પ્રધાનમંત્રી શ્રી નરેન્દ્ર મોદીએ આજે જકાર્તામાં ભારતીય સમુદાયના એક સ્વાગત સમારોહમાં ભાગ લીધો હતો. આ કાર્યક્રમમાં તેમના આગમન પર, ભારતીય પ્રવાસીઓ અને ભારતના ઇન્ડોનેશિયન મિત્રોની વિશાળ જનમેદની દ્વારા તેમનું ભવ્ય અને ઉત્સાહભર્યું સ્વાગત કરવામાં આવ્યું હતું. એક વિશેષ આદરના પ્રતીક રૂપે, ઇન્ડોનેશિયા પ્રજાસત્તાકના રાષ્ટ્રપતિ મહામહિમ શ્રી પ્રબોવો સુબિયાન્ટો પણ આ કાર્યક્રમમાં પ્રધાનમંત્રી સાથે જોડાયા હતા.

મેદનીને સંબોધિત કરતા, પ્રધાનમંત્રીએ વાઇબ્રન્ટ સ્વાગત માટે સમુદાયનો આભાર માન્યો હતો. રાષ્ટ્રપતિ પ્રબોવોની ગરિમાપૂર્ણ ઉપસ્થિતિ બદલ તેમનો આભાર વ્યક્ત કરતા પ્રધાનમંત્રીએ તેમને એક મહાન નેતા અને ભારતના સાચા મિત્ર ગણાવ્યા હતા. તેમણે ઇન્ડોનેશિયાની પ્રગતિ અને સમૃદ્ધિમાં આપેલા યોગદાન બદલ અને બંને દેશો વચ્ચે મિત્રતાના જીવંત સેતુ તરીકે કામ કરવા બદલ ભારતીય પ્રવાસીઓની પ્રશંસા કરી હતી. તેમણે પરસ્પર વિશ્વાસ, સહિયારી વિરાસત અને દરિયાઈ જોડાણોના આધારે ઇન્ડોનેશિયા સાથેના દ્વિપક્ષીય સંબંધોને વધુ ગાઢ બનાવવા માટે ભારતની અડગ પ્રતિબદ્ધતાનો પુનરોચ્ચાર કર્યો હતો. બંને દેશો વચ્ચેના પ્રાચીન સાંસ્કૃતિક જોડાણો પર પ્રકાશ પાડતા તેમણે નોંધ્યું હતું કે બાલી યાત્રા, વેસાક તીર્થયાત્રા જેવી પરંપરાઓ અને નાલંદા યુનિવર્સિટી દ્વારા આધુનિક સમયના જોડાણો વિવિધ અને જીવંત લોકો વચ્ચેના પરસ્પર સંબંધોને પોષવાનું ચાલુ રાખે છે.

પ્રધાનમંત્રીએ તાજેતરના વર્ષોમાં ભારત દ્વારા હાંસલ કરવામાં આવેલી નોંધપાત્ર પ્રગતિ પર પ્રકાશ પાડ્યો હતો, જેમાં આગામી પેઢીના ઇન્ફ્રાસ્ટ્રક્ચર વિકાસથી લઈને સ્ટાર્ટ-અપ ક્રાંતિ અને સામાજિક વિકાસ કાર્યક્રમોમાં નોંધપાત્ર વિસ્તરણનો સમાવેશ થાય છે, જેણે 250 મિલિયન (25 કરોડ) થી વધુ લોકોને ગરીબીમાંથી બહાર આવવા માટે સક્ષમ બનાવ્યા છે. તેમણે નોંધ્યું હતું કે ભારત હવે કેટલાક વર્ષોથી વિશ્વમાં સૌથી ઝડપથી વિકસતું મોટું અર્થતંત્ર રહ્યું છે, અને આનાથી દેશ વૈશ્વિક વિકાસનો એક મુખ્ય ચાલક બન્યો છે. તેમણે વ્યક્ત કર્યું કે ભારતમાં થઈ રહેલા ફેરફારોને ગતિશીલ બનેલી 1.4 અબજ લોકોની આકાંક્ષાઓ તરીકે જોવા જોઈએ.

તેમણે સમુદાયને વિકસિત ભારત 2047 અને ઇન્ડોનેશિયા ઇમાસ 2045 ની સહિયારી આકાંક્ષાઓને સાકાર કરવા માટે યોગદાન આપવા આહવાન કર્યું હતું. તેમણે વધુમાં નોંધ્યું હતું કે ભારત ઇન્ડોનેશિયા અને આસિયાન (ASEAN) ક્ષેત્રમાં પ્રગતિ અને સમૃદ્ધિ લાવવા માટે 'ફોર્સ મલ્ટિપ્લાયર' તરીકે કામ કરવા પ્રતિબદ્ધ છે.

ભારત અને ઇન્ડોનેશિયા બે હજાર વર્ષ કરતાં વધુ સમયના ગાઢ સભ્યતા, સાંસ્કૃતિક અને લોકો વચ્ચેના પરસ્પર સંબંધો ધરાવે છે. આજે, ઇન્ડોનેશિયા આશરે 150,000 ભારતીય મૂળના લોકો (PIOs) અને લગભગ 15,000 બિન-નિવાસી ભારતીયોનું ઘર છે. ભારતીય સમુદાય ઇન્ડોનેશિયાના આર્થિક વિકાસ અને બહુસાંસ્કૃતિક સમાજમાં મૂલ્યવાન યોગદાન આપવાનું ચાલુ રાખે છે અને ભારત તથા ઇન્ડોનેશિયા વચ્ચે એક મહત્વપૂર્ણ કડી તરીકે કામ કરે છે.

SM/NP/JD