Katba ka India ka nang iaid shaphrang sha ka jingthmu jong ka Viksit Bharat @2047, ka jingpynkupbor ia ki samla ban long ki nongtei ia ka jingkylla ha ka imlang sahlang ka dang long ka bynta pdeng jong ka jingiaid lynti jong ka ri. Haba pynskhem ïa ka jingkyntu ba shai jong u Myntri Rangbahduh ba donburom ban pynlong ïa ka jingïakhun pyrshah ïa ka jingdih pynbuaid kum ka Jan Andolan, ka Tnad Youth Affairs & Sports (MYAS), lyngba ka Mera Yuva Bharat (MY Bharat), ka la sdang ïa ka bynta ka ban wan jong ka campaign 'Nasha Mukt Yuva for Viksit Bharat ha ka ri baroh kawei ha kaba ki jingiakop ha ka kyrdan District kin sdang naduh ka 13 tarik Naitung 2026. Lyngba ka bor jong ka jingsaindur, ka kolshor bad ka jinglong nongialam ha ka imlang sahlang, ka sienjam ka thmu ban ai mynsiem ia ki samla ban ialam ia ka jingiakhih na ka bynta ka Nasha Mukt Bharat katba ka dang noh synniang sha ka jingthmu jong ka Viksit Bharat @2047.

Da kaba rah ia kane ka jingthmu shakhmat lyngba ka rynsan kaba la buh ryntih ha ka ri baroh kawei, ia ki jingiakop yn pynlong ha ka rukom kaba lai kyrdan, kaba sdang na ka District Level, bud sa ka State Level, bad pynkut ha ka National Level. Ki jingpynrung kyrteng kin sdang ha ka 13 tarik u Naitung 2026, hadien kane yn pynlong ïa ki jingïakob ha ka kyrdan district naduh ka 24 tarik haduh ka 27 tarik u Naitung 2026, ha kaba yn jied ïa ki lai ngut ha kawei pa kawei ka kyrdan. Ki nongjop na ki District kin ïakhun ha ki jingïakop ha ka kyrdan jong ka Jylla naduh ka 30 tarik u Naitung haduh ka 6 tarik u Nailar 2026. Hadien kata yn khot ïa ki nongjop jong ka Jylla sha New Delhi na ka bynta ka National Finale ha ka 12 bad 13 tarik u Nailar 2026, ha kaba ki samla ba tbit na kylleng ka ri kin pyni ïa ka jingsaindur jong ki ha ka rynsan jong ka ri ha ka National Youth Summit.

Ha ka bynta pdeng jong kane ka campaign ka don ka bor jong ka jingpynpaw ia ka jingsaindur ba la ïalam da ki samla. Ka MY Bharat kan pynlong ia ki jingiakop ha ka kyrdan district ha kylleng ki san tylli ki thup saindur - Ka jingshad, ka jingrwai, ka Reel & short Film, ka Nukkad Natak bad ka Slam Poetry. Da kaba pynïasoh lang ïa ka kolshor, ka jingïathuhkhana, ka jingrwai bad ka jingsaindur digital, ki jingïakob ki ai ka rynsan kaba kyrpang ïa ki samla ban ai mynsiem ia ka shong ka thaw jong ki, ban ai mynsiem ia ki paralok jong ki bad ban pynsaphriang ïa ka khubor jong ka ri India kaba lait na u drok.

Da kaba pynthikna ia ka jingiashim bynta kaba iar bad kaba kynthup lang ia baroh, ki jingiakop kilong na ka bynta ki samla kiba naduh 15 haduh 29 snem ka rta, da kaba pdiang sngewbha ia ki jingiashim bynta shimet bad kynhun. Ki nongiashim bynta ki lah ban phah ia ki kam jong ki ha ka ktien Hindi, Phareng ne kano kano ka ktien jong ka thain, da kaba pynthikna ba man la ka sur, khlem da khein ia ka jaka ne ka ktien, ka ioh ia ka lad ban long shi bynta jong kane ka jingiakhih jong ka ri.

Ban pynsuk ïa ka jingïashim bynta kaba ryntih, ki jingpynrung kyrteng na ka bynta ka District Round kin plie naduh ka 13 tarik Naitung 2026 ha ka MY Bharat Portal (mybharat.gov.in). Ki samla ki lah ban pynrung kyrteng bad upload ia ki kam jong ki lyngba ka rynsan, ha kaba ki jingphah kin long kum ka bynta ba nyngkong jong ka jingiakop.

Ka Tnat Youth Affairs & Sports lyngba ka MY Bharat ka pynshlur ia ki Yuva Shakti ha kylleng ka ri ban shim ia kane ka kabu ban pyndonkam ia ka sap jong ki kum ka bor na ka bynta ka jingkylla ha ka imlang sahlang, ban noh synniang sha ka jingthmu jong ka Nasha Mukt Bharat, bad ban pyniahap ia ka bor bad ki jingangnud jong ki bad ka thong jong ka ri na ka bynta ka Viksit Bharat ha ka Amrit Kaal.

***