ইন্দোনেসিয়াগী ইকায় খুম্নরবা রাস্ত্রপতি,

ইকায় খুম্নরবা উপ রাস্ত্রপতি,

ইকায় খুম্নরবা স্পিকরশিং,

ইকায় খুম্নরবা পার্লিয়ামেন্তকী মেম্বরশিং,

এক্সলেন্সীস,

ইন্দোনেসিয়াগী ঐহাক্কী নুংশিরবা ইচিল-ইনাওশিং,

ময়াম পুম্নমকপু খুরুমজরি।

সেলামত সিয়াং!

ঐহাক্কী অশেংবা মরুপশিং - সাহাবত সেজতিগী মরক্তা লৈজবা অসি য়াম্না নুংঙাইবা অমদি খুদোংচাবা অমনি।

ঙসি নখোয়গী মরক্তা লৈজবা অসি ঐহাক্কীদমক্তা য়াম্না চাউথোকচনীংঙাই অমসুং নুংঙাইবা অমনি। ঐহাক্না ভারতকী মীওই বিলিয়ন ১.৪গী মীহুৎ অমা ওইনা অমসুং দেমোক্রেসীগী মমাগী চাউথোকচনীংঙাই ওইবা নাগরিক অমা ওইনা অদোমগী মমাংদা লেপ্লদুনা ভারতকী মীয়াম পুম্নমক্কী মহুৎ শিন্দুনা য়াইফ-পাউজেল পীজরি।

ইকায় খুম্নরবা মেম্বরশিং,

ইন্দোনেসিয়াগী মীয়াম - মাগী অঙাংশিং, নহাশিং, অমসুং নুপীশিং - না ঙসিগী নুমিৎ অসি ঐগী পুন্সিগী খ্বাইদগী কাওঙমদ্রবা নুমিৎ অমা ওইহনখি। ঙসি অয়ুক ইন্দোনেসিয়াগী মীয়াম্না ঐঙোন্দা উৎখিবা মীনুংশি, থৌজাল অমসুং তরাম্না ওকপগী থৌওং অসি ঐহাক্না মতম পুম্নমক্তা নীংশিংদুনা লৈহৌরগনি। ঙসি অঙনবা মতমদা, রাস্ত্রপতি প্রবোৱোনা কোপিরাইৎকী মতাংদা ৱা ঙাংখি। ঐহাক্না মঙোন্দা হায়জনীংই মদুদি নুংশিবা, থৌজাল, মরুপ-মপাং ওইবগী মরী, নৎত্রগা অমগা অমগা ইকায় খুম্নবগী মতাংদা কোপিরাইত লৈ হায়না কনা অমত্তনা হায়বা ঙমলোই। রাস্ত্রপতি প্রাবোৱোগা লোয়ননা ঐহাক্কী মরুপ-মপাং ওইবগী মরী অসি কোপিরাইতকী ঙমখৈ পুম্নমক্তগী হেল্লি।

মরুপশিং,

ঙসি অয়ুক্কী মতমদা, ঐহাক্না ইন্দোনেসিয়াগী খ্বাইদগী ৱাংবা সিবিলিয়ন ইকায় খুম্নবা ফংবগী খুদোংচাবা ফংজখি। ইন্দোনেসিয়াগী মীয়াম্না ভারতকী মীওই মিলিয়ন কয়াদা থম্লিবা নুংশিজবগী মমি অমা ওইনা, ঐহাক্না ইকায়খুম্নবা অমসুং থাগৎচবা ফোংদোকচরি। মসিগী ইকায় খুম্নবা অসিনা ঐখোয়গী মান্নবা দেমোক্রেতিক ভেল্যুশিং, ঐখোয়গী কম্মন হেরিতেজ, অমসুং ঐখোয়গী লৈবাক অনিগী মরক্তা মতম পুম্নমক্তা মপাঙ্গল কনখৎলক্লিবা মরীশিংবু পালন তৌরি। ঐহাক্না ময়াম পুম্নমকপু, রাস্ত্রপতি প্রাবোৱো, ইন্দোনেসিয়াগী সরকার অমসুং ইন্দোনেসিয়াগী মীয়াম্বু মসিগী ইকায় খুম্নবা অসিগীদমক থাগৎপা ফোংদোকচরি।

ইকায় খুম্নরবা মীহুৎশিং,

ঙসি, ভারত অমসুং ইন্দোনেসিয়ানা পুৱারীগী মরুওইবা তাঙ্কক অমদা অমত্তা ওইনা লেপমিন্নরি। চহিচা অসিগী অহানবা ক্বার্তর অসি হৌজিত্তি লোইখ্রে, অমসুং মথংগী চহি কুন মঙা অসি ঐখোয়গী লৈবাক অনিমক্কী ওইনা য়াম্না মরু ওইগনি। ইন্দোনেসিয়াগী অথোইবা লৈবাক অসিদা, ঐহাক্না ঐখোয়গী পুন্না চৎমিন্নরিবা চাউখৎপগী খোঙচৎ অসিদা থাজবা থমদুনা অদোমগী মমাংদা লাক্লি। ভারত অমসুং ইন্দোনেসিয়ানা পুন্না থবক তৌমিন্নরবদি মীওইবা খুন্নাইদা অনৌবা আশা, পান্দম অমসুং থৌনা পীরগনি হায়বা থাজবা অসিগা লোয়ননা ঐহাক লাক্লি।
ভারতকী মীওই বিলিয়ন ১.৪ অমসুং ইন্দোনেসিয়াগী মীওই মিলিয়ন ২৯০না মান্নবা পান্দম অমসুং পুন্না কন্না হোৎনদুনা অমত্তা ওইনা মাংলোমদা চংশিল্লকপা মতমদা, মালেম অসিনা পুৱারীদা অনৌবা পন্দুপ অমা শেম্বা উবা ফংলগনি।

ভারত অসি এক্সপান্সনিজমদা থাজবা থম্বা লৈবাক অমা নত্তে, অদুবু দিবেলপমেন্ততা থাজবা থম্মি। মরম অসিনা ঐখোয়না 'সবকা সাথ, সবকা বিকাস' হায়বা প্রিন্সিপল অসিনা লমজিংলি। পুম্নমক্কা লোয়ননা অমত্তা ওইনা, পুম্নমক্কীদমক চাউখৎপা।

ঙসি ঐহাক্না ইন্দোনেসিয়াগী পার্লিয়ামেন্তকী ইকায় খুম্নরবা মেম্বরশিংগী মমাংদা লেপ্লিবা অসিসু হায়রিবা মন্ত্র অমসুং ৱাখল্লোন অসিদনি।

ইকায় খুম্নরবা মীহুৎশিং,

ঐখোয়গী কোনুংশিং অসি কিলোমীতর লিশিং কয়া লাপ্না লৈরবসু, সমুদ্রগী লম্বীদা ঐখোয়গী লৈবাক অনিগী মরক্তা লৈরিবা অরাপ্পা অসি কিলোমীতর ১৫০ খক্তনি। সমুদ্রশিংনা লৈবাক কয়াগী ঙমখৈ অমসুং অরাপ্পগী খুদম ওইনা থবক তৌরবসু, ভারত অমসুং ইন্দোনেসিয়াবু সমুদ্রনা কৈদৌনুংদা খায়দোক্তে। ঐখোয়গীদমক্তদি, সমুদ্র অসি অথিংবা নত্তে- মসি থোং অমনি। মসি ঐখোয়গী অপুনবা তুংলমচৎকী মরুওইবা শরুক্নি।

ভারত, ইন্দোনেসিয়া অমসুং ভারত মহাসাগর - হায়রিবা মমিংশিং অসিনা ঐখোয়গী লৈবাক অনিগী মরক্তা লৈনরিবা অচেৎপা মরীগী খুদম ওইরি। চহি লিশিং কয়াগী মমাংদগী, ঐখোয়গী পোর্তশিংনা মালেম অসি শম্নহল্লি, অমসুং ঐখোয়গী জহাজশিংনা ললোন-ইতিক, চৎনবী অমসুং ৱাখল্লোনশিংবু অরাপ্পা লৈবাকশিংদা পুদুনা চৎলি। সমুদ্রশিংদা ঐখোয়গী অপুনবা তুংলমচৎকীদমক অচৌবা খুদোংচাবশিং লৈ। অসিগুম্বা অচৌবা সমুদ্র অসিদগী ঐখোয়গী ইথিল ফংদুনা ঐনা ঙসি অদোমবু ভারত-ইন্দোনেসিয়াগী মরী অসি হেন্না ৱাংখৎহন্নবা হায়জরি।

ইকায় খুম্নরবা মীহুৎশিং,

ভারত অমসুং ইন্দোনেসিয়ানা সমুদ্রদগী হেন্দোক্না মান্নবা লৈ - ঐখোয়না মান্নবা পুৱারী অমা লৈ। ঐখোয়গী মরী অসি রামায়ন অমসুং মহাভারতকী মতম চুপ্পগী লেগেসীদা য়ুম্ফম ওইরি। চহি চা কয়াগী মমাংদা মসিগী সমুদ্র মপালশিং অসিদা নালন্দাগী লৌশিং-জ্ঞানগী মওংদা য়ৌরকখি। ৱায়াংগী চৎনবীদা, জগোয় অমসুং ঈশৈদা।

বোরোবুদুর অমসুং প্রম্বাননগুম্বা চাউরবা মোন্যুমেন্তশিংনা ঐখোয়বু শম্নহল্লি। গারুদা, ইন্দোনেসিয়াগী নেস্নেল এম্বেলমনা ঐখোয়বু অমত্তা ওইনা পুনশিল্লি। বালি জাত্রা ফেস্তিবেলগী ৱাখল্লোন অমসুং থৌরমগী স্পিরিৎনা ঐখোয়বু শম্নহল্লি। অদুগা চাবা-থকপশিংগী মতাংদা, ক্রুপুক নৎত্রগা পাপাদ অসি হেন্না ক্রঞ্চি ওইবরা হায়বদা অরুবা ওই। অদুবু ৱাফম অমদি চুম্মি- মাসালা অমসুং বুম্বু অনিমক্না ঐখোয়গী পুন্সিদা মগুন অমসুং মহাও হাপচিল্লি।

মরুপশিং,

ভারতকী নোংচুপ থংবা সমুদ্র মপালদা লৈবা গুজরাত অসি ঐহাক্কী পোক্নফম রাজ্যনি। চহি চা কয়াগী মমাংদা গুজরাতকী ললোন-ইতিক তৌবা মীওইশিং অমসুং সুফিগী লম্বোইবশিংনা ইন্দোনেসিয়াদা সমুদ্রগী লম্বীদা চৎলম্মি অমসুং মখোয়গা লোয়ননা ইস্লামগী পাউজেল অমসুং ভেল্যুশিং পুশিল্লম্মি। ঙসিসু গুজরাতকী ফজরবা পতোলা তেক্সতাইলশিং অসি মফম অসিদা ইকায় খুম্নবা অমসুং মগুন লৈবগী খুদম ওইনা লৌনরি। মখোয়গী ইথিল অসি ইন্দোনেসিয়াগী বাতিক ক্রাফমেনশিপকী মরাং কায়রবা চৎনবীদা হৌজিক ফাওবা উবা ফংলি।

মসিনা মরম ওইদুনা রাস্ত্রপতি সুকার্নোনা হায়রম্মি, “ইন্দোনেসিয়া অমসুং ভারতকী মীয়াম অসি ঈ অমসুং চৎনবীগী মরীনা অমত্তা ওইনা পুনশিল্লি।”

মরুপশিং,

ঐখোয়গী ইমা-ইপাশিংনা পুন্না থেংনখিবা কয়া অমা লৈরি। ঐখোয়গী মীয়াম অনিমক্না মপানগী লৈঙাক্কী মখাদা মতম শাংনা লৈখি। ঐখোয়গী লৈবাক অনিমক অসিসু চাউরাক্না মতম অমত্তদা নীংতম্বা ফংখি- ১৯৪৫দা ইন্দোনেসিয়া অমসুং ১৯৪৭দা ভারত। অমসুং ইন্দোনেসিয়াগী নীংতম্লবা লৈবাক্কী মশাগী লৈঙাক লৈবগী ৱাহং থোরকপা মতমদা, ভারতনা ইন্দোনেসিয়াগী নীংতম লান্থেংবু শৌগৎপদা চেৎনা লেপখি অমসুং য়ুনাইতেদ নেসন্সতা ইন্দোনেসিয়াগী মরমদা অকনবা ভোইস থমখি।

হায়রিবা মশক থোকপা মতম অদুদা, ইকায় খুম্নরবা বিজু পত্নাইকনা লৌখিবা থৌদাং অসি ঐখোয়গী পুৱারীগী অঙকপা পন্দুপ অমা ওইরি। মহাক্না প্রধান মন্ত্রী সুতান শাহরির অমসুং উপ-রাস্ত্রপতি মোহমদ হত্তাবু ভারত্তা ঙাকশেলগা লোয়ননা পুরকখিবা থৌনা অদুনা ঐখোয়গী লৈবাক অনিগী মরক্তা হেন্না চেৎশিল্লবা মরী অমা শেমগৎখি।

ইকায় খুম্নরবা মীহুৎশিং,

ঐখোয়বু হেন্না নকশিন্নহল্লিবা অতোপ্পা মরুওইবা মরী অমা হায়রগদি দিমোক্রেসি অমসুং য়ুনিতী ইন দাইভর্সিতী লৈবগী ঐখোয়গী মান্নবা ফিরপ অদুনি। ভারত অসি মালেমগী খ্বাইদগী চাউবা দেমোক্রেসী অমসুং দেমোক্রেসীগী মমানি। ইন্দোনেসিয়ানা মালেমগী খ্বাইদগী চাউবা দেমোক্রেসীগী অহুমশুবা লৈবাক ওইরি।

ভারত অসি লোল চাম্মরোম অমসুং চৎনবী কয়াগী লমদম ওইরি, অমসুং ইন্দোনেসিয়ানা লোল চাম্মরোম অমসুং তোঙান তোঙানবা চৎনবী কয়াগা লোয়ননা থৌজাললি। ভারতনা ভসুধৈব কুতুম্বকমগী মতম চুপ্পগী ওইবা ৱাখল্লোননা লমজিংলি - মালেম অসি ইমুং অমখক্তনি - অদুগা ইন্দোনেসিয়ানা ভিন্নিকা তুংগল ইকা - য়ুনিতী ইন দাইবর্সিতীগী ৱাংঙুলোলনা ইথিল পীরি। ঐখোয়গী লৈবাক অনিমক্না মসিগী দাইভর্সিতী অসি ঐখোয়গী দেমোক্রেসী অমসুং ঐখোয়গী অমত্তা ওইবগী য়ুম্ফম ওইহল্লি।

ইকায় খুম্নরবা মীহুৎশিং,

ইকায় খুম্নরবা স্পিকরনা নৌনা নিংশিংলকখিবগুম্না, ভারতনা অহানবা রিপব্লিক দে কুমজা ১৯৫০দা পাংথোকখিবা অদুদা রাস্ত্রপতি সুকার্নোনা মরুওইবা মীথুংলেন ওইখি। অমসুং চপ মান্নবা মতম অদুদা, বন্দুং কনফরেন্সতা, রাস্ত্রপতি সুকার্নো অমসুং প্রধান মন্ত্রী নেহরুনা মালেমদা ময়েক শেংনা পাউজেল পীখি মদুদি - নীংতম্বা লৈবাক্কী মশাগী ৱারেপ লৌবগী সোভরেন রাইৎ লৈ।

ইকায় খুম্নরবা মীহুৎশিং,

ইন্দোনেসিয়ানা রিফোর্মসিগী খুত্থাংদা মালেমদা দিমোক্রেসীগী অশেংবা পাঙ্গল অদু উৎখ্রে। হৌখিবা চহি তরাগী খুজিং অনি অসিদা, মাগী শেন্মিৎলোন অসি য়াম্না থুনা চাউখৎলকখি, মসিনা মীওই মিলিয়ন কয়া অমা লায়রবা কোকহল্লে।

ভারতকী দেমোক্রেতিক্কী খোঙচৎ অসিসু মান্নবা ৱারীনি। ঙসিদি, ভারত অসি মালেমগী খ্বাইদগী য়াংনা চাউখৎলক্লিবা মরুওইবা ইকোনোমী ওইরে, অমসুং হৌখিবা চহি তরা অসিদা, ভারত মচা মিলিয়ন ২৫০ হেন্না লায়রবা ফীভমদগী থোরকহনখ্রে।

মরম অসিনা ঐহাক্কী মরুপশিং, ভারত অমসুং ইন্দোনেসিয়া পুন্না লেপমিন্নরকপা মতমদা, মখোয়না মালেমগী থাজবা অদু মপাঙ্গল কনখৎহল্লি মদুদি দিমোক্রেসীনা খুদোংচাবশিং শেম্মী, অমসুং দিমোক্রেসীনা থাজবা পোকহল্লি,

দেমোক্রেসীনা তুংলমচৎ শেম্মী। অমসুং ঐহাক্না থাজবা থম্লি মদুদি ঐখোয়গী মান্নবা দেমোক্রেসীগী মগুনশিং অমসুং অপুনবা এস্পিরেসনশিংনা ভারত-ইন্দোনেসিয়াগী মরী অসি অনৌবা অৱাংবা থাক্তা পুখৎকনি।

ইকায় খুম্নরবা মীহুৎশিং,

ঐখোয়না অনৌবা নীংতম্বা লৈবাকশিং ওইনা পুন্না হৌখিবা খোঙচৎ অসিনা অথুবা মতমদা নীংতম্বা চহি ১০০ মপুং ফারগনি। ইন্দোনেসিয়াদা, অদোম্না ইন্দোনেসিয়া ইমাস ২০৪৫গী অচৌবা মঙলানগা লোয়ননা খোঙজেল য়াংনা চংশিল্লি। ভারত্তা ঐখোয়না ২০৪৭ ফাওবদা বিক্সিত ভারত অমা শেমগৎনবা ঐখোয়গী ৱারেপ অদুগা লোয়ননা মাংলোমদা চংশিল্লি। ঐখোয়না নেস্নেল এস্পিরেসনশিং অসি ফংনবা হোৎনবদা, ঐখোয়গী লৈবাক অনি অসিনা মান্নবা পান্দমশিং অসি ফংনবা অমনা অমবু মপাঙ্গল কনখৎহনবা ঙমগনি।

ঐখোয়না মালেমগী খ্বাইদগী নহা ওইরিবা খুন্নাইশিংগী মনুংদা অমা ওইরি। ঐখোয়না খ্বাইদগী খোঙজেল য়াংনা চাউখৎলক্লিবা অচৌবা ইকোনোমীশিংগী মরক্তা অমা ওইরি। ঐখোয় অনিমক মরুওইবা সমুদ্রগী শক্তিশিংনি। ঐখোয়না গ্লোবেল সাউথকী মপাঙ্গল কনবা ভোইসনি। ঐখোয়না অরিবা সিভিলাইজেসনশিংনি, অমসুং মতম অমত্তদা, তুংলমচৎ শেম্বদা মহৌশাগী ওইবা পার্তনরশিংনি।

খোঙচৎ অসিদা, ঐখোয় অমগা অমগগী পার্তনর ওইবতা নত্তনা, অমনা অমগী শক্তিগী সোর্সসু ওইবীয়ু। অসিগুম্বা ৱাখল্লোন অসিগা লোয়ননা ঙসি রাস্ত্রপতি প্রাবোৱোগা লোয়ননা ঐহাক্না কুপ্না খন্ন-নৈনখি। ঐখোয়গী পান্দমশিং অসি য়াম্না ময়েক শেংই। ঐখোয়না ভারত অমসুং ইন্দোনেসিয়াগী মরক্তা লৈনরিবা অফবা মঙলান অমসুং অমগা অমগা থাজবা অসি ঐখোয়গী মীয়ামগীদমক অনৌবা খুদোংচাবদা ওন্থোক্কদবনি।

হৌখিবা চহিদা ঐখোয়গী লৈবাক অনিগী মরক্তা লৈবাক অনিগী ওইবা ত্রেদ অসি য়ু.এস. দোল্লর বিল্লিয়ন ২৫ রোম য়ৌখি। ঙসি ইন্দোনেসিয়াদা ভারতকী কম্পেনী ১০০ হেন্না থবক তৌরি। ঐখোয়না য়াম্না থুনা পুন্না মাংলোমদা চংশিল্লি হায়বসিদা করিসু চিংননিংঙাই লৈতে। অদুম ওইনমক, লাক্কদৌরিবা চহিশিংদা হেন্না চাউবা অমসুং ঙমখৈ লৈতবা খুদোংচাবশিং ঐখোয়না ফংলগনি।

ইকায় খুম্নরবা মীহুৎশিং,

ভারত অমসুং ইন্দোনেসিয়ানা ফ্যুচরস্তিক সেক্তরশিংদা পুন্না ঙমখৈ লৈতবা অৱাংবা থাক্তা য়ৌনবা পোতেন্সিএল লৈ। অসিগুম্বা খুদম অমা হায়রগদি স্পেস তেক্নোলোজীনি। ঙসি মালেম পুম্বনা স্পেস সেক্তরদা ভারতকী তৌবা ঙম্বশিং খঙলে। অমসুং ভারতনা ইন্দোনেসিয়াবু মসিগী খোঙচৎ অসিদা মহৌশাগী ওইবা পার্তনর অমা ওইনা লৌনরি।

চহি কয়াগী মমাংদগী, বিয়াকতা লৈবা সেতলাইত ত্রেকিং ফেসিলিতীশিংনা ভারতকী স্পেস প্রোগ্রামদা মতেং পাংদুনা লাক্লি। ভারতনা ইন্দোনেসিয়াগী সেতেলাইত কয়া অমসু থাগৎখ্রে অমসুং স্পেস সেক্তরদা কেপাসিতী বিল্দিংদা মতেং পাংলি। হৌজিক্তি অসিগুম্বা কোওপরেসন অসি মথংগী থাক্তা পুখৎপগী মতম ওইরে। সেতেলাইত এপ্লিকেসনশিংদা ঐখোয়না পুন্না থবক তৌমিন্নবা য়াই, অমসুং ইন্দোনেসিয়াদা সেতেলাইত থাগৎপগী ফেসিলিতীশিং শেমগৎপদা ভারতনা মতেং পাংনবা শেম-শারি।

মরুপশিং,

ঐখোয়গী মরাং কায়রবা মেরিতাইম হেরিতেজ অসি ঙাক-শেন্দুনা থম্নবা অমসুং থৌরম অসি পাংথোক্নবগীদমক, ঐখোয়না চহি ৫০০০গী মমাংগী পোর্ত সিতি অমা ওইরিবা লোথালদা নেস্নেল মেরিতাইম হেরিতেজ কমপ্লেক্স অমা শেমগৎলি।

ঐহাক্না ইন্দোনেসিয়ানা মসিগী মরুওইবা প্রোজেক্ত অসিদা ঐখোয়গা পুন্না চৎমিন্নবা পাম্মি।

ইকায় খুম্নরবা মীহুৎশিং,

ভারত অমসুং ইন্দোনেসিয়ানা মতম পুম্নমক্তা তেরোরিজমগুম্বা ইসুশিংদা মান্নবা মীৎয়েং থম্লি। হৌখিবা চহিদা, পহালগামদা তমথিরবা তেরোরিস্ত এতেক থোকখিবা মতমদা, ইন্দোনেসিয়ানা ভারতকা লোয়ননা লেপখি। ঐহাক্না রাস্ত্রপতি প্রাবোৱো অমসুং ময়াম পুম্নমকপু মতেং পাংবীবগীদমক্তা ঐহাক্কী থাগৎপা ফোংদোকচরি।

ঐখোয়গী লৈবাক অনিমক্না জোইন্ত ৱার্কিং গ্রুপকী খুত্থাংদা তেরোরিজম থেংননবা পুন্না থবক তৌমিন্নরি। ইন্তেলিজেন্স শেয়র তৌবা, সাইবর থ্রেৎ, তেরোরিস্ত ফাইনান্সিং অমসুং দি-রদিক্যলাইজেসনগুম্বা লমশিংদা মতেং পীনবা হেনগৎহন্দুনা ঐখোয়না মালেম শীনবা থুংনা শান্তিগী মপাঙ্গল কনখৎহনবা ঙমগনি।

ইকায় খুম্নরবা মীহুৎশিং,

ঙসিদি, মালেমগী ওইবা ফীভম অসি য়াম্না থুনা হোংলক্লি, অমসুং মসিগী মতাংদা, ঐখোয়গীগুম্বা চাউখৎলক্লিবা লৈবাকশিংনা মালেমগী থৌওংশিংদা মান্নবা শরুক য়াবা অমসুং হেন্না চাউবা থৌদাং লৌবা পাম্লি। মালেমগী ওইরক্লিবা ফীভম অসিদা, ভারতনা য়ুনাইতেদ নেসন্স সেক্যুরিতী কাউন্সিলদা রিফোর্মশিং পাংথোকপদা অথিংবা থম্লোই হায়না চেৎনা থাজৈ।

২০২২দা ইন্দোনেসিয়াগী জি-২০ প্রসিদেন্সী অমসুং ২০২৩দা ভারতকী জি-২০ প্রসিদেন্সী অনিমক্না চাউখৎলক্লিবা লৈবাকশিংগী মরুওইবশিং মালেমগী খন্ন-নৈনবগী ময়াইদা পুখৎনবা হোৎনখি।

ইন্দোনেসিয়াগী বেবাস-অক্তিব (মনিংতম্বা অমসুং এক্তিব ফোরেন পোলিসী) গী চৎনবী অমসুং স্ত্রেতেজিক ওতোনোমীদা ভারতকী অচেৎপা ফিরেপ অসিনা মালেমগী ইসুশিংদা ঐখোয় পুন্না লেপমিন্নবগীদমক মপাঙ্গল কনবা য়ুম্ফম অমা পীরি।

ভারত অসি ফ্রী, ওপন অমসুং ইনক্লুসিব ইন্দো-পেসিফিক্কী অচৌবা শৌগৎপা অমনি। ভারতনা ইন্দো-পেসিফিক লমদমদা নেভিগেসনগী নীংতম্বা লৈহন্নবা হোৎনরি। মসি ফংনবগীদমক্তা, ঐখোয়না আসিয়ানবু ঐখোয়গী এপ্রোচকী ময়াইদা থম্লি। ঐখোয়গী এক্ত ইস্ত পোলিসী অসিসু আসিয়ান-সেন্ত্রিক ওই। ভারত অমসুং আসিয়ানগী মরক্তা কম্প্রিহেন্সিব স্ত্রেতেজিক পার্তনরশিপ অসি মখা তানা মপাঙ্গল কনখৎলক্লি। মরম অদুনা, ভারত অমসুং ইন্দোনেসিয়ানা মসিগী মাইকৈ অসিদা লেপ্পা লৈতনা পুন্না থবক তৌমিন্নবা অসি য়াম্না মরু ওই।

ইকায় খুম্নরবা মীহুৎশিং,

ঐখোয়গী মমাংদা অতোপ্পা মরু ওইবা খুদোংচাবা অমা লৈরি। হৌখিবা চহিদা, ইন্দোনেসিয়ানা ব্রিক্সকী মপুং ফাবা মেম্বর অমা ওইখি অমসুং চহি অসিদা ভারতনা ব্রিক্সকী প্রসিদেন্সী পায়রি। ঐখোয়না ব্রিক্স প্লেৎফোর্ম অসি হেন্না প্রেক্তিকেল ওইহন্নবা, হেন্না বেলেন্স ওইহন্নবা অমসুং গ্লোবেল সাউথকী মথৌ তাবশিংদা হেন্না রেস্পোন্সিব ওইহন্নবা পুন্না থবক তৌমিন্নবা য়াই।

ইকায় খুম্নরবা মীহুৎশিং,

ঙসি, ইন্দোনেসিয়াগী পার্লিয়ামেন্তকী মীহুৎ পুম্নমক্কী মমাংদা, ঐহাক্না ভারত-ইন্দোনেসিয়া পার্তনরশিপকী অনৌবা চহিচা অমগীদমক হায়জরি। গঙ্গা অমসুং মহকাম তুরেলগী ঈশিংগুম্না ঐখোয়গী সিভিলাইজেসন্না ৱাখল্লোন, থাজবা, ললোন-ইতিক অমসুং চৎনবীবু চহি চা কয়া শম্নহল্লি। ঙসি, পুৱারী ওইরবা মরী অসিবু তুংলমচৎকীদমক অনৌবা ইনর্জীগা লোয়ননা শাগৎনবা, ঐহাক্না গঙ্গা-মহাকম ভিজন অসি ময়াম পুম্নমক্কী মমাংদা পুথোকচবা পাম্মি।

মসিগী মীৎয়েং অসিনা ঐখোয়গী পার্তনরশিপ অসি হৌজিক্কী মতমগী মথৌ তাবখক্তদা য়ুম্ফম ওইহন্দ্রে। মসিনা তুংগী মীরোনগীদমক্তা শান্তি, চাউখৎপা, সেক্যুরিতী অমসুং পুন্না চাউখৎপগী লম্বী য়াৎলি।

অহানবদা... সিভিলাইজেস্নেল কন্নেক্সন

ঐখোয়না ঐখোয়গী সিভিলাইজেস্নেল লিঙ্কশিং অসি নহা ওইরিবা মীরোলশিংগী ৱাখল্লোনগা শম্নহল্লগনি। রামায়নদগী হৌরগা বোরোবুদুর ফাওবা, অমসুং সমুদ্রগী খোঙচৎশিংদগী হৌরগা কলচরেল একচেঞ্জ ফাওবা, ঐখোয়না ঐখোয়গী পুৱারীবু তুংলমচৎকী শক্তিগী হৌরকফম অমা ওইনা ওন্থোক্কনি। মসি ফংনবা ঐখোয়না ইন্দিয়া-ইন্দোনেসিয়া সিভিলাইজেসন দাইলোগ অমা হৌদোক্কদবনি।

অনিশুবদা... শেয়র দিবেলপমেন্ত

 ভারত অমসুং ইন্দোনেসিয়ানা চাউখৎলবা লৈবাক অমা ওইবগী মখোয়গী খোঙচৎ অসিদা লেপ্পা লৈতনা শরুক য়ামিন্নগনি। ইন্দোনেসিয়াগী "ইন্দোনেসিয়া ইমাস ভিজন" অমসুং ভারতকী "ভিক্সিৎ ভারত ভিজন"না অমগা অমগা মপাঙ্গল হাপচিন্দুনা অমদি ঐখোয়গী মীয়ামগীদমক অনৌবা খুদোংচাবশিং শেমগৎতুনা অমনা অমগী প্রোগ্রেসপু মপাঙ্গল কনখৎহল্লগনি অমসুং খুমাং চাউশিলহল্লগনি।

অহুমশুবদা... সেক্যুরিতী অমসুং স্ত্রেতেজিক ত্রস্ত

ঐখোয়না ঐখোয়গী দিফেন্স অমসুং সেক্যুরিতী কোওপরেসনবু অনৌবা অৱাংবা থাক্তা পুখৎকনি। পুন্না, ঐখোয়না ঐখোয়গী নেস্নেল কেপাসিতীশিং মপাঙ্গল কনখৎহল্লগনি অমসুং তেরোরিজম, সাইবর থ্রেতশিং, মেরিতাইম চেলেঞ্জশিং অমসুং অনৌবা সেক্যুরিতী রিস্কশিং থেংনগনি। ভারত অমসুং ইন্দোনেসিয়াগী মরক্তা লৈরিবা স্ত্রেতেজিক ত্রস্ত অসি ইন্দো-পেসিফিক লমদমদা স্তেবিলিতীগীদমক অকনবা য়ুম্ফম অমা ওইরগনি।

মরিশুবদা... মেরিতাইম চাউখৎপা

অচৌবা মেরিতাইম নেসন অনি ওইনা, ঐখোয়না ঐখোয়গী শরুক য়ামিন্নরিবা মেরিতাইম জিওগ্রাফি অসি শরুক য়ামিন্নরিবা চাউখৎপা অমা ওইহল্লগনি। সবাংদগী গ্রেৎ নিকোবর ফাওবা, অমসুং মালাক্কা গেৎৱেদগী ইন্দো-পেসিফিক ফাওবদা, ঐখোয়না কনেক্তিবিতী, লোজিস্তিক্স, ব্লু ইকোনোমী, মেরিতাইম সেক্যুরিতী, অমসুং ত্রেদ রেসিলিয়েন্সতা অনৌবা খুদোংচাবশিং শেম্লগনি।

মঙাশুবদা.... গ্লোবেল সাউথকী ভোইস

ঐখোয়না গ্লোবেল সাউথকী এস্পিরেসনশিংদা হেন্না মপাঙ্গল কনখৎহল্লগনি। ঐখোয় পুন্না চাউখৎ-থৌরাং অসি ইনক্লুসিব ওইগদবা, তেক্নোলোজী অসি য়ৌগদবা, অমসুং মালেমগী লৈঙাক অসি হেন্না অচুম্বা, চপ মান্নবা অমসুং মীহুৎ ওইগদবা মালেমগী ওইবা কাংলোন অমগী মায়কৈদা থবক তৌমিন্নগনি।

মরুপশিং,

ভারত অমসুং ইন্দোনেসিয়ানা পুন্না মীওইবা খুন্নাইগী শরুক মঙা থোকপগী অমা ওইরি। ঐখোয়গী পার্তনরশিপ অসি লৈবাক অনিগী মরক্তা লৈনরিবা মরী খক্তা নত্তে, মসি ইন্দো-পেসিফিক্কী তংদু লৈতাবা, গ্লোবেল সাউথকী শক্তি অমসুং মালেমগী তুংলমচৎকীদমক অপুনবা থাজবা অমা ওইরি। ঐখোয়গী পুৱারী ওইরবা মরুপ-মপাং ওইবগী মরী অসি অনৌবা চহিচা অমদা পুরসি। গঙ্গা-মহাকম ভিজন অসি মঙফাওনহন্নবা ঐখোয় পুন্না থবক তৌমিন্নসি।

ইকায় খুম্নরবা মীহুৎশিং,

ভারত্তা, শক্নাইরবা কবি-ঋসি তুলসিদাসনা অসুম্না ইরম্মি:

जानें बिनु न होइ परतीती।

जानें बिनु न होइ परतीती।

बिनु परतीति होइ नहिं प्रीती॥

মসিনা তাকপদি, মীওই অমনা অমবু তশেংনা খঙদ্রবদি, মখোয় অমনা অমবু থাজবা থম্বা ঙম্লোই; অমসুং থাজবা য়াওদ্রবদি, নুংশিবা লৈরোই।

ইন্দোনেসিয়াদা অসিগুম্বা ৱাখল্লোন অসিগা চপ মান্নবা পাউরৌ অমা লৈ হায়না ঐঙোন্দা পাউদমখি:

"ताक केनाल माका ताक सायांग"

—কনাগুম্বা অমনা মীওই অদুবু মুন্না খঙদনা তশেংনা নুংশিবা ঙম্লোই।

মরম অসিনা,

ঐখোয়না ঐখোয়গী মীয়ামগী মরক্তা লৈনরিবা মরী অসি মখা তানা চেৎশিলহন্নবা ৱারেপ লৌরে। ঙসি নুমিদাং, রাস্ত্রপতি প্রাবোৱো অমসুং ঐহাক্না ইন্দোনেসিয়াদা লৈরিবা ভারত মচাশিংগা উনগনি। হয়েং, রাস্ত্রপতি প্রাবোৱো অমসুং ঐহাক্না প্রম্বাননদসু চৎকনি, মফম অসিদা ঐখোয়না য়ু.এন.ই.এস.সি.ও.গী ৱার্ল্দ হেরিতেজ সাইত অসিগী কঞ্জার্বেসন অমসুং রিস্তোরেসন প্রোজেক্ত হৌদোক্কনি। ভারত অমসুং ইন্দোনেসিয়ানা পুৱারীনা ঐখোয়দা থাজবা পীখিবা মমল য়াম্লবা হেরিতেজ অসিবু ঙাক-শেন্দুনা থম্বদা মপুং ফানা অচেৎপা ৱাফম থম্লি।

ইকায় খুম্নরবা মীহুৎশিং,

ঙসি, ঐহাক্না হাউস অসিগী ইকায় খুম্নরবা মেম্বর পুম্নমকপু ভারত্তা লাক্নবা বার্তন তৌরি। ঐহাক্না অদোমবু অদোমগী ইমুং-মনুং অমসুং মরুপ-মপাংশিংগা লোয়ননা লাক্নবগীদমক থম্মোয় শেংনা কৌজরি। ভারতকী মীয়াম্না অদোমবু থম্মোয় শেংনা তরাম্না ওকপা ফংজবদা নুংঙাইবা ফংগনি।

ঐহাক্না থাজবা থম্লি মদুদি ঐখোয়না মিত্র সেলামানিয়া - পার্তনরস ফোরএভর ওইদুনা লৈহৌরগনি। পুন্না, ঐখোয়না ভারত অমসুং ইন্দোনেসিয়াগী মীয়ামগীদমক পুন্না চাউখৎপা তুংলমচৎ অমা শেম্লগনি। ৱাহৈশিং অসিগা লোয়ননা ঐহাক্না ঐহাক্কী ৱারোল লোইশিনজরি।

লোং লিব ইন্দোনেসিয়া!

ভারত মাতা কী জয়!

অদোমবু থাগৎচরি।

খঙহঞ্জবা: মসি প্রধান মন্ত্রীগী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

*****