શ્રમ અને રોજગાર મંત્રાલય, ભારત સરકાર હેઠળના કર્મચારી રાજ્ય વીમા નિગમ (ESIC) એ શૈક્ષણિક સત્ર 2026-27 માટે વીમાકૃત વ્યક્તિના આશ્રિત (વોર્ડ ઓફ IP) ક્વોટા હેઠળ અંડરગ્રેજ્યુએટ મેડિકલ અને નર્સિંગ અભ્યાસક્રમોમાં પ્રવેશ માટે અરજીઓ આમંત્રિત કરી છે. પ્રવેશની આ તક ખાસ કરીને કર્મચારી રાજ્ય વીમા યોજના હેઠળ આવરી લેવાયેલા કામદારોના આશ્રિત બાળકો માટે ઉપલબ્ધ છે અને તે દેશભરના વીમાકૃત કામદારોના પરિવારોને અર્થપૂર્ણ સામાજિક સુરક્ષા અને શૈક્ષણિક લાભો આપવા માટેની ESIC ની સતત પ્રતિબદ્ધતા દર્શાવે છે.

શૈક્ષણિક સત્ર 2026-27 માટે વોર્ડ ઓફ IP ક્વોટા હેઠળ કામચલાઉ ધોરણે કુલ 783 બેઠકો અનામત રાખવામાં આવી છે, જેમાં 22 તબીબી, દંત ચિકિત્સા અને નર્સિંગ સંસ્થાઓમાં 695 MBBS બેઠકો, 28 BDS બેઠકો અને 60 B.Sc. નર્સિંગ બેઠકોનો સમાવેશ થાય છે. આમાં વિવિધ રાજ્યોમાં આવેલી ESIC મેડિકલ કોલેજો અને પસંદગીની રાજ્ય સરકારી મેડિકલ કોલેજોનો સમાવેશ થાય છે જ્યાં પાત્રતા ધરાવતા વીમાકૃત વ્યક્તિના આશ્રિતો (Wards of Insured Persons) માટે બેઠકો અનામત રાખવામાં આવી છે. આ પ્રવેશ પ્રક્રિયા આરોગ્ય અને પરિવાર કલ્યાણ મંત્રાલયના ડાયરેક્ટોરેટ જનરલ ઓફ હેલ્થ સર્વિસીસ દ્વારા સંચાલિત કેન્દ્રીયકૃત કાઉન્સેલિંગ પ્રક્રિયા દ્વારા હાથ ધરવામાં આવશે.

વોર્ડ ઓફ IP ક્વોટા એ કામદારોના પરિવારોની શૈક્ષણિક આકાંક્ષાઓને ટેકો આપવા માટે ESIC ની અગ્રણી કલ્યાણકારી પહેલોમાંની એક છે. આ યોજના પાત્રતા ધરાવતા વિદ્યાર્થીઓને ભારે સબસિડીવાળી ટ્યુશન ફી પર વ્યાવસાયિક તબીબી અને નર્સિંગ શિક્ષણ મેળવવા સક્ષમ બનાવે છે. આ ક્વોટા હેઠળ પ્રવેશ મેળવનારા વિદ્યાર્થીઓએ MBBS અને BDS અભ્યાસક્રમો માટે વાર્ષિક ટ્યુશન ફી માત્ર ₹24,000 અને B.Sc. નર્સિંગ અભ્યાસક્રમો માટે માત્ર ₹10,000 ચૂકવવાના રહેશે, જે ESI યોજનાના લાભાર્થીઓ માટે ગુણવત્તાયુક્ત તબીબી શિક્ષણને સુલભ અને સસ્તું બનાવે છે. આ ક્વોટા હેઠળ પ્રવેશ માટે કોઈ કેપિટેશન ફી કે દાન સ્વીકાર્ય નથી.

પાત્રતા મેળવવા માટે, માતા કે પિતા ESI એક્ટ હેઠળ નોંધાયેલા વીમાકૃત વ્યક્તિ હોવા જોઈએ અને 30 સપ્ટેમ્બર 2025 ના રોજ ESI યોજનામાં સક્રિય યોગદાનકર્તા હોવા જોઈએ. અરજદાર વીમાકૃત વ્યક્તિનું આશ્રિત બાળક હોવું જોઈએ, તેમણે NEET (UG) 2026 ની પરીક્ષા આપી હોવી જોઈએ અને નેશનલ મેડિકલ કમિશન, ડેન્ટલ કાઉન્સિલ ઓફ ઇન્ડિયા, ઇન્ડિયન નર્સિંગ કાઉન્સિલ, નેશનલ ટેસ્ટિંગ એજન્સી અને મેડિકલ કાઉન્સેલિંગ કમિટી દ્વારા નિર્ધારિત પાત્રતાની શરતો પૂરી કરતા હોવા જોઈએ. પુરુષ ઉમેદવારોની ઉંમર 08 માર્ચ 2026 ના રોજ 21 વર્ષથી વધુ ન હોવી જોઈએ, જ્યારે ESI એક્ટ, 1948 ની જોગવાઈઓ અનુસાર વીમાકૃત વ્યક્તિઓની આશ્રિત અપરિણીત મહિલા સંતાનો માટે વય મર્યાદા લાગુ પડતી નથી.

પાત્ર ઉમેદવારોએ ESIC દ્વારા જારી કરાયેલું માન્ય 'વોર્ડ ઓફ IP પ્રમાણપત્ર' મેળવવું જરૂરી છે, જે પ્રવેશ પ્રક્રિયામાં ભાગ લેવા માટે ફરજિયાત છે. આ પ્રમાણપત્ર મેળવવા માટેની સંપૂર્ણ અરજી પ્રક્રિયા ઓનલાઇન છે અને તે ESIC પોર્ટલ દ્વારા પૂર્ણ કરી શકાય છે. અરજદારોએ નિર્ધારિત વિગતો સબમિટ કરવાની રહેશે અને જરૂરી દસ્તાવેજો અપલોડ કરવાના રહેશે, જેમાં ફોટોગ્રાફ્સ, ઉંમરનો પુરાવો, NEET (UG) 2026 નું એડમિટ કાર્ડ અને જ્યાં લાગુ પડતું હોય ત્યાં અન્ય સંબંધિત પ્રમાણપત્રોનો સમાવેશ થાય છે.

વોર્ડ ઓફ IP પ્રમાણપત્ર માટે ઓનલાઇન અરજીઓ સબમિટ કરવાની છેલ્લી તારીખ 21 જૂન 2026 છે. ઉમેદવારોને સલાહ આપવામાં આવે છે કે તેઓ સુનિશ્ચિત કરે કે વીમાકૃત વ્યક્તિનો મોબાઈલ નંબર ESIC ડેટાબેઝમાં યોગ્ય રીતે અપડેટ થયેલો હોય, કારણ કે અરજી પ્રક્રિયામાં OTP-આધારિત પ્રમાણીકરણ સામેલ છે. વોર્ડ ઓફ IP પ્રમાણપત્ર મેળવ્યા પછી, ઉમેદવારોએ કેન્દ્રીયકૃત કાઉન્સેલિંગ પ્રક્રિયામાં ભાગ લેવા માટે મેડિકલ કાઉન્સેલિંગ કમિટી (MCC) ના પોર્ટલ પર અલગથી નોંધણી કરાવવી આવશ્યક છે.

ESIC એ એમ્પ્લોયર્સ, વીમાકૃત વ્યક્તિઓ, પ્રાદેશિક કચેરીઓ, શાખા કચેરીઓ, હોસ્પિટલો અને રાજ્યના ESI સત્તાધિકારીઓ સહિતના તમામ હિતધારકોને પાત્ર લાભાર્થીઓ વચ્ચે પ્રવેશ પ્રક્રિયા વિશેની માહિતીનો સક્રિયપણે પ્રસાર કરવા અપીલ કરી છે. ESI યોજના હેઠળ આવરી લેવાયેલા નિયોક્તાઓને વિનંતી કરવામાં આવી છે કે તેઓ તેમના કર્મચારીઓને આ તક વિશે માહિતગાર કરે, કાર્યસ્થળો પર પ્રવેશ નોટિસ પ્રમુખતાથી પ્રદર્શિત કરે અને ESIC રેકોર્ડ્સમાં મોબાઈલ નંબરોની ચકાસણી અને અપડેશન પ્રક્રિયાને સરળ બનાવે. ફિલ્ડ ઓફિસોને પણ જાગૃતિ અભિયાન આયોજિત કરવા અને અરજીઓ સમયસર સબમિટ કરવા તથા તેની પ્રક્રિયા માટે અરજદારોને સહાય પૂરી પાડવાની સલાહ આપવામાં આવી છે.

કર્મચારી રાજ્ય વીમા નિગમએ વિશ્વની સૌથી મોટી સામાજિક સુરક્ષા સંસ્થાઓમાંની એક છે અને તે કામદારો અને તેમના પરિવારોને તબીબી સંભાળ, માંદગી લાભ, પ્રસૂતિ લાભ, અક્ષમતા લાભ અને આશ્રિત લાભ સહિત સામાજિક સુરક્ષા લાભોનું વ્યાપક પેકેજ પ્રદાન કરે છે. વોર્ડ ઓફ IP ક્વોટા જેવી પહેલો દ્વારા, ESIC ભારતના કાર્યબળના કલ્યાણ, સશક્તિકરણ અને સામાજિક-આર્થિક ઉન્નતિ માટેની તેની પ્રતિબદ્ધતાને વધુ મજબૂત કરવાનું ચાલુ રાખે છે.

પાત્રતા, અરજી પ્રક્રિયા અને પ્રવેશ સંબંધિત અપડેટ્સ વિશેની વિગતવાર માહિતી માટે ઉમેદવારો ESIC ની વેબસાઇટ www.esic.gov.in અને મેડિકલ કાઉન્સેલિંગ કમિટીના પોર્ટલ www.mcc.nic.in ની મુલાકાત લઈ શકે છે.

SM/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com