'ఆయిల్ సీడ్స్ కిసాన్ మిత్ర' - నూనె గింజల రైతుల కోసం భారత తొలి దేశవ్యాప్త వాట్సాప్ ఏఐ సూచనల కార్యక్రమం

దేశీయంగా నూనెగింజల ఉత్పత్తిని పెంచడం, వంట నూనె దిగుమతులపై ఆధారపడటాన్ని తగ్గించడంపై దృష్టి సారిస్తూ దేశం ఖరీఫ్ సాగు కాలంలోకి ప్రవేశిస్తున్న తరుణంలో... హైదరాబాద్‌కు చెందిన ఐసీఏఆర్-ఇండియన్ ఆయిల్ సీడ్స్ రీసెర్చ్ ఇనిస్టిట్యూట్ (ఐసీఏఆర్-ఐఐవోఆర్) వాట్సాప్ ఆధారిత ఏఐ సూచనల కోసం 'ఆయిల్ సీడ్స్ కిసాన్ మిత్ర'ను అభివృద్ధి చేసింది. నూనెగింజల సాగుకు సంబంధించిన విశ్వసనీయమైన, పరిశోధన ఆధారిత జ్ఞానాన్ని రైతుల మొబైల్ ఫోన్లకు ఎప్పుడైనా, వారి సొంత భాషలో నేరుగా అందించే ఒక శక్తిమంతమైన సాధనంగా ఇది ఆవిర్భవిస్తోంది.

వ్యవసాయ రంగానికి ప్రత్యక్ష ప్రయోజనం చేకూర్చేందుకు డిజిటల్ టెక్నాలజీని వినియోగించడం పట్ల ఐసీఏఆర్ నిబద్ధతను స్పష్టం చేస్తూ... 2026 ఫిబ్రవరి 6న న్యూఢిల్లీలో జరిగిన జాతీయ నూనెగింజల సదస్సులో డీఏఆర్ఈ కార్యదర్శి, ఐసీఏఆర్ డైరెక్టర్ జనరల్ సంయుక్తంగా ఈ సేవను ప్రారంభించారు. ఈ కార్యక్రమం ద్వారా, దేశంలో ఏ రకమైన నూనెగింజలు సాగు చేసే రైతులైనా... అదనపు అప్లికేషన్‌ను డౌన్‌లోడ్ చేయాల్సిన అవసరం లేకుండానే... ఇప్పటికే లక్షలాది మంది రైతులకు సుపరిచితమైన వాట్సాప్ వేదిక ద్వారానే విశ్వసనీయమైన, తక్షణ పంట సలహాలను ఉచితంగా పొందవచ్చు.

రైతులు +91 4024598180 నంబరును వాట్సాప్‌లో ‘ఆయిల్ సీడ్స్ కిసాన్ మిత్ర’గా సేవ్ చేసుకొని... వేరుశనగ, ఆవాలు, నువ్వులు, పొద్దుతిరుగుడు, సోయాబీన్, నైజర్, ఇతర నూనెగింజల పంటల గురించి ఏ భారతీయ భాషలోనైనా ప్రశ్నలు అడగవచ్చు. ఏఐ-ఆధారిత చాట్‌బాట్... వంగడాల ఎంపిక, పంట నిర్వహణ, తెగుళ్లు-వ్యాధుల నియంత్రణ, నీటిపారుదల, పంట కోతానంతర పద్ధతులపై పరిశోధన ఆధారిత మార్గదర్శనంతో అన్ని వేళలా తక్షణం స్పందిస్తుంది. ఇది పూర్తిగా ఉచిత సేవ.

హైదరాబాద్‌లోని ఐసీఏఆర్-ఇండియన్ ఆయిల్ సీడ్స్ పరిశోధనా సంస్థ డైరెక్టర్ డాక్టర్ ఆర్.కె. మాథుర్ మాట్లాడుతూ... ఐసీఏఆర్ సంస్థలు నూనెగింజలపై చేసిన సమష్టి పరిశోధన ద్వారా, దేశంలో నూనెగింజలు సాగు చేసే ప్రతి రైతుకు వారు ఇప్పటికే ఉపయోగిస్తున్న వేదికపై, వారి సొంత భాషలో పంట సంబంధిత సూచనలను అందించే తొలి వ్యవస్థ ‘ఆయిల్ సీడ్స్ కిసాన్ మిత్ర’ అన్నారు. ఐసీఏఆర్-ఐఐఓఆర్... ఎన్‌ఎస్‌ఆర్‌ఐ... ఐఐజీఆర్... ఐఐఆర్‌ఎంఆర్... పీసీ-యూనిట్ (నువ్వులు, నైజర్) సంస్థల శాస్త్రీయ పరిజ్ఞానాన్ని వాట్సాప్‌లోని బహుభాషా ఏఐ ఏజెంట్‌తో అనుసంధానించడం ద్వారా ఇది సాధ్యమైందని ఆయన తెలిపారు. ప్రయోగశాలకు, రైతు పొలానికి మధ్య ఉన్న దూరం, భాష, ఖర్చు వంటి దీర్ఘకాలిక అవరోధాలను తాము తొలగించామని ఆయన తెలిపారు. ఖరీఫ్ సాగు ప్రారంభమవుతున్న సమయంలో నూనెగింజల రైతులు, ఇతర భాగస్వాములంతా ‘కిసాన్ మిత్ర’ను సేవ్ చేసుకోవడం ద్వారా, ఏ సమయంలోనైనా తమకు గల సందేహాలను అడిగి, నివృత్తి చేసుకోవాలని ఆయన విజ్ఞప్తి చేశారు.

ఇది ఎలా పనిచేస్తుంది

అనేక ఐసీఏఆర్ సంస్థల సమష్టి శాస్త్రీయ నైపుణ్యంతో అభివృద్ధి చేసిన అధునాతన ఏఐ ఆధారిత, సమగ్ర విజ్ఞాన వ్యవస్థను ఉపయోగించి... ‘ఆయిల్ సీడ్స్ కిసాన్ మిత్ర’ ప్రాంతీయ భాషల్లో టైప్ చేసిన, పంపిన ప్రశ్నలను అర్థం చేసుకుని, పంటకు అనుగుణంగా కచ్చితమైన సమాధానాలను అందిస్తుంది. రైతులకు ప్రత్యేక యాప్ లేదా ఇంటర్నెట్ బ్రౌజర్ అవసరం లేదు. సుపరిచితమైన వాట్సాప్ ఇంటర్‌ఫేస్ ఉంటే సరిపోతుంది. ఈ చాట్‌బాట్... వంగడాల ఎంపిక, వ్యవసాయ పద్ధతులు, తెగుళ్లు-వ్యాధుల నిర్వహణ, నీటిపారుదల ప్రణాళిక, పంట కోతానంతర మార్గదర్శనం, విత్తనాల లభ్యత సహా మొత్తం పంట చక్రాన్ని కవర్ చేస్తుంది.

దేశంలోని వివిధ వ్యవసాయ-వాతావరణ మండలాల్లోని అన్ని ప్రధాన నూనెగింజల పంటలకు సమగ్ర కవరేజీని నిర్ధారిస్తూ... ఐసీఏఆర్-నేషనల్ సోయాబీన్ రీసెర్చ్ ఇన్‌స్టిట్యూట్, ఇండోర్ (ఐసీఏఆర్-ఎన్ఎస్ఆర్ఐ), ఐసీఏఆర్-ఇండియన్ ఇన్‌స్టిట్యూట్ ఆఫ్ గ్రౌండ్‌నట్ రీసెర్చ్, జునాగఢ్ (ఐసీఏఆర్-ఐఐజీఆర్), ఐసీఏఆర్-ఇండియన్ ఇన్‌స్టిట్యూట్ ఆఫ్ రాప్‌సీడ్ అండ్ మస్టర్డ్ రీసెర్చ్, భరత్‌పూర్ (ఐసీఏఆర్-ఐఐఆర్ఎమ్ఆర్), పీసీ-యూనిట్ (నువ్వులు, నైజర్)లు సమష్టిగా ఈ విజ్ఞాన వ్యవస్థను రూపొందించాయి.

***