எனது நண்பர் மேதகு அதிபர் திரு. ஃபிரெடெரிக் மெர்ஸ் அவர்களே, இரு நாடுகளின் பிரதிநிதிகளே மற்றும் ஊடக நண்பர்களே, உங்கள் அனைவருக்கும் எனது வணக்கம்.

சுவாமி விவேகானந்தரின் பிறந்த நாளான இன்று, அதிபர் திரு. மெர்ஸ் அவர்களை வரவேற்பதில் நான் மிகுந்த மகிழ்ச்சி அடைகிறேன். இந்தியா மற்றும் ஜெர்மனி ஆகிய இரு நாடுகளுக்கும் இடையே தத்துவம், அறிவு மற்றும் ஆன்மீகத்தின் பாலத்தைக் கட்டியவர் சுவாமி விவேகானந்தர் என்பது ஒரு இனிமையான தற்செயல் நிகழ்வாகும். இன்று அதிபர் மெர்ஸ் அவர்களின் இந்தப் பயணம், அந்தப் பாலத்திற்குப் புதிய ஆற்றலையும், நம்பிக்கையையும், விரிவான வாய்ப்புகளையும் வழங்கியுள்ளது.

அதிபராகப் பொறுப்பேற்ற பிறகு, திரு. மெர்ஸ் அவர்கள் இந்தியாவிற்கு மட்டுமன்றி, ஆசியாவிற்கே மேற்கொள்ளும் முதல் பயணம் இதுவாகும். இந்தியாவுடனான உறவுக்கு அவர் அளிக்கும் முக்கியத்துவத்திற்கு இது ஒரு வலுவான சான்றாகும். அவரது தனிப்பட்ட அக்கறை மற்றும் அர்ப்பணிப்புக்காக நான் அவருக்கு எனது மனமார்ந்த நன்றிகளைத் தெரிவித்துக் கொள்கிறேன். ஜெர்மனியுடனான நட்பு மற்றும் கூட்டாண்மையை மேலும் வலுப்படுத்த இந்தியா முழுமையாக உறுதிபூண்டுள்ளது.

குஜராத்தி மொழியில் 'ஆவ்காரோ மிட்டோ ஆப்ஜே ரே' (Aavkaaro Mitho Aapje Re) என்ற ஒரு பழமொழி உண்டு; அதாவது ஒருவரை அன்போடும் பாசத்தோடும் வரவேற்க வேண்டும் என்பது அதன் பொருள். அதே உணர்வுடன் அதிபர் திரு.மெர்ஸ் அவர்களை இந்தியாவிற்கு மனதார வரவேற்கிறோம்.

அதிபர் திரு.மெர்ஸ் அவர்களின் இந்தப் பயணம் மிக முக்கியமான ஒரு காலகட்டத்தில் நடைபெறுகிறது. கடந்த ஆண்டு நமது உத்திசார் கூட்டாண்மையின் 25 ஆண்டுகளை நிறைவு செய்தோம்; இந்த ஆண்டு நமது தூதரக உறவுகளின் 75-வது ஆண்டைக் கொண்டாடுகிறோம். இந்த மைல்கற்கள் வெறும் கால அடையாளங்கள் மட்டுமல்ல, அவை நமது பகிரப்பட்ட லட்சியங்கள், பரஸ்பர நம்பிக்கை மற்றும் வலுவடைந்து வரும் ஒத்துழைப்பின் அடையாளங்களாகும்.

இந்தியா மற்றும் ஜெர்மனி போன்ற நாடுகளின் பொருளாதாரங்களுக்கு இடையேயான நெருக்கமான ஒத்துழைப்பு ஒட்டுமொத்த மனிதகுலத்திற்கும் மிக முக்கியமானது. வளர்ந்து வரும் வர்த்தகம் மற்றும் முதலீட்டு உறவுகள் நமது உத்திசார் கூட்டாண்மைக்கு புதிய ஆற்றலை வழங்கியுள்ளன. நமது இருதரப்பு வர்த்தகம் தற்போது வரலாற்றிலேயே இல்லாத வகையில் 5,000 கோடி அமெரிக்க டாலர்களைக்  கடந்து சாதனை படைத்துள்ளது.

இந்தியாவில் இரண்டாயிரத்திற்கும் மேற்பட்ட ஜெர்மனி நிறுவனங்கள் நீண்டகாலமாகச் செயல்பட்டு வருகின்றன. இது இந்தியாவின் மீது அவர்கள் கொண்டுள்ள அசைக்க முடியாத நம்பிக்கையையும், இங்குள்ள மகத்தான வாய்ப்புகளையும் பிரதிபலிக்கிறது. இன்று காலை நடைபெற்ற 'இந்தியா - ஜெர்மனி தலைமை செயல் அலுவலர்கள் கலந்துரையாடல் நிகழ்வில் இது தெளிவாகத் தெரிந்தது.

தொழில்நுட்ப ஒத்துழைப்பைப் பொறுத்தவரை, இரு நாடுகளுக்கும் இடையே அது ஆண்டுக்கு ஆண்டு வலுவடைந்து வருகிறது. புதுப்பிக்கத்தக்க எரிசக்தித் துறையில் இரு நாடுகளும் ஒரே மாதிரியான முன்னுரிமைகளைக் கொண்டுள்ளன. இந்த ஒத்துழைப்பை மேம்படுத்த, 'இந்தியா - ஜெர்மனி சிறப்பு மையத்தை' நிறுவ நாங்கள் முடிவு செய்துள்ளோம். இது அறிவு, தொழில்நுட்பம் மற்றும் கண்டுபிடிப்புகளுக்கான பகிரப்பட்ட தளமாக விளங்கும்.

காலநிலை மாற்றம், எரிசக்தி மற்றும் நகர மேம்பாடு போன்ற துறைகளில் நாம் இணைந்து புதிய திட்டங்களை முன்னெடுத்து வருகிறோம். குறிப்பாக, எதிர்கால எரிசக்தியாகக் கருதப்படும் பசுமை ஹைட்ரஜன்  தொடர்பான புதிய மெகா திட்டம் இரு நாட்டு நிறுவனங்களையும் உள்ளடக்கியது; இது ஒரு மிகப்பெரிய மாற்றத்தை  ஏற்படுத்தும் என்பதில் சந்தேகமில்லை.

பாதுகாப்பான மற்றும் நம்பகமான உலகளாவிய விநியோகச் சங்கிலிகளை  உருவாக்க இந்தியா மற்றும் ஜெர்மனி இணைந்து பணியாற்றி வருகின்றன. இது தொடர்பாக இன்று கையெழுத்தாகியுள்ள புரிந்துணர்வு ஒப்பந்தங்கள் நமது ஒத்துழைப்பிற்குப் புதிய வேகத்தையும் வலிமையையும் வழங்கும். பாதுகாப்பு மற்றும் பாதுகாப்புத் துறையில் வளர்ந்து வரும் ஒத்துழைப்பு, இரு நாடுகளுக்கும் இடையே உள்ள பரஸ்பர நம்பிக்கையையும், பகிரப்பட்ட தொலைநோக்குப் பார்வையையும் பிரதிபலிக்கிறது. பாதுகாப்பு உபகரணங்கள் தொடர்பான வர்த்தக நடைமுறைகளை எளிதாக்கியதற்காக அதிபர் திரு. மெர்ஸ் அவர்களுக்கு எனது மனமார்ந்த நன்றியைத் தெரிவித்துக் கொள்கிறேன். இதன் மூலம், பாதுகாப்புத் தளவாடங்களை இரு நாடுகளும் இணைந்து தயாரிப்பதற்கான புதிய வாய்ப்புகள் உருவாகும்.

இந்தியா மற்றும் ஜெர்மனி இடையே ஆழமான வரலாற்றுச் சிறப்புமிக்க மக்கள் உறவுகள் உள்ளன. ரவீந்திரநாத் தாகூரின் படைப்புகள் ஜெர்மனியின் அறிவுசார் உலகிற்குப் புதிய பார்வையை வழங்கின; சுவாமி விவேகானந்தரின் தத்துவங்கள் ஐரோப்பா முழுவதையும் ஈர்த்தன. மேலும், மேடம் காமா முதன்முதலில் ஜெர்மனியில் இந்திய சுதந்திரக் கொடியை ஏற்றி, நமது சுதந்திர வேட்கையை உலகிற்கு உணர்த்தினார். இந்த வரலாற்றுத் தொடர்புகளை இன்று நவீனக் கூட்டாண்மையாக நாம் மாற்றி வருகிறோம்.

குறிப்பாக, இரு நாடுகளுக்கும் இடையே தொழிலாளர்களின் இடப்பெயர்வு  மற்றும் திறன் மேம்பாட்டிற்கு அதிக முக்கியத்துவம் அளிக்கப்பட்டுள்ளது. இந்தியாவின் திறமையான இளைஞர்கள் ஜெர்மனியின் பொருளாதார வளர்ச்சிக்கு மிகச்சிறந்த பங்களிப்பை வழங்கி வருகின்றனர். இன்று வெளியிடப்பட்ட 'உலகளாவிய திறன் கூட்டாண்மை' குறித்த பிரகடனம், குறிப்பாக சுகாதாரத் துறை சார்ந்த பணியாளர்களின் வேலைவாய்ப்பிற்கும் அவர்களின் இடப்பெயர்விற்கும் பெரும் வசதியாக அமையும். மேலும், விளையாட்டுத் துறையிலும் ஒத்துழைப்பை அதிகரிக்கத் திட்டமிட்டுள்ளோம்; இது இரு நாட்டு இளைஞர்களையும் ஒன்றிணைக்கும் ஒரு சிறந்த பாலமாக அமையும்.

உயர்கல்வித் துறை தொடர்பாக இன்று வெளியிடப்பட்டுள்ள விரிவான செயல்திட்டம் இரு நாடுகளுக்கும் இடையேயான கல்வி ஒத்துழைப்பிற்குப் புதிய திசையைக் காட்டும். இந்தியாவிலேயே தங்களது கிளை வளாகங்களைத்  திறக்குமாறு ஜெர்மனி பல்கலைக்கழகங்களுக்கு நான் அழைப்பு விடுக்கிறேன். மேலும், இந்தியக் குடிமக்களுக்கு 'விசா இல்லாத போக்குவரத்து' வசதியை அறிவித்ததற்காக அதிபர் திரு. மெர்ஸ் அவர்களுக்கு எனது நன்றியைத் தெரிவித்துக் கொள்கிறேன். இந்த நடவடிக்கை இரு நாட்டு மக்களுக்கும் இடையிலான தொடர்பை மேலும் வலுப்படுத்தும்.

குஜராத் மாநிலம் லோத்தலில் உருவாக்கப்பட்டு வரும் தேசிய கடல்சார் பாரம்பரிய வளாகத்தில், ஜெர்மனி கடல்சார் அருங்காட்சியகம் இணைவது எனக்கு மிகுந்த மகிழ்ச்சி அளிக்கிறது. இது இரு நாடுகளின் கடல்சார் வரலாறுகளை இணைக்கும் ஒரு வரலாற்றுச் சிறப்புமிக்க நடவடிக்கையாகும். அதேபோல், பாரம்பரிய மருத்துவத் துறையில் குஜராத் ஆயுர்வேதப் பல்கலைக்கழகம் ஜெர்மனியுடன் கொண்டுள்ள நெருக்கமான ஒத்துழைப்பு, இன்று கையெழுத்தாகியுள்ள புரிந்துணர்வு ஒப்பந்தம் மூலம் மேலும் பலப்படும்.

இந்தியா மற்றும் ஜெர்மனி ஆகிய இரு நாடுகளும் உலக அரங்கில் எப்போதும் தோளோடு தோள் நின்று செயல்படுகின்றன. கானா, கேமரூன் மற்றும் மலாவி போன்ற நாடுகளில் நாம் இணைந்து செயல்படுத்தி வரும் முத்தரப்பு மேம்பாட்டுத் திட்டங்கள், உலகிற்கே ஒரு சிறந்த முன்மாதிரியாகத் திகழ்கின்றன. தெற்குலக நாடுகளின்  வளர்ச்சிக்கு ஆதரவாக நாம் தொடர்ந்து இணைந்து பணியாற்றுவோம்.

இந்தோ-பசிபிக் பிராந்தியம் இந்தியா மற்றும் ஜெர்மனி ஆகிய இரு நாடுகளுக்கும் மிக முக்கியமான முன்னுரிமைப் பகுதியாகும். இப்பிராந்தியத்தில் நமது ஒத்துழைப்பை மேம்படுத்துவதற்காக ஒரு 'ஆலோசனை வழிமுறையை' தொடங்க உள்ளோம். இன்று நடைபெற்ற பேச்சுவார்த்தையில் உக்ரைன் மற்றும் காசா உள்ளிட்ட பல்வேறு உலகளாவிய மற்றும் பிராந்திய விவகாரங்கள் குறித்து நாங்கள் விரிவாக விவாதித்தோம். அனைத்துப் பிரச்சினைகளுக்கும் விவாதங்கள் மூலமே அமைதியான முறையில் தீர்வு காணப்பட வேண்டும் என்பதில் இந்தியா உறுதியாக உள்ளதுடன், அதற்கான அனைத்து முயற்சிகளையும் தொடர்ந்து ஆதரிக்கும்.

பயங்கரவாதம் என்பது ஒட்டுமொத்த மனிதகுலத்திற்கும் விடுக்கப்பட்டுள்ள ஒரு கடுமையான அச்சுறுத்தல் என்பதை இரு நாடுகளும் ஒப்புக்கொள்கின்றன. இதற்கு எதிராக இந்தியா மற்றும் ஜெர்மனி முழு உறுதியுடன் இணைந்து போராடும். மேலும், உலகளாவிய சவால்களை எதிர்கொள்ள சர்வதேச நிறுவனங்களில் சீர்திருத்தங்கள் மேற்கொள்வது அவசியம் என்பதில் நாங்கள் உடன்படுகிறோம். ஐநா பாதுகாப்பு சபையை சீரமைக்க ஜி4 குழுவின் மூலம் நாம் எடுத்து வரும் கூட்டு முயற்சிகள் நமது பகிரப்பட்ட நம்பிக்கைக்குச் சான்றாகும்.

மேதகு அதிபர் அவர்களே, 140 கோடி இந்தியர்களின் சார்பில் உங்களை மீண்டும் ஒருமுறை இந்தியாவிற்கு வரவேற்கிறேன். இன்றைய ஆலோசனைகள் இந்தியா - ஜெர்மனி கூட்டாண்மைக்குப் புதிய ஆற்றலையும் தெளிவான திசையையும் வழங்கும் என்று நான் நம்புகிறேன். உங்கள் பயணம், தனிப்பட்ட ஆதரவு மற்றும் இந்தியாவுடனான உங்களது நட்பிற்கு எனது நன்றியைத் தெரிவித்துக் கொள்கிறேன்.

நன்றி.

பொறுப்புத் துறப்பு: இது பிரதமரின் உரையின் தோராயமான மொழிபெயர்ப்பாகும். அவரது அசல் உரை இந்தி மொழியில் நிகழ்த்தப்பட்டது.

***

AD/VK/PD