ریلوے کے مرکزی وزیر جناب اشونی ویشنو نے آج ورچوئل طور پر بنگلورو– ممبئی ایکسپریس ٹرین کو ہری جھنڈی دکھا کر روانہ کیا، جو کرناٹک اور مہاراشٹر کے درمیان رابطے کو مزید مضبوط بنانے کی جانب ایک اہم قدم ہے۔

جناب ویشنو نے کہا کہ جنوبی اور شمالی کرناٹک کے طویل عرصے سے زیر التوا مطالبات اب پورے کیے جا رہے ہیں۔ مزید برآں، انہوں نے اعلان کیا کہ بنگلورو اور ممبئی کے درمیان وندے بھارت سلیپر سروس جلد شروع ہونے کی توقع ہے۔

بنیادی ڈھانچے کی ترقی پر روشنی ڈالتے ہوئے انہوں نے کہا کہ حالیہ برسوں میں ریلوے فنڈنگ میں نمایاں اضافہ ہوا ہے، جس کے باعث کرناٹک بھر میں منصوبوں پر عمل درآمد کی رفتار تیز ہوئی ہے۔

امرت بھارت اسٹیشن اسکیم کے تحت 2,160 کروڑ روپے کی لاگت سے 61 اسٹیشنوں کی ازسر نو ترقی کی جا رہی ہے، جن میں سے 9 اسٹیشنوں کا کام مکمل ہو چکا ہے۔ بنگلورو کینٹونمنٹ اسٹیشن کو 485 کروڑ روپے جبکہ یشونت پور اسٹیشن کو 367 کروڑ روپے کی لاگت سے جدید بنایا جا رہا ہے۔

2014 کے بعد سے کرناٹک میں تقریباً 1,750 کلومیٹر نئی ریلوے لائنیں تعمیر کی جا چکی ہیں، جبکہ حسن–منگلورو سیکشن میں پیچیدہ برقی کاری کے کام مکمل ہو چکے ہیں اور اس وقت ان کی جانچ جاری ہے۔

بنگلورو سب اربن ریلوے پروجیکٹ کے بارے میں انہوں نے کہا کہ چاروں کوریڈور پر کام جاری ہے۔ بائی پناہلی–چکابنوارا اور ہیلالیگے–راجنوکنتے کوریڈور کے لیے زمین کے حصول کا عمل مکمل ہو چکا ہے اور اسٹیشنوں کی تعمیر کا کام جاری ہے۔ کے ایس آر بنگلورو–دیوناہلی الائنمنٹ کو ریاستی حکومت اور ریلوے نے مشترکہ طور پر منظوری دے دی ہے، جبکہ جیو ٹیکنیکل سروے بھی مکمل ہو چکا ہے۔ کینگیری–وائٹ فیلڈ الائنمنٹ کو حال ہی میں منظوری دی گئی ہے اور اس کا سروے جلد شروع ہوگا۔ انہوں نے کہا کہ سب اربن ریلوے نیٹ ورک اہم مراکز بشمول ایئرپورٹ، الیکٹرانک سٹی، مراٹھاہلی اور ہیبل کو آپس میں مربوط کرے گا۔

ریلوے کے وزیر نے مزید کہا کہ اس وقت کرناٹک میں وندے بھارت ٹرینوں کے 12 جوڑے چل رہے ہیں۔ بنگلورو–منگلورو روٹ پر آزمائشی کارروائی جاری ہے، جس سے جلد ہی ساحلی رابطہ مدگاؤں تک بہتر ہو جائے گا۔

جناب اشونی ویشنو نے بتایا کہ بنگلورو کو حیدرآباد اور چنئی سے جوڑنے والے بلٹ ٹرین کوریڈور کو بھی منظوری دے دی گئی ہے۔ انہوں نے مزید کہا کہ ممبئی، بنگلورو اور دیگر بڑے شہروں کو جوڑنے کے طویل مدتی وژن کے تحت یہ نیٹ ورک 7,000 کلومیٹر تک توسیع پانے کی توقع ہے۔

ریلوے کے مرکزی وزیر مملکت جناب وی سومنا نے ٹرین نمبر 16553/54 ایس ایم وی ٹی بنگلورو–لوکمانیہ تلک ٹرمینس ایکسپریس کو ہری جھنڈی دکھانے کی تقریب سے خطاب کرتے ہوئے جناب اشونی ویشنو کا شکریہ ادا کیا کہ انہوں نے نئی بنگلورو–ممبئی ٹرین کی منظوری دی، اور کہا کہ اس سے ملک کے مصروف ترین راستوں میں سے ایک پر سفر کرنے والے مسافروں کو بڑا فائدہ ہوگا اور کرناٹک کی ترقی کو مزید فروغ ملے گا۔

انہوں نے بتایا کہ اس وقت کرناٹک میں وندے بھارت ٹرینوں کے 12 جوڑے 14 اضلاع کا احاطہ کر رہے ہیں۔ انہوں نے کہا کہ تھانی سندرا میں 270 کروڑ روپے کی لاگت سے وندے بھارت سلیپر مینٹیننس ڈپو قائم کیا جائے گا، جبکہ ایس ایم وی ٹی بنگلورو میں 52.73 کروڑ روپے کی لاگت سے چیئر کار مینٹیننس سہولت بھی تیار کی جائے گی۔ صلاحیت میں اضافے کے لیے بائی اپنہلی–ہوسور (1,116 کروڑ روپے)، بیٹاہلاسورو–راجنوکنتے (248 کروڑ روپے) ڈبلنگ اور بنگلورو کے اطراف کوآڈروپلنگ کے کام (1,347 کروڑ روپے) انجام دیے جا رہے ہیں۔

جناب سومنا نے بتایا کہ یشونت پور، کے ایس آر بنگلورو، لوٹے گولہلی، بائی اپنہلی، پینوکونڈا، میسورو اور جولارپیٹائی سمیت اہم سیکشنز پر 6,396 کروڑ روپے کی مجموعی لاگت سے آٹومیٹک سگنلنگ کے کام نافذ کیے جا رہے ہیں۔ مجموعی ترقی پر روشنی ڈالتے ہوئے انہوں نے کہا کہ کرناٹک کو 7,748 کروڑ روپے کا ریکارڈ ریلوے بجٹ مختص کیا گیا ہے۔ 2014 کے بعد سے تقریباً 3,840 کلومیٹر ریلوے لائنیں تیار کی جا چکی ہیں اور 3,742 کلومیٹر لائنوں کی برقی کاری مکمل ہو چکی ہے، جس سے ریاست تقریباً 100 فیصد برقی کاری کے قریب پہنچ گئی ہے۔

اس موقع پر موجود معزز شخصیات میں بنگلورو سینٹرل سے رکن پارلیمنٹ جناب پی سی موہن، راجیہ سبھا کے رکن پارلیمنٹ جناب لہَر سنگھ سیرویا، اور بنگلورو ساؤتھ سے رکن پارلیمنٹ جناب تیجسوی سوریا شامل تھے، جنہوں نے ویڈیو کانفرنس کے ذریعے تقریب میں شرکت کی، جبکہ سینئر ریلوے حکام بھی اس موقع پر موجود تھے۔

**************

ش ح۔ ف ش ع

                                                                                                                                         U: 7172