কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহে আজি গুজৰাটৰ গান্ধীনগৰৰ মহাত্মা মন্দিৰ সন্মিলন আৰু প্ৰদৰ্শনী কেন্দ্ৰত গুজৰাটৰ বাবে সমবায় ভিত্তিক গতিশীলতা মঞ্চ 'ভাৰত টেক্সি' মুকলি কৰে। ভাৰত টেক্সিৰ লক্ষ্য হৈছে নাগৰিকসকলক নিৰ্ভৰযোগ্য আৰু সেৱা-মুখী পৰিবহণ সুবিধা প্ৰদান কৰাৰ লগতে টেক্সি, অটো আৰু দুচকীয়া বাহন চলাচল সেৱাত নিয়োজিত সাৰথিসকলক মালিকীস্বত্ব, সন্মান, নিৰাপত্তা আৰু সমৃদ্ধিৰ সৈতে সংযোগ কৰা। এই কাৰ্যসূচীত গুজৰাটৰ মুখ্যমন্ত্ৰী শ্ৰী ভূপেন্দ্রভাই পেটেল, উপ মুখ্যমন্ত্ৰী শ্ৰী হৰ্ষ সংঘৱী, গুজৰাটৰ সমবায় মন্ত্ৰী শ্ৰী জিতুভাই বাঘানী, গুজৰাটৰ সমবায় মন্ত্ৰালয়ৰ ৰাজ্য মন্ত্ৰী শ্ৰী ৰমেশভাই কাটাৰা, সমবায় মন্ত্ৰালয়ৰ সচিব ড০ আশীষ কুমাৰ ভুটানী, গুজৰাটৰ মুখ্য সচিব শ্ৰী মনোজ দাস, ভাৰত টেক্সিৰ অধ্যক্ষ ড০ জয়েন মেহতাৰ লগতে সমবায় খণ্ডৰ জ্যেষ্ঠ প্ৰতিনিধি, বিষয়া আৰু বৃহৎ সংখ্যক সাৰথি উপস্থিত আছিল।

এই উপলক্ষে সমবেত লোকসকলক সম্বোধন কৰি কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহে কয় যে আজি ভাৰতৰ গতিশীলতা খণ্ডৰ বাবে এক অতি গুৰুত্বপূৰ্ণ দিন। তেওঁ কয় যে দেশৰ উন্নয়নৰ লগে লগে প্ৰতিটো ঘৰতে টেক্সি আৰু পৰিবহণ সেৱাৰ প্ৰয়োজনীয়তা বৃদ্ধি পাইছে। টেক্সিৰ ধাৰণা এতিয়া চাৰিচকীয়া বাহনত সীমাবদ্ধ হৈ থকা নাই; দুচকীয়া বাহন, অটো আৰু অন্যান্য নগৰীয়া পৰিবহণ সেৱাও ইয়াৰ অংশ হৈ পৰিছে। গুজৰাটত 'ভাৰত টেক্সি’ ৰ শুভাৰম্ভ হৈছে সহযোগিতাৰ জৰিয়তে এই ব্যাপক গতিশীলতাৰ প্ৰয়োজনীয়তাক এক নতুন দিশ প্ৰদান কৰাৰ দিশত এক পদক্ষেপ।

শ্ৰী অমিত শ্বাহে কয় যে আন কোম্পানীসমূহে বাহন চলোৱাসকলক চালক হিচাপে বিবেচনা কৰে কিন্তু ভাৰত টেক্সীয়ে তেওঁলোকক ‘সাৰথি’ বুলি গণ্য কৰে। তেওঁ কয় যে এয়া কেৱল শব্দৰ পাৰ্থক্য নহয়, ই সমগ্ৰ দৃষ্টিভংগীৰ পাৰ্থক্য। এজন 'সাৰথি' কেৱল সেৱা প্ৰদানকাৰী নহয়, বৰঞ্চ এই সমবায় প্ৰতিষ্ঠানৰ এগৰাকী সন্মানীয় অংশীদাৰ আৰু 'গৰাকী'। ভাৰত টেক্সিৰ মূল উদ্দেশ্য হৈছে সাৰথি আৰু গ্ৰাহক উভয়ৰে শোষণ প্ৰতিৰোধ কৰা, সেৱাৰ মান উন্নত কৰা আৰু গতিশীলতা খণ্ডত এক ন্যায্য ব্যৱস্থা স্থাপন কৰা।

কেন্দ্ৰীয় গৃহ মন্ত্ৰীগৰাকীয়ে কয় যে যোৱা কেইবছৰমানৰ ভিতৰত, এপ-আধাৰিত টেক্সি সেৱাৰ সন্দৰ্ভত কেইবাটাও অভিযোগ উত্থাপন হৈছিল-কিছুমান ক্ষেত্ৰত, সাৰথিসকলৰ উপাৰ্জনৰ পৰা অত্যাধিক কমিছন কাটি লোৱা হৈছিল; কিছুমান ক্ষেত্ৰত, পৰিশোধ তেওঁলোকৰ সময়মতে উপনীত হোৱা নাছিল; আৰু কিছুমান ক্ষেত্ৰত, তেওঁলোকৰ শুনানি নিদিয়াকৈ পঞ্জীয়ন বাতিল কৰা হৈছিল। তেওঁ কয় যে প্ৰতিটো সমস্যা আইন গৃহীত কৰি সমাধান কৰিব নোৱাৰি; বহু সময়ত, সঠিক প্ৰতিষ্ঠানিক আৰ্হিয়ে এক স্থায়ী সমাধান প্ৰদান কৰে। এই চিন্তাধাৰাৰে সমবায় মডেলৰ ওপৰত ভিত্তি কৰি ভাৰত টেক্সিৰ ধাৰণা লোৱা হৈছিল।

শ্ৰী অমিত শ্বাহে কয় যে সমবায়ে শোষণৰ সমাপ্তি ঘটাইছে আৰু দেশৰ বহু ক্ষেত্ৰত জনসাধাৰণক অধিকাৰ আৰু সমৃদ্ধি প্ৰদান কৰিছে। আমুলৰ উদাহৰণ দি তেওঁ কয় যে মাত্ৰ ১০০ টকাৰ অংশীদাৰীত্বৰ সৈতে সমবায় ব্যৱস্থাত যোগদান কৰা এগৰাকী গ্ৰাম্য মহিলা পশু পালক আজি ১ লাখ কোটি টকাৰ টাৰ্ণঅ’ভাৰৰ সৈতে এক বিশ্বস্ত খাদ্য ব্ৰেণ্ডৰ অংশীদাৰ। আমুলে প্ৰমাণ কৰিছে যে সহযোগিতাৰ জৰিয়তে, মধ্যস্থতাকাৰী অবিহনে, শোষণ অবিহনে আৰু সম্পূৰ্ণ স্বচ্ছতাৰে এটা বিশাল অৰ্থনৈতিক ব্যৱস্থা গঢ়ি তুলিব পাৰি। এই আৰ্হিয়ে দুগ্ধ খণ্ডত শোষণৰ অন্ত পেলাইছে আৰু মহিলা পশু পালকসকলৰ কঠোৰ পৰিশ্ৰমৰ উপাৰ্জন পোনপটীয়াকৈ তেওঁলোকৰ বেংক একাউণ্টত উপনীত হোৱাটো নিশ্চিত কৰিছে। আজি, গ্ৰাম্য ভাৰতৰ মহিলা পশু পালকসকলে তেওঁলোকৰ শ্ৰমৰ সম্পূৰ্ণ মূল্য মৰ্য্যাদাৰে লাভ কৰিছে। তেওঁ কয় যে একেদৰে, ইফকো আৰু কৃভকোৰ দৰে সমবায় প্ৰতিষ্ঠানে আজি দেশৰ কৃষকসকলৰ সাৰৰ প্ৰয়োজনীয়তাৰ প্ৰায় ৩৫ শতাংশ পূৰণ কৰি আছে।

এয়াও সমবায়ৰ এক গুৰুত্বপূৰ্ণ সফলতাৰ কাহিনী। ভাৰত টেক্সি হৈছে গতিশীলতা খণ্ডত এই সফল সমবায় পৰম্পৰাক আগুৱাই নিয়াৰ এক প্ৰচেষ্টা। তেওঁ কয় যে বহু লোকে প্ৰশ্ন উত্থাপন কৰিছিল যে ভাৰত টেক্সিৰ দৰে উদ্যোগৰ বাবে সম্পদ ক’ৰ পৰা আহিব। এই সন্দৰ্ভত দেশৰ আগশাৰীৰ সমবায় প্ৰতিষ্ঠানসমূহৰ সৈতে আলোচনা অনুষ্ঠিত হৈছিল আৰু তেওঁলোকক এই গুৰুত্বপূৰ্ণ পদক্ষেপত যোগদান কৰিবলৈ আহ্বান জনোৱা হৈছিল। এয়া অতি সন্তুষ্টিৰ বিষয় যে এনচিডিচি, ইফকো, ক্ৰিভকো, এনডিডিবি, নাবাৰ্ড, এনচিইএল আৰু আমুলৰ দৰে প্ৰতিষ্ঠিত সমবায় প্ৰতিষ্ঠানে একেলগে গতিশীলতা খণ্ডত সাৰথিসকলৰ এক সমবায় প্ৰতিষ্ঠান গঢ়ি তোলাৰ সিদ্ধান্ত লৈছে, যাতে দেশৰ বৃহৎ ব্যক্তিগত কোম্পানীসমূহৰ সন্মুখত এক শক্তিশালী, স্বচ্ছ আৰু সাৰথি-কেন্দ্ৰিক সমবায় বিকল্প উপস্থাপন কৰিব পাৰি।

কেন্দ্ৰীয় গৃহ তথা সমবায় মন্ত্ৰীগৰাকীয়ে কয় যে এতিয়ালৈকে ৭ লাখৰো অধিক সাৰথিয়ে ভাৰত টেক্সীত যোগদান কৰিছে। ভাৰত টেক্সীয়ে সাৰথিসকলক সন্মান প্ৰদান কৰিব, তেওঁলোকক নিৰাপত্তা প্ৰদান কৰিব আৰু অনাগত সময়ত সমৃদ্ধিৰ পথ প্ৰশস্ত কৰিব। তেওঁ কয় যে এই সমবায় প্ৰতিষ্ঠানে সাৰথিসকলৰ উপাৰ্জন সুৰক্ষিত কৰিব আৰু ভৱিষ্যতে ঋণ, বীমা আৰু তেওঁলোকৰ ব্যৱসায়ৰ সম্প্ৰসাৰণৰ জৰিয়তে তেওঁলোকক সহায় কৰিব। এতিয়ালৈকে প্ৰায় ৩৭ লাখ গ্ৰাহকে ভাৰত টেক্সিৰ সেৱা লাভ কৰিছে, যি ইয়াৰ বৰ্ধিত জনপ্ৰিয়তা আৰু জনসাধাৰণৰ বিশ্বাসৰ এক স্পষ্ট প্ৰমাণ।

শ্ৰী অমিত শ্বাহে কয় যে কিছুমান বাতৰি কাকতে ভাৰত টেক্সিৰ ভাড়া অধিক বুলি প্ৰকাশ কৰিছে। তেওঁ কয়, ‘মই সমগ্ৰ দেশৰ গ্ৰাহকসকলক ক’ব বিচাৰো যে ভাৰত টেক্সী য'তেই গৈ আছে, প্ৰতিযোগী কোম্পানীসমূহে লোকচানৰ সন্মুখীন হৈ সাময়িকভাৱে ভাড়া হ্ৰাস কৰি আছে; কিন্তু এই পৰিস্থিতি কিমান দিনলৈ অব্যাহত থাকিব? এক বা দুবছৰৰ বাবে নহয়’,  তেওঁ লগতে কয় যে তেওঁ সম্পূৰ্ণ আত্মবিশ্বাসৰে ক’ব বিচাৰে যে ভাৰত টেক্সীয়ে ক্লান্ত হ’ব নোৱাৰিব, পিছুৱাই যাব নোৱাৰিব, খেলপথাৰ এৰিব নোৱাৰিব। ভাৰত টেক্সি সেৱা আৰু সহযোগিতাৰ মনোভাৱেৰে ক্ষেত্ৰখনত দৃঢ়ভাৱে থাকিব আৰু স্বাস্থ্যকৰ পদ্ধতিৰে প্ৰতিযোগিতাত অংশগ্ৰহণ কৰিব। আমাৰ উদ্দেশ্য কাৰো ক্ষতি কৰা নহয়, কিন্তু গতিশীলতা খণ্ডত এক ন্যায়সংগত, স্বচ্ছ আৰু বহনক্ষম ব্যৱস্থা গঢ়ি তোলা।

কেন্দ্ৰীয় গৃহ মন্ত্ৰীগৰাকীয়ে কয় যে যিবোৰ কোম্পানীয়ে আজি ভাড়া হ্ৰাস কৰি অস্থায়ীভাৱে সাৰথিসকলক অধিক কমিছন দি বজাৰত চাপ সৃষ্টি কৰিবলৈ চেষ্টা কৰি আছে, তেওঁলোকে কেৱল ভাৰত টেক্সীৰ অগ্ৰগতি বন্ধ কৰিবলৈহে এনে কৰি আছে। তেওঁলোকে ভাৰত টেক্সি খেলপথাৰৰ পৰা ওলাই যোৱাটো বিচাৰে যাতে তেওঁলোকে পুনৰ স্বেচ্ছাচাৰী অনুশীলন আৰম্ভ কৰিব পাৰে। ‘কিন্তু মই আজি স্পষ্টকৈ ক’ব বিচাৰো যে তেওঁলোকৰ ইচ্ছা কেতিয়াও পূৰণ নহ’ব। ভাৰত টেক্সীয়ে সেৱাৰ সংকল্প, সহযোগিতাৰ শক্তি আৰু সাৰথিসকলৰ বিশ্বাসৰ সৈতে আগবাঢ়ি যাব’ , তেওঁ কয়। তেওঁ লগতে কয় যে উৰাবাতৰি বিয়পোৱাসকলে আমাৰ সহযোগিতামূলক মনোভাৱ, আমাৰ ধাৰাবাহিকতা আৰু সেৱাৰ প্ৰতি আমাৰ সমৰ্পণেৰে উত্তৰ দিব। ভাৰত টেক্সি সফল কৰাৰ আটাইতকৈ ডাঙৰ দায়িত্ব আমাৰ সাৰথিসকলৰ ওপৰত ন্যস্ত। যদি আমি কেৱল তাৎক্ষণিক লাভৰ প্ৰতি লক্ষ্য ৰাখি সিদ্ধান্ত লওঁ, তেন্তে অনাগত বছৰবোৰত আমি পুনৰ সেই একেই শোষণৰ সন্মুখীন হ’ব লাগিব যাৰ পৰা ভাৰত টেক্সি প্ৰতিষ্ঠা কৰা হৈছে।

শ্ৰী অমিত শ্বাহে সাৰথিসকলক কয় যে তেওঁলোকে বছৰ বছৰ ধৰি বিভিন্ন কোম্পানীৰ সৈতে কাম কৰি আহিছে আৰু জানে যে বহুবাৰ তেওঁলোকৰ কথা নুশুনিয়েই সিদ্ধান্ত লোৱা হৈছিল, তেওঁলোকৰ উপাৰ্জন হ্ৰাস কৰা হৈছিল আৰু তেওঁলোকৰ শ্ৰমৰ সম্পূৰ্ণ সন্মান দিয়া হোৱা নাছিল। তেওঁ কয়, "মই আপোনালোকক আশ্বাস দিছোঁ যে ভাৰত টেক্সীয়ে আপোনাক কেতিয়াও শোষণ নকৰে, কিয়নো ই আন কাৰোবাৰ কোম্পানী নহয়, আপোনাৰ নিজৰ সমবায় প্ৰতিষ্ঠান।" তেওঁ কয় যে কিছুমান কোম্পানীয়ে লোকচানত কাম কৰি অন্যায় প্ৰতিযোগিতাৰ জৰিয়তে ভাৰত টেক্সীক বজাৰৰ পৰা বাহিৰলৈ ঠেলি দিবলৈ চেষ্টা কৰি আছে। এনে ৰণনীতিয়ে বিশ্বৰ কিছুমান দেশত কাম কৰিব পাৰে, কিন্তু সেইবোৰ ভাৰতত কাম নকৰে, কিয়নো ভাৰতৰ আত্মা সমবায়, সেৱা আৰু সকলোৰে কল্যাণত নিহিত। ইয়াত কেৱল নিজৰ স্বাৰ্থই নহয়, সকলোৰে স্বাৰ্থই সৰ্বোপৰি বুলি গণ্য কৰা হয়। সাৰথি আৰু গ্ৰাহকসকলক আহ্বান জনাই কেন্দ্ৰীয় গৃহ মন্ত্ৰীগৰাকীয়ে কয় যে যদি আমি এক দীৰ্ঘম্যাদী, নিৰ্ভৰযোগ্য আৰু ন্যায়সংগত পৰিবহণ ব্যৱস্থা বিচাৰো, তেন্তে ভাৰত টেক্সীক সফল কৰাটো আমাৰ সকলোৰে সামূহিক দায়িত্ব। ‘ভাৰত টেক্সিৰ সৈতে থাকক, ভাৰত টেক্সি সদায় আপোনাৰ সৈতে থিয় দিব’, তেওঁ কয়। তেওঁ কয় যে আমি সমবায় খণ্ডত বহুতো সফল উদাহৰণ উপস্থাপন কৰিছো। আমুলয়েও ব্যক্তিগত দুগ্ধশালাৰ পৰা প্ৰতিযোগিতাৰ সন্মুখীন হ’বলগীয়া হৈছিল; ইফকো, ক্ৰিভকো আৰু এনডিডিবি-য়েও ব্যক্তিগত কোম্পানীসমূহৰ সৈতে প্ৰতিযোগিতা কৰিবলগীয়া হৈছিল, কিন্তু এই প্ৰতিষ্ঠানসমূহে সহযোগিতা, স্বচ্ছতা আৰু জনসাধাৰণৰ বিশ্বাসৰ শক্তিত সফল হৈছিল।

শ্ৰী অমিত শ্বাহে সাৰথিসকলক কয় যে ভাৰত টেক্সি তেওঁলোকৰ নিজৰ প্ৰতিষ্ঠান আৰু ইয়াক তেওঁলোকৰ শোষণ বন্ধ কৰিবলৈ, তেওঁলোকক সন্মান দিবলৈ আৰু তেওঁলোকক সমৃদ্ধিশালী কৰি তুলিবলৈ সৃষ্টি কৰা হৈছে। অনাগত সময়ত, এই প্ৰতিষ্ঠানে তেওঁলোকক ঋণ প্ৰাপ্ত কৰাত সহায় কৰিবলৈ, বীমা সুৰক্ষা প্ৰদান কৰিবলৈ আৰু তেওঁলোকৰ ব্যৱসায়ৰ সম্প্ৰসাৰণত সহায় কৰিবলৈ কাম কৰিব। তেওঁ কয় যে কোনো ব্যক্তিগত মঞ্চই এয়া কৰিব নোৱাৰে, কিয়নো তেওঁলোকৰ উদ্দেশ্য হৈছে তেওঁলোকৰ নিজৰ লাভ, আনহাতে ভাৰত টেক্সিৰ উদ্দেশ্য হৈছে ইয়াৰ সাৰথিসকলৰ কল্যাণ। তেওঁ কয় যে হ্ৰস্বম্যাদী লাভৰ পৰিৱৰ্তে দীৰ্ঘম্যাদী নিৰাপত্তা, সন্মান আৰু স্থিৰ আয়ক অগ্ৰাধিকাৰ দিব লাগিব।

কেন্দ্ৰীয় গৃহ তথা সমবায় মন্ত্ৰীগৰাকীয়ে কয় যে কিমানখন চহৰৰ বাবে প্ৰতিযোগী কোম্পানীসমূহে ভাড়া হ্ৰাস কৰি থাকিব? অহা ডেৰ বছৰৰ পৰা দুবছৰৰ ভিতৰত ভাৰত টেক্সীয়ে ৫০০ ৰো অধিক চহৰ আৰু নগৰত প্ৰৱেশ কৰিব। ভাৰত টেক্সীয়ে নাগপুৰ, পুনে, মুম্বাই, লক্ষ্ণৌ, চণ্ডীগড়, জয়পুৰ আৰু কলকাতাকে ধৰি দেশৰ বহু চহৰলৈ ইয়াৰ সেৱা সম্প্ৰসাৰিত কৰিব। ৩১ জুলাই ২০২৬ ৰ আগতে, ভাৰত টেক্সি সাতখন মুখ্য চহৰত উপনীত হ’ব। তেওঁ কয় যে অহা দুবছৰৰ ভিতৰত দেশৰ ৫০০ ৰো অধিক চহৰ আৰু নগৰত দুচকীয়া, অটো আৰু চাৰিচকীয়া তিনিওটা শ্ৰেণীত ভাৰত টেক্সি মডেল ৰূপায়ণ কৰা হ’ব।

গুজৰাটত ভাৰত টেক্সিৰ শুভাৰম্ভক লৈ আনন্দ প্ৰকাশ কৰি শ্ৰী অমিত শ্বাহে কয় যে আজি তেওঁলোক সাত লাখ সাৰথিৰ এক বিশাল পৰিয়ালৰ অংশ হৈ পৰিছে আৰু ভাৰত টেক্সিত যোগদান কৰি সমবায় আন্দোলনক নতুন শক্তি প্ৰদান কৰিছে। তেওঁ কয় যে তেওঁৰ সম্পূৰ্ণ বিশ্বাস আছে যে অনাগত সময়ত এই সমবায় প্ৰতিষ্ঠানে গতিশীলতা আৰু পৰিবহণ খণ্ডত নতুন উচ্চতা অৰ্জন কৰিব আৰু নিশ্চিতভাৱে সফল হ'ব। আজি, তেওঁলোক এক বিশাল সমবায় পৰিয়ালৰ অংশ হৈ পৰিছে যাৰ সৈতে দেশৰ কোটি কোটি কৃষক জড়িত হৈ আছে আৰু এতিয়া গুজৰাটৰ সাৰথিসকলেও এই গৌৰৱোজ্জ্বল সমবায় পৰিয়ালৰ এক অবিচ্ছেদ্য অংশ হৈ পৰিছে।

কেন্দ্ৰীয় গৃহ মন্ত্ৰীগৰাকীয়ে কয় যে প্ৰধানমন্ত্ৰী শ্ৰী নৰেন্দ্ৰ মোদীয়ে দেশক ‘সহকাৰ চে সমৃদ্ধি’ৰ মন্ত্ৰ প্ৰদান কৰিছে। গতিশীলতা আৰু পৰিবহণ খণ্ডত এই মন্ত্ৰটো বাস্তৱায়িত কৰাৰ দিশত ভাৰত টেক্সি হৈছে এক গুৰুত্বপূৰ্ণ পদক্ষেপ। তেওঁ কয় যে অনাগত দিনবোৰত সমবায় অধিক নতুন খণ্ডলৈ সম্প্ৰসাৰিত হ'ব আৰু ভাৰত টেক্সি সাৰথিসকলৰ সন্মান, নিৰাপত্তা আৰু সমৃদ্ধিৰ বাবে এক শক্তিশালী মাধ্যম হৈ পৰিব।

শ্ৰী অমিত শ্বাহে গুজৰাটৰ সকলো সাৰথিলৈ শুভেচ্ছা জ্ঞাপন কৰি কয় যে ভাৰত টেক্সীৰ সফলতা সেৱাৰ মনোভাৱ, সহযোগিতামূলক নৈতিকতা আৰু সাৰথিসকলৰ অংশগ্ৰহণৰ দ্বাৰা নিৰ্ধাৰণ কৰা হ'ব। তেওঁ কয় যে ভাৰত টেক্সীত যোগদান কৰি সাৰথিসকলে তেওঁলোকৰ সমৃদ্ধি, সন্মান আৰু নিৰাপত্তা এই তিনিওটাৰে পথ প্ৰশস্ত কৰিছে।

এই কাৰ্যসূচীৰ সময়ত ভাৰত টেক্সিৰ সম্প্ৰসাৰণ আৰু সুচাৰুৰূপে পৰিচালনাৰ বাবে বিভিন্ন প্ৰতিষ্ঠানৰ সৈতে বুজাবুজিৰ চুক্তিপত্ৰও বিনিময় কৰা হয়। ইয়াৰ ভিতৰত আছিল ৰাজকোটৰ ভাৰতীয় বিমানবন্দৰ প্ৰাধিকৰণ, চুৰাটৰ ভাৰতীয় বিমানবন্দৰ প্ৰাধিকৰণ, গুজৰাট মেট্ৰ’ৰেল নিগম, আহমেদাবাদ পৌৰ নিগম/বাছ দ্ৰুত পৰিবহন ব্যৱস্থা, গুজৰাট ৰাজ্যিক সমবায় বেংক, আদানী বিমানবন্দৰ, গুজৰাট ট্ৰেফিক আৰক্ষী, পশ্চিম ৰে’লৱে-আহমেদাবাদ বিভাগ আৰু বদোদৰা বিমানবন্দৰ। এই বুজাবুজি চুক্তিসমূহে বিমানবন্দৰ, ৰে’লপথ, মেট্ৰ’, নগৰীয়া পৰিবহণ আৰু যান-বাহন ব্যৱস্থাপনাৰ সৈতে জড়িত ক্ষেত্ৰসমূহত ভাৰত টেক্সিৰ সেৱাৰ পৰিসৰ অধিক শক্তিশালী কৰিব। কাৰ্যসূচীৰ সময়ত সৰ্বশ্ৰেষ্ঠ প্ৰদৰ্শন কৰা সাৰথিসকলক শ্বেয়াৰ প্ৰমাণপত্ৰও বিতৰণ কৰা হয়।

***

AK/MK