قبائلی امور کی وزارت کی اہم اسکالرشپ اسکیموں کے مستفیدین کے ایک گروپ نے آج، 2 جون 2026 کو راشٹرپتی بھون میں بھارت کی صدرجمہوریہ محترمہ دروپدی مرمو سے ملاقات کی۔

مستفید ین سے خطاب کرتے ہوئے صدر نے کہا کہ ہمارے ملک میں صلاحیتوں کی کوئی کمی نہیں ہے۔ صرف ضرورت اس بات کی ہے کہ درست رہنمائی، تعاون اور ایک مناسب پلیٹ فارم فراہم کیا جائے۔ مستفیدین کی موجودگی اس بات کا ثبوت ہے کہ اگر مواقع فراہم کئے جائیں تو ہمارے دیہات، دور دراز علاقوں اور قبائلی خطوں سے ایسے نوجوان سامنے آئیں گے جو بھارت کا نام روشن کریں گے۔

صدرجمہوریہ نے کہا کہ حکومت مختلف اسکیموں کے ذریعے قبائلی برادریوں سے تعلق رکھنے والے نوجوانوں کو بااختیار بنانے اور ان کی ترقی کے لیے مسلسل کوششیں کر رہی ہے۔ اسکالرشپ اسکیمیں صرف مالی امداد کا ذریعہ نہیں ہیں ،بلکہ یہ نوجوانوں کے خوابوں کو پرواز دینے کا کام کرتی ہیں۔ یہ اسکالرشپس ان نوجوانوں کی زندگی میں نئے امکانات کے دروازے کھولتی ہیں جن کے پاس بے پناہ صلاحیت تو ہوتی ہے لیکن وسائل کی کمی انہیں آگے بڑھنے سے روک دیتی ہے۔

صدر جمہوریہ نے کہا کہ تعلیم بااختیار بنانے کا ایک اہم ذریعہ ہے۔ تعلیم ہی وہ طاقت ہے جو کسی فرد کو خود کفیل، باخبر اور قابل بناتی ہے۔ انہوں نے کہا کہ ان کی اپنی زندگی کے سفر میں بھی تعلیم نے ایک اہم کردار ادا کیا ہے۔ انہوں نے کہا کہ نوجوانوں کی تعلیم اور تجربہ ان بچوں کے لیے تحریک کا ذریعہ بننا چاہیے جو محدود وسائل کے باوجود بڑے خواب دیکھنے کی ہمت رکھتے ہیں۔ جب وہ دوسروں کو ساتھ لے کر آگے بڑھیں گے، تب ہی قومی شمولیتی ترقی ایک حقیقت بن سکے گی۔

صدرجمہوریہ نے کہا کہ نوجوان ہمارے ملک کی طاقت، امید اور روشن مستقبل کی علامت ہیں۔ انہوں نے نوجوانوں، خصوصاً قبائلی برادریوں سے تعلق رکھنے والے نوجوانوں سے درخواست کی کہ وہ اپنی جڑوں اور اپنے لوگوں کو نہ بھولیں۔ انہوں نے کہا کہ جب نوجوان اپنی وراثت پر فخر کرتے ہوئے، تعلیم اور ٹیکنالوجی کی طاقت کے ذریعے آگے بڑھیں گے تو وہ ایک مضبوط، خوشحال اور خود کفیل بھارت کی تعمیر کریں گے۔

ہم 2047 تک بھارت کو “ترقی یافتہ بھارت” میں تبدیل کرنے کی سمت آگے بڑھ رہے ہیں۔ اس ہدف کے حصول میں نوجوان اہم کردار ادا کریں گے۔ انہوں نے کہا کہ وہ جس بھی شعبے کا انتخاب کریں، اس میں وہ سماج اور قوم کی ترقی کے لئے فعال کردار ادا کر سکتے ہیں۔

صدرجمہوریہ کی تقریر دیکھنےکیلئے براہِ کرم یہاں کلک کریں۔

***

ش ح۔ ک ا۔  خ م

U.NO.7858