ભારતના ઉપરાષ્ટ્રપતિ શ્રી સી. પી. રાધાકૃષ્ણને આજે ભૂતપૂર્વ કેન્દ્રીય મંત્રી અને ઉત્તરાખંડના ભૂતપૂર્વ મુખ્યમંત્રી મેજર જનરલ (નિવૃત્ત) બી. સી. ખંડુરીના નિધન પર ઊંડો શોક વ્યક્ત કર્યો છે.

એક સંદેશમાં, ઉપરાષ્ટ્રપતિએ કહ્યું કે મેજર જનરલ ખંડુરીના નિધનથી, રાષ્ટ્રએ એક પ્રતિષ્ઠિત સૈનિક, એક સક્ષમ પ્રશાસક અને દુર્લભ પ્રામાણિકતાના રાજનેતા ગુમાવ્યા છે.

ઉપરાષ્ટ્રપતિએ કહ્યું કે સુવર્ણ ચતુર્ભુજ અને રાષ્ટ્રીય રાજમાર્ગ વિકાસ કાર્યક્રમ દ્વારા ભારતના માર્ગ માળખાગત સુવિધામાં પરિવર્તન લાવવામાં મેજર જનરલ ખંડુરીનું દૂરંદેશી યોગદાન દેશની વિકાસ યાત્રામાં એક સીમાચિહ્નરૂપ રહેશે.

દેહરાદૂન મુલાકાત દરમિયાન સ્વર્ગસ્થ નેતા સાથેની તેમની તાજેતરની મુલાકાતને યાદ કરતાં, ઉપરાષ્ટ્રપતિએ કહ્યું કે તેઓ લોકસભામાં ભૂતપૂર્વ સાથીદારો તરીકેના તેમના જોડાણને પ્રેમથી યાદ કરે છે.

ઉપરાષ્ટ્રપતિએ આ દુઃખની ઘડીમાં શોકગ્રસ્ત પરિવાર, તેમના અસંખ્ય પ્રશંસકો અને ઉત્તરાખંડના લોકો પ્રત્યે હૃદયપૂર્વક સંવેદના વ્યક્ત કરી છે.

IJ/DK/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com