بھارت سرکار نے ایتھانول بلینڈنگ پیٹرول (ای بی پی) کے حوالے سے سوشل میڈیا پر گردش کرنے والے کچھ گم راہ کن اور بے بنیاد دعوؤں کو نوٹ کیا ہے، جو عوام کو الجھانے اور گم راہ کرنے کے مقصد سے دکھائی دیتے ہیں۔ یہ بھی مشاہدہ کیا گیا ہے کہ پرانی تصاویر اور ویڈیوز کو سنسنی خیزی کے ذریعے ناظرین حاصل کرنے اور ایتھانول بلینڈنگ ایندھن کے بارے میں غیر ضروری خدشات پیدا کرنے کی کوشش میں دوبارہ گردش کرایا جا رہا ہے۔

پیٹرولیم اور قدرتی گیس کی وزارت اس بات کی تصدیق کرتی ہے کہ ایتھانول بلینڈنگ پروگرام سائنسی طور پر تصدیق شدہ ہے اور سرکار کے ذریعے مسلسل نگرانی کی جاتی ہے۔

ایتھانول بلینڈنگ پروگرام کا آغاز 2003 میں خام تیل کی درآمدات میں کمی، توانائی کی سلامتی کو بڑھانے اور ماحولیاتی پائیداری کو فروغ دینے کے مقاصد کے ساتھ کیا گیا تھا۔ اس پروگرام کو تکنیکی تیاری اور اسٹیک ہولڈروں کے مشوروں کی بنیاد پر مرحلہ وار طور پر نافذ کیا گیا ہے، جس کا اختتام 2023 سے 20 فیصد ایتھانول بلینڈنگ (ای20) کے اجرا پر ہوا ہے۔

سرکار تیل مارکیٹنگ کمپنیوں، گاڑی سازوں، ایندھن ٹیسٹنگ ایجنسیوں اور دیگر اسٹیک ہولڈروں کے مشورے سے ایتھانول بلینڈنگ پروگرام کے نفاذ کی مسلسل نگرانی کرتی ہے۔

ای20 پیٹرول کے متعارف ہونے کے بعد سے، انجن کی ناکامی یا گاڑی کے خراب ہونے کے وسیع پیمانے پر مسائل، جو ایتھانول بلینڈنگ سے منسوب ہوں، رپورٹ نہیں ہوئے ہیں۔

فی الحال گردش کرنے والا ایک دعوٰی ایتھانول کی ہائیگروسکوپک فطرت سے متعلق ہے۔ یہ عام علم ہے کہ ایندھن کے ٹینک میں پانی کا داخلہ کسی بھی ایندھن کے لیے، خواہ وہ ایتھانول ملا ہو یا نہ ہو، ناپسندیدہ ہے۔ جدید گاڑیوں میں ڈیزائن کی خصوصیات اور حفاظتی اقدامات موجود ہیں جو ایندھن کے ٹینک میں پانی کے داخلے کو روکنے کے لیے ہیں۔

یہ بھی مشاہدہ کیا گیا ہے کہ کچھ افراد سوشل میڈیا پر ویڈیوز بنا اور شیئر کر رہے ہیں جن میں گنے کے رس کو براہ راست پیٹرول میں ملا کر دکھایا جا رہا ہے۔ ایسا مواد گم راہ کن اور بے بنیاد ہے۔ ایندھن ملاوٹ کے لیے استعمال ہونے والا ایتھانول قائم شدہ صنعتی عمل کے ذریعے تیار کیا جاتا ہے اور پیٹرول میں ملانے سے پہلے سخت معیاری تفصیلات کے مطابق ہوتا ہے۔

ایتھانول مختلف قسم کے فیڈ اسٹاکس جیسے گنے کا رس، گڑ، ٹوٹے ہوئے چاول اور مکئی سے بنایا جاتا ہے، لیکن ایتھانول کی خصوصیات ان پٹ فیڈ اسٹاک سے بہت مختلف ہوتی ہیں کیوں کہ یہ تخمیر سمیت کئی مراحل سے گزرا ہوتا ہے، جس سے فیڈ اسٹاک میں موجود شکر کی تخمیر ہوتی ہے۔

ایسی ویڈیوز کی گردش کا مقصد معاملے کو سنسنی خیز بنانا اور اپنے ناظرین میں اضافہ کرنا دکھائی دیتا ہے۔

بھارت میں ایتھانول بلینڈنگ سخت ایندھن معیاری تفصیلات کے مطابق ہے اور تعیناتی سے پہلے سخت ٹیسٹنگ سے گزرتی ہے۔ زیادہ ملاوٹ کی سطحوں کا اجرا صرف وسیع تکنیکی تشخیص اور گاڑی سازوں اور دیگر اسٹیک ہولڈروں کے مشورے کے بعد کیا گیا ہے۔

حال ہی میں، ایک ویڈیو جس میں گاڑی کے ایندھن ٹینک کے قریب چیونٹیاں دکھائی گئی تھیں، سوشل میڈیا پر وسیع پیمانے پر گردش کی گئی۔ جواب میں، بھارتی پیٹرولیم کارپوریشن لمیٹڈ (بی پی سی ایل) نے وضاحت کی کہ پیٹرول ملاوٹ کے لیے استعمال ہونے والا ایندھن گریڈ ایتھانول تخمیر اور کشید کے عمل کے ذریعے تیار کیا جاتا ہے جو حتمی مصنوعات سے باقی شکر کو ختم کر دیتے ہیں۔ مزید برآں، ایندھن ایتھانول میں ڈینیچرنٹس ہوتے ہیں جو کیڑوں کے لیے ناپسندیدہ ہوتے ہیں۔ ای20 ایندھن سے کوئی قابل شناخت کشش وابستہ نہیں ہے جو چیونٹیوں یا دیگر کیڑوں کو گاڑی کے ایندھن کے ڈھکنوں کے ارد گرد جمع ہونے پر مجبور کرے۔ لہٰذا، ای20 ایندھن اور چیونٹیوں کی کشش کے درمیان تعلق بتانے والے دعوؤں کی کوئی سائنسی بنیاد نہیں ہے اور وہ سائنسی شواہد سے تائید شدہ نہیں ہیں۔

اسی طرح، متعدد دعوؤں جن میں یہ بتایا گیا تھا کہ ای20 ایندھن کے استعمال سے گاڑی کے انشورنس کی توثیق متاثر ہو سکتی ہے، متعلقہ اسٹیک ہولڈروں نے وضاحت کی اور انھیں غلط پایا گیا۔

ایتھانول بلینڈنگ ایک عالمی سطح پر قبول شدہ عمل ہے اور کئی ممالک بشمول ریاستہائے متحدہ امریکہ، برازیل اور جاپان میں کام یابی سے نافذ کیا گیا ہے۔ برازیل نے طویل عرصے سے زیادہ ایتھانول بلینڈنگ کی سطحیں اپنائی ہیں، جہاں ای27 معیاری پیٹرول ملاوٹ کے طور پر کام کرتا ہے۔

یہ جاننا اہم ہے کہ ایتھانول بلینڈنگ پروگرام نے خام تیل کی درآمدات میں کمی کے ذریعے ملک کو 1.4 لاکھ کروڑ روپے سے زیادہ کی غیر ملکی کرنسی بچانے میں مدد کی ہے۔ اس پروگرام نے ایتھانول کی پیداوار میں استعمال ہونے والے زرعی فیڈ اسٹاکس کے لیے مسلسل طلب بھی پیدا کی ہے، جس سے کسانوں کی آمدنی کو سہارا ملتا ہے اور دیہی معیشت مضبوط ہوتی ہے۔

ایتھانول بلینڈنگ بھارت کی توانائی کی سلامتی کو بڑھانے، کاربن کے اخراج کو کم کرنے اور ملک کے صاف ستھری نقل و حرکت کی طرف منتقلی کو آگے بڑھانے میں اہم کردار ادا کرتا ہے۔ سرکار سائنسی شواہد اور مسلسل اسٹیک ہولڈروں کی مشغولیت کی رہ نمائی میں، اس پروگرام کو محفوظ، شفاف اور صارف مرکزیت کے ساتھ نافذ کرنے کے لیے عہدبستہ ہے۔

***

(ش ح - ع ا)

U.No. 9109