કેન્દ્રીય ગૃહ અને સહકારિતા મંત્રી શ્રી અમિત શાહે ત્રિપુરામાં સરહદી વિસ્તારો સંબંધિત મુદ્દાઓ અંગે એક બેઠકની અધ્યક્ષતા કરી હતી. આ બેઠક ત્રિપુરાના સાલબાગાન ખાતે યોજાઈ હતી. આ બેઠકમાં ત્રિપુરાના માનનીય મુખ્યમંત્રી, મુખ્ય સચિવ, ડીજીપી અને અન્ય વરિષ્ઠ અધિકારીઓ સહિત ત્રિપુરાના તમામ 8 સરહદી જિલ્લાના જિલ્લા મેજિસ્ટ્રેટ (ડીએમ) અને પોલીસ અધિક્ષક (એસપી) ઉપસ્થિત રહ્યા હતા. બેઠકમાં રાજ્ય સરકારના તંત્રના વધુ સારા સંકલન સાથે વ્યાપક અને સુદ્રઢ સરહદ વ્યવસ્થાપન પર ધ્યાન કેન્દ્રિત કરવામાં આવ્યું હતું.

કેન્દ્રીય ગૃહ મંત્રી શ્રી અમિત શાહે જણાવ્યું હતું કે સરહદ સુરક્ષા એ કોઈ અલગ ફરજ નથી પરંતુ પ્રાદેશિક જવાબદારી છે. તેમણે જિલ્લા મેજિસ્ટ્રેટ, પોલીસ અધિક્ષક, પટવારીઓ, સરપંચો, આધુનિક ટેક્નોલોજી અને સીમા સુરક્ષા દળ (BSF) ને સામેલ કરીને એક ફૂલપ્રૂફ સુરક્ષા ગ્રીડ વિકસાવવાની જરૂરિયાત પર ભાર મૂક્યો હતો.

પ્રધાનમંત્રી શ્રી નરેન્દ્ર મોદીજીના નેતૃત્વમાં, ભારત સરકાર સરહદ સુરક્ષાને પોતાની સર્વોચ્ચ પ્રાથમિકતા આપીને દરેક સરહદી વિસ્તારને મજબૂત બનાવી રહી છે. શ્રી શાહે ભારપૂર્વક જણાવ્યું હતું કે માત્ર ફેન્સિંગ  જ નહીં, પરંતુ સ્થાનિક વહીવટીતંત્ર, સ્માર્ટ ટેક્નોલોજી અને બીએસએફ સહિતનું સંપૂર્ણ પ્રાદેશિક સંરક્ષણ એક સંપૂર્ણ સુરક્ષિત અને ફૂલપ્રૂફ બોર્ડર ગ્રીડ બનાવશે.

કેન્દ્રીય ગૃહ મંત્રીએ નાર્કોટિક્સ (માદક દ્રવ્યો) અને હથિયારોના જોખમોનો સામનો કરવા માટે સરહદી વિસ્તારોમાં રહેતા લોકોને તાલીમ આપવા માટે કેમ્પનું આયોજન કરવાનો નિર્દેશ આપ્યો હતો. તેમણે સૂચના આપી હતી કે આ કેમ્પોમાં પટવારીઓ, સ્થાનિક પોલીસ અને બીએસએફના જવાનોની હાજરી સુનિશ્ચિત કરવામાં આવે.

કેન્દ્રીય ગૃહ મંત્રી શાહે નિર્દેશ આપ્યો હતો કે ગૃહ મંત્રાલય (MHA) નું સીસીટીવી મોડલ સૌપ્રથમ ત્રિપુરામાં લાગુ કરવામાં આવે અને બીએસએફના દરેક કેમેરાને અપગ્રેડ કરીને જિલ્લા વહીવટીતંત્ર સાથે જોડવામાં આવે.

શ્રી અમિત શાહે જણાવ્યું હતું કે ડ્રગ્સ અને હથિયારોની તસ્કરી વિરુદ્ધ વારંવાર ઓપરેશન ચલાવવામાં આવે અને ડ્રગ્સની તસ્કરીમાં યોગદાન આપનારાઓની આખી સાંકળ સામે કડક અભિગમ અપનાવીને કાર્યવાહી કરવામાં આવે.

કેન્દ્રીય ગૃહ મંત્રીએ જણાવ્યું હતું કે સરહદી જિલ્લાઓમાં નાણાકીય શિસ્ત સુનિશ્ચિત કરવી એ પણ રાજ્યોની જવાબદારી છે. તેમણે નિર્દેશ આપ્યો કે કલેક્ટર્સ અને જીએસટી અધિકારીઓને તાલીમ આપવામાં આવે અને કેન્દ્રીય પ્રત્યક્ષ કરવેરા બોર્ડ (CBDT) નકલી ચલણ પર સર્વેક્ષણ કરે.

શ્રી શાહે સરહદો પર નાણાકીય વ્યવહારો, મોટી ઇમારતોના બાંધકામ અને મિલકતોની ખરીદી અને વેચાણ પર તીક્ષ્ણ નજર રાખવા આહવાન કર્યું હતું અને નિર્દેશ આપ્યો હતો કે છેલ્લા પાંચ વર્ષના જમીનના રેકોર્ડની તપાસ કરવામાં આવે.

આ બેઠકમાં રેખાંકિત કરવામાં આવ્યું હતું કે પ્રધાનમંત્રી શ્રી નરેન્દ્ર મોદીના નેતૃત્વમાં ભારત સરકાર આંતરરાષ્ટ્રીય સરહદો પર સુરક્ષાના સર્વોચ્ચ ધોરણો સુનિશ્ચિત કરવા માટે દ્રઢપણે પ્રતિબદ્ધ છે, જ્યારે સરહદી વિસ્તારોના સર્વાંગી વિકાસ અને સુરક્ષા માટે કેન્દ્રીય અને રાજ્યની એજન્સીઓ વચ્ચે ગાઢ સંકલન (સિનર્જી) ને પ્રોત્સાહન આપી રહી છે.

SM/DK/JD