অংশীদাৰিত্ব বৃদ্ধি, সমৃদ্ধি আৰু স্থিতিস্থাপকতাৰ বাবে কৌশলগত অভিসৰণ তথা বিশ্বাসৰ ধাৰাক আগুৱাই নিয়াৰ সংকল্প

ভাৰতৰ প্ৰধানমন্ত্ৰী শ্ৰী নৰেন্দ্ৰ মোদীৰ আমন্ত্ৰণমৰ্মে জাপানৰ প্ৰধানমন্ত্ৰী শ্ৰীমতী তাকাইচি ছানায়ে  ১৬ সংখ্যক ভাৰত-জাপান বাৰ্ষিক সন্মিলন ২০২৬ত অংশগ্ৰহণৰ উদ্দেশ্যে ১-৩ জুলাইলৈ ভাৰত  ভ্ৰমণ কৰিছে । প্ৰধানমন্ত্ৰী তাকাইচিৰ সৈতে  জাপানৰ জ্যেষ্ঠ বিষয়া, মুখ্য কাৰ্যবাহী বিষয়া আৰু উদ্যোগৰ  শীৰ্ষ ব্যক্তিকে  ধৰি এক উচ্চ পৰ্যায়ৰ প্ৰতিনিধি দল  আহিছে । এয়া  হৈছে প্ৰধানমন্ত্ৰী তাকাইচিৰ প্ৰথম  ভাৰত ভ্ৰমণ। দুয়োগৰাকী প্ৰধানমন্ত্ৰীয়ে যোৱা বাৰ্ষিক সন্মিলনৰ পিছৰ পৰিস্থিতিৰ পৰ্যালোচনা কৰি ভাৰত-জাপান বিশেষ কৌশলগত আৰু বিশ্বজোৰা  অংশীদাৰিত্ব আৰু অধিক বৃদ্ধিৰ বাবে সহযোগিতাৰ বিস্তৃত ক্ষেত্ৰসমূহৰ  বিষয়ত আলোচনা কৰে। তেওঁলোকে স্বীকাৰ কৰে যে দুয়োখন দেশৰ মাজত  কৌশলগত আৰু বিশ্বজোৰা  সহযোগিতা শক্তিশালী কৰাটো পাৰস্পৰিকভাৱে লাভজনক হ’ব আৰু ই এক স্থিতিস্থাপক তথা সমৃদ্ধিশালী ভাৰত-প্ৰশান্ত মহাসাগৰীয় আৰু ইয়াৰ বাহিৰতো অৰিহণা যোগাব। ক্ৰমান্বয়ে অস্থিৰ আৰু অনিশ্চিত হৈ পৰা  ভূ-ৰাজনৈতিক পৰিৱেশত ভাৰত-জাপানৰ অংশীদাৰিত্বৰ কৌশলগত গুৰুত্বৰ কথা  স্বীকাৰ কৰি দুয়োগৰাকী প্ৰধানমন্ত্ৰীয়ে পাৰস্পৰিকভাৱে পৰিপূৰক সম্পৰ্ক গঢ়ি তোলাৰ প্ৰতিশ্ৰুতি পুনৰ দৃঢ় কৰে। ১৫ সংখ্যক ভাৰত-জাপান বাৰ্ষিক সন্মিলনৰ সফলতাৰ ওপৰত নিৰ্ভৰ কৰি তেওঁলোকে তিনিটা অগ্ৰাধিকাৰ ক্ষেত্ৰৰ বিষয়ত সহযোগিতা আগবঢ়াই নিয়াৰ ক্ষেত্ৰত সহমত প্ৰকাশ কৰে: প্ৰতিৰক্ষা আৰু নিৰাপত্তা সহযোগিতা; অৰ্থনৈতিক সুৰক্ষা, শক্তিৰ স্থিতিস্থাপকতা, প্ৰযুক্তি, আৰু উদ্ভাৱনকে ধৰি অৰ্থনৈতিক অংশীদাৰিত্ব; আৰু মানুহৰ মাজত আদান-প্ৰদান বৃদ্ধি কৰা। ভাৰত আৰু জাপান নিজ নিজ জাতীয় স্বাৰ্থত পদক্ষেপসমূহ  বাস্তৱায়িত কৰাৰ প্ৰচেষ্টাত অপৰিহাৰ্য অংশীদাৰ বুলি তেওঁলোকে মত প্ৰকাশ কৰে।

দুয়োগৰাকী প্ৰধানমন্ত্ৰীয়ে পুনৰ কয় যে বিশ্বৰ আগশাৰীৰ গণতন্ত্ৰ তথা প্ৰধান অৰ্থনীতি হিচাপে তেওঁলোকৰ কৰ্তব্য হৈছে  মুক্ত, মুকলি আৰু আইনৰ শাসনৰ ওপৰত ভিত্তি কৰি গঢ়ি উঠা আন্তঃৰাষ্ট্ৰীয় ব্যৱস্থা গঢ়ি তোলা আৰু ৰক্ষা কৰা। ইয়াৰ বাবে প্ৰধানমন্ত্ৰী মোদীয়ে “মুক্ত ভাৰত-প্ৰশান্ত মহাসাগৰীয় (এফ অ’ আই পি)”ক আদৰণি জনায় আৰু কয় যে ই ভাৰত-প্ৰশান্ত মহাসাগৰৰ পদক্ষেপ (আই পি অ’ আই) আৰু মিউচুৱেল এণ্ড হোলিষ্টিক এডভান্সমেণ্ট ফৰ ছিকিউৰিটি এণ্ড গ্ৰ’থ এক্ৰছ ৰিজিঅ’নছ (মহাসাগৰ)ৰ সৈতে ঘনিষ্ঠভাৱে সংগতি বজাই ৰাখিছে। তেওঁলোকে তেওঁলোকৰ উমৈহতীয়া কৌশলগত দৃষ্টিভংগীৰ ভিত্তিত সুনিৰ্দিষ্ট সহযোগিতা আৰু অধিক গভীৰ কৰাৰ প্ৰতিশ্ৰুতিৰ কথা  পুনৰবাৰ প্ৰকাশ কৰে। দুয়োগৰাকী প্ৰধানমন্ত্ৰীয়ে দ্বিপাক্ষিক প্ৰতিৰক্ষা আৰু নিৰাপত্তা সহযোগিতা উৰ্ধমুখী গতিপথত আগবাঢ়িছে বুলি গভীৰ সন্তুষ্টি প্ৰকাশ কৰি বিগত বাৰ্ষিক সন্মিলনত গ্ৰহণ কৰা নিৰাপত্তা সহযোগিতাৰ যুটীয়া ঘোষণাৰ ভিত্তিত সহযোগিতা গভীৰ কৰাৰ প্ৰতিশ্ৰুতি পুনৰ দৃঢ় কৰে। তেওঁলোকে নিজৰ মন্ত্ৰীসকলক চলিত বৰ্ষৰ শেষৰ ফালে টকিঅ’ত ২+২ মন্ত্ৰীসভাৰ চতুৰ্থ ৰাউণ্ডৰ বৈঠক অনুষ্ঠিত কৰিবলৈ নিৰ্দেশ দিয়ে। জাপানী পক্ষৰ দুয়োটা সেৱাৰ দ্বাৰা সমৰ্থিত নৌসেনাৰ অনুশীলন জাইমেক্স ২৫ (“JAIMEX 25” )ৰ সফল পৰিচালনাকে ধৰি নিজ নিজ সেৱাসমূহৰ মাজত সহযোগিতাৰ ক্ষেত্ৰত হোৱা অগ্ৰগতিক তেওঁলোকে আদৰণি জনায়। বিশাখাপট্টনমত অনুষ্ঠিত হোৱা আন্তঃৰাষ্ট্ৰীয় বহৰ পৰ্যালোচনা ২০২৬ত জাপানৰ অংশগ্ৰহণক ভাৰতে আদৰণি জনায়। তেওঁলোকে বৰ্ধিত অনুশীলনৰ জৰিয়তে সামুদ্ৰিক সুৰক্ষা সহযোগিতা গভীৰ কৰা, উপগ্ৰহৰ ক্ষমতা ব্যৱহাৰ কৰি সামুদ্ৰিক ক্ষেত্ৰৰ  সজাগতা, নৌসেনাৰ ৰক্ষণাবেক্ষণ, মেৰামতি আৰু অভাৰহ'ল (এম আৰ অ') সহযোগিতা, আৰু "মেক ইন ইণ্ডিয়া"ৰ কাঠামোৰ অধীনত প্ৰতিৰক্ষা সঁজুলি আৰু প্ৰযুক্তি সহযোগিতাৰ বিষয়ত  একমত প্ৰকাশ কৰে। প্ৰধানমন্ত্ৰী মোদীয়ে প্ৰতিৰক্ষা সঁজুলি আৰু প্ৰযুক্তি হস্তান্তৰ সম্পৰ্কীয় তিনিটা নীতিৰ বিষয়ত  জাপানৰ পৰ্যালোচনাক আদৰণি জনায় আৰু ইয়াৰ দ্বাৰা দুয়োখন দেশৰ মাজত প্ৰতিৰক্ষা অংশীদাৰিত্ব আৰু অধিক গভীৰ হ’ব বুলি আশা কৰে। ইউনিফাইড কম্প্লেক্স ৰেডিঅ’ এণ্টেনা (“ইউনিকৰ্ণ”) প্ৰকল্পৰ সন্দৰ্ভত বাকী থকা কাৰিকৰী সবিশেষ সন্দৰ্ভত নীতিগতভাৱে এক চুক্তিত উপনীত হোৱাত দুয়োগৰাকী প্ৰধানমন্ত্ৰীয়ে সন্তুষ্টি প্ৰকাশ কৰে। তেওঁলোকে প্ৰকল্পটো শীঘ্ৰে  সমাপ্ত হোৱাৰ আশা প্ৰকাশ কৰে আৰু প্ৰতিৰক্ষা সঁজুলি আৰু প্ৰযুক্তিৰ ক্ষেত্ৰত অন্যান্য প্ৰকল্পসমূহ বাস্তৱায়িত কৰাৰ উপায় অন্বেষণ কৰাত একমত প্ৰকাশ কৰে।

প্ৰধানমন্ত্ৰী দুগৰাকীয়ে স্বীকাৰ কৰে যে বৰ্তমানৰ আন্তঃৰাষ্ট্ৰীয় পৰিস্থিতিয়ে দুয়োখন দেশকে অৰ্থনৈতিক সুৰক্ষাৰ ক্ষেত্ৰত স্পষ্ট সহযোগিতা আৰু অধিক প্ৰসাৰিত কৰিবলৈ আহ্বান জনাইছে। তেওঁলোকে অৰ্থনৈতিক সুৰক্ষা সহযোগিতা গভীৰ কৰাৰ লগতে এটা স্থিতিস্থাপক আৰু সমৃদ্ধিশালী অঞ্চলক সমৰ্থন কৰিবলৈ মূল পদক্ষেপসমূহ বিকশিত কৰাৰ প্ৰতিশ্ৰুতি দিয়ে। বিশেষকৈ গুৰুত্বপূৰ্ণ খনিজ আৰু জটিল ঔদ্যোগিক খণ্ডত যোগান শৃংখলত ব্যাঘাত জন্মাব পৰা  ৰপ্তানি নিষেধাজ্ঞাকে ধৰি অৰ্থনৈতিক জোৰ-জবৰদস্তি আৰু  নীতি আৰু পদ্ধতিৰ ব্যৱহাৰৰ ওপৰত তেওঁলোকৰ ভাব প্ৰকাশ কৰে। তেওঁলোকে বৈচিত্ৰ্যপূৰ্ণ, স্থিতিস্থাপক আৰু নিৰ্ভৰযোগ্য বিশ্ব যোগান শৃংখল, ন্যায্য প্ৰতিযোগিতামূলক বিশ্ব পৰিৱেশ, আৰু যিকোনো এখন দেশৰ ওপৰত নিৰ্ভৰশীলতা এৰাই চলাৰ প্ৰয়োজনীয়তাৰ বিষয়ত আলোকপাত কৰে। তেওঁলোকে নিজৰ নিয়ম আৰু আনুষংগিক নিয়মসমূহৰ প্ৰতি  সন্মান জনাই মূল প্ৰযুক্তিসমূহৰ  প্ৰচাৰ আৰু সুৰক্ষাৰ প্ৰতিশ্ৰুতি পুনৰ দৃঢ় কৰে।

দুয়োপক্ষই উচ্চ প্ৰযুক্তিৰ বাণিজ্যক অধিক সুৰক্ষিত কৰাৰ লগতে পাৰস্পৰিকভাৱে ৰপ্তানি নিয়ন্ত্ৰণৰ প্ৰত্যাহ্বানসমূহ লাঘৱ কৰাৰ বাবে সন্মতি প্ৰকাশ কৰে। তদুপৰি তেওঁলোকে দুয়োখন দেশৰ সংশ্লিষ্ট মন্ত্ৰালয়ৰ মাজত আলোচনা আগবঢ়াই নিয়াৰ সিদ্ধান্ত লয়। তেওঁলোকে যোৱা বাৰ্ষিক শীৰ্ষ সন্মিলনত আৰম্ভ কৰা অৰ্থনৈতিক সুৰক্ষা পদক্ষেপৰ আধাৰত দুয়োখন দেশৰ অগ্ৰগতিৰ শলাগ লয়, য’ত উদ্বোধনী ব্যক্তিগত খণ্ডৰ অৰ্থনৈতিক নিৰাপত্তা আলোচনা, আৰু চলিত বৰ্ষৰ আৰম্ভণিতে দ্বিতীয় ৰাউণ্ডৰ অৰ্থনৈতিক সুৰক্ষা আলোচনা অনুষ্ঠিত কৰা হয়। তেওঁলোকে অৰ্ধপৰিবাহী, গুৰুত্বপূৰ্ণ খনিজ পদাৰ্থ, তথ্য আৰু যোগাযোগ প্ৰযুক্তি, স্বচ্ছ শক্তি আৰু ঔষধৰ মূল খণ্ডত প্ৰকল্পভিত্তিক সহযোগিতাক অধিক প্ৰসাৰিত কৰাৰ বাবে ভাৰত-জাপানৰ অৰ্থনৈতিক সুৰক্ষা সহযোগিতাৰ যুটীয়া ঘোষণাপত্ৰ গ্ৰহণ কৰে। বিশ্ব শক্তি বজাৰত অস্থিৰতাৰ দ্বাৰা প্ৰভাৱান্বিত হোৱা  প্ৰধান শক্তি খৰচী ৰাষ্ট্ৰ হিচাপে তেওঁলোকৰ ভাগ-বাটোৱাৰা কৰা  মৰ্যাদাক স্বীকৃতি দি দুয়োগৰাকী প্ৰধানমন্ত্ৰীয়ে শক্তি সুৰক্ষাৰ ক্ষেত্ৰত ভাৰত-জাপানৰ সহযোগিতা গভীৰ কৰাৰ প্ৰয়োজনীয়তাৰ বিষয়ত  গুৰুত্ব আৰোপ কৰে। তেওঁলোকে হৰমুজ প্ৰণালীৰ লগতে  বিশ্ব বাণিজ্যৰ নিৰৱচ্ছিন্ন স্বাধীনতা আৰু বিশ্ব বাণিজ্যৰ নিৰৱচ্ছিন্ন প্ৰবাহ নিশ্চিত কৰাৰ গুৰুত্ব পুনৰবাৰ উল্লেখ কৰে আৰু বাণিজ্যিক জাহাজৰ চলাচলত বাধাৰ সৃষ্টি কৰা যিকোনো নিষেধাজ্ঞামূলক ব্যৱস্থাৰ বিৰোধিতা কৰে। তেওঁলোকে শক্তি মূল্য শৃংখলত সম্প্ৰসাৰিত সহযোগিতাৰ সম্ভাৱনাক আদৰণি জনায়। তেওঁলোকে শক্তি যোগান শৃংখলৰ স্থিতিস্থাপকতা বৃদ্ধি আৰু বিশ্ব শক্তি বজাৰত স্থিতিশীলতা বৃদ্ধিৰ বাবে দ্বিপাক্ষিক আৰু বহুপক্ষীয় মঞ্চৰ জৰিয়তে একেলগে কাম কৰাৰ প্ৰতিশ্ৰুতি পুনৰ দৃঢ় কৰে। দুয়োগৰাকী প্ৰধানমন্ত্ৰীয়ে সমগ্ৰ সামুদ্ৰিক শক্তি পৰিবহণ মূল্য শৃংখলত যৌথ বিনিয়োগকে ধৰি সহযোগিতামূলক সুযোগসমূহ অন্বেষণ কৰাৰ বিষয়ত একমত প্ৰকাশ কৰে। তেওঁলোকে শক্তিৰ স্থিতিস্থাপকতা শক্তিশালী কৰাৰ বাবে আঞ্চলিক পদক্ষেপসমূহৰ গুৰুত্বৰ বিষয়ত  আলোকপাত কৰে, যেনে জাপানৰ পাৰ্টনাৰশ্বিপ অন ৱাইড এনাৰ্জি এণ্ড ৰিচ’ৰ্চ ৰেজিলিয়েন্স (POWERR এছিয়া), দক্ষিণ এছিয়াত শক্তি সুৰক্ষাৰ প্ৰতি ভাৰতৰ সমৰ্থন, আৰু ভাৰত-প্ৰশান্ত মহাসাগৰীয় শক্তি সুৰক্ষাৰ ওপৰত কোৱাড ইনিচিয়েটিভ আদি । শক্তি স্থিতিস্থাপকতাৰ  বিষয়ত যুটীয়া বিবৃতি গ্ৰহণ কৰাৰ কথাক  তেওঁলোকে আদৰণি জনায়। তেওঁলোকে কৌশলগত পেট্ৰলিয়াম মজুতৰ ক্ষেত্ৰত সহযোগিতা শক্তিশালী কৰাৰ ক্ষেত্ৰতো একমত প্ৰকাশ কৰে, য’ত উত্তম পদ্ধতিৰ বিনিময় আৰু কৌশলগত মজুত পৰিৱেশ তন্ত্ৰৰ ওপৰত কাৰিকৰী সহযোগিতাৰ জৰিয়তেও একমত প্ৰকাশ কৰে। এই পটভূমিত প্ৰধানমন্ত্ৰী তাকাইচিয়ে আন্তঃৰাষ্ট্ৰীয় শক্তি সংস্থাৰ (আই ই এ) ভাৰতৰ সদস্যপদৰ প্ৰতি সমৰ্থন জনায়।

স্বচ্ছ শক্তি খণ্ডত তেওঁলোকৰ অংশীদাৰিত্ব আগবঢ়াই নিয়াৰ ক্ষেত্ৰত দুয়োগৰাকী প্ৰধানমন্ত্ৰীয়ে একমত প্ৰকাশ কৰি ভাৰত-জাপান সমবায় বায়’গেছ ফৰ গ্ৰ’থ ইনিচিয়েটিভ (চিবিজি ইনিচিয়েটিভ)ক ভাৰত-জাপানৰ সহযোগিতাৰ নতুন প্ৰকল্প হিচাপে  সমগ্ৰ ভাৰততে ১০০০টা জৈৱ গেছ উদ্যোগ আৰু জৈৱিক সাৰ উদ্যোগ স্থাপনেৰে জৈৱ গেছ উৎপাদন বৃদ্ধি কৰাৰ পদক্ষেপক  প্ৰশংসা কৰে। জাপানৰ অৰ্থনীতি, বাণিজ্য আৰু উদ্যোগ মন্ত্ৰণালয় আৰু সহযোগিতা মন্ত্ৰালয় আৰু ভাৰতৰ পশুপালন আৰু দুগ্ধ বিভাগৰ মাজত সহযোগিতা স্মাৰক স্বাক্ষৰিত হোৱাক আদৰণি জনায়। তেওঁলোকে হাইড্ৰজেন আৰু এমোনিয়াৰ গুৰুত্ব কেৱল ডিকাৰ্বনাইজেচনৰ বাবেই নহয়, শক্তিৰ সুৰক্ষা বৃদ্ধিৰ বাবেও বুলি  স্বীকাৰ কৰে। দুয়োখন চৰকাৰৰ অবিৰত সমৰ্থনত ওড়িশাত এই  স্বচ্ছ এমোনিয়া প্ৰকল্পটোৰ প্ৰসাৰ সাধন কৰিব  বুলি তেওঁলোকে পুনৰ দৃঢ়তাৰে কয়। স্বচ্ছ এমোনিয়া, সেউজ হাইড্ৰজেন, সৌৰ পিভি প্ৰযুক্তি, পাৰমাণৱিক শক্তি আদিকে ধৰি ক্ষেত্ৰত স্বচ্ছ শক্তি প্ৰকল্পক প্ৰসাৰিত কৰাৰ গুৰুত্বৰ কথাও তেওঁলোকে স্বীকাৰ কৰে।

দুয়োগৰাকী প্ৰধানমন্ত্ৰীয়ে সহযোগিতাৰ ভিত্তি আৰু অধিক বিস্তৃত কৰাৰ বাবে এআইকে ধৰি নতুন প্ৰযুক্তিৰ উদ্ভাৱনক প্ৰসাৰ কৰাটো অতি গুৰুত্বপূৰ্ণ বুলি মত ব্যক্ত কৰে। তেওঁলোকে এআইত ৰাষ্ট্ৰীয় সামৰ্থ্য বৃদ্ধি আৰু বিশ্বাসযোগ্য আৰু স্থিতিস্থাপক ডিজিটেল আন্তঃগাঁথনিৰ ক্ষেত্ৰত সহযোগিতা শক্তিশালী কৰাৰ প্ৰয়োজনীয়তাৰ বিষয়ত  একমত প্ৰকাশ কৰে। তেওঁলোকে কঠিন আন্তঃগাঁথনিৰ ক্ষেত্ৰকে ধৰি এআইৰ বহনক্ষম আৰু সৰ্বাংগীন উন্নয়নৰ বাবে এআই প্ৰযুক্তিৰ ব্যৱহাৰ আৰু প্ৰয়োগৰ জৰিয়তে উদ্ভাৱনক প্ৰসাৰিত কৰাৰ প্ৰয়োজনীয়তাৰ কথা স্বীকাৰ কৰে।  একে সময়তে সুযোগসমূহ ব্যৱহাৰ কৰি আনুষংগিক বিপদসমূহ উপযুক্তভাৱে হ্ৰাস কৰি আৰু হিৰোচিমা এআই প্ৰক্ৰিয়া আৰু এআই প্ৰভাৱৰ ওপৰত নতুন দিল্লী ঘোষণাৰ মনোভাৱেৰে এক স্থিতিস্থাপক, বৈচিত্ৰ্যময় আৰু বিশ্বাসযোগ্য এআই যোগান শৃংখলৰ কথা  প্ৰকাশ  কৰে। এই প্ৰেক্ষাপটত তেওঁলোকে ভাৰত-জাপান এআই কৌশলগত বৈঠক  আহ্বান কৰাটোক আদৰণি জনায় আৰু ভাৰত-জাপান এআই সহযোগিতা পদক্ষেপৰ অধীনত হোৱা অগ্ৰগতিৰ বিষয়ত  আৰু এআই সহযোগিতাৰ বিষয়ত  যুটীয়া বিবৃতি গ্ৰহণ কৰে।

 প্ৰধানমন্ত্ৰী দুগৰাকীয়ে জাপানৰ পৰা ভাৰতলৈ বৃদ্ধি পোৱা ব্যক্তিগত বিনিয়োগক আদৰণি জনোৱাৰ লগতে ভাৰতৰ ৰাষ্ট্ৰীয় লক্ষ্য বিক্ষিত ভাৰতত ইয়াৰ অৱদানক স্বীকৃতি দিয়ে। যোৱা বাৰ্ষিক শীৰ্ষ সন্মিলনত নিৰ্ধাৰণ কৰা ১০ ট্ৰিলিয়ন য়েনৰ লক্ষ্য বাস্তৱায়িত কৰাৰ দিশত হোৱা অগ্ৰগতিৰ শলাগ লয়। ভাৰত-জাপান ঔদ্যোগিক প্ৰতিযোগিতামূলক অংশীদাৰিত্ব (আই জি আই চি পি)ৰ অধীনত দ্ৰুতগতিত ব্যৱস্থা ব্যৱহাৰ কৰি বিনিয়োগৰ পৰিৱেশ বৃদ্ধিৰ দিশত কাম কৰাৰ ক্ষেত্ৰত তেওঁলোকে একমত প্ৰকাশ কৰে। দুয়োখন দেশে বিস্তৃত অৰ্থনৈতিক অংশীদাৰিত্ব চুক্তি (চিইপিএ) স্বাক্ষৰ কৰাৰ ১৫ বছৰতকৈও অধিক সময় পাৰ হোৱাটো লক্ষ্য কৰি আৰু দ্বিপাক্ষিক বাণিজ্য বৃদ্ধি আৰু বৈচিত্ৰ্যপূৰ্ণ কৰাৰ প্ৰয়োজনীয়তাক স্বীকাৰ কৰি তেওঁলোকে কাৰ্যকৰীকৰণৰ পৰ্যালোচনা ত্বৰান্বিত কৰাৰ লগতে চিইপিএক অধিক আগন্তুক দৃষ্টিকোণৰ বাবে সম্পূৰ্ণ আৰু ফলপ্ৰসূ ব্যৱহাৰৰ ক্ষেত্ৰত একমত প্ৰকাশ কৰে। জাপানী পক্ষই প্ৰযোজ্য আইন-কানুন অনুসৰি ভাৰতৰ বেংকিং আৰু অ-বেংকিং বিত্তীয় খণ্ডত নিজৰ উপস্থিতি শক্তিশালী কৰাৰ বাবে আগশাৰীৰ জাপানী বিত্তীয় প্ৰতিষ্ঠান আৰু বেংকসমূহলৈ সম্প্ৰসাৰিত কৰা সুবিধাক স্বীকৃতি দিয়ে। তেওঁলোকে আই জি আই চি পিৰ অধীনত লজিষ্টিক, বস্ত্ৰশিল্প, খাদ্য প্ৰক্ৰিয়াকৰণ, কৃষি, অটোমোটিভ, আৰু ঔদ্যোগিক মূলধনী সামগ্ৰীৰ ক্ষেত্ৰত সহযোগিতা শক্তিশালী কৰাৰ বাবে দ্বিপাক্ষিক প্ৰচেষ্টাক সমৰ্থন জনায়। স্থানীয় মুদ্ৰাৰ লেনদেনকে ধৰি ভাৰত আৰু জাপানৰ মাজত পেমেণ্ট ব্যৱস্থাৰ ক্ষেত্ৰত দ্বিপাক্ষিক বিত্তীয় সহযোগিতা আৰু সহযোগিতা বৃদ্ধিৰ গুৰুত্বৰ কথাও  পুনৰ দৃঢ়তাৰে কয়। ফাৰ্মা যোগান শৃংখলকে ধৰি স্বাস্থ্যসেৱা খণ্ডত সহযোগিতা শক্তিশালী কৰাৰ গুৰুত্বও তেওঁলোকে স্বীকাৰ কৰে।

প্ৰধানমন্ত্ৰী দুগৰাকীয়ে ভাৰত-জাপান ক্ষুদ্ৰ আৰু মজলীয়া উদ্যোগ মঞ্চ উদ্বোধন আৰু জাপানৰ পৰা ভাৰতলৈ বিমান পৰিবহণ খণ্ডৰ ক্ষুদ্ৰ আৰু মজলীয়া উদ্যোগৰ অভিযানক আদৰণি জনায়। তেওঁলোকে ব্যৱসায়িক পৰিৱেশ উন্নত কৰাৰ বাবে আৰু জাপানী আৰু ভাৰতীয় উভয় ব্যৱসায়িক প্ৰতিষ্ঠান বিশেষকৈ ক্ষুদ্ৰ আৰু মজলীয়া উদ্যোগ আৰু ষ্টাৰ্টআপৰ নেটৱৰ্ক বৃদ্ধিৰ বাবে বিভিন্ন প্ৰচেষ্টাৰ অবিৰত অগ্ৰগতিক আদৰণি জনায়। জাপান-ভাৰত ষ্টাৰ্টআপ ছাপৰ্ট ইনিচিয়েটিভ (জিআইএছএছআই)ৰ ওপৰত নিৰ্মাণ কৰি তেওঁলোকে বিভিন্ন বিশ্ববিদ্যালয়ৰ সহযোগত ভাৰতীয় বজাৰত জাপানী ক্ষুদ্ৰ আৰু মজলীয়া উদ্যোগ আৰু ষ্টাৰ্টআপৰ অংশগ্ৰহণক অধিক উৎসাহিত কৰাৰ ইচ্ছা প্ৰকাশ কৰে। তেওঁলোকে ক্ষুদ্ৰ, ক্ষুদ্ৰ আৰু মজলীয়া উদ্যোগ (এম এছ এম ই)ৰ অধিক অংশগ্ৰহণ আৰু জাপানী উদ্যোগ আৰু ভাৰতৰ দ্বিতীয় স্তৰ আৰু তৃতীয় স্তৰৰ যোগানকাৰী পৰিৱেশ তন্ত্ৰৰ মাজত সংযোগৰ গুৰুত্বৰ বিষয়তো আলোকপাত কৰে। এই প্ৰেক্ষাপটত তেওঁলোকে অধিক বিনিয়োগৰ প্ৰবাহ, ঔদ্যোগিক সহযোগিতা আৰু প্ৰযুক্তি অংশীদাৰিত্বৰ সুবিধা প্ৰদানৰ প্ৰতিশ্ৰুতি পুনৰবাৰ উল্লেখ কৰে।

ভাৰতৰ আৰ্থ-সামাজিক উন্নয়নত জাপানৰ উন্নয়ন সহযোগিতাৰ সমৰ্থনৰ উল্লেখযোগ্য অৱদানৰ বিষয়ে দুয়োগৰাকী প্ৰধানমন্ত্ৰীয়ে সন্তুষ্টিৰে লক্ষ্য কৰে। তেওঁলোকে চাৰিটা প্ৰকল্পৰ শেহতীয়া অগ্ৰগতি আদৰণি জনায়: মুম্বাই মেট্ৰ’ (লাইন ১১), বাংগালুৰু মেট্ৰ’ (পৰ্যায় ৩), মহাৰাষ্ট্ৰৰ স্বাস্থ্যসেৱা প্ৰদান আৰু শিক্ষা ব্যৱস্থা, আৰু পঞ্জাৱৰ বহনক্ষম উদ্যান শস্য, যিয়ে সংযোগ শক্তিশালী কৰাত আৰু স্বচ্ছ আৰু বহনক্ষম আৰ্থ-সামাজিক উন্নয়নক প্ৰসাৰিত কৰাত অৰিহণা যোগাব। তেওঁলোকে উন্নয়নমূলক সহযোগিতাক এনেদৰে প্ৰসাৰিত কৰাৰ উদ্দেশ্য ভাগ কৰিছিল যিয়ে অৰ্থনৈতিক বৃদ্ধিৰ সহ-সৃষ্টিত অৰিহণা যোগায়। প্ৰধানমন্ত্ৰী দুগৰাকীয়ে ভাৰত আৰু জাপানৰ মাজত ফ্লেগশ্বিপ প্ৰজেক্ট হিচাপে মুম্বাই-আহমেদাবাদ হাই স্পীড ৰে'লৰ গুৰুত্বৰ কথা  পুনৰ দৃঢ় কৰে। প্ৰধানমন্ত্ৰী তাকাইচিয়ে উল্লেখ কৰে যে জাপানে ২০২৭ চনত অগ্ৰাধিকাৰ ধাৰাত বাণিজ্যিক কাৰ্য্যকলাপ আৰম্ভ কৰাৰ ভাৰতৰ লক্ষ্য সম্পূৰ্ণৰূপে বুজি পাইছে আৰু প্ৰয়োজনীয় সহযোগিতা বৃদ্ধিৰ বাবে প্ৰতিশ্ৰুতিবদ্ধ হৈ আছে।  ৭,০০০ কিলোমিটাৰ দৈৰ্ঘ্যৰ ৰাষ্ট্ৰীয় হাই স্পীড ৰে’ল নেটৱৰ্কৰ বাবে  ভাৰতে গ্ৰহণ কৰা  লক্ষ্যত উপনীত হ'বলৈ ভৱিষ্যতে দ্ৰুতবেগী কৰিডৰ নিৰ্মাণত সহযোগিতা কৰাৰ সম্ভাৱ্য উপায় বিচাৰি উলিয়াবলৈও তেওঁলোকে ইচ্ছা প্ৰকাশ কৰে। প্ৰধানমন্ত্ৰী মোদীয়ে জাপানী কোম্পানীসমূহক ভৱিষ্যতৰ কৰিডৰসমূহৰ উন্নয়নত অংশগ্ৰহণৰ সুযোগ বিচাৰিবলৈ আমন্ত্ৰণ জনায় আৰু এনে সংযোগৰ সুবিধা প্ৰদানৰ বাবে তেওঁৰ প্ৰস্তুতি প্ৰকাশ কৰে, যাক জাপানী পক্ষই আদৰণি জনায়। তেওঁলোকে ব্যক্তিগত খণ্ডৰ নেতৃত্বত সহযোগিতা আৰু হাই স্পীড ৰে’ল আৰু ব্যাপক গতিশীলতাত বিনিয়োগ ত্বৰান্বিত কৰাৰ মতামতও ভাগ কৰে, যাৰ লক্ষ্য  হৈছে জাপানৰ উন্নত গতিশীলতা প্ৰযুক্তিসমূহক সমগ্ৰ ভাৰতত ভাৰতৰ উৎকৃষ্ট মানৱ সম্পদ আৰু বজাৰ সম্ভাৱনাৰ সৈতে সংযুক্ত কৰা। ইয়াৰ বাবে তেওঁলোকে দুয়োপক্ষৰ মাজত পৰৱৰ্তী প্ৰজন্মৰ গতিশীলতা অংশীদাৰিত্বৰ বিষয়ত   চুক্তি স্বাক্ষৰ কৰাৰ কথাক  আদৰণি জনায়। মানৱ সম্পদৰ সহযোগিতাকে ধৰি জাহাজ নিৰ্মাণ খণ্ডতো  সহযোগিতাৰ গুৰুত্ব তেওঁলোকে স্বীকাৰ কৰে।

দুয়োগৰাকী প্ৰধানমন্ত্ৰীয়ে অত্যাধুনিক বিজ্ঞান আৰু প্ৰযুক্তিৰ ক্ষেত্ৰত সহযোগিতা আৰু বিনিময় দ্বিপাক্ষিক সম্পৰ্কৰ এক মূল স্তম্ভ বুলি মন্তব্য  কৰে। এই সন্দৰ্ভত তেওঁলোকে শৈক্ষিক প্ৰতিষ্ঠানসমূহৰ মাজত চলি থকা যৌথ গৱেষণা সহযোগিতা, দুয়োখন দেশৰ বিজ্ঞানী আৰু গৱেষকৰ বিনিময় ভ্ৰমণ, আৰু জাপানী কোম্পানীসমূহত ইন্টাৰশ্বিপৰ সুযোগৰ জৰিয়তে উদ্যোগ-শৈক্ষিক সহযোগিতা আদি সন্তুষ্টিৰে লক্ষ্য কৰে। তেওঁলোকে লোটাছ  (LOTUS) কাৰ্যসূচীৰ অধীনত গ্ৰহণ কৰা ভাৰতীয় প্ৰতিভাধৰৰ সংখ্যা বৃদ্ধি পোৱাৰ কথা উল্লেখ কৰে, আৰু জাপান বিজ্ঞান আৰু প্ৰযুক্তি সংস্থাৰ ছাকুৰা বিজ্ঞান বিনিময় কাৰ্যসূচী আৰু বিজ্ঞান আৰু প্ৰযুক্তি বিভাগৰ (DST) পদক্ষেপৰ অধীনত আমন্ত্ৰিত জাপানীজ হাইস্কুলৰ ছাত্ৰ-ছাত্ৰীসকলৰ কথাও বিশেষভাবে উল্লেখ কৰে।  লক্ষ্য কৰে। ডি এছ টিৰ ভাৰত-জাপান সমবায় বিজ্ঞান কাৰ্যসূচী (আই জে চি এছ পি), জাপান ছ’চাইটি ফৰ প্ৰমোচন অৱ ছায়েন্স (জে এছ পি এছ), এম ই এক্স টি বৃত্তি আৰু আন্তঃবিশ্ববিদ্যালয় বিনিময় প্ৰকল্প আদি কাৰ্যসূচীৰ জৰিয়তে ছাত্ৰ আৰু বিশ্ববিদ্যালয়ৰ আদান-প্ৰদানক অধিক উন্নত কৰাৰ গুৰুত্বৰ বিষয়তো তেওঁলোকে  আলোকপাত কৰে। ভাৰতীয় মহাকাশ গৱেষণা সংস্থা আৰু জাপান মহাকাশ অন্বেষণ সংস্থাৰ মাজত চন্দ্ৰ মেৰু অন্বেষণ (LUPEX) অভিযানত চলি থকা অগ্ৰগতিত  তেওঁলোকে সন্তুষ্টি প্ৰকাশ কৰে। শেহতীয়াকৈ ভাৰতৰ ডি এছ টি আৰু জাপানৰ কেবিনেট অফিচৰ মাজত কোৱাণ্টাম টেকন’লজিছৰ লেটাৰ অৱ ইনটেণ্টত স্বাক্ষৰ হোৱাক তেওঁলোকে আদৰণি জনায়। দুয়োখন দেশৰ প্ৰতিভাৰ দ্বাৰা  দুয়োপক্ষৰ প্ৰত্যাহ্বানসমূহৰ সৈতে মোকাবিলা কৰা এক পাৰস্পৰিক পৰিপূৰক সম্পৰ্ক  গঢ়ি তোলাৰ বিষয়তো দুয়োগৰাকী প্ৰধানমন্ত্ৰীয়ে প্ৰতিশ্ৰুতি পুনৰ দৃঢ় কৰে। তেওঁলোকে ভাৰতত জাপানী ভাষা শিক্ষাৰ অধিক প্ৰসাৰৰ কথা  দৃঢ়তাৰে কয়, নিহংগো পাৰ্টনাৰ্ছ কাৰ্যসূচীকে   ধৰি এতিয়ালৈকে হোৱা অগ্ৰগতিৰ শলাগ লয়। তেওঁলোকে ২০২৫ চনত দুয়োখন দেশৰ মাজত  পৰ্যটকৰ সংখ্যা  ৫ লাখ ৪০ হাজাৰ অতিক্ৰম কৰাৰ কথাক  আদৰণি জনাই দুয়োখন দেশৰ পৰ্যটনক প্ৰসাৰিত কৰাৰ প্ৰতিশ্ৰুতি পুনৰবাৰ উল্লেখ কৰে। তেওঁলোকে প্ৰতিষ্ঠানিক আৰু জনসাধাৰণৰ সংযোগ গভীৰ কৰাৰ লক্ষ্যৰে দুয়োখন দেশৰ মাজত চলি থকা বৌদ্ধিক আৰু সাংস্কৃতিক আদান-প্ৰদানৰ শলাগ লয়। বিশেষকৈ যুৱক-যুৱতীসকলৰ মাজত এনিমে, মাংগা, গেমিং, ছবি আদি সৃষ্টিশীল উদ্যোগসমূহে লোৱা গুৰুত্বপূৰ্ণ ভূমিকাক তেওঁলোকে প্ৰশংসা কৰে। পৰ্যটককে ধৰি জনসাধাৰণৰ মাজত বৰ্ধিত আদান-প্ৰদানক স্বীকৃতি দি তেওঁলোকে সংশ্লিষ্ট কৰ্তৃপক্ষৰ মাজত কনছুলাৰ বিষয়ত আলোচনাক প্ৰসাৰিত কৰাৰ বিষয়তো তেওঁলোকে গুৰুত্ব আৰোপ কৰে।

প্ৰধানমন্ত্ৰী দুগৰাকীয়ে দুয়োখন দেশৰ মাজত অৰ্থনৈতিক আৰু জনসাধাৰণৰ সংযোগ গভীৰ কৰাৰ ক্ষেত্ৰত ভাৰতীয় ৰাজ্য আৰু জাপানৰ প্ৰিফেকচাৰ আৰু পৌৰসভাসমূহে গ্ৰহণ কৰা গুৰুত্বপূৰ্ণ ভূমিকাক স্বীকাৰ কৰে  । তেওঁলোকে আঞ্চলিক পৰ্যায়ত নিত্য বৃদ্ধি পোৱা আদান-প্ৰদানক আদৰণি জনায়, য’ত ভাৰত-জাপান গৱৰ্ণৰছ নেটৱৰ্ক ফৰ ফ্ৰেণ্ডশ্বিপ এণ্ড এক্সচেঞ্জ স্থাপন আৰু শেহতীয়াকৈ ইয়ামানাছি প্ৰিফেকচাৰ আৰু উত্তৰ প্ৰদেশ, টয়ামা প্ৰিফেকচাৰ আৰু আন্দ্ৰ প্ৰদেশ, শ্বিজুওকা প্ৰিফেকচাৰ আৰু গুজৰাট, হামামাটছু চহৰ আৰু আহমেদাবাদ, ৱাকায়ামা প্ৰিফেকচাৰ আৰু মহাৰাষ্ট্ৰ, ছান’ইন অঞ্চল , কেৰেলা, এহিমে প্ৰিফেকচাৰ আৰু তামিলনাডু, ফুক’কা প্ৰিফেকচাৰ আৰু দিল্লীৰ লগতে কিটাকিউছু চহৰ আৰু তেলেংগানা আদি অন্তৰ্ভুক্ত হৈ আছে ।

আঞ্চলিক আৰু বিশ্বজোৰা বিষয়

নবীকৃত এফ অ’ আই পি আৰু এক্ট ইষ্ট পলিচিৰ আধাৰত  আৰু স্থিতিস্থাপক আৰু সমৃদ্ধিশালী ভাৰত-প্ৰশান্ত মহাসাগৰীয় অঞ্চল বাস্তৱায়িত কৰিবলৈ দুয়োগৰাকী প্ৰধানমন্ত্ৰীয়ে ভাৰতৰ উত্তৰ-পূব অঞ্চলৰ (এন ই আৰ) কৌশলগত গুৰুত্বৰ বিষয়ত আলোকপাত কৰে। প্ৰধানমন্ত্ৰী মোদীয়ে অঞ্চলটোত পথ নেটৱৰ্ক, দলং, স্বাস্থ্যসেৱাৰ সামাজিক আন্তঃগাঁথনি, বন ব্যৱস্থাপনা আৰু দুৰ্যোগৰ আশংকা হ্ৰাসৰ দৰে ক্ষেত্ৰত কঠিন, কোমল আৰু মানুহৰ মাজত সংযোগ বৃদ্ধিৰ ক্ষেত্ৰত জাপানৰ শক্তিশালী সমৰ্থনৰ শলাগ লয়। তেওঁলোকে অৰ্ধপৰিবাহী আৰু জৈৱ ইন্ধন খণ্ডত জাপানী আৰু ভাৰতীয় উদ্যোগৰ  অৰ্থনৈতিক কাৰ্যকলাপৰ লগতে দক্ষতা বিকাশ, জাপানী ভাষা প্ৰশিক্ষণ আৰু মানৱ সম্পদ বিনিময়ক আদৰণি জনায়। তেওঁলোকে বিমষ্টেককে ধৰি সংশ্লিষ্ট অংশীদাৰ আৰু আঞ্চলিক সংস্থাসমূহৰ সৈতে ঘনিষ্ঠ সহযোগিতাৰে উত্তৰ-পূবক বংগোপসাগৰ অঞ্চলৰ সৈতে সংযোগ কৰা ঔদ্যোগিক মূল্য শৃংখল গঢ়ি তোলাৰ বাবে তেওঁলোকৰ ভাগ-বাটোৱাৰা কৰা  প্ৰতিশ্ৰুতিৰ কথা পুনৰ দৃঢ় কৰে। ২০২৬ চনৰ ফেব্ৰুৱাৰী মাহত, মেঘালয়ৰ শ্বিলঙত ষষ্ঠ ভাৰত জাপান বৌদ্ধিক সন্মিলন সফলভাৱে অনুষ্ঠিত হোৱাৰ কথাও তেওঁলোকে স্বীকাৰ কৰে। এক্ট ইষ্ট ফ’ৰাম (এ ই এফ)ৰ পৰৱৰ্তী ৰাউণ্ড আগতীয়াকৈ অনুষ্ঠিত কৰাৰ গুৰুত্বৰ বিষয়ত তেওঁলোকে সহমত প্ৰকাশ কৰে। স্থিতিস্থাপক আৰু সমৃদ্ধিশালী ভাৰত-প্ৰশান্ত মহাসাগৰীয় অঞ্চলৰ ভাগ-বতৰা লক্ষ্যৰ দিশে দুয়োগৰাকী প্ৰধানমন্ত্ৰীয়ে সমভাবাপন্ন  দেশসমূহৰ মাজত সহযোগিতা আগবঢ়াই নিয়াৰ প্ৰতিশ্ৰুতিৰ কথা  পুনৰবাৰ উল্লেখ কৰে। তেওঁলোকে কোৱাডৰ কাঠামোৰ অধীনত অবিৰত অগ্ৰগতিক আদৰণি জনায় আৰু ব্যৱহাৰিক সহযোগিতা বৃদ্ধিৰ বাবে তেওঁলোকৰ ভাগ-বতৰা প্ৰতিশ্ৰুতি পুনৰ দৃঢ় কৰে। তেওঁলোকে সামুদ্ৰিক আৰু আন্তঃৰাষ্ট্ৰীয় নিৰাপত্তাৰ চাৰিটা স্তম্ভৰ মাজেৰে কোৱাডৰ সহযোগিতাৰ গুৰুত্বৰ বিষয়ত  আলোকপাত কৰে।  গুৰুত্বপূৰ্ণ খনিজকে ধৰি অৰ্থনৈতিক সমৃদ্ধি আৰু নিৰাপত্তা; গুৰুত্বপূৰ্ণ  আৰু উদীয়মান প্ৰযুক্তি তথা মানৱীয় সাহায্য আৰু জৰুৰীকালীন সঁহাৰি আদিৰ বিষয়ে আলোচনাত গুৰুত্ব লাভ কৰে। তেওঁলোকে উল্লেখ কৰে যে এই ক্ষেত্ৰসমূহত দ্বিপাক্ষিক সহযোগিতাৰ বৃদ্ধিয়ে কোৱাডৰ প্ৰচেষ্টাক আৰু অধিক শক্তিশালী আৰু পৰিপূৰক হ’ব। তেওঁলোকে পৰৱৰ্তী কোৱাড লিডাৰ্ছ ছামিটৰ শীঘ্ৰে  আহ্বান কৰাৰ দিশত সহযোগিতা আগবঢ়োৱাৰ প্ৰতিশ্ৰুতি পুনৰ দৃঢ় কৰে। আঞ্চলিক স্থিতিস্থাপকতা শক্তিশালী কৰাৰ লগতে শান্তি, স্থিতিশীলতা আৰু সমৃদ্ধিৰ প্ৰসাৰৰ বাবে আছিয়ানৰ সদস্য ৰাষ্ট্ৰৰ সৈতে সহযোগিতাৰ গুৰুত্বৰ বিষয়তো  আলোকপাত কৰে। এই প্ৰেক্ষাপটত তেওঁলোকে ফিলিপাইনছৰ সৈতে  ত্ৰিপাক্ষিক ১.৫ ট্ৰেক নীতি আলোচনা অনুষ্ঠিত কৰাৰ প্ৰস্তুতি চলোৱাৰ বিষয়ত সহমত প্ৰকাশ কৰে। তেওঁলোকে আছিয়ানৰ  ঐক্যৰ প্ৰতি তেওঁলোকৰ প্ৰবল সমৰ্থন আৰু “ভাৰত-প্ৰশান্ত মহাসাগৰীয় (এঅ’আইপি)”ৰ ওপৰত আছিয়ানৰ দৃষ্টিভংগী”ৰ প্ৰতি তেওঁলোকৰ অটল সমৰ্থনৰ কথা  পুনৰবাৰ প্ৰকাশ কৰে। তদুপৰি, তেওঁলোকে বহুপাক্ষিক  উন্নয়ন বেংক (এমডিবি)ৰ জৰিয়তেকে ধৰি সমভাবাপন্ন দেশসমূহৰ মাজত গুৰুত্বপূৰ্ণ  খনিজ যোগান শৃংখল শক্তিশালী কৰাৰ ক্ষেত্ৰত সহযোগিতাৰ  বিষয়ত আলোকপাত কৰে, যেনে বিশ্ব বেংক গোটৰ ৰেজিলিয়েণ্ট এণ্ড ইনক্লুছিভ চাপ্লাই-চেইন এনহান্সমেণ্ট (আৰআইইই) পাৰ্টনাৰশ্বিপ আৰু এছিয়ান ডেভেলপমেণ্ট বেংক (এডিবি) ক্ৰিটিকেল মিনাৰেলছ-টু-মেনুফেকচাৰিং ফাইনেন্সিং ফেচিলিটি (চিএমএম-এফপিএফ) আদিৰ ক্ষেত্ৰত সহযোগিতা । প্ৰধানমন্ত্ৰী দুগৰাকীয়ে পূব চীন সাগৰ আৰু দক্ষিণ চীন সাগৰৰ পৰিস্থিতিক লৈ গুৰুতৰ উদ্বেগ প্ৰকাশ কৰে। তেওঁলোকে নিৰাপত্তাৰ লগতে যাতায়ত আৰু অভাৰফ্লাইটৰ স্বাধীনতা তথা বলপূৰ্বক বা জোৰ-জবৰদস্তিৰে অৱস্থা সলনি কৰাৰ চেষ্টাৰ ফলত বিপন্ন হোৱা যিকোনো একপক্ষীয় কাৰ্য্যৰ তীব্ৰ বিৰোধিতা কৰে। বিতৰ্কিত বিষয়সমূহত ক্ৰমবৰ্ধমান সামৰিকীকৰণক লৈ তেওঁলোকে গুৰুতৰ উদ্বেগ প্ৰকাশ কৰে। তেওঁলোকে পুনৰ দৃঢ়তাৰে কয় যে সামুদ্ৰিক বিবাদসমূহ শান্তিপূৰ্ণভাৱে আৰু আন্তঃৰাষ্ট্ৰীয় আইন অনুসৰি সমাধান কৰিব লাগিব, যিটো ইউএনচিএলঅ’এছত প্ৰতিফলিত হৈছে। উত্তৰ কোৰিয়াৰ পাৰমাণৱিক আৰু ক্ষেপণাস্ত্ৰ কাৰ্যসূচীক লৈ দুয়োগৰাকী প্ৰধানমন্ত্ৰীয়ে গুৰুতৰ উদ্বেগ প্ৰকাশ কৰে। ৰাষ্ট্ৰসংঘৰ নিৰাপত্তা পৰিষদৰ (UNSC) সংশ্লিষ্ট প্ৰস্তাৱ অনুসৰি উত্তৰ কোৰিয়াক সম্পূৰ্ণ পাৰমাণৱিক বিচ্ছিন্ন কৰাৰ প্ৰতিশ্ৰুতি পুনৰ দৃঢ় কৰে। তেওঁলোকে  উত্তৰ কোৰিয়াৰ পাৰমাণৱিক আৰু ক্ষেপণাস্ত্ৰ প্ৰযুক্তিৰ প্ৰসাৰৰ সন্দৰ্ভত নিৰন্তৰ উদ্বেগক মোকাবিলা কৰাৰ গুৰুত্বৰ বিষয়ত আলোকপাত কৰে। তেওঁলোকে ৰাষ্ট্ৰসংঘৰ সকলো সদস্য ৰাষ্ট্ৰকে নিষেধাজ্ঞা কাৰ্যকৰী কৰাৰ বাবে  ৰাষ্ট্ৰসংঘৰ প্ৰস্তাৱৰ অধীনত নিজৰ আন্তঃৰাষ্ট্ৰীয় বাধ্যবাধকতাসমূহ পালন কৰিবলৈ আহ্বান জনায়, য’ত উত্তৰ কোৰিয়ালৈ হস্তান্তৰ বা উত্তৰ কোৰিয়াৰ পৰা সকলো অস্ত্ৰ তথা আনুষংগিক সামগ্ৰী ক্ৰয় কৰাত নিষেধাজ্ঞা আৰোপ কৰা হৈছে। ম্যানমাৰৰ পৰিস্থিতি আৰু ইয়াৰ আঞ্চলিক প্ৰভাৱক লৈ প্ৰধানমন্ত্ৰী দুগৰাকীয়ে উদ্বেগ প্ৰকাশ কৰে । তেওঁলোকে শত্ৰুতা শীঘ্ৰে বন্ধ কৰি ম্যানমাৰৰ সমস্যাৰ  শান্তিপূৰ্ণ আৰু স্থায়ী সমাধানৰ বাবে সকলো অংশীদাৰৰ মাজত আলোচনাৰ বাবে অনুকূল পৰিৱেশ সৃষ্টিৰ আহ্বান  জনায় ।

প্ৰধানমন্ত্ৰী দুগৰাকীয়ে মধ্যপ্ৰাচ্যত বহনক্ষম শান্তি আৰু স্থিতিশীলতাৰ প্ৰতি নিজৰ প্ৰতিশ্ৰুতিৰ কথা  পুনৰবাৰ প্ৰকাশ কৰে। ইৰাণৰ পৰিস্থিতিৰ সন্দৰ্ভত তেওঁলোকে হৰমুজ প্ৰণালীৰ  মাজেৰে মুক্ত আৰু নিৰাপদ নৌ পৰিবহণ সুৰক্ষিত কৰা, শক্তি আৰু অন্যান্য অত্যাৱশ্যকীয় সামগ্ৰীৰ বাবে সুস্থিৰ যোগান শৃংখল বজাই ৰখা আৰু বিশেষকৈ ইউএনচিএলঅ’এছত প্ৰতিফলিত হোৱা আন্তঃৰাষ্ট্ৰীয় আইনসমূহ ৰক্ষা কৰাৰ বিষয়ত গুৰুত্ব আৰোপ কৰে। তেওঁলোকে গাজা পুনৰ নিৰ্মাণৰ বাবে বিস্তৃত পৰিকল্পনাক আগুৱাই নিয়াৰ লগতে দুখন ৰাষ্ট্ৰৰ সমাধান নিশ্চিত কৰাৰ প্ৰতিশ্ৰুতি অনুসৰি জীৱন যাপন কৰাটো অতি প্ৰয়োজনীয় বুলি মন্তব্য কৰে। তেওঁলোকে পুনৰ দৃঢ়তাৰে কয় যে অতি সোনকালে স্থিতিশীলতা ঘূৰাই অনা আৰু অঞ্চলটোত স্থায়ী শান্তি লাভৰ বাবে কূটনৈতিক প্ৰচেষ্টা অব্যাহত ৰখা অপৰিহাৰ্য। দুয়োগৰাকী প্ৰধানমন্ত্ৰীয়ে ইণ্ডিয়া আফ্ৰিকা ফ’ৰাম ছামিট (আই এ এফ এছ) ব্যৱস্থা আৰু জাপানৰ টকিঅ’ আন্তঃৰাষ্ট্ৰীয় আফ্ৰিকান উন্নয়ন সন্মিলন (টিকাড)ৰ লগতে ভাৰত মহাসাগৰ-আফ্ৰিকাৰ অৰ্থনৈতিক অঞ্চল পদক্ষেপত কল্পনা কৰা অনুসৰি আফ্ৰিকাত সহযোগিতাক প্ৰসাৰিত কৰাৰ প্ৰতিশ্ৰুতি পুনৰ দৃঢ় কৰে। এই উদ্দেশ্যে তেওঁলোকে বাণিজ্য আৰু বিনিয়োগৰ বাবে এটা কেন্দ্ৰ স্থাপনৰ বাবে আৰু আফ্ৰিকাত বহনক্ষম অৰ্থনৈতিক উন্নয়নৰ অৰ্থে  ভাৰত-জাপান সহযোগিতা পদক্ষেপক আগুৱাই নিয়াৰ বাবে আফ্ৰিকাত জাপান-ভাৰত সহযোগিতা সম্প্ৰসাৰণ তথা  ভাৰতত উদ্যোগিক কেন্দ্ৰীভূতকৰণৰ কৌশলগত দৃষ্টিভংগী প্ৰণয়ন কৰাৰ বিষয়লৈ  লক্ষ্য কৰে। এই পদক্ষেপসমূহৰ সহযোগিতাৰ  আধাৰত সুনিৰ্দিষ্ট সহযোগিতাক অধিক প্ৰসাৰিত কৰাৰ বাবে তেওঁলোকে নিজৰ  প্ৰতিশ্ৰুতি পুনৰবাৰ প্ৰকাশ কৰে।

দুয়োগৰাকী প্ৰধানমন্ত্ৰীয়ে ৰাষ্ট্ৰসংঘৰ চনদকে ধৰি আন্তঃৰাষ্ট্ৰীয় আইন অনুসৰি ইউক্ৰেইনত ন্যায়সংগত আৰু স্থায়ী শান্তিৰ বাবে সমৰ্থন প্ৰকাশ কৰে। ন্যায্য আৰু স্থায়ী শান্তি লাভৰ বাবে বিভিন্ন দেশৰ কূটনৈতিক প্ৰচেষ্টাক আদৰণি জনায়। বহুপাক্ষিক ক্ষেত্ৰত দুয়োগৰাকী প্ৰধানমন্ত্ৰীয়ে বৰ্তমানৰ ভূ-ৰাজনৈতিক বাস্তৱতাক ভালদৰে প্ৰতিফলিত কৰিবলৈ স্থায়ী আৰু অস্থায়ী উভয়  শ্ৰেণীৰ পদক্ষেপৰ সম্প্ৰসাৰণকে ধৰি ৰাষ্ট্ৰসংঘৰ নিৰাপত্তা পৰিষদৰ (UNSC) জৰুৰী সংস্কাৰৰ বাবে জি-৪ দেশসমূহৰ সৈতে ঘনিষ্ঠভাৱে কাম কৰাৰ প্ৰতিশ্ৰুতি পুনৰবাৰ উল্লেখ কৰে। বিশেষকৈ নিৰ্দিষ্ট সময়সীমাৰ ভিতৰত সুনিৰ্দিষ্ট ফলাফল লাভ কৰাৰ সামগ্ৰিক লক্ষ্যৰে আন্তঃচৰকাৰী আলোচনাৰ কাঠামোৰ অধীনত আলোচনা আৰম্ভ কৰাৰ জৰিয়তে তেওঁলোকে ৰাষ্ট্ৰসংঘৰ  সংস্কাৰ ত্বৰান্বিত কৰাৰ বাবে নিজৰ দৃঢ়তা প্ৰকাশ কৰে। সংস্কাৰ সাধন কৰা  ইউএনএছচিৰ স্থায়ী আসনৰ বাবে দুয়োখন দেশে উভয়ৰে  প্ৰাৰ্থিত্বৰ প্ৰতি তেওঁলোকে পাৰস্পৰিক সমৰ্থন প্ৰকাশ কৰে। ২০২৮-২৯ আৰু ২০৩৩-৩৪ চনত অস্থায়ী আসনৰ বাবে নিজ নিজ প্ৰাৰ্থীৰ বাবে পাৰস্পৰিক সমৰ্থনৰ ক্ষেত্ৰত ভাৰত আৰু জাপানে এক বুজাবুজিত উপনীত হোৱাৰ বিষয়টোৰ কথাও   তেওঁলোকে প্ৰশংসাৰে উল্লেখ কৰে। পৰিৱৰ্তিত বিশ্বত বিশ্ব শাসনত অৰিহণা যোগোৱা ৰাষ্ট্ৰসংঘৰ কাৰ্যক্ষমতা আৰু ফলপ্ৰসূতা বৃদ্ধিৰ বাবে ৰাষ্ট্ৰসংঘৰ সংস্কাৰৰ প্ৰয়োজনীয়তাৰ বিষয়তো তেওঁলোকে গুৰুত্ব আৰোপ কৰে। প্ৰধানমন্ত্ৰী মোদীয়ে দুৰ্যোগৰ আশংকা হ্ৰাসৰ ক্ষেত্ৰত বিনিয়োগৰ গুৰুত্ব আৰু “বিল্ড বেক বেটাৰ” আদিৰ দৰে ২০১৫-২০৩০ চনৰ দুৰ্যোগৰ আশংকা হ্ৰাসৰ বাবে চেণ্ডাই কাঠামো আৰু নীতিসমূহ আগুৱাই নিয়াৰ উদ্দেশ্যেৰে ২০৩০ চনত ৰাষ্ট্ৰসংঘৰ দুৰ্যোগৰ আশংকা হ্ৰাসৰ চতুৰ্থ বিশ্ব সন্মিলন আয়োজন কৰিবলৈ ভাৰতক জাপানে জনোৱা সমৰ্থনক আদৰণি জনায়। ২০২৭ চনত জাপানৰ চেণ্ডাইত অনুষ্ঠিত হ’বলগীয়া দুৰ্যোগৰ আশংকা হ্ৰাসৰ এছিয়া-পেচিফিক মন্ত্ৰীসভাৰ সন্মিলনৰ জৰিয়তেও দুৰ্যোগৰ আশংকা হ্ৰাসৰ ক্ষেত্ৰত সহযোগিতা অব্যাহত ৰাখিবলৈ প্ৰতিশ্ৰুতিবদ্ধ হয়। জলবায়ু পৰিৱৰ্তন, সন্ত্ৰাসবাদ, আৰু আৰ্কটিকৰ লগতে নীতি তথা পৰিকল্পনাৰ বিষয়তো তেওঁলোকে সহমত প্ৰকাশ কৰে। প্ৰধানমন্ত্ৰী দুগৰাকীয়ে পাকিস্তানৰ পৰা অহা সীমা অতিক্ৰম কৰি সন্ত্ৰাসবাদকে ধৰি সকলো ৰূপ আৰু প্ৰকাশভংগীৰ সন্ত্ৰাসবাদ আৰু হিংসাত্মক উগ্ৰবাদক নিৰ্দ্বিধায় আৰু কঠোৰভাৱে গৰিহণা দিয়ে। ২০২৫ চনৰ ২২ এপ্ৰিলত জম্মু-কাশ্মীৰৰ পহলগামত হোৱা সন্ত্ৰাসবাদী আক্ৰমণক তেওঁলোকে কঠোৰ ভাষাৰে গৰিহণা দিয়ে আৰু ২০২৫ চনৰ ২৯ জুলাইৰ ৰাষ্ট্ৰসংঘৰ নিৰাপত্তা পৰিষদৰ নিৰীক্ষণ দলৰ প্ৰতিবেদনত দ্য ৰেজিষ্টেন্স ফ্ৰণ্ট (টি আৰ এফ)ৰ প্ৰসংগও উল্লেখ কৰে। ২০২৫ চনৰ ১০ নৱেম্বৰত দিল্লীত সংঘটিত হোৱা সন্ত্ৰাসবাদী কাণ্ডকো কঠোৰ ভাষাৰে গৰিহণা দিয়ে।এই নিন্দনীয় কাৰ্য্যৰ দোষী, সংগঠক, আৰু বিত্তীয় সাহায্য প্ৰদানকাৰীসকলক কোনো পলম নকৰাকৈ ন্যায়ৰ কাষ চাপিবলৈ আহ্বান জনায়। ৰাষ্ট্ৰসংঘৰ তালিকাভুক্ত সকলো সন্ত্ৰাসবাদী গোট আৰু সত্তাৰ বিৰুদ্ধে আল কায়দা, আইছিছ/দাইছ, লস্কাৰ-ই-তায়িবা (লেট), জৈছ-ই-মহম্মদ (জেএম) আৰু তেওঁলোকৰ সহযোগীসকলৰ বিৰুদ্ধে একত্ৰিতভাৱে ব্যৱস্থা গ্ৰহণ কৰাৰ লগতে সন্ত্ৰাসবাদীৰ নিৰাপদ আশ্ৰয়স্থলসমূহ নিপাত কৰাৰ বাবে, সন্ত্ৰাসবাদী বিত্তীয় চেনেলসমূহ আৰু আন্তঃৰাষ্ট্ৰীয় দেশৰ সৈতে ইয়াৰ সংযোগ দূৰ কৰাৰ বাবে দৃঢ় পদক্ষেপ গ্ৰহণৰ আহ্বান জনায়।  প্ৰধানমন্ত্ৰী দুগৰাকীয়ে ভাৰত-জাপানৰ সহযোগিতাক একাধিক খণ্ডত আগুৱাই নিয়াৰ বাবে বাৰ্ষিক শীৰ্ষ সন্মিলন ব্যৱস্থাৰ গুৰুত্বৰ বিষয়ত  পুনৰ দৃঢ়তাৰে মত প্ৰকাশ  কৰে। কূটনৈতিক সম্পৰ্ক স্থাপনৰ ৭৫ বছৰ সম্পূৰ্ণ হোৱাটো ভাৰত-জাপানৰ ভাগ-বাটোৱাৰা কৰা  সম্পৰ্কৰ বছৰ হিচাপে উদযাপন কৰি তেওঁলোকে বিশেষ কৌশলগত তথা বিশ্বজোৰা  অংশীদাৰিত্বক অধিক শক্তিশালী কৰাৰ প্ৰতিশ্ৰুতি দৃঢ় কৰে। প্ৰধানমন্ত্ৰী তাকাইচিয়ে এই ভ্ৰমণৰ সময়ত প্ৰধানমন্ত্ৰী মোদীয়ে প্ৰদান কৰা  আতিথ্যৰ বাবে ধন্যবাদ জ্ঞাপন কৰাৰ লগতে অহা বছৰ ১৭ সংখ্যক বাৰ্ষিক সন্মিলনৰ বাবে জাপান ভ্ৰমণৰ বাবে প্ৰধানমন্ত্ৰী মোদীক আমন্ত্ৰণ জনায়। সেই আমন্ত্ৰণ প্ৰধানমন্ত্ৰী মোদীয়ে আনন্দৰে গ্ৰহণ কৰে।

***

MJPS/SS/ST/DM