়ানাগী দবল-ইঞ্জিন সরকারনা সবকা সাথ, সবকা বিকাসকী মন্ত্রগা লোয়ননা থবক তৌরি। নায়ব সিংহ জীগী লুচিং মখাদা হরিয়ানা সরকারনা মফম অসিগী নহারোল, লৌমী, ইচে-ইচল অমসুং ইচানুপীশিংগীদমক শীংথানীংঙাই ওইনা থবক তৌরি। হরিয়ানা সরকারনা শেল লৌদনা নত্ত্রগা খঙনা চাননবা য়েংদনা থবক পীবগী উৎলিবা লম্বেল অসি অরাইবা নত্তে অদুবু মসিগী বি.জে.পি. সরকার অসিনা মসি ওইথোকপা ঙমহল্লি।

মরুপশিং,

হরিয়ানাগী লৌমীশিং অসি ঐখোয়গীদমক মরু ওইবা ৱাফম অমনি। জিন্দগী মন্দি অসি হরিয়ানাগী খ্বাইদগী চাউবা অমনি। দবল-ইঞ্জিন বি.জে.পি. সরকারনা মরম ওইদুনা হরিয়ানাগী লৌমীশিংনা চাউনা কান্নবা ফংলি। পি.এম. কিসান সম্মান নিধিগী খুত্থাংদা লুপা করোর ৮,০০০গী ময়াদা ফংখি। মসিগী মনুংদা জিন্দগী লৌমীশিং খক্তনা লুপা করোর ৬০০ হেন্না ফংখি।

মরুপশিং,

ঐখোয়গী লৈবাক অসি ভেল্যু অমসুং কলচরগী লমদম অমনি। অমসুং মসিগী লমদম অসি ইনাক খুল্লবা হেরিতেজকী অচৌবা সেন্তর অমনি। জিন্দগী লমদম অসি মহারাজা রঞ্জিৎ সিংহগী মতিক ময়াই লৈরবা লমদম অমসুং পান্দবাশিংনা থাজবা থমখিবা মফমনি। পন্দু-পিন্দারা অমসুং রামরাইগুম্বা শেংলবা মফমশিং অসি তীর্থ য়াত্রী করোর কয়াগীদমক হৌজিকসু লাইফমলেন ওইরি।

মরুপশিং,

থাজবা অমসুং স্পিরিচুএলিতীগী হেরিতেজ অসি ঙসিগী ভারতনা ঙাক শেন্দুনা থম্মিবা অমসুং মথংগী মীরোলদা ইকাই খুম্নবগা লোয়ননা থংথরিবা অদুনি। মসিগী ৱাখল্লোন অসিদা ঙসি কুরুক্ষেত্রাদা সিখ ম্যুজিয়ম অমগী উরেপ উয়ুং তমখ্রে। মসিগী হরিয়ানাগী অনৌবা ম্যুজিয়ম অসিনা ভারতকী অথোইবা গুরুগী চৎনবী অদু তুংগী মীরোলদা থংথরগনি।

মরুপশিং,

হরিয়ানা অসি হৌজিক খোঙজেল য়াংনা চাউখৎপগী লম্বীদা মাং থানা চংশিল্লি। লৌউ-শিংউ অমসুং ইন্দস্ত্রী – মসি হরিয়ানাবু শক্তি পীরিবা চাকা অনি অদুনি। ঙসি শঙ্গাখিবা অমসুং হৌদোকখিবা প্রোজেক্তসিং অসিনা হরিয়ানাগী চাউখৎ খোঙজেল হেন্না য়াংশিনহনগনি। অমসুং হরিয়ানাগী মসিগী খোঙজেল য়াংনা চাউখৎলকপা অসিনা চাউখৎপা লৈবাক অমা ওইনবা মাইকৈদা ভারতকী খোঙচৎ অসিবু শক্তি পীগনি। মসিগী য়াইফ পাউজেলশিং অসিগা লোয়ননা ঐহাক্না ময়াম পুম্নমক, জাতিগী মীয়ামবু ভারতকী অহানবা হাইদ্রোজেন ত্রেনগীদমক অমুক হন্না নুংঙাইবা ফোংদোকচরি। ঐহাক্কা লোয়ননা হায়বীয়ু।

ভারত ইমানা য়াইফরে! ভারত ইমানা য়াইফরে! ভারত ইমানা য়াইফরে!

হন্না-হন্না থাগৎচরি!

*****