প্রধান মন্ত্রী শ্রী নরেন্দ্র মোদীনা ঙসি জাকার্তাদা ভারত মচাশিংনা শিনবা তরাম্না ওকপগী থৌরম অমদা শরুক য়াখ্রে। থৌরম অদুগীদমক য়ৌরকপদা, মহাকপু মশিং য়াম্লবা ইন্দিয়ন দাইস্পোরাগী মীহুৎশিং অমসুং ভারতকী ইন্দোনেসিয়ন মরুপশিংনা হরাও তয়াম্না তরাম্না ওকখি। অখন্নবা মতৌ অমা ওইনা, থৌরম অদুদা ইন্দোনেসিয়াগী রাস্ত্রপতি, প্রাবোৱো সুবিয়ান্তোসু প্রধান মন্ত্রীগা লোয়ননা শরুক য়াখি।

মীয়াম তিনখিবা অদুদা ৱা ঙাংলদুনা, প্রধান মন্ত্রীনা মীয়ামদা তরাম্না ওকপিবগীদমক থাগৎপা ফোংদোকখি। প্রধান মন্ত্রীনা রাস্ত্রপতি প্রাবোৱোনা শরুক য়ানবা লাকপগীদমক থাগৎপা ফোংদোকখি, প্রধান মন্ত্রীনা মহাকপু অফবা লুচিংবা অমসুং ভারতকী অশেংবা মরুপ অমনি হায়খি। মহাক্না ইন্দোনেসিয়াগী চাউখৎপা অমসুং নুংঙাই-য়াইফবদা শরুক তম্বগীদমক অমসুং লৈবাক অনিগী মরক্তা মরুপ-মপাং ওইবগী মরীগী অহিংবা থোং অমা ওইনা থবক তৌবগীদমক ইন্দিয়ন দাইস্পোরাশিংদা থাগৎপা ফোংদোকখি। মহাক্না ইন্দোনেসিয়াগা লোয়ননা নাকল অনিগী থাজনবা, মান্নবা হেরিতেজ অমসুং মেরিতাইম কন্নেক্তিবিতীদা য়ুম্ফম ওইবা লৈবাক অনিগী মরী হেন্না চেৎশিলহন্নবা ভারতকী অচেৎপা ফিরেপ অদু অমুক হন্না ফোংদোকখি। লৈবাক অনিগী মরক্তা লৈবা অরিবা সভ্যতাগী মরীশিং অদু পল্লদুনা মহাক্না হায়খি মদুদি বালি য়াত্রা, ভেসাক তীর্থ য়াত্রা অমসুং নালন্দা য়ুনিভর্সিতীগী খুত্থাংদা হৌজিক মতমগী মরীশিং অসিগুম্বা চৎনবীশিং অসিনা তোঙান তোঙানবা অমসুং অচৌবা মীয়ামগী মরক্তা লৈনরিবা মরী অসি মখা তানা মপাঙ্গল কনখৎহল্লি।

প্রধান মন্ত্রীনা হৌখিবা চহিশিংদা ভারতনা মাই পাক্না পায়খৎলিবা থবকশিং, নেক্স জেনরেসন ইনফ্রাস্ত্রকচর দিবেলপমেন্তদগী হৌদুনা স্তার্ত অপ রিভোলুসন অমসুং সোসিএল দিবেলপমেন্ত প্রোগ্রামশিংদা চাউনা পাকথোক চাউথোকহন্দুনা মীওই মিল্লিয়ন ২৫০ হেন্না লাইরবদগী থোরকপা ঙমহনখ্রে হায়না ফোংদোকখি। মহাক্না হায়খি মদুদি চহি কয়াগী মমাংদগী ভারত অসি মালেমগী খ্বাইদগী খোংজেল য়াংনা চাউখৎলক্লিবা মরুওইবা ইকোনোমী অমা ওইরি অমসুং মসিনা লৈবাক অসিবু মালেমগী চাউখৎপগী মরুওইবা দ্রাইভর অমা ওইহল্লি। মহাক্না হায়খি মদুদি ভারত্তা ওইরক্লিবা অহোংবশিং অসি মীওই বিল্লিয়ন ১.৪গী অপাম্বশিং ওইনা উবা তাই।

মহাক্না কম্ম্যুনিতীদা ভিক্সিত ভারত ২০৪৭ অমসুং ইন্দোনেসিয়া ইমাস ২০৪৫গী অপাম্বশিং অদু মপুং ফাহন্নবগীদমক তেংবাংনবা হায়খি। মহাক্না মখা তানা হায়খি মদুদি ভারতনা ইন্দোনেসিয়া অমসুং আসিয়ান লমদমদা চাউখৎপা অমসুং নুংঙাই য়াইফবা পুরক্নবা ফোর্স মল্তিপ্লাইয়র অমা ওইনা থবক তৌনবা থাজবা থম্লি।

ভারত অমসুং ইন্দোনেসিয়ানা চহি লিশিং অনিগী মথক্কী নক্নবা সভ্যতা, কলচরেল অমসুং পিপল-তু-পিপলগী মরী লৈনরি। ঙসি, ইন্দোনেসিয়াদা চাউরাক্না পর্সন ওফ ইন্দিণ ওরিজন (পি.আই.ও.)  ১৫০,০০০ অমসুং নন-রেসিদেন্ত ইন্দিয়ন (এন.আর.আই.) ১৫,০০০ রোম লৈরি। ইন্দিয়ন কম্ম্যুনিতীনা ইন্দোনেসিয়াগী ইকোনোমিক গ্রোথ অমসুং মল্তিকলচরেল খুন্নাইদা কান্নরবা কন্ত্রিব্যুসন পীদুনা ভারত অমসুং ইন্দোনেসিয়াগী মরক্তা মরুওইবা লিঙ্ক অমা ওইনা থবক তৌরি।

***