مکانات و شہری امور کی وزارت (ایم او ایچ یو اے) کی فلیگ شپ مائیکرو کریڈٹ اسکیم، پردھان منتری اسٹریٹ وینڈر آتم نربھر ندھی (پی ایم سوانِدھی)، نے اسٹریٹ فروشوں کو کم لاگت، بغیر ضمانت قرضوں، ڈیجیٹل شمولیت اور سماجی تحفظ کے ذریعے بااختیار بنانے کے چھ سال مکمل کر لیے ہیں۔

اس موقع کی یاد میں منعقدہ تقریب میں مرکزی وزیر برائے مکانات و شہری امور جناب منوہر لال نے تریپورہ کے وزیر اعلیٰ جناب مانک ساہا کے ہمراہ اروناچل پردیش، آسام، منی پور، میزورم اور تریپورہ سے تعلق رکھنے والے پی ایم سوانِدھی کے مستفیدین سے بات چیت کی۔ تقریب کے دوران تریپورہ کے اسٹریٹ فروشوں میں کریڈٹ کارڈز اور قرض منظوری کے خطوط بھی تقسیم کیے گئے۔

جون 2020 میں آغاز کے بعد سے پی ایم سوانِدھی اسٹریٹ فروشوں کے لیے ایک انقلابی اقدام کے طور پر ابھری ہے، جس نے انہیں باضابطہ قرضہ جاتی نظام تک رسائی فراہم کی اور ان کے روزگار کو مضبوط اور وسیع بنانے میں مدد دی ہے۔ اس اسکیم کے تحت اب تک 1.05 کروڑ سے زائد قرضے منظور کیے جا چکے ہیں، جن کی مجموعی مالیت 17,800 کروڑ روپے سے زیادہ ہے اور ملک بھر کے لاکھوں اسٹریٹ فروش اس سے مستفید ہوئے ہیں۔

مرکزی وزیر برائے ہاؤسنگ و شہری امور جناب منوہر لال نے کہا کہ وزیر اعظم جناب نریندر مودی نے اسٹریٹ فروشوں کی محنت، جدوجہد اور ملکی معیشت میں ان کے اہم کردار کو تسلیم کرتے ہوئے 2020 میں پی ایم سوانِدھی اسکیم کا آغاز کیا تھا۔ اس کا مقصد شہری غریبوں کو بااختیار بنانا اور ان کے ذریعۂ معاش کو مزید مستحکم کرنا تھا۔

انہوں نے کہا کہ اس اسکیم کا مقصد صرف بغیر ضمانت قرضے فراہم کرنا نہیں تھا، بلکہ اسٹریٹ فروشوں کو عزتِ نفس، اعتماد اور ایسے مواقع فراہم کرنا بھی تھا جن کے ذریعے وہ مالی تحفظ اور سماجی شناخت کے ساتھ اپنی زندگی میں آگے بڑھ سکیں۔

اسکیم کی کامیابیوں کا ذکر کرتے ہوئے جناب منوہر لال نے کہا کہ گزشتہ چھ برسوں کے دوران ملک بھر میں 75.5 لاکھ سے زائد اسٹریٹ فروش پی ایم سوانِدھی کے تحت مستفید ہو چکے ہیں۔

مرکزی وزیر نے مزید بتایا کہ اس اسکیم کے تحت ملک بھر میں 1.12 کروڑ سے زائد بغیر ضمانت قرضے منظور کیے جا چکے ہیں، جبکہ اب تک مستفیدین کو 17,800 کروڑ روپے سے زیادہ کی رقم فراہم کی جا چکی ہے۔

شمال مشرقی خطے کا حوالہ دیتے ہوئے جناب منوہر لال نے کہا کہ اس علاقے میں 2.59 لاکھ سے زائد قرضے تقسیم کیے جا چکے ہیں، جن کے ذریعے اسٹریٹ فروشوں کو 430 کروڑ روپے سے زیادہ کی مالی معاونت فراہم کی گئی ہے۔

تریپورہ کے بارے میں خصوصی طور پر بات کرتے ہوئے مرکزی وزیر نے کہا کہ ریاست میں اب تک 9,300 سے زائد قرضے منظور کیے جا چکے ہیں اور اس اسکیم کے تحت مستفیدین کو تقریباً 15 کروڑ روپے کی رقم فراہم کی گئی ہے۔

جناب منوہر لال نے یہ بھی کہا کہ پی ایم سوانِدھی کے ذریعے لاکھوں افراد پہلی بار بینکاری نظام سے منسلک ہوئے ہیں اور باضابطہ معیشت کا حصہ بنے ہیں، جس سے مالی شمولیت اور خود انحصاری کی راہ ہموار ہوئی ہے۔

گزشتہ چھ برسوں کے دوران اس اسکیم کے اثرات ہر لحاظ سے انقلابی اور دور رس ثابت ہوئے ہیں۔ اعداد و شمار کے مطابق 34.81 لاکھ خواتین اسٹریٹ فروش پی ایم سوانِدھی اسکیم کے تحت بااختیار بنائی گئی ہیں، جبکہ ملک بھر میں خواتین اسٹریٹ فروشوں کو 51.84 لاکھ قرضے فراہم کیے جا چکے ہیں۔ اسی طرح 55 لاکھ اسٹریٹ فروشوں کو ڈیجیٹل نظام سے جوڑا گیا ہے۔

مزید برآں اس اسکیم کے تحت مستفیدین کی اوسط آمدنی میں سالانہ 20 فیصد اضافہ ریکارڈ کیا گیا ہے، جبکہ 30 فیصد سے زائد اسٹریٹ فروشوں نے اسکیم کے تحت دستیاب قرضوں کے علاوہ دیگر ذرائع سے بھی قرضہ حاصل کرنے میں کامیابی حاصل کی ہے۔

پی ایم سوانِدھی کی اہم کامیابیاں

• 1.05 کروڑ سے زائد قرضوں کی منظوری میں سہولت فراہم کی گئی۔
• اسکیم کے تحت 17,800 کروڑ روپے سے زائد کی رقم مستفیدین کو فراہم کی گئی۔
• 34.81 لاکھ خواتین اسٹریٹ فروشوں کو بااختیار بنایا گیا۔
• سوانِدھی سے سمردھی اقدام کے تحت 50 لاکھ سے زائد اسٹریٹ فروش خاندانوں کا سماجی و معاشی پروفائل تیار کیا گیا۔
• مرکزی حکومت کی آٹھ فلاحی اسکیموں کے تحت 1.52 کروڑ سے زائد فلاحی فوائد/منظوریوں تک مستحقین کی رسائی یقینی بنائی گئی۔

******

ش ح۔ ش ا ر۔ ول

Uno-7779