ફાર્માસ્યુટિકલ સપ્લાય ચેઈનને મજબૂત કરવા અને વ્યાપારની સરળતાને સુગમ બનાવવા તરફના એક મહત્વપૂર્ણ પગલાં તરીકે, આરોગ્ય અને પરિવાર કલ્યાણ મંત્રાલયે મહારાષ્ટ્રમાં તાજેતરમાં ઉદ્ઘાટન કરાયેલા નવી મુંબઈ એરપોર્ટ દ્વારા દવાઓની આયાત સક્ષમ બનાવી છે.

ડ્રગ્સ રૂલ્સ, 1945 ના નિયમ 43A માં કરવામાં આવેલા સુધારામાં હવે નવી મુંબઈને એવા એરપોર્ટની યાદીમાં સામેલ કરવામાં આવ્યું છે કે જેના દ્વારા દેશમાં દવાઓની આયાત કરી શકાય છે. ડ્રગ્સ એન્ડ કોસ્મેટિક્સ એક્ટ, 1940 ની જોગવાઈઓ હેઠળ ડ્રગ્સ ટેકનિકલ એડવાઇઝરી બોર્ડ (DTAB) સાથે પરામર્શ કર્યા બાદ આ નોટિફિકેશન (જાહેરનામું) બહાર પાડવામાં આવ્યું છે. (ગેઝેટ નોટિફિકેશન આ લિંક પર ઉપલબ્ધ છે: https://egazette.gov.in/WriteReadData/2026/274223.pdf)

આ સુધારા સાથે, નવી મુંબઈ એરપોર્ટ ડ્રગ્સ રૂલ્સ, 1945 હેઠળ દવાઓની આયાત માટે મંજૂરી મેળવનારા નિયુક્ત એરપોર્ટની યાદીમાં જોડાઈ ગયું છે. આ નવીનતમ ઉમેરા સાથે પોર્ટ ઓફ એન્ટ્રી (રોડ/રેલવે/જહાજ/હવાઈ માર્ગ) ની કુલ સંખ્યા 42 થઈ ગઈ છે. આ સુધારાથી ફાર્માસ્યુટિકલ કન્સાઇનમેન્ટ્સની સરળ હેરફેર સુગમ બનવાની, લોજિસ્ટિક્સ ઇન્ફ્રાસ્ટ્રક્ચર મજબૂત થવાની અને ભારતમાં દવાઓની આયાત માટે નવો વિકલ્પ ઉમેરીને આયાતકારોને વધુ સુગમતા મળવાની અપેક્ષા છે.

આ પહેલ નિયમનકારી માળખાને મજબૂત કરવા, વ્યાપાર સુવિધામાં સુધારો કરવા અને આયાતી દવાઓની અસરકારક નિયમનકારી દેખરેખ સુનિશ્ચિત કરવાની સાથે વ્યાપાર કરવાની સરળતાને પ્રોત્સાહન આપવાના સરકારના સતત પ્રયાસોને અનુરૂપ છે.

SM/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com