மாண்புமிகு பிரதமர் மார்க் கார்னி அவர்களே,

இரு நாடுகளின் சிறப்புப் பிரதிநிதிகளே,

ஊடக நண்பர்களே,

வணக்கம்!

பிரதமர் கார்னியை இந்தியாவிற்கு வரவேற்பதில் நான் மட்டற்ற மகிழ்ச்சி அடைகிறேன். பிரதமராக அவர் இந்தியாவிற்கு வருவது இதுவே முதல் முறை. இதை எங்கள் இருதரப்பு உறவில் ஒரு முக்கிய மைல்கல்லாகக் கருதுகிறோம்.

கடந்த ஆண்டு கனடாவில் நடைபெற்ற ஜி7 உச்சிமாநாட்டில், எனக்கும் எனது தூதுக்குழுவினருக்கும் அவர் அன்பான வரவேற்பு அளித்தார். அந்த அன்பையும் உபசரிப்பையும் இன்று திருப்பிச் செலுத்துவது எனது பாக்கியம். உலகில் மிகச் சிலருக்கே, இரண்டு நாடுகளின் மத்திய வங்கி நிறுவனங்களின் தலைமைப் பதவிகளைத் தங்கள் சுயவிவரத்தில் பிரதிபலிக்கும் நபர்கள் உள்ளனர்.

நாங்கள் முதன்முதலில் சந்தித்ததிலிருந்தே, எங்கள் உறவில் புது ஆற்றல், பரஸ்பர நம்பிக்கை மற்றும் நேர்மறை மனப்பான்மை ஆகியவை நிறைந்துள்ளன. ஒத்துழைப்பின் அனைத்துத் துறைகளிலும் வளர்ந்து வரும் இந்த உத்வேகத்திற்கு எனது நண்பரான பிரதமர் கார்னியே காரணம் என்று நான் கருதுகிறேன்.

நண்பர்களே,

இந்தியாவுக்கும் கனடாவுக்கும் ஜனநாயக மாண்புகளில் அசைக்க முடியாத நம்பிக்கை உண்டு. நாங்கள் பன்முகத்தன்மையைக் கொண்டாடுகிறோம். மனிதகுல நலனே எங்கள் பொதுவான தொலைநோக்குப் பார்வை. இந்தத் தொலைநோக்குப் பார்வைதான் ஒத்துழைப்பின் ஒவ்வொரு தளத்திலும் முன்னோக்கிச் செல்ல நம்மைத் தூண்டுகிறது. இன்று, இந்தத் தொலைநோக்குப் பார்வையை அடுத்த கட்டக் கூட்டாண்மையாக மாற்றுவது குறித்து நாங்கள் விவாதித்தோம்.

2030-ம் ஆண்டுக்குள் இருதரப்பு வர்த்தகத்தை 50 பில்லியன் டாலர்களாக விரிவுபடுத்துவதே எங்களின் நோக்கமாகும். எங்கள் பொருளாதார ஒத்துழைப்பின் முழு ஆற்றலையும் வெளிக்கொணர்வது எங்களுக்கு ஒரு முன்னுரிமையாகத் தொடர்கிறது. அதன்படி, விரிவான பொருளாதாரக் கூட்டாண்மை ஒப்பந்தத்தை இறுதி செய்வதை விரைவுபடுத்த நாங்கள் முடிவு செய்துள்ளோம். இது இரு நாடுகளிலும் முதலீடு மற்றும் வேலைவாய்ப்பிற்கான புதிய வாய்ப்புகளை உருவாக்கும்.

கனடா நாட்டின் ஓய்வூதிய நிதிகள் இந்தியாவில் 100 பில்லியன் டாலர்களை முதலீடு செய்துள்ளன. இது, இந்தியாவின் வளர்ச்சிப் பாதையின் மீது அவர்கள் வைத்துள்ள ஆழ்ந்த நம்பிக்கைக்கு ஓர் சான்றாக விளங்குகிறது.

இன்று, இரு நாடுகளின் வணிகத் தலைவர்களையும் நாங்கள் சந்திக்க உள்ளோம். அவர்களின் நுண்ணறிவுகளும் பரிந்துரைகளும் எங்கள் பொருளாதாரக் கூட்டாண்மையின் செயல்திட்டத்தை வடிவமைக்க உதவும்.

நண்பர்களே,

தொழில்நுட்பம் மற்றும் புத்தாக்கத் துறைகளில் நாங்கள் இயல்பான கூட்டாளிகள். கனடா, இந்தியா இடையேயான புத்தாக்கக் கூட்டாண்மை மூலம், நாங்கள்  எண்ணங்களை உலகளாவிய தீர்வுகளாக மாற்றுவோம்.

கடந்த மாதம் இந்தியாவில் நடைபெற்ற செயற்கை நுண்ணறிவு தாக்க உச்சிமாநாட்டின் வெற்றிக்குக் கனடா ஆற்றிய மதிப்புமிக்க பங்களிப்பிற்காக பிரதமர் கார்னிக்கு எனது பாராட்டுகளைத் தெரிவித்துக் கொள்கிறேன். செயற்கை நுண்ணறிவைத் தாண்டி, குவாண்டம் தொழில்நுட்பங்கள், சூப்பர் கம்ப்யூட்டிங் மற்றும் குறைக்கடத்திகள் ஆகிய துறைகளிலும் எங்கள் ஒத்துழைப்பை ஆழப்படுத்துவோம்.

முக்கிய கனிமங்கள் தொடர்பாக இன்று கையெழுத்தான புரிந்துணர்வு ஒப்பந்தம், மீள்திறன் கொண்ட விநியோகச் சங்கிலிகளை வலுப்படுத்தும். விண்வெளித் துறையில், எங்கள் இரு நாடுகளின் புத்தொழில் நிறுவனங்களையும் தொழில்துறைகளையும் நாங்கள் இணைப்போம்.

நண்பர்களே,

பிரதமர் கார்னியைப் பொறுத்தவரை, சுற்றுச்சூழல் என்பது ஒரு தனிப்பட்ட செயல்திட்டம் அல்ல, மாறாக அது பொருளாதார நிலைத்தன்மையின் ஒரு ஒருங்கிணைந்த பகுதியாகும். எரிசக்தித் துறையில், நாங்கள் ஒரு அடுத்த தலைமுறைக் கூட்டாண்மையை உருவாக்கி வருகிறோம். இது ஹைட்ரோகார்பன்களுக்கு மட்டுமல்லாமல், புதுப்பிக்கத்தக்க எரிசக்தி, பசுமை ஹைட்ரஜன் மற்றும் எரிசக்தி சேமிப்பு ஆகியவற்றிற்கும் சிறப்பு முக்கியத்துவம் அளிக்கும்.

சர்வதேச சூரியசக்தி கூட்டமைப்பு மற்றும் உலகளாவிய உயிரி எரிபொருள் கூட்டமைப்பில் கனடா இணைய முடிவு செய்திருப்பது எங்களுக்கு மகிழ்ச்சி அளிக்கிறது. எங்கள் கூட்டு முயற்சிகளை மேலும் முன்னெடுத்துச் செல்ல, இந்த ஆண்டின் பிற்பகுதியில் இந்திய-கனடா புதுப்பிக்கத்தக்க எரிசக்தி மற்றும் சேமிப்பு உச்சிமாநாட்டை நடத்தவிருக்கிறோம்.

குடிமை அணுசக்தித் துறையில், யுரேனியத்தின் நீண்டகால விநியோகத்திற்காக ஒரு வரலாற்றுச் சிறப்புமிக்க ஒப்பந்தத்தை நாங்கள் மேற்கொண்டுள்ளோம். மேலும், சிறிய மாதிரி அணு உலைகள் மற்றும் மேம்பட்ட அணு உலைகள் தொடர்பாகவும் நாங்கள் இணைந்து பணியாற்றுவோம்.

வேளாண்மை, வேளாண் தொழில்நுட்பம் மற்றும் உணவுப் பாதுகாப்பு ஆகியவற்றில் மதிப்புக்கூட்டல் என்பது எங்கள் பகிரப்பட்ட முன்னுரிமைகளாகும். இதன் அடிப்படையில், இந்திய-கனடா பருப்புப் புரத சிறப்பு மையம் ஒன்று இந்தியாவில் நிறுவப்படும்.

நண்பர்களே,

பாதுகாப்புத் துறையில் வளர்ந்து வரும் ஒத்துழைப்பு, எங்கள் பரஸ்பர நம்பிக்கையின் ஆழத்தையும் எங்கள் உறவின் முதிர்ச்சியையும் பிரதிபலிக்கிறது. எங்கள் பாதுகாப்புத் தொழில்களுக்கு இடையிலான ஒத்துழைப்பை வலுப்படுத்தவும், கடல்சார் விழிப்புணர்வை மேம்படுத்தவும், ராணுவப் பரிமாற்றங்களை விரிவுபடுத்தவும் நாங்கள் இணைந்து செயல்படுவோம். இந்த உணர்வுடன், இந்திய-கனடா பாதுகாப்பு மாநாட்டை நிறுவ இன்று நாங்கள் முடிவு செய்துள்ளோம்.

நண்பர்களே,

மக்களுக்கு இடையேயான உறவுகளே எங்கள் உறவின் உண்மையான பலம். அவற்றை மேலும் வலுப்படுத்துவதற்காக, இன்று நாங்கள் பல முக்கிய முடிவுகளை எடுத்துள்ளோம். செயற்கை நுண்ணறிவு, சுகாதாரம், வேளாண்மை மற்றும் புத்தாக்கம் போன்ற துறைகளில் பல்கலைக்கழகங்களுக்கு இடையேயான புதிய கூட்டாண்மைகள் இன்று அறிவிக்கப்படுகின்றன. மேலும், கனடாவின் பல்கலைக்கழகங்கள் இந்தியாவில் வளாகங்களை நிறுவுவதற்கு வசதி செய்து கொடுக்கவும் நாங்கள் ஒப்புக்கொண்டுள்ளோம்.

உள்நாட்டு மற்றும் பழங்குடி சமூகங்கள், எங்கள் பகிரப்பட்ட கலாச்சார பாரம்பரியத்தின் ஒரு முக்கிய அங்கமாகத் திகழ்கின்றன. மேலும் கலாச்சாரப் பரிமாற்றங்களை ஊக்குவிக்கும் வகையில், இன்று எங்கள் இருதரப்பினருக்கும் இடையே ஒரு புரிந்துணர்வு ஒப்பந்தம் கையெழுத்தாகியுள்ளது.

நண்பர்களே,

இந்தோ-பசிபிக் பிராந்தியத்தில் இந்தியாவிற்கு கனடா ஒரு முக்கிய கூட்டாளியாகும். இந்தியப் பெருங்கடல் எல்லைக் கூட்டமைப்பில் (Indian Ocean Rim Association) பேச்சுவார்த்தை ரீதியான கூட்டாளியாக ஆவதில் அதன் ஆர்வத்தை நாங்கள் வரவேற்கிறோம். இது எங்கள் கடல்சார் ஒத்துழைப்பிற்கு ஒரு புதிய ஆற்றலை வழங்கும்.

பயங்கரவாதம், தீவிரவாதம் மற்றும் அடிப்படைவாதச் சிந்தனை ஆகியவை எங்கள் இரு நாடுகளுக்கு மட்டுமல்ல, ஒட்டுமொத்த மனிதகுலத்திற்கே பொதுவான மற்றும் கடுமையான சவால்களாக அமைகின்றன என்பதை நாங்கள் ஏற்றுக்கொள்கிறோம். இந்த அச்சுறுத்தல்களை எதிர்த்துப் போராடவும், உலக அமைதி மற்றும் நிலைத்தன்மையை மேம்படுத்தவும் எங்கள் நெருங்கிய ஒத்துழைப்பு இன்றியமையாததாகிறது.

உலகம் முழுவதும் நிலவும் பதட்டங்கள் குறித்த இந்தியாவின் நிலைப்பாடு தெளிவாகவும் சீராகவும் இருந்து வருகிறது. அமைதியையும் ஸ்திரத்தன்மையையும் கடைபிடிக்குமாறு நாங்கள் எப்போதும் வலியுறுத்தி வருகிறோம். இரண்டு ஜனநாயக நாடுகள் ஒன்றுபடும்போது, ​​அமைதிக்கான குரல் மேலும் சக்திவாய்ந்ததாகவும் ஆழமானதாகவும் மாறுகிறது.

மேற்கு ஆசியாவில் நிலவும் தற்போதைய சூழல் எங்களுக்கு மிகுந்த கவலையளிக்கிறது. அனைத்துப் பிரச்சனைகளுக்கும் பேச்சுவார்த்தை மற்றும் ராஜாங்க ரீதியாக தீர்வு காண்பதை இந்தியா ஆதரிக்கிறது. அப்பகுதியில் உள்ள இந்தியக் குடிமக்களின் பாதுகாப்பை உறுதி செய்வதற்காக, நாங்கள் அனைத்து நாடுகளுடனும் தொடர்ந்து நெருக்கமாகப் பணியாற்றுவோம்.

மாண்புமிகு பிரதமர் அவர்களே,

தங்கள் வருகை நமது ஒத்துழைப்பின் அனைத்துப் பரிமாணங்களுக்கும் புதுப்பொலிவு அளித்துள்ளது. இந்தியா மீதான உங்களின் ஆழ்ந்த அர்ப்பணிப்பிற்கும், தொலைநோக்குப் பார்வை கொண்ட தலைமைத்துவத்திற்கும் எனது மனமார்ந்த பாராட்டுகளை மீண்டும் ஒருமுறை தெரிவித்துக் கொள்கிறேன்.

மிக்க நன்றி.

பொறுப்புத் துறப்பு: இது பிரதமர் உரையின் தோராயமான மொழிபெயர்ப்பு ஆகும். பிரதமர் தமது உரையை இந்தியில் வழங்கியிருந்தார்.

***

(Release ID: 2234463)

AD/RB/RJ