২০২৬ বৰ্ষৰ আন্তৰ্জাতিক যোগ দিৱস (IDY) উদযাপনৰ প্ৰস্তুতিৰ অংশ হিচাপে ভাৰত চৰকাৰৰ আয়ুষ মন্ত্ৰালয়ে মোৰাৰজী দেশাই ৰাষ্ট্ৰীয় যোগ প্ৰতিষ্ঠান (MDNIY) আৰু হেবিল্ড (Habuild)-ৰ সহযোগত ২০২৬ চনৰ ১৪ জুন তাৰিখে এক ঐতিহাসিক গোলকীয় অনলাইন যোগানুষ্ঠানৰ আয়োজন কৰিব। এই অনুষ্ঠানটোৰ লক্ষ্য হৈছে ইউটিউব লাইভ যোগ ষ্ট্ৰীমত সৰ্বাধিক দৰ্শকৰ উপস্থিতিৰে এক নতুন বিশ্ব অভিলেখ গঢ়া, যিয়ে বিশ্বৰ বিভিন্ন প্ৰান্তৰ যোগাভ্যাসকাৰী আৰু স্বাস্থ্য কল্যাণ অনুৰাগীসকলক এখন একেই ডিজিটেল মঞ্চত একত্ৰিত কৰিব।

কেন্দ্ৰীয় আয়ুষ মন্ত্ৰালয়ৰ ৰাজ্যিক মন্ত্ৰী (স্বতন্ত্ৰ দায়িত্ব) আৰু স্বাস্থ্য তথা পৰিয়াল কল্যাণ দপ্তৰৰ ৰাজ্যিক মন্ত্ৰী শ্ৰী প্ৰতাপৰাও যাদৱৰ লগতে আয়ুষ মন্ত্ৰালয়ৰ জ্যেষ্ঠ বিষয়াসকলেও এই পদক্ষেপত অংশগ্ৰহণ কৰিব। কেন্দ্ৰীয় মন্ত্ৰীগৰাকীৰ বাসভৱনৰ পৰাই এই সামূহিক অংশগ্ৰহণ অনুষ্ঠিত হ'ব, যিয়ে যোগৰ জৰিয়তে স্বাস্থ্য কল্যাণৰ বাৰ্তা প্ৰচাৰ কৰা আৰু এক আদৰ্শ দাঙি ধৰি নেতৃত্ব দিয়াৰ প্ৰতি মন্ত্ৰালয়ৰ দায়বদ্ধতাক প্ৰতিফলিত কৰে।

সামগ্ৰিক স্বাস্থ্য আৰু কল্যাণৰ প্ৰসাৰৰ বাবে এক শক্তিশালী মাধ্যম হিচাপে যোগৰ সাৰ্বজনীন আবেদন আৰু ইয়াৰ ক্ৰমৱৰ্ধমান গ্ৰহণযোগ্যতাক দাঙি ধৰাৰ উদ্দেশ্যে এই পদক্ষেপ গ্ৰহণ কৰা হৈছে। ব্যাপক জনসাধাৰণৰ অংশগ্ৰহণৰ জৰিয়তে, এই অনুষ্ঠানটোৱে ভৌগোলিক, সাংস্কৃতিক আৰু ভাষিক সীমা অতিক্ৰম কৰি এক জীৱনশৈলী হিচাপে যোগৰ বাৰ্তাক সুদৃঢ় কৰাৰ প্ৰয়াস কৰিছে।

এই অনলাইন যোগানুষ্ঠান পুৱা ৬:১৫ বজাৰ পৰা ৭:৩৫ বজালৈ (ভাৰতীয় মান সময়) অনুষ্ঠিত হ'ব আৰু ইয়াত ১৩০ খনতকৈয়ো অধিক দেশে অংশগ্ৰহণ কৰিব বুলি আশা কৰা হৈছে, যিয়ে ইয়াক আজিলৈকে আয়োজিত অন্যতম বৃহৎ গোলকীয় ডিজিটেল যোগ সমাৱেশ হিচাপে পৰিগণিত কৰিব। বিভিন্ন পটভূমি, বয়সৰ শ্ৰেণী আৰু অঞ্চলৰ অংশগ্ৰহণকাৰীসকলে স্বাস্থ্য, সম্প্ৰীতি আৰু কল্যাণৰ প্ৰতি এক উমৈহতীয়া দায়বদ্ধতাৰ সৈতে একত্ৰিত হ'ব।

২০২৬ বৰ্ষৰ আন্তৰ্জাতিক যোগ দিৱসৰ পূৰ্বে হাতত লোৱা প্ৰচাৰ কাৰ্যসূচীসমূহৰ এক গুৰুত্বপূৰ্ণ অংশ হৈছে এই অনুষ্ঠানটো। ডিজিটেল প্ৰযুক্তি আৰু গোলকীয় সংযোগৰ সুবিধা গ্ৰহণ কৰি, এই পদক্ষেপে যোগৰ পৰিসৰ সম্প্ৰসাৰিত কৰাৰ লগতে বিশ্বজুৰি এই অনুশীলনৰ প্ৰতি জনসাধাৰণৰ অধিক অংশগ্ৰহণক উৎসাহিত কৰাৰ প্ৰয়াস কৰিছে।

অংশগ্ৰহণ কৰিবলৈ আগ্ৰহী ব্যক্তিসকলে 1800-315-7008 নম্বৰত এটা মিছ কল দি অথবা নিৰ্দিষ্ট পৰ্টেল: https://moa.habit.yoga -ৰ জৰিয়তে অনলাইনযোগে পঞ্জীয়ন কৰিব পাৰিব।

অধিক অংশগ্ৰহণক উৎসাহিত কৰিবলৈ আৰু যোগ অনুৰাগীসকলৰ অৱদানক স্বীকৃতি প্ৰদান কৰাৰ উদ্দেশ্যে, অনুষ্ঠানটোত যোগদান কৰা সকলো পঞ্জীয়নভুক্ত অংশগ্ৰহণকাৰীয়ে তেওঁলোকৰ পঞ্জীভুক্ত হোৱাটছএপ নম্বৰত অংশগ্ৰহণৰ এখন ডিজিটেল প্ৰমাণপত্ৰ লাভ কৰিব।

আয়ুষ মন্ত্ৰালয়ে নাগৰিক, যোগাভ্যাসকাৰী, শিক্ষানুষ্ঠান, স্বাস্থ্য কল্যাণ সংস্থা, সামাজিক গোট আৰু বিশ্বজুৰি থকা প্ৰবাসী ভাৰতীয়সকলক এই অনুষ্ঠানত যোগদান কৰিবলৈ আৰু এই ঐতিহাসিক গোলকীয় প্ৰচেষ্টাত অৱদান আগবঢ়াবলৈ আমন্ত্ৰণ জনাইছে।

গোলকীয় স্বাস্থ্য কল্যাণ আন্দোলনক আগুৱাই নিয়াৰ ক্ষেত্ৰত ভাৰতৰ নেতৃত্বক এই অনুষ্ঠানে অধিক সুদৃঢ় কৰিব আৰু অধিক সুস্থ তথা স্থিতিস্থাপক সমাজ গঢ়াৰ ক্ষেত্ৰত যোগৰ চিৰস্থায়ী প্ৰাসংগিকতাক পুনৰ দৃঢ় কৰিব বুলি আশা কৰা হৈছে।

পঞ্জীয়ন আৰু অংশগ্ৰহণৰ বাবে:

• মিছ কল: 1800-315-7008

• পঞ্জীয়ন পৰ্টেল: https://moa.habit.yoga

***

SR/SV/SG/RD