Ki jaka paidbah jong ka India, ki jaka sor bad ki park ki la pynïasoh lang ïa ki briew naduh mynshwa katba ki dang kyntiew ïa ki rukom im kiba koit ba khiah. Katba ka jingim ha sor ka nang stet, kine ki jaka paidbah ki nang kham pawnam kum ki jaka pdeng jong ka jingkoit jingkhiah ha ka met bad ka bor pyrkhat. Da kaba ithuh ia ki lad jong ki, ka tnad Ayush ka la plie ia ka Yoga Park Portal ban pynkylla ia ki park kiba la don lypa ha kylleng ka India sha ki jaka sumar paidbah ha kaba ka yoga, ka jingpyrkhat jylliew, bad ka rukom im kaba koit ba khiah ki long shi bynta jong ka jingim ba man ka sngi.

Ia kane ka Yoga Park Portal la plie paidbah da u Myntri Khynnah ka Sorkar Pdeng (Independent Charge) na ka bynta ka Ayush bad u Myntri khynnah ka tnad ka koit ka khiah jong ka sorkar pdeng u Prataprao Jadhav, ha ka jingkhein sngi kaba 25 sngi na ka bynta ka International Day of Yoga 2026 kaba la pynlong ha Khajuraho, Madhya Pradesh. La plie paidbah ryngkat bad ka Yoga Sangam Portal ba la pynmih biang, kane ka rynsan ka pyni ïa kawei na ki sienjam ba kongsan jong ka Tnad ban pynjylliew ïa ka jingsaphriang ka yoga bad wanrah ia ki jingdon jingem kiba iaineh ha kaba iadei bad ka koit ka khiah ha kylleng ka ri.

Ha ka tynrai jong ka, ka sienjam Yoga Park ka ialeh ban pyrkhat biang ïa ki park ym tang kum ki jaka pynjahthait hynrei kum ki jaka sumar paidbah. Lyngba kane ka portal, ki jaka treikam jong ka Panchayati Raj, ki bor shnong ha ki jaka sor, ki Resident Welfare Association, ki seng treimon sngewbha, ki kompeni, bad kiwei kiwei ki jaka treikam ki lah ban ïashim bynta ha kaba kyntiew ïa ki park kiba la don lypa sha ki jaka Yoga Park kiba pynshlur ïa ka jingleh yoga man ka por, ka jingpyrkhat jylliew, ka jingsumar kaba ai jingiada na ki jingpang, bad ka jingïadei bad ka imlang sahlang.

Haba kren shaphang ka jingdonkam jong kane ka sienjam, u Prataprao Jadhav u la ban jur ba ki Yoga Park ki long kiba la thmu ban long kum ki jingdon jingem ba shirta jong ka imlang sahlang kiba kyntiew ia ki rukom im kiba koit ba khiah bad pynkhlain ia ka kam ai jingsumar jong ka India kiba iada na ki jingpang. Ka sienjam ka pyni ia ka jingangnud kaba kham iar jong ka Tnad ban pyniasoh ia ka yoga ha ka jingim ba man ka sngi bad ban pynthikna ba ka jinglah ban ioh ia ka jingkoit jingkhiah kan long kaba lah ban ioh hapoh ki dong bad ki shnong ki thaw ha kylleng ka ri.

Ym kum ki projek ba iadei bad ki jingdon jingem kiba pynleit jingmut tang ha ka jingkilan met, ka Yoga Park ka pyniasoh lang ia ka jingkoit jingkhiah, ka jingpynneh pynsah ia ka mariang, bad ka jingiashim bynta ha ka imlang sahlang. Ka sienjam ka thmu ban kyntiew ia ki park kiba la don lypa sha ki jaka kiba iahap kiba la pynkhreh na ka bynta ka jingleh yoga, ka jingpyrkhat jylliew, bad ki kam ba iadei bad ka jingkoit jingkhiah ha ka imlang sahlang. Lah ban shna ia ki jaka leh yoga ba kyrpang, ki jaka pyrkhat jylliew, ki jaka ba jyrngam, ki jaka ai jinghikai, bad ki jaka na ka bynta ki jingialang jong ki kynhun ban pynshlur ia ka jingiashim bynta man ka por da ki briew baroh.

Ka jinglong ba kyrpang jong ka sienjamka long ka rukom pyntreikam ba iatreilang jong ka. La khmih lynti ba ki bor synshar shnong bad ki kynhun ha ka imlang sahlang kin don ka bynta kaba hakhmat eh ha kaba ithuh bad pynneh pynsah ia ki park kiba biang, katba ki jaka leh yoga ki lah ban kyrshan ia ki prokram ai jinghikai bad ki jingleh yoga man ka por. Ka sienjam ka pynshlur ruh ia ka jingiashim bynta lyngba ka Corporate Social Responsibility (CSR), kaba plie lad ia ki kompeni ban noh synniang sha ka jingkyntiew ia ki jingdon jingem ba iadei bad ka koit ka khiah kiba ai jingmyntoi beit beit ia ki nongshong shnong.

Ka Tnad ka la ban jur ba ki Yoga Park ba la kyrshan da ka CSR ki lah ban wanrah ia ka pateng jong ka koit ka khiah jong ki paidbah kaba iaineh da kaba pynbiang ia ki jaka kiba lah ban ioh na ka bynta ka jingleh yoga man ka sngi, ki kam ai jinghikai shaphang ka koit ka khiah, bad ki prokram ba iadei bad ka jingkoit jingkhiah ha ka imlang sahlang. Ki kompeni kiba iashim bynta ki lah ruh ban ioh ia ka jingithuh kaba biang na ka bynta ka jingnoh synniang jong ki sha ka bha ka miat ha ka imlang sahlang, kaba pynskhem ia ka bynta jong ki riew shimet ha kaba kyntiew ia ka jingsumar kaba iada na ki jingpang bad ka rukom im kaba koit ba khiah.

Nalor ka jingkyntiew ia ki jingdon jingem, ka Yoga Park Portal ka pyni ia ka rukom treikam digital na ka bynta ka jingiashim bynta ha ka ri baroh kawei. Ka rynsan ka ai lad ban ioh ia ki jingbthah, ki jingthmu, ki rukom pynrung kyrteng, bad ki jingdonkam na ka bynta kito kiba don bynta ha kane ka kam ban iasoh bad kane ka sienjam. Da kaba pynïasoh lang ïa ki jaka treikam jong ka sorkar, ki bor shnong, ki kynhun ha ka imlang sahlang, bad ki kompeni kiba iatreilang lyngba kawei ka rynsan, ka Tnad ka thmu ban wanrah ïa ki kam kiba pyntrei lang ha ka ri kaba ïatreilang kaba pynshong nongrim ha ka jingkoit jingkhiah bad ka koit ka khiah jong ki paidbah.

Kane ka sienjam ka ïahap ruh bad ka phang jong ka International Day of Yoga 2026, "Yoga for Healthy Ageing.” Katba ki paidbah ha kylleng ka pyrthei ki iakynduh ia ki jingeh kiba nangroi kiba iadei bad ki jingpang kiba wan na ka rukom im, ka jingkhuslai, bad ki jingeh ha ka koit ka khiah kiba iadei bad ka rta, ki jaka sumar paidbah kiba lah ban ioh bynta ki lah ban don ka bynta kaba kongsan ha kaba pynshlur ia ka kam kilan met man ka por, ka jingpyrkhat, bad ka jingiakren ha ka imlang sahlang. Ki Yoga Park ki long kiba la thmu kum ki jaka ba kynthup lang ia baroh ha kaba ki khynnah, ki samla, ki nongtrei, bad ki riew tymmen baroh ki lah ban ioh jingmyntoi na ka jingleh ia ka yoga ha ka jingim ba man ka sngi jong ki.

Kaba kongsan ka long ba ka Yoga Park ka ialeh ban wanrah ïa ka pateng kaba iaineh ka bym sahkut tang ha ka jingrakhe ia ka International Day of Yoga man la u snem. Katba ki jingpyni yoga paidbah bad ki jingïalang paidbah ki wanrah ïa ka jingsngewthuh, ka jingsdang ïa ki jaka ba la aiti kyrpang na ka bynta ka jingkoit jingkhiah ka ai ïa ka lad jingïarap ba neh jong ka imlang sahlang kaba lah ban bteng ban shakri ïa ki nongshong shnong ha baroh shisnem. Ha kane ka jingmut, ka sienjam ka pyni ia ka jingkylla na ka jingiashim bynta sha ka jingiatreilang kaba iaineh ha ka koit ka khiah.

Ha kine ki shiphew snem ba la leit noh, ka International Day of Yoga ka la kylla sha kawei na ki jingïakhih paidbah kaba heh tam ha ka pyrthei. Ka Yoga Park Portal ka tei ia kata ka bor da kaba pynkylla ia ka jingpynsngewthuh sha ki jingdon jingem bad ka jingiashim bynta sha ka jingmyntoi jong ka imlang sahlang ha ka samoi kaba jrong. Katba nang bun ki park ha kylleng ki jaka nongkyndong bad ki jaka sor jong ka India kiba la pynïasoh lang ha kane ka sienjam, ka Yoga Park ka don ka lad ban long ka dak kaba iaineh jong ka jingaiti jong ka India ha ka jingsumar kaba ai jingiada na ki jingpang, ka jingiadei bad ka mariang, bad ka bha ka miat ba pura.

***