ಭಾರತದ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಮತ್ತು ಫ್ರೆಂಚ್ ಗಣರಾಜ್ಯದ ಅಧ್ಯಕ್ಷ ಘನತೆವೆತ್ತ ಇಮ್ಯಾನುಯೆಲ್ ಮ್ಯಾಕ್ರನ್ ಅವರು ಇಂದು ಫ್ರಾನ್ಸ್‌ನ ನೀಸ್‌ನಲ್ಲಿರುವ ಪ್ಯಾಲೇಸ್ ಡೆಸ್ ಎಕ್ಸ್‌ಪೋಸಿಷನ್ಸ್ ಡಿ ನೀಸ್‌ನಲ್ಲಿ 'ಭಾರತ ಇನೋವೇಟ್ಸ್ 2026'ರ ಮೊದಲ ಆವೃತ್ತಿಯನ್ನು ಜಂಟಿಯಾಗಿ ಉದ್ಘಾಟಿಸಿದರು. ಕೇಂದ್ರ ಶಿಕ್ಷಣ ಸಚಿವಾಲಯದ ಉಪಕ್ರಮವಾಗಿ ಭಾರತ ಸರ್ಕಾರವು ಆಯೋಜಿಸಿರುವ ಈ ಪ್ರಭಾವಶಾಲಿ ಕಾರ್ಯಕ್ರಮವು, ಭಾರತದ ಡೀಪ್ ಟೆಕ್ ನಾವೀನ್ಯಕಾರರು ಮತ್ತು ಜಾಗತಿಕ ಪಾಲುದಾರರ ನಡುವೆ ನಾವೀನ್ಯತೆ-ಚಾಲಿತ ಪಾಲುದಾರಿಕೆಯನ್ನು ಮುನ್ನಡೆಸಲು ಒಂದು ಪ್ರಮುಖ ವೇದಿಕೆಯಾಗಿ ಕಾರ್ಯನಿರ್ವಹಿಸುತ್ತದೆ.

ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವರಾದ ಶ್ರೀ ಪಿಯೂಷ್ ಗೋಯಲ್ ಅವರು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದ ಗಣ್ಯರನ್ನು ಸ್ವಾಗತಿಸಿದರು. ಕೇಂದ್ರ ವಿದೇಶಾಂಗ ವ್ಯವಹಾರಗಳ ಸಚಿವರಾದ ಡಾ. ಎಸ್. ಜೈಶಂಕರ್; ರಾಷ್ಟ್ರೀಯ ಭದ್ರತಾ ಸಲಹೆಗಾರ ಶ್ರೀ ಅಜಿತ್ ದೋವಲ್ ಮತ್ತು ಭಾರತ ಸರ್ಕಾರದ ಪ್ರಧಾನ ವೈಜ್ಞಾನಿಕ ಸಲಹೆಗಾರ ಡಾ. ಅಜಯ್ ಕುಮಾರ್ ಸೂದ್ ಸೇರಿದಂತೆ ಹಲವು ಗಣ್ಯರು ಉದ್ಘಾಟನಾ ಸಮಾರಂಭದಲ್ಲಿ ಉಪಸ್ಥಿತರಿದ್ದರು.

ಸಭೆಯನ್ನುದ್ದೇಶಿಸಿ ಮಾತನಾಡಿದ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು, ನಾವೀನ್ಯತೆ ಮತ್ತು ತಂತ್ರಜ್ಞಾನದಲ್ಲಿ ಭಾರತದ ಬೆಳೆಯುತ್ತಿರುವ ನಾಯಕತ್ವವ ಕುರಿತು ಒತ್ತಿಹೇಳುತ್ತಾ, "ಭಾರತವು ಪ್ರಮಾಣ ಮತ್ತು ವೇಗದೊಂದಿಗೆ ನಾವೀನ್ಯತೆಗಳನ್ನು ರೂಪಿಸುತ್ತದೆ. ಭಾರತವು ಸುಸ್ಥಿರ ಭವಿಷ್ಯಕ್ಕಾಗಿ ನಾವೀನ್ಯತೆಗಳನ್ನು ರೂಪಿಸುತ್ತದೆ ಮತ್ತು ಇಡೀ ಜಗತ್ತಿಗಾಗಿ ಆವಿಷ್ಕಾರಗಳನ್ನು ಮಾಡುತ್ತದೆ. ನಾವೀನ್ಯತೆಯು ಭಾರತದ ಡಿಎನ್‌ಎ (DNA) ನಲ್ಲಿದೆ. 'ಭಾರತ ಇನೋವೇಟ್ಸ್' ಎಂಬುದು ಜಾಗತಿಕ ನಾವೀನ್ಯತೆಯ ಮುಂದಿನ ಅಧ್ಯಾಯವನ್ನು ಭಾರತದೊಂದಿಗೆ ಸೇರಿ ಸೃಷ್ಟಿಸಲು ಜಗತ್ತಿಗೆ ನೀಡುವ ಆಹ್ವಾನವಾಗಿದೆ" ಎಂದು ಹೇಳಿದರು.

ಅಧ್ಯಕ್ಷ ಗೌರವಾನ್ವಿತ ಇಮ್ಯಾನುಯೆಲ್ ಮ್ಯಾಕ್ರನ್ ಅವರು ಭಾರತದ ರೋಮಾಂಚಕ ನಾವೀನ್ಯತೆಯ ಪರಿಸರ ವ್ಯವಸ್ಥೆಯನ್ನು ಶ್ಲಾಘಿಸಿದರು ಮತ್ತು "ಭಾರತದ ಹೊರಗೆ, ಮೊದಲ ಬಾರಿಗೆ 'ಭಾರತ ಇನೋವೇಟ್ಸ್ 2026' ಕಾರ್ಯಕ್ರಮವನ್ನು ಇಂದು ನೀಸ್ ಆಯೋಜಿಸುತ್ತಿದೆ ಎಂಬುದು ನಮ್ಮ ಎರಡೂ ದೇಶಗಳನ್ನು ಒಗ್ಗೂಡಿಸುವ ಬಾಂಧವ್ಯದ ಶಕ್ತಿಗೆ ಒಂದು ಪ್ರಬಲ ಸಾಕ್ಷಿಯಾಗಿದೆ ಎಂದು ನಾನು ಆಳವಾಗಿ ನಂಬುತ್ತೇನೆ. ಈ ಬಾಂಧವ್ಯಗಳು ದೀರ್ಘಕಾಲದ ತಾಂತ್ರಿಕ, ವೈಜ್ಞಾನಿಕ ಮತ್ತು ಕೈಗಾರಿಕಾ ಪಾಲುದಾರಿಕೆಯಲ್ಲಿ ಬೇರೂರಿದ್ದು, ಇತ್ತೀಚಿನ ವರ್ಷಗಳಲ್ಲಿ ಗಮನಾರ್ಹ ಬದಲಾವಣೆಯನ್ನು ಕಂಡಿವೆ. ನಮ್ಮ ಎರಡೂ ದೇಶಗಳು ತಮ್ಮ ವೈಜ್ಞಾನಿಕ, ಉದ್ಯಮಶೀಲತಾ ಮತ್ತು ಕೈಗಾರಿಕಾ ಸಾಮರ್ಥ್ಯಗಳ ಮೂಲಕ ಒಟ್ಟಾಗಿ ಇನ್ನೂ ಎಷ್ಟು ನಿರ್ಮಿಸಬೇಕಾಗಿದೆ ಎಂಬುದನ್ನು ಇವು ತೋರಿಸಿಕೊಡುತ್ತವೆ" ಎಂದು ಹೇಳಿದರು.

ಉದ್ಘಾಟನೆಯ ನಂತರ, ನಾಯಕರು 'ಭಾರತ ಇನೋವೇಟ್ಸ್ ಇನೋವೇಷನ್ ಪೆವಿಲಿಯನ್'ಗೆ ಭೇಟಿ ನೀಡಿದರು. ಇಲ್ಲಿ ಕೃತಕ ಬುದ್ಧಿಮತ್ತೆ (AI), ಸೆಮಿಕಂಡಕ್ಟರ್‌ಗಳು, ಬಯೋಟೆಕ್ನಾಲಜಿ, ಆರೋಗ್ಯ ರಕ್ಷಣೆ, ಇಂಧನ, ಸುಧಾರಿತ ಉತ್ಪಾದನೆ, ಮೊಬಿಲಿಟಿ ಮತ್ತು ಬಾಹ್ಯಾಕಾಶ ತಂತ್ರಜ್ಞಾನಗಳಂತಹ ವಲಯಗಳಲ್ಲಿ ಭಾರತೀಯ ನಾವೀನ್ಯಕಾರರು ಮತ್ತು ಪ್ರಮುಖ ಉನ್ನತ ಶಿಕ್ಷಣ ಸಂಸ್ಥೆಗಳು ಅಭಿವೃದ್ಧಿಪಡಿಸಿದ 120 ಅತ್ಯಾಧುನಿಕ ತಂತ್ರಜ್ಞಾನಗಳು ಮತ್ತು ನವೀನ ಆವಿಷ್ಕಾರಗಳನ್ನು ಪ್ರದರ್ಶಿಸಲಾಯಿತು.

'ಭಾರತ ಇನೋವೇಟ್ಸ್' ಕಾರ್ಯಕ್ರಮವು ಜಗತ್ತಿನಾದ್ಯಂತದ ಹೂಡಿಕೆದಾರರು, ಕೈಗಾರಿಕೆಗಳು, ಸಂಸ್ಥೆಗಳು ಮತ್ತು ನಾವೀನ್ಯಕಾರರೊಂದಿಗೆ ಪಾಲುದಾರಿಕೆಯನ್ನು ಸುಗಮಗೊಳಿಸಲು ಭಾರತೀಯ ಡೀಪ್ ಟೆಕ್ ನಾವೀನ್ಯತೆಗಳನ್ನು ಪ್ರದರ್ಶಿಸುವ ಮತ್ತು ಉತ್ತೇಜಿಸುವ ಗುರಿಯನ್ನು ಹೊಂದಿದೆ. ಇದು ವಿಜ್ಞಾನ, ತಂತ್ರಜ್ಞಾನ, ನಾವೀನ್ಯತೆ, ಶಿಕ್ಷಣ ಮತ್ತು ಉದ್ಯಮಶೀಲತೆಯಲ್ಲಿ ದ್ವಿಪಕ್ಷೀಯ ಸಹಕಾರವನ್ನು ಗಾಢಗೊಳಿಸುವ ನಿರೀಕ್ಷೆಯಿದೆ ಮತ್ತು ಜಾಗತಿಕ ನಾವೀನ್ಯತೆಯ ಜಾಲಗಳಲ್ಲಿ ಭಾರತದ ಏಕೀಕರಣವನ್ನು ಬಲಪಡಿಸುತ್ತದೆ.

ಜೂನ್ 14 ರಿಂದ 16, 2026 ರವರೆಗೆ ಮೂರು ದಿನಗಳ ಕಾಲ ನಡೆಯಲಿರುವ 'ಭಾರತ ಇನೋವೇಟ್ಸ್ 2026', 11 ಉನ್ನತ ಮಟ್ಟದ ಪ್ಯಾನಲ್ ಚರ್ಚೆಗಳು, ಬಹು ವಲಯ-ಕೇಂದ್ರಿತ ಮಾಸ್ಟರ್‌ ಕ್ಲಾಸ್‌ಗಳು, ಕ್ಯುರೇಟೆಡ್ ಬಿ2ಬಿ (B2B) ಮ್ಯಾಚ್‌ಮೇಕಿಂಗ್ ಸಭೆಗಳು, 50ಕ್ಕೂ ಹೆಚ್ಚು ಸ್ಟಾರ್ಟ್-ಅಪ್‌ಗಳನ್ನು ಒಳಗೊಂಡ ಹೂಡಿಕೆದಾರರ ಪಿಚ್ ಅಧಿವೇಶನಗಳು, ಹಾಗೂ ಜಾಗತಿಕ ಹೂಡಿಕೆದಾರರು, ಕಾರ್ಪೊರೇಟ್‌ಗಳು, ವಿಶ್ವವಿದ್ಯಾಲಯಗಳು, ಇನ್ಕ್ಯುಬೇಟರ್‌ಗಳು ಮತ್ತು ನೀತಿ ನಿರೂಪಕರೊಂದಿಗೆ ಮೀಸಲಾದ ನೆಟ್‌ವರ್ಕಿಂಗ್ ಕಾರ್ಯಕ್ರಮಗಳನ್ನು ಒಳಗೊಂಡಿದೆ. ಈ ಕಾರ್ಯಕ್ರಮವು ಜಾಗತಿಕ ಕೈಗಾರಿಕಾ ಮುಖಂಡರು, ಹೂಡಿಕೆದಾರರು, ಶಿಕ್ಷಣ ತಜ್ಞರು ಮತ್ತು ತಂತ್ರಜ್ಞಾನ ತಜ್ಞರನ್ನು ಒಂದೆಡೆ ಸೇರಿಸಿ, ಕೃತಕ ಬುದ್ಧಿಮತ್ತೆ, ಸೆಮಿಕಂಡಕ್ಟರ್‌ಗಳು, ಬಯೋಟೆಕ್ನಾಲಜಿ, ಆರೋಗ್ಯ ರಕ್ಷಣೆ, ಇಂಧನ, ಸುಧಾರಿತ ಉತ್ಪಾದನೆ, ಬಾಹ್ಯಾಕಾಶ, ರಕ್ಷಣೆ ಮತ್ತು ಹವಾಮಾನ ತಂತ್ರಜ್ಞಾನಗಳಲ್ಲಿ ಉದಯೋನ್ಮುಖ ಅವಕಾಶಗಳ ಕುರಿತು ಚರ್ಚಿಸಲು ವೇದಿಕೆ ಕಲ್ಪಿಸಿದೆ.

'ಭಾರತ ಇನೋವೇಟ್ಸ್'ನ ಉದ್ಘಾಟನಾ ಆವೃತ್ತಿಯು ಸಹಯೋಗ, ಪ್ರತಿಭೆ ಮತ್ತು ಪರಿವರ್ತನಾತ್ಮಕ ತಂತ್ರಜ್ಞಾನಗಳಿಂದ ಚಾಲಿತವಾದ ಭವಿಷ್ಯದ ನಾವೀನ್ಯತೆಯ ಪರಿಸರ ವ್ಯವಸ್ಥೆಯನ್ನು ಬೆಳೆಸಲು ಭಾರತ ಮತ್ತು ಫ್ರಾನ್ಸ್‌ನ ಹಂಚಿಕೆಯ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ.

ಈ ಉಪಕ್ರಮ ಮತ್ತು ಭಾಗವಹಿಸುವ ಸ್ಟಾರ್ಟ್-ಅಪ್‌ಗಳ ಕುರಿತು ಹೆಚ್ಚಿನ ಮಾಹಿತಿಗಾಗಿ, ಈ ವೆಬ್‌ಸೈಟ್‌ಗೆ ಭೇಟಿ ನೀಡಿ: www.bharatinnovates.in.

*****