19వ ముంబయి అంతర్జాతీయ చలనచిత్రోత్సవం (ఎంఐఎఫ్ఎఫ్) 2026 కు అనుబంధంగా జరగనున్న రెండో వేవ్స్ డాక్ బజార్  కోసం 'వేవ్స్ డాక్ బజార్ రికమెండ్స్' కార్యక్రమం కింద ఎంపికైన ప్రాజెక్టులను జాతీయ చలనచిత్ర పరిశ్రమాభివృద్ధి సంస్థ (నేషనల్ ఫిల్మ్ డెవలప్‌మెంట్ కార్పొరేషన్ - ఎన్ఎఫ్‌డీసీ) ప్రకటించింది.

ఎంఐఎఫ్ఎఫ్ మార్కెట్ విభాగాన్ని 2026 జూన్ 16 నుంచి 18 వరకు ముంబయిలోని డాక్టర్ గోపాలరావు దేశ్‌ముఖ్ మార్గ్‌లో ఉన్న ఎన్ఎఫ్‌డీసీ ప్రధాన కార్యాలయంలో నిర్వహిస్తారు. ఇది డాక్యుమెంటరీ, షార్ట్ ఫిల్మ్, యానిమేషన్ రంగాలకు చెందిన చిత్ర దర్శకులు, నిర్మాతలు, బ్రాడ్‌కాస్టర్లు, పంపిణీదారులు, చలనచిత్రోత్సవ నిర్వహకులు, పరిశ్రమ నిపుణులను ఒకే వేదికపైకి తీసుకురానుంది.

వ్యూయింగ్ రూమ్, వర్క్-ఇన్-ప్రోగ్రెస్ లాబ్, బిజినెస్-టు-బిజినెస్ మీటింగ్స్ వంటి కార్యక్రమాల ద్వారా భాగస్వామ్యాలు, నెట్‌వర్కింగ్, మార్కెట్ అవకాశాలను పెంపొందించే లక్ష్యంతో కూడిన పారిశ్రామిక వేదికగా  వేవ్స్ డాక్ బజార్ సేవలందిస్తుంది.

కొత్త ప్రతిభను ఆదరించడానికి, ప్రభావవంతమైన కథలను ప్రోత్సహించడానికి వేవ్స్ డాక్ బజార్ 2026లో పాల్గొనే మూడు అత్యుత్తమ ప్రాజెక్టులకు ఒక్కో దానికి మూడు లక్షల రూపాయల చొప్పున నగదు బహుమతులను ఎన్ఎఫ్‌డీసీ అందిస్తోంది. భారత్ తో పాటు అంతర్జాతీయ స్థాయి ప్రేక్షకులను ఆకట్టుకునే సామర్థ్యం ఉండి, అసాధారణమైన సృజనాత్మక దృక్పథం, బలమైన కథనం, అత్యుత్తమ కళాత్మక విలువలను ప్రదర్శించే ప్రాజెక్టులను ఈ బహుమతుల ద్వారా గుర్తిస్తారు.

'వేవ్స్ డాక్ బజార్ రికమెండ్స్' ఎంపికలో మొత్తం 12 ప్రాజెక్టులు ఉన్నాయి. ఇందులో 'వర్క్-ఇన్-ప్రోగ్రెస్ లాబ్'  లో పాల్గొనే నాలుగు ప్రాజెక్టులు కూడా కలిసి ఉన్నాయి. డబ్ల్యూఐపీ లాబ్ ద్వారా ఎంపికైన చలనచిత్ర రూపకర్తలు తమ చిత్రాల రఫ్ కట్‌లను అంతర్జాతీయ సలహాదారులు, ఎడిటర్లతో కూడిన ప్యానెల్‌ ముందు ప్రదర్శిస్తారు. తద్వారా వారు తమ ప్రాజెక్టులను మరింత మెరుగుపరచుకునేందుకు అవసరమైన విలువైన సూచనలు, సలహాలు, మార్గదర్శకత్వాలను పొందుతారు. తమ చిత్రాలు విస్తృత పరిశ్రమ భాగస్వామ్యం, పంపిణీ అవకాశాలకు సిద్ధమయ్యేలా అవసరమైన సహకారాన్ని కూడా అందుకుంటారు.

వేవ్స్ డాక్ బజార్ రికమెండ్స్ లైనప్ కింద కూడా ఎనిమిది ప్రాజెక్టులు ఎంపికయ్యాయి. ఇప్పటికే పూర్తయిన లేదా పోస్ట్-ప్రొడక్షన్ చివరి దశల్లో ఉన్న ఈ చిత్రాలు అమ్మకాలు పంపిణీ, ప్రదర్శన అవకాశాల కోసం చూస్తున్నాయి. ఈ కార్యక్రమం మార్కెట్ ప్రవేశాన్ని, విస్తృతమైన ప్రేక్షకులను చేరుకునే మార్గాలను అన్వేషించడానికి వీలుగా కొనుగోలుదారులు, పంపిణీదారులు, బ్రాడ్‌కాస్టర్లు, స్ట్రీమింగ్ వేదికలు, ఇతర పరిశ్రమ భాగస్వాములతో పరస్పర చర్చలకు దోహదపడుతుంది.

ఎంపికైన మొత్తం 12 ప్రాజెక్టులూ బజార్ ప్రారంభ రోజైన 2026 జూన్ 16న జరిగే ఓపెన్ పిచ్ సెషన్‌లో' పాల్గొంటాయి. ఈ సెషన్ చలనచిత్ర రూపకర్తలకు తమ ప్రాజెక్టులను కొనుగోలుదారులు, పంపిణీదారులు, బ్రాడ్‌కాస్టర్లు, చలనచిత్రోత్సవ  ప్రతినిధులతో కూడిన పరిశ్రమ నిపుణుల ముందు ప్రదర్శించే అవకాశాన్ని కల్పిస్తుంది. పాల్గొనేవారు తమ చిత్రాల విశిష్టమైన దృక్పథాన్ని ప్రదర్శించడానికి తోడ్పడటంతో పాటు, అర్థవంతమైన భాగస్వామ్యాలను సహకారాలను పెంపొందించుకోవడానికి కూడా వీలు కల్పిస్తుంది.

వేవ్స్ డాక్ బజార్ రెండో ఎడిషన్ ప్రత్యేకతల్లో వ్యూయింగ్ రూమ్  ఒకటి. ఇది చలనచిత్ర నిర్మాతలు తమ సృష్టిని పరిశ్రమ భాగస్వాములకు ప్రదర్శించడానికి అనుమతించే ఒక ప్రత్యేకమైన డిజిటల్ లైబ్రరీ వేదిక. ఇది నెట్‌వర్కింగ్, పంపిణీ, కొనుగోలు  అవకాశాలను సులభతరం చేస్తుంది.

ఈ సంవత్సరం, వ్యూయింగ్ రూమ్ 19 దేశాల నుంచి  35 భాషలలోని 155 ప్రాజెక్టులను ప్రదర్శించనుంది. ఇది కొనుగోలుదారులు, బ్రాడ్‌కాస్టర్లు, పంపిణీదారులు, చలనచిత్రోత్సవ నిర్వాహకులు, ఇతర పరిశ్రమ భాగస్వాములకు ప్రపంచవ్యాప్తంగా ఉన్న డాక్యుమెంటరీ కథనాలు, విభిన్న దృక్పథాల సంపన్నమైన వైవిధ్యాన్ని వీక్షించే అవకాశాన్ని కల్పిస్తుంది.

వర్క్-ఇన్-ప్రోగ్రెస్ లాబ్ కోసం ఎంపికైన  నాలుగు ప్రాజెక్టుల వివరాలు:

1. అడ్యు డిల్లీ: దర్శకులు - నందన్ సక్సేనా, కవితా బహీ

2. ఇట్ టేక్స్ ఎ విలేజ్:  దర్శకుడు - ఇంద్రజీత్ మోరే

3. కుంచోక్ అండ్ హిస్ మెనీ మూన్స్: దర్శకుడు - అశోక్ మీనా

4. ఆన్ ఎ గుడ్ నోట్: దర్శకురాలు - కరిష్మా రావు

వేవ్స్ డాక్ బజార్ రికమెండ్స్ 2026  కింద ఎంపికైన  ఎనిమిది చిత్రాల వివరాలు

1. బై ది హోమ్ - దర్శకుడు: మంకాప్ నోక్వోహామ్

2. దో చార్ దిన్ - దర్శకురాలు: సాన్యా ఆనంద్

3. ఎచె  - దర్శకుడు: డింగ్కు థింగ్‌నామ్

4. రస నిష్పతి -దర్శకుడు: హరీష్ కె. ఎం.

5. రైజ్  - దర్శకుడు: అరస్తు జకియా

6. ది గర్ల్ బినీత్ ది సన్  - దర్శకురాలు: మధురిమా మైతి

7. తురు  - దర్శకుడు: రామేశ్వర్ భట్

8. టుక్రో టుక్రో పృథిబి  - దర్శకురాలు: అస్మితా పాల్.

ఎంపికైన ఈ ప్రాజెక్టులు సమకాలీన డాక్యుమెంటరీ చిత్ర నిర్మాణంలోని వైవిధ్యాన్ని, సృజనాత్మకతను, సామర్ధ్యాలను ప్రతిబింబిస్తాయి. కొత్త ప్రతిభను ప్రోత్సహిస్తూనే, చలనచిత్ర రూపకర్తలు ప్రపంచ మార్కెట్లను, ప్రేక్షకులను చేరుకోవడానికి అర్థవంతమైన అవకాశాలను సృష్టించడంలో ఎన్ఎఫ్‌డీసీ నిబద్ధతను ఇవి స్పష్టం చేస్తున్నాయి.

***