ಕೃಷಿ ಸಚಿವಾಲಯ
‘ಆಯಿಲ್ಸೀಡ್ಸ್ ಕಿಸಾನ್ ಮಿತ್ರ’ – ಎಣ್ಣೆಬೀಜ ಬೆಳೆಗಾರರಿಗಾಗಿ ಭಾರತದ ಮೊದಲ ರಾಷ್ಟ್ರವ್ಯಾಪಿ ವಾಟ್ಸಾಪ್ ಎಐ ಸಲಹಾ ಸೇವೆ
ಎಲ್ಲಾ ಭಾರತೀಯ ಭಾಷೆಗಳಲ್ಲಿ ಉಚಿತ, ಸಂಶೋಧನೆ ಆಧಾರಿತ ಸಲಹೆಗಳನ್ನು ನೀಡುವ 24x7 ಬಹುಭಾಷಾ ಚಾಟ್ಬಾಟ್
‘ಆಯಿಲ್ಸೀಡ್ಸ್ ಕಿಸಾನ್ ಮಿತ್ರ’ – ಐಸಿಎಆರ್-ಐಐಒಆರ್ ಮತ್ತು ಸಹಯೋಗಿ ಸಂಸ್ಥೆಗಳಿಂದ ಒಂದು ಬಹುಭಾಷಾ, 24×7, ಸಂಶೋಧನೆ ಆಧಾರಿತ ಸೇವೆ
प्रविष्टि तिथि:
11 JUN 2026 5:56PM by PIB Bengaluru
ದೇಶೀಯ ಎಣ್ಣೆಬೀಜ ಉತ್ಪಾದನೆಯನ್ನು ಹೆಚ್ಚಿಸಲು ಮತ್ತು ಖಾದ್ಯ ತೈಲ ಆಮದಿನ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಭಾರತವು ಹೊಸ ಆದ್ಯತೆಯೊಂದಿಗೆ ಮುಂಗಾರು ಬಿತ್ತನೆ ಹಂಗಾಮಿಗೆ ಪ್ರವೇಶಿಸುತ್ತಿದೆ. ಈ ಸಂದರ್ಭದಲ್ಲಿ, ಹೈದರಾಬಾದ್ನ ಐಸಿಎಆರ್-ಭಾರತೀಯ ಎಣ್ಣೆಬೀಜ ಸಂಶೋಧನಾ ಸಂಸ್ಥೆ (ICAR-IIOR) ಅಭಿವೃದ್ಧಿಪಡಿಸಿರುವ ವಾಟ್ಸಾಪ್ ಆಧಾರಿತ ಎಐ (ಕೃತಕ ಬುದ್ಧಿಮತ್ತೆ) ಸಲಹಾ ಸೇವೆಯಾದ ‘ಆಯಿಲ್ಸೀಡ್ಸ್ ಕಿಸಾನ್ ಮಿತ್ರ’, ಎಣ್ಣೆಬೀಜ ಕೃಷಿಯ ಬಗ್ಗೆ ವಿಶ್ವಾಸಾರ್ಹ ಮತ್ತು ಸಂಶೋಧನೆ ಆಧಾರಿತ ಜ್ಞಾನವನ್ನು ನೇರವಾಗಿ ರೈತರ ಮೊಬೈಲ್ ಫೋನ್ಗಳಿಗೆ, ಯಾವುದೇ ಸಮಯದಲ್ಲಿ ಮತ್ತು ಅವರದ್ದೇ ಭಾಷೆಯಲ್ಲಿ ತಲುಪಿಸುವ ಒಂದು ಪ್ರಬಲ ಸಾಧನವಾಗಿ ಹೊರಹೊಮ್ಮುತ್ತಿದೆ.
ಕೃಷಿ ಸಂಶೋಧನೆ ಮತ್ತು ಶಿಕ್ಷಣ ಇಲಾಖೆಯ (DARE) ಕಾರ್ಯದರ್ಶಿ ಹಾಗೂ ಐಸಿಎಆರ್ (ICAR) ಮಹಾನಿರ್ದೇಶಕರು 2026ರ ಫೆಬ್ರವರಿ 6ರಂದು ನವದೆಹಲಿಯಲ್ಲಿ ನಡೆದ ರಾಷ್ಟ್ರೀಯ ಎಣ್ಣೆಬೀಜ ಸಮ್ಮೇಳನದಲ್ಲಿ ಈ ಸೇವೆಯನ್ನು ಪ್ರಾರಂಭಿಸಿದರು. ಕೃಷಿ ಸಮುದಾಯದ ನೇರ ಪ್ರಯೋಜನಕ್ಕಾಗಿ ಡಿಜಿಟಲ್ ತಂತ್ರಜ್ಞಾನವನ್ನು ಬಳಸಿಕೊಳ್ಳುವ ಐಸಿಎಆರ್ ಬದ್ಧತೆಯನ್ನು ಇದು ಒತ್ತಿ ಹೇಳುತ್ತದೆ. ಈ ಉಪಕ್ರಮವು ಭಾರತದ ಯಾವುದೇ ಎಣ್ಣೆಬೀಜ ರೈತರಿಗೆ ಯಾವುದೇ ಹೆಚ್ಚುವರಿ ಅಪ್ಲಿಕೇಶನ್ ಡೌನ್ಲೋಡ್ ಮಾಡುವ ಅಗತ್ಯವಿಲ್ಲದೇ, ಈಗಾಗಲೇ ಲಕ್ಷಾಂತರ ರೈತರಿಗೆ ಪರಿಚಿತವಿರುವ ವಾಟ್ಸಾಪ್ ಮೂಲಕ ಉಚಿತ, ವಿಶ್ವಾಸಾರ್ಹ ಮತ್ತು ತಕ್ಷಣದ ಬೆಳೆ ಸಲಹೆಯನ್ನು ಪಡೆಯಲು ಅನುವು ಮಾಡಿಕೊಡುತ್ತದೆ.
ರೈತರು +91 4024598180 ಸಂಖ್ಯೆಯನ್ನು ತಮ್ಮ ವಾಟ್ಸಾಪ್ನಲ್ಲಿ ‘ಆಯಿಲ್ಸೀಡ್ಸ್ ಕಿಸಾನ್ ಮಿತ್ರ’ ಎಂದು ಉಳಿಸಿಕೊಳ್ಳಬಹುದು ಮತ್ತು ನೆಲಗಡಲೆ (ಶೇಂಗಾ), ಸಾಸಿವೆ, ಎಳ್ಳು, ಸೂರ್ಯಕಾಂತಿ, ಸೋಯಾಬೀನ್, ಗುರೆಳ್ಳು ಮತ್ತು ಇತರ ಎಣ್ಣೆಬೀಜ ಬೆಳೆಗಳ ಬಗ್ಗೆ ಯಾವುದೇ ಭಾರತೀಯ ಭಾಷೆಯಲ್ಲಿ ಪ್ರಶ್ನೆಗಳನ್ನು ಕೇಳಬಹುದು. ಎಐ-ಚಾಲಿತ ಚಾಟ್ಬಾಟ್ ತಳಿಗಳ ಆಯ್ಕೆ, ಬೆಳೆ ನಿರ್ವಹಣೆ, ಕೀಟ ಮತ್ತು ರೋಗ ನಿಯಂತ್ರಣ, ನೀರಾವರಿ ಮತ್ತು ಕಟಾವಿನ ನಂತರದ ಪದ್ಧತಿಗಳ ಕುರಿತು ಸಂಶೋಧನೆ ಆಧಾರಿತ ಮಾರ್ಗದರ್ಶನದೊಂದಿಗೆ ದಿನದ 24 ಗಂಟೆಯೂ, ವಾರದ 7 ದಿನವೂ ಯಾವುದೇ ಶುಲ್ಕವಿಲ್ಲದೆ ತಕ್ಷಣವೇ ಪ್ರತಿಕ್ರಿಯಿಸುತ್ತದೆ.
ಹೈದರಾಬಾದ್ನ ಐಸಿಎಆರ್-ಭಾರತೀಯ ಎಣ್ಣೆಬೀಜ ಸಂಶೋಧನಾ ಸಂಸ್ಥೆಯ ನಿರ್ದೇಶಕರಾದ ಡಾ. ಆರ್.ಕೆ. ಮಾಥುರ್ ಅವರು ಮಾತನಾಡಿ, "ಐಸಿಎಆರ್ನ ಸಾಮೂಹಿಕ ಎಣ್ಣೆಬೀಜ ಸಂಶೋಧನೆಯನ್ನು ದೇಶದ ಪ್ರತಿಯೊಬ್ಬ ರೈತನಿಗೂ ಅವರದೇ ಭಾಷೆಯಲ್ಲಿ, ಅವರು ಈಗಾಗಲೇ ಬಳಸುತ್ತಿರುವ ವೇದಿಕೆಯಲ್ಲೇ ತಲುಪಿಸುವ ‘ಆಯಿಲ್ಸೀಡ್ಸ್ ಕಿಸಾನ್ ಮಿತ್ರ’ ಇತಿಹಾಸದಲ್ಲೇ ಮೊದಲ ಬಾರಿಯಾಗಿದೆ. ಐಸಿಎಆರ್-ಐಐಒಆರ್ (ICAR-IIOR), ಎನ್ಎಸ್ಆರ್ಐ (NSRI), ಐಐಜಿಆರ್ (IIGR), ಐಐಆರ್ಎಂಆರ್ (IIRMR) ಮತ್ತು ಪಿಸಿ-ಯೂನಿಟ್ (ಎಳ್ಳು ಮತ್ತು ಗುರೆಳ್ಳು) ಸಂಸ್ಥೆಗಳ ವೈಜ್ಞಾನಿಕ ಜ್ಞಾನವನ್ನು ವಾಟ್ಸಾಪ್ನಲ್ಲಿನ ಬಹುಭಾಷಾ ಎಐ ಏಜೆಂಟ್ನೊಂದಿಗೆ ಸಂಯೋಜಿಸುವ ಮೂಲಕ, ಪ್ರಯೋಗಾಲಯ ಮತ್ತು ರೈತನ ಹೊಲದ ನಡುವೆ ಇದ್ದ ದೂರ, ಭಾಷೆ ಮತ್ತು ವೆಚ್ಚದ ದೀರ್ಘಕಾಲದ ಅಡೆತಡೆಗಳನ್ನು ನಾವು ನಿವಾರಿಸಿದ್ದೇವೆ," ಎಂದು ಅವರು ಹೇಳಿದರು. ಮುಂಗಾರು ಬಿತ್ತನೆ ಪ್ರಾರಂಭವಾಗುತ್ತಿದ್ದಂತೆ, ಎಲ್ಲಾ ಎಣ್ಣೆಬೀಜ ರೈತರು ಮತ್ತು ಇತರ ಪಾಲುದಾರರು ‘ಕಿಸಾನ್ ಮಿತ್ರ’ ಸಂಖ್ಯೆಯನ್ನು ಬಳಸಿಕೊಂಡು ತಮ್ಮ ಪ್ರಶ್ನೆಗಳನ್ನು 24×7 ಕೇಳುವಂತೆ ವಿನಂತಿಸುತ್ತೇವೆ ಎಂದು ಅವರು ತಿಳಿಸಿದರು.
ಆಯಿಲ್ಸೀಡ್ಸ್ ಕಿಸಾನ್ ಮಿತ್ರವನ್ನು ಬಳಸುವುದು ಹೇಗೆ
• ಹಂತ 1: ನಿಮ್ಮ ಫೋನ್ನಲ್ಲಿ +91 4024598180 ಸಂಖ್ಯೆಯನ್ನು ‘ಆಯಿಲ್ಸೀಡ್ಸ್ ಕಿಸಾನ್ ಮಿತ್ರ’ ಎಂದು ಉಳಿಸಿಕೊಳ್ಳಿ.
• ಹಂತ 2: ವಾಟ್ಸಾಪ್ ಓಪನ್ ಮಾಡಿ ಮತ್ತು ನಿಮ್ಮ ನೆಚ್ಚಿನ ಭಾರತೀಯ ಭಾಷೆಯಲ್ಲಿ ಸಂದೇಶವನ್ನು ಕಳುಹಿಸಿ.
• ಹಂತ 3: ನಿಮ್ಮ ಎಣ್ಣೆಬೀಜ ಬೆಳೆಗೆ ಸಂಬಂಧಿಸಿದಂತೆ ಸಂಶೋಧನೆ ಆಧಾರಿತ ತಕ್ಷಣದ ಸಲಹೆಯನ್ನು 24x7 ಉಚಿತವಾಗಿ ಪಡೆಯಿರಿ.
ಇದು ಹೇಗೆ ಕೆಲಸ ಮಾಡುತ್ತದೆ
ಸುಧಾರಿತ ಎಐ (AI) ತಂತ್ರಜ್ಞಾನ ಮತ್ತು ಹಲವಾರು ಐಸಿಎಆರ್ ಸಂಸ್ಥೆಗಳ ಸಾಮೂಹಿಕ ವೈಜ್ಞಾನಿಕ ಪರಿಣತಿಯಿಂದ ಅಭಿವೃದ್ಧಿಪಡಿಸಲಾದ ದೃಢವಾದ ಜ್ಞಾನದ ಮೂಲವನ್ನು ಬಳಸಿಕೊಂಡು, ‘ಆಯಿಲ್ಸೀಡ್ಸ್ ಕಿಸಾನ್ ಮಿತ್ರ’ ಪ್ರಾದೇಶಿಕ ಭಾಷೆಗಳಲ್ಲಿ ಟೈಪ್ ಮಾಡಿದ ಅಥವಾ ಕಳುಹಿಸಿದ ಪ್ರಶ್ನೆಗಳನ್ನು ಅರ್ಥಮಾಡಿಕೊಳ್ಳುತ್ತದೆ ಮತ್ತು ನಿಖರವಾದ, ಬೆಳೆ-ನಿರ್ದಿಷ್ಟ ಉತ್ತರಗಳನ್ನು ನೀಡುತ್ತದೆ. ರೈತರಿಗೆ ಯಾವುದೇ ವಿಶೇಷ ಆಪ್ ಅಥವಾ ಇಂಟರ್ನೆಟ್ ಬ್ರೌಸರ್ ಅಗತ್ಯವಿಲ್ಲ; ಪರಿಚಿತವಿರುವ ವಾಟ್ಸಾಪ್ ಇಂಟರ್ಫೇಸ್ ಮಾತ್ರ ಸಾಕು. ಈ ಚಾಟ್ಬಾಟ್ ತಳಿಗಳ ಆಯ್ಕೆ, ಕೃಷಿ ಪದ್ಧತಿಗಳು, ಕೀಟ ಮತ್ತು ರೋಗ ನಿರ್ವಹಣೆ, ನೀರಾವರಿ ವೇಳಾಪಟ್ಟಿ, ಕಟಾವಿನ ನಂತರದ ಮಾರ್ಗದರ್ಶನ ಮತ್ತು ಬೀಜಗಳ ಲಭ್ಯತೆ ಸೇರಿದಂತೆ ಸಂಪೂರ್ಣ ಬೆಳೆ ಚಕ್ರವನ್ನು ಒಳಗೊಳ್ಳುತ್ತದೆ.
ಈ ಜ್ಞಾನದ ಮೂಲವನ್ನು ಐಸಿಎಆರ್-ರಾಷ್ಟ್ರೀಯ ಸೋಯಾಬೀನ್ ಸಂಶೋಧನಾ ಸಂಸ್ಥೆ (ಇಂದೋರ್), ಐಸಿಎಆರ್-ಭಾರತೀಯ ನೆಲಗಡಲೆ ಸಂಶೋಧನಾ ಸಂಸ್ಥೆ (ಜುನಾಗಢ್), ಐಸಿಎಆರ್-ಭಾರತೀಯ ಸಾಸಿವೆ ಸಂಶೋಧನಾ ಸಂಸ್ಥೆ (ಭರತ್ಪುರ) ಮತ್ತು ಪಿಸಿ-ಯೂನಿಟ್ (ಎಳ್ಳು ಮತ್ತು ಗುರೆಳ್ಳು) ಸಂಸ್ಥೆಗಳ ಸಹಯೋಗದೊಂದಿಗೆ ನಿರ್ಮಿಸಲಾಗಿದೆ. ಇದು ಭಾರತದ ವಿವಿಧ ಕೃಷಿ-ಹವಾಮಾನ ವಲಯಗಳಾದ್ಯಂತ ಎಲ್ಲಾ ಪ್ರಮುಖ ಎಣ್ಣೆಬೀಜ ಬೆಳೆಗಳ ಸಮಗ್ರ ಮಾಹಿತಿಯನ್ನು ಖಾತರಿಪಡಿಸುತ್ತದೆ.
****
(रिलीज़ आईडी: 2271836)
आगंतुक पटल : 53