পেত্রোলিয়ম অমসুং নেচরেল গ্যাসকী ইকাইখুম্নরবা মন্ত্রী শ্রী হরদীপ সিংহ পুরি এপ্রিল ৯ গী নুমীৎয়ুংবা মতমদা নুমিৎ নিনিগী ওফিসিএল খোঙচৎ অমদা দোহাদা য়ৌখি। নুমিদাংৱাইরমদা, মহাক্না কতারগী ইনর্জী এফিয়র্সকী মিনিস্তর ওফ স্তেত, অমসুং কতার ইনর্জীগী প্রসিদেন্ত অমসুং সি.ই.ও., ঐচ.ই. শ্রী সাদ শেরিদা অল-কাবীগা উনখি।

ইকাইখুম্নরবা মন্ত্রীনা ভারতকী ইকাইখুম্নরবা প্রধান মন্ত্রী শ্রী নরেন্দ্র মোদীগী মহুৎ শিন্দুনা কতারগী হিজ হাইনেস দি আমির শেখ তামিম বিন হামাদ অল থানি অমসুং কতারগী প্রধান মন্ত্রী অমসুং ফোরেন মিনিস্তর ঐচ.ই. শেখ মোহম্মদ বিন আব্দুল রহমান অল থানিবু তরাম্না ওকপগী ৱাহৈ অমসুং শৌগৎপগী পাউজেল পীখি।

মহাক্না মুক্নবা হৌরকখিবা মতমদা মার্চ ২০২৬ তা প্রধান মন্ত্রী মোদী অমসুং হিজ হাইনেস দি আমিরগী মরক্তা তেলিফোন্দা শানখিবা ৱারী-ৱাতায় অনি অদু নীংশিংখি, মসিদা লুচিংবা অনিমক্না ৱারী-ৱাতায় শানদুনা অমসুং দিপ্লোমেসীগী খুত্থাংদা লমদম অসিদা ইং-তপ্পা অমসুং তংদু লৈতাবা ফীভম অমুক হন্না পুরকপগী তঙাইফদবা অদু ফোংদোকখি। প্রধান মন্ত্রী মোদীনা কতারনা ভারতকী মীয়ামদা পীবীবা ঙাক্লৌ অমসুং মতেংগীদমক হিজ হাইনেসপু থাগৎপা ফোংদোকখি।

মন্ত্রী অনিমক্না লৈবাক অনিগী মরক্তা লৈবা স্ত্রেতেজিক ওইবা মরীশিংগী, অৱাংবা থাক্তা চৎমিন্নবা, লল্লোন-ইতিক, ইনভেস্তমেন্ত, ইনর্জী, নাৎ অমসুং মীগা মীগগী মরক্তা লৈনবা মরী য়াওনা হীরম পুম্নমক খন্ন-নৈনখি। মখোয়না লমদম অসিদা ইং-তপ্পা অমসুং তংদু লৈতাবা ফীভম থুনা হল্লক্নবা অমসুং ভারত অমসুং কতারগী মরক্তা লৈবা মরী অসি হেন্না মপাঙ্গল কনখৎহন্নবা থাজবা ফোঙদোক্নখি।

হিজ এক্সেলেন্সী মিনিস্তর সাদ শেরিদা অল-কাবীনা থাজনিংঙাই ওইবা ইনর্জী সপ্লাইয়র অমা ওইনা লৈগনি হায়না কতার স্তেতকী ফিরেপ অদু অমুক হন্না থমখি অমসুং ভারতকা লোয়ননা ইনর্জীগী মরী অমসুং খুৎশম্ননা চৎমিন্নবগী থৌরাং মখা চত্থনবা অমসুং মপাঙ্গল কনখৎহন্নবা হোৎনগনি হায়খি।

মন্ত্রী অনিমক্না এপ্রিল ৮ দা য়ানখিবা চয়োল অনিগী লান-লেপ্পা অদুসু তরাম্না ওকখি, অমসুং মালেমগী ইনর্জী সপ্লাইদা লৈরিবা অয়েৎ-অপন অসি থুনা লোইশিন্নবা অমসুং হান্নগী ফীভমদা হল্লকপগী মরু ওইবা অদু ফোংদোক্নখি। হীরমসিদা, মখোয়না মালেমগী সপ্লাই চেন লেঙদনা থম্ননবা জহাজ চৎথোক-চৎশিনগী মনিংতম্বা অমসুং মালেমগী লল্লোন-ইতিক্কী ঈচেলদা অপনবা লৈহন্দবগী তঙাইফদবা অদুদা মীৎয়েং চঙখি।

ইকাইখুম্নরবা মন্ত্রীনা কতারগী ইনর্জী এফিয়র্সকী এম.ও.এস. ঐচ.ই. মিস্তর কাবীবু তরাম্না ওকপিবগীদমক থাগৎপা ফোঙদোকখি। মন্ত্রী অনিমক্না লাক্কদবা চয়োলশিংদা চাং নাইনা পাউ ফাওননবা য়ানখি।

***