નમસ્કાર!

આજે, અમદાવાદની ધરતી પરથી, વિશ્વના રમતગમતના વારસામાં એક નવું પ્રકરણ ઉમેરાયું છે. પ્રથમ વિશ્વ યોગાસન ચેમ્પિયનશિપ આજથી શરૂ થઈ રહી છે. હું ભારતમાં ભાગ લેવા આવેલા વિવિધ દેશોના તમામ રમતવીરોનું હાર્દિક સ્વાગત કરું છું અને તેમને મારી અસંખ્ય શુભેચ્છાઓ પાઠવું છું. યુનેસ્કો (UNESCO) વર્લ્ડ હેરિટેજ સિટી એવા અમદાવાદમાં આ ઈવેન્ટનું આયોજન થઈ રહ્યું છે, જે સમગ્ર દેશ માટે ગૌરવની બાબત છે. હવેથી બરાબર થોડા દિવસો પછી, 21 જૂનના રોજ ‘વિશ્વ યોગ દિવસ’ ની પણ ઉજવણી કરવામાં આવશે. તે દિવસે, વિવિધ દેશોમાં યોગ સંબંધિત કાર્યક્રમો યોજાશે, જેમાં મુખ્ય કાર્યક્રમ ભારતના અન્ય એક ઐતિહાસિક શહેર, કોલકાતામાં યોજાશે. આમ, વિશ્વ યોગ દિવસ પહેલા, વિશ્વ યોગાસન ચેમ્પિયનશિપ આવી પહોંચી છે, જે પોતાની સાથે સ્વાસ્થ્ય અને સુખાકારીનો ડબલ ડોઝ લઈને આવી છે.

મિત્રો,

લગભગ એક દાયકા પહેલા, ભારતે સંયુક્ત રાષ્ટ્ર (યુનાઇટેડ નેશન્સ) માં આંતરરાષ્ટ્રીય યોગ દિવસનો પ્રસ્તાવ રજૂ કર્યો હતો. અમારો ઉદ્દેશ્ય આ પ્રાચીન ભારતીય પરંપરાને માનવતાના સ્વાસ્થ્ય અને સામૂહિક સુખાકારી સાથે જોડવાનો હતો. તે સમયે 190 દેશોએ ભારતના પ્રસ્તાવને ટેકો આપ્યો હતો. આજે એ જોઈને આનંદ થાય છે કે લાખો લોકોએ યોગને પોતાની દૈનિક દિનચર્યાનો એક ભાગ બનાવી લીધો છે. ધ્યાન અને પ્રાણાયામ તેમની જીવનશૈલીના અભિન્ન અંગ બની રહ્યા છે.

પરંતુ મિત્રો,

દરેક જીવંત પરંપરા સમય સાથે નવા તબક્કામાં પ્રવેશે છે. યોગાસન સ્પોર્ટ્સની આ વર્લ્ડ ચેમ્પિયનશિપ આવા જ એક નવા તબક્કાની શરૂઆત દર્શાવે છે. આ ચેમ્પિયનશિપ દ્વારા યોગાસનને એક સ્પર્ધાત્મક રમત તરીકે ઓળખ મળશે. મને વિશ્વાસ છે કે ભવિષ્યમાં, યોગાસન આંતરરાષ્ટ્રીય રમતગમતની સ્પર્ધાઓમાં પોતાનું સ્થાન સુરક્ષિત કરશે, પછી તે ઓલિમ્પિક હોય કે અન્ય મલ્ટી-સ્પોર્ટ્સ  સ્પર્ધાઓ હોય. સમર્પિત પ્રયાસો સાથે, સકારાત્મક પરિણામો શક્ય છે. ચોક્કસપણે, અમદાવાદમાં આ પ્રથમ વિશ્વ યોગાસન ચેમ્પિયનશિપ તે સફરમાં મહત્વપૂર્ણ ભૂમિકા ભજવશે.

મિત્રો,

યોગાસન સ્પોર્ટ્સનું બીજું એક પરિમાણ પણ છે. આપણે જાણીએ છીએ કે દરેક મુખ્ય રમત તેની સાથે આખી ઇકોસિસ્ટમ લઈને આવે છે. તે રોજગારીની નવી તકો ઉભી કરે છે. જેમ જેમ યોગાસન સ્પોર્ટ્સનો વિસ્તાર થશે તેમ તેમ નવી સંભાવનાઓ પણ વધશે. આનાથી એથ્લેટ્સ (રમતવીરો) ની સાથે સાથે ટ્રેનર્સ, સ્પોર્ટ્સ સાયન્ટિસ્ટ્સ, સંશોધકો અને ઇવેન્ટ મેનેજર્સ માટે કરિયરની તકો ખુલશે.

મિત્રો,

મેં અગાઉ ઉલ્લેખ કર્યો છે તેમ, આ ચેમ્પિયનશિપ એવા સમયે યોજાઈ રહી છે જ્યારે સમગ્ર વિશ્વ આંતરરાષ્ટ્રીય યોગ દિવસની તૈયારી કરી રહ્યું છે. આ વર્ષે, આંતરરાષ્ટ્રીય યોગ દિવસની થીમ છે - 'યોગ ફોર હેલ્ધી એજિંગ' (Yoga for Healthy Ageing - સ્વસ્થ વૃદ્ધત્વ માટે યોગ). લોકો આજે લાંબા સમય સુધી સ્વસ્થ અને સક્રિય રહેવાના રસ્તાઓ શોધી રહ્યા છે. યોગ આના માટે ખૂબ જ યોગ્ય વિકલ્પ છે. યોગ આપણને ભોગવિલાસ તેમજ રોગમાંથી મુક્ત કરે છે. સૌથી મહત્વની બાબત એ છે કે, ન્યૂનતમ ખર્ચ સાથે સ્વસ્થ જીવનશૈલી જાળવવાનો આ શ્રેષ્ઠ માર્ગ છે. તેથી, આ મંત્ર યાદ રાખો: ‘દૈનિક યોગ, તમામ રોગોને ભગાડશે’.

મિત્રો,

આ વિઝનને આગળ ધપાવતા, ભારત સરકારના આયુષ મંત્રાલયે ‘યોગ થ્રી સિક્સટી ફાઇવ’ (Yoga Three Sixty Five) અભિયાન શરૂ કર્યું છે. હું આ વિશ્વ યોગાસન ચેમ્પિયનશિપમાં ભાગ લઈ રહેલા તમામ રમતવીરોને વિનંતી કરું છું કે તેઓ યોગનો આ સંદેશ પોતાના દેશોમાં પાછો લઈ જાય. તમે તમારા દેશોમાં ‘યોગ થ્રી સિક્સટી ફાઇવ’ ના બ્રાન્ડ એમ્બેસેડર બની શકો છો. તમારો અનુભવ અને યોગમાં શ્રદ્ધા સમગ્ર વિશ્વને આ સંદેશ સાથે જોડી શકે છે.

મિત્રો,

આ સ્પર્ધામાં ભલે ગમે તે જીતે, પરંતુ આ ઐતિહાસિક પ્રકરણનો હિસ્સો બનીને, તમે બધા પહેલેથી જ ચેમ્પિયન છો. તમારી પ્રતિભા અને શિસ્ત વિશ્વભરના યુવાનોને પ્રેરણા આપશે. આ અદભુત શુભેચ્છાઓ સાથે, હું વિશ્વ યોગાસન ચેમ્પિયનશિપના તમામ સહભાગીઓ અને આયોજકોને હાર્દિક અભિનંદન પાઠવું છું.

હું આ સાથે ધ ફર્સ્ટ વર્લ્ડ યોગાસન ચેમ્પિયનશિપ 2026, અમદાવાદને ખુલ્લી જાહેર કરું છું.

SM/IJ/JD

(रिलीज़ आईडी: 2269076) आगंतुक पटल : 6