بھارت کے انسانی حقوق کے قومی کمیشن(این ایچ آر سی)نے21 ریاستوں اور این سی ٹی دہلی سے کہا ہے کہ وہ ملک میں گرمی کی شدید لہروں کے دوران کمزورطبقے کے تحفظ کے لیے پیشگی کارروائی کریں اور امدادی اقدامات نافذ کریں ۔  ان ریاستوں میں آندھرا پردیش ، آسام ، بہار ، چھتیس گڑھ ، گجرات ، ہریانہ ، ہماچل پردیش ، جھارکھنڈ ، کرناٹک ، کیرالہ ، مدھیہ پردیش ، مہاراشٹر ، اڈیشہ ، پنجاب ، راجستھان ، سکم ، تمل ناڈو ، تلنگانہ ، تریپورہ ، اتر پردیش اور مغربی بنگال شامل ہیں ۔

کمیشن نے یہ مشاہدہ کیا ہے کہ گرمی کی لہروں کی تعداد ، مدت اور شدت میں اضافہ ، مناسب پناہ گاہ اور وسائل کی کمی کی وجہ سے پسماندہ ، معاشی طور پر کمزور طبقات ، بیرونی کارکنوں اور بے گھر افراد کو غیر متناسب طور پر متاثر کرتا ہے ۔  بزرگ ، بچے اور نوزائیدہ بچے خاص طور پر شدید گرمی  میں  اس کے اثرات کے شکار ہوتے ہیں ۔  مزیدیہ کہ گرمی کی لہریں معاش کے   ختم  ہوجانے اور آگ لگنے کے حادثات کے بڑھتے ہوئے خطرے کا باعث بن سکتی ہیں۔

لہٰذاکمیشن نے مذکورہ ریاستوں اور مرکز کے زیر انتظام علاقے دہلی کے چیف سکریٹریوں کو لکھے گئے خط میں مربوط اور جامع اقدامات کی فوری ضرورت پر زور دیا ہے ۔  نیشنل کرائم ریکارڈ بیورو (این سی آر بی) کے اعداد و شمارکو اجاگر کرتے ہوئے کہا ہے کہ 23-2019 کے درمیان ہندوستان میں گرمی یا دھوپ کی وجہ سے 3712 افراد کی موت ہوئی ہے ، کمیشن نے ان پر زور دیا ہے کہ وہ گرمی کی شدید لہروں کے اثرات کو کم کرنے اور ہلاکتوں کو روکنے کے لئے نیشنل ڈیزاسٹر مینجمنٹ اتھارٹی(این ڈی ایم اے)کے ذریعہ جاری کردہ اپنے موجودہ معیاری آپریٹنگ طریقہ کار یا رہنما خطوط کے مطابق امدادی اقدامات کے ہموار نفاذ کی منصوبہ بندی اور سہولت فراہم کریں ۔

کمیشن نے اس سلسلے میں ریاستی/مرکز کے زیر انتظام علاقوں کی سطح پر اضلاع سے مربوط کارروائی کی رپورٹ طلب کی ہے ۔

***

 ( ش ح ۔ ش م۔اش ق)

U. No. 6392