ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ "ସହକାର ସେ ସମୃଦ୍ଧି" ସଂକଳ୍ପ ଏବଂ ଶ୍ୱେତ ବିପ୍ଳବ ୨.୦ର ଉଦ୍ଦେଶ୍ୟକୁ ଆଗକୁ ନେଇ କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଶ୍ରୀ ଅମିତ ଶାହ ୨୦୨୬ ଜୁଲାଇ ୧୯ ତାରିଖରେ କଲିକତାର ନ୍ୟୁ ଟାଉନ୍ କନଭେନସନ ସେଣ୍ଟରଠାରେ ଅମୂଲ ବେଙ୍ଗଲ ଡାଏରୀ ପ୍ରକଳ୍ପ ଅଧୀନରେ ବିଶ୍ୱର ସବୁଠାରୁ ବଡ଼ ଦହି ଉତ୍ପାଦନ କାରଖାନାର ଭୂମି ପୂଜନ କରିବେ। ଏହି ଅବସରରେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ଶ୍ରୀ ଶୁଭେନ୍ଦୁ ଅଧିକାରୀଙ୍କ ସମେତ ସମବାୟ କ୍ଷେତ୍ରର ଅନେକ ବିଶିଷ୍ଟ ବ୍ୟକ୍ତି ଓ ପ୍ରତିନିଧିମାନେ ଉପସ୍ଥିତ ରହିବେ।

ପ୍ରାୟ ୭୦୦ କୋଟି ଟଙ୍କା ନିବେଶରେ ଅମୁଲ ପଶ୍ଚିମବଙ୍ଗର ହାଓଡ଼ା ଫୁଡ୍‍ ପାର୍କରେ ଅମୁଲ ବେଙ୍ଗଲ ଦୁଗ୍ଧ ପ୍ରକଳ୍ପ ପ୍ରତିଷ୍ଠା କରୁଛି। ସମ୍ପୂର୍ଣ୍ଣ ହେବା ପରେ, ଏହି ପ୍ରକଳ୍ପରେ ଦୈନିକ ପ୍ରାୟ ୩୦ ଲକ୍ଷ ଲିଟର କ୍ଷୀର ପ୍ରକ୍ରିୟାକରଣ କରିବାର କ୍ଷମତା ରହିବ। ଏହି କାରଖାନାର ଦୈନିକ ପାଖାପାଖି ୧୦ ଲକ୍ଷ କିଲୋଗ୍ରାମ କ୍ଷୀର ଏବଂ ଅନ୍ୟାନ୍ୟ ପୁଷ୍ଟିକର ଦୁଗ୍ଧଜାତ ଦ୍ରବ୍ୟ ସହିତ ସମାନ ମେଟ୍ରିକ ଟନ ଉତ୍ପାଦନ କରିବାର କ୍ଷମତା ରହିବ।

ଏହି ପ୍ରକଳ୍ପର ପ୍ରସ୍ତାବିତ ଦୈନିକ ଉତ୍ପାଦନ କ୍ଷମତାରେ ୧୦ ଲକ୍ଷ ଲିଟର କ୍ଷୀରର ପ୍ୟାକେଜିଂ, ଦୁଇ ଲକ୍ଷ ଲିଟର ୟୁଏଚଟି କ୍ଷୀର ପ୍ରକ୍ରିୟାକରଣ, ଏକ ଲକ୍ଷ ଲିଟର ଆଇସ୍କ୍ରିମ୍ ଉତ୍ପାଦନ, ୨୦ ମେଟ୍ରିକ୍ ଟନ୍ ପନିର୍, ୧୦ ମେଟ୍ରିକ୍ ଟନ୍ ଘିଅ ଏବଂ ୧୦ ମେଟ୍ରିକ୍ ଟନ୍ ମିଠା ଅନ୍ତର୍ଭୁକ୍ତ । ଏହାବ୍ୟତୀତ, ଏହି କାରଖାନା ପ୍ରତିଦିନ ପ୍ରାୟ ୨.୫ ଲକ୍ଷ ପ୍ୟାକେଟ୍ ସ୍ୱାଦଯୁକ୍ତ କ୍ଷୀର ଉତ୍ପାଦନ କରିବାରେ ସକ୍ଷମ ହେବ।

ପଶ୍ଚିମବଙ୍ଗରେ ଅମୁଲର ସମବାୟ ଆନ୍ଦୋଳନର ନିରନ୍ତର ପ୍ରସାର ଘଟୁଛି। ବର୍ତ୍ତମାନ ରାଜ୍ୟର ଲକ୍ଷେରୁ ଅଧିକ ଦୁଗ୍ଧ ଉତ୍ପାଦନକାରୀ କୃଷକ ଅମୁଲର ସମବାୟ ନେଟୱାର୍କ ସହିତ ଜଡିତ ଅଛନ୍ତି। ଏଥିରେ ୧.୨୫ ଲକ୍ଷରୁ ରୁ ଅଧିକ ଦୁଗ୍ଧ ଉତ୍ପାଦନକାରୀ ସାମିଲ ଅଛନ୍ତି। ଏମାନଙ୍କ ମଧ୍ୟରେ ୩୦,୦୦୦ ମହିଳା ଦୁଗ୍ଧଚାଷୀ ଅର୍ନ୍ତଭୁକ୍ତ । ଏହି କୃଷକମାନଙ୍କ ସହଯୋଗରେ ରାଜ୍ୟରେ ପ୍ରତିଦିନ ପ୍ରାୟ ନଅ ଲକ୍ଷ ଲିଟର କ୍ଷୀର ସଂଗ୍ରହ କରାଯାଉଛି।

ଅମୁଲ ବେଙ୍ଗଲ ଦୁଗ୍ଧ ପ୍ରକଳ୍ପ ପଶ୍ଚିମବଙ୍ଗର ଦୁଗ୍ଧ କ୍ଷେତ୍ରରେ ଆଧୁନିକ ପ୍ରକ୍ରିୟାକରଣ, ମୂଲ୍ୟ ସଂଯୋଜନ ଏବଂ ବିପଣନ ସୁବିଧାର ସମ୍ପ୍ରସାରଣ କରିବ। ଏହା ଦୁଗ୍ଧ ଉତ୍ପାଦନ କରୁଥିବା କୃଷକମାନଙ୍କୁ ସେମାନଙ୍କ ଉତ୍ପାଦ ପାଇଁ ଏକ ଉନ୍ନତ ଏବଂ ସ୍ଥାୟୀ ବଜାର ସୁବିଧା ପ୍ରଦାନ କରିବ ଏବଂ ସେମାନଙ୍କ ଆୟ ବୃଦ୍ଧି କରିବାରେ ସହାୟକ ହେବ। ରାଜ୍ୟରେ ଦୁଗ୍ଧ ସମବାୟ ସମିତିକୁ ସୁଦୃଢ଼ କରି, ଏହି ପ୍ରକଳ୍ପ ବଙ୍ଗଳାରେ ଶ୍ୱେତ ବିପ୍ଳବର ଏକ ନୂତନ ଅଧ୍ୟାୟର ଆରମ୍ଭକୁ ଚିହ୍ନିତ କରିବ।

ଏହି କାର୍ଯ୍ୟକ୍ରମ ସମୟରେ, ରାଜ୍ୟରେ ଗମନାଗମନ ସେବାର ପରିଚାଳନା ଏବଂ ସମ୍ପ୍ରସାରଣ ପାଇଁ ଭାରତ ଟ୍ୟାକ୍ସି ଏବଂ ପଶ୍ଚିମବଙ୍ଗ ସରକାରଙ୍କ ସୂଚନା ପ୍ରଯୁକ୍ତିବିଦ୍ୟା ଏବଂ ଇଲେକ୍ଟ୍ରୋନିକ୍ସ ବିଭାଗ-ଡିଓଆଇଟି ଆଣ୍ଡ ଇ ମଧ୍ୟରେ ଏକ ବୁଝାମଣା ପତ୍ର ମଧ୍ୟ ସ୍ବାକ୍ଷରିତ ହେବ।

ଶ୍ରୀ ଶାହ ଶ୍ୱେତ ବିପ୍ଳବ ୨.୦ ଅଧୀନରେ ପଶ୍ଚିମବଙ୍ଗର ୨୦୦ ରୁ ଅଧିକ ନବଗଠିତ ଦୁଗ୍ଧ ସମବାୟ ସମିତି ମଧ୍ୟରୁ ଗୋଟିଏକୁ ପଞ୍ଜୀକରଣ ପ୍ରମାଣପତ୍ର ପ୍ରଦାନ କରିବେ। ସେ ରାଜ୍ୟର ୧୧ ଟି ନୂତନ ପଞ୍ଜୀକୃତ ବହୁମୁଖୀ ଗ୍ରାମୀଣ ସମବାୟ ସମିତି ମଧ୍ୟରୁ ଗୋଟିଏକୁ ପ୍ରତୀକାତ୍ମକ ଭାବରେ ଏକ ପଞ୍ଜୀକରଣ ପ୍ରମାଣପତ୍ର ପ୍ରଦାନ କରିବେ।

ଶ୍ରୀ ଅମିତ ଶାହ ପଶ୍ଚିମବଙ୍ଗରେ ସମବାୟ ସମିତିର ରେଜିଷ୍ଟ୍ରାରଙ୍କ କାର୍ଯ୍ୟାଳୟର କମ୍ପ୍ୟୁଟରୀକରଣ ପ୍ରକଳ୍ପ ଅଧୀନରେ ବିକଶିତ ଇ-ଆରସିଏସ ପୋର୍ଟାଲର ମଧ୍ୟ ଶୁଭାରମ୍ଭ କରିବେ। ଏହି ପୋର୍ଟାଲ ସମବାୟ ସମିତିଗୁଡ଼ିକର ପଞ୍ଜୀକରଣ ଏବଂ ଅନ୍ୟାନ୍ୟ ପ୍ରଶାସନିକ ପ୍ରକ୍ରିୟାକୁ ଡିଜିଟାଲ, ସ୍ୱଚ୍ଛ ଏବଂ ଅଧିକ ସୁଗମ୍ୟ କରିବାରେ ସହାୟକ ହେବ।

ଏହି କାର୍ଯ୍ୟକ୍ରମ ସମୟରେ ଶ୍ରୀ ଅମିତ ଶାହ ୧୦ଟି ଜିଲ୍ଲାରେ ମୋଟ ୧୪୦୦ ମେଟ୍ରିକ୍ ଟନ୍ ମହଜୁଦ କ୍ଷମତା ବିଶିଷ୍ଟ ୧୪ଟି ଗୋଦାମଗୃହର ଭିତ୍ତିପ୍ରସ୍ତର ସ୍ଥାପନ କରିବେ। ଏହି ପଣ୍ୟାଗାରଗୁଡ଼ିକ ଆନୁମାନିକ ୫.୯୮ କୋଟି ଟଙ୍କା ବ୍ୟୟରେ ନିର୍ମାଣ କରାଯିବ। ଏହାବ୍ୟତୀତ, ସେ ଦକ୍ଷିଣ ୨୪ ପ୍ରଗଣା ଏବଂ କୋଚବିହାରରେ ୧୦୦ ମେଟ୍ରିକ୍ ଟନ୍ କ୍ଷମତା ବିଶିଷ୍ଟ ଦୁଇଟି ପଣ୍ୟାଗାରର ଉଦଘାଟନ କରିବେ, ଯାହାର ମୋଟ ମୂଲ୍ୟ ୭୩.୬୧ ଲକ୍ଷ ଟଙ୍କା।

ଏହି ପଦକ୍ଷେପଗୁଡ଼ିକ କୃଷକ, ଦୁଗ୍ଧ ଉତ୍ପାଦକ ଏବଂ ଗ୍ରାମୀଣ ସମବାୟ ସଂସ୍ଥାଗୁଡ଼ିକ ପାଇଁ ଆର୍ଥିକ ସୁଯୋଗର ସମ୍ପ୍ରସାରଣ କରିବା ସହିତ ପଶ୍ଚିମବଙ୍ଗରେ ଦୁଗ୍ଧ ସମବାୟ ସମିତି, ଗ୍ରାମୀଣ ସଂରକ୍ଷଣ ଭିତ୍ତିଭୂମି, ଡିଜିଟାଲ ସମବାୟ ପ୍ରଶାସନ ଏବଂ ସଦସ୍ୟ-ଆଧାରିତ ଗମନାଗମନ ସେବାକୁ ନୂତନ ପ୍ରୋତ୍ସାହନ ଦେବ।

HS