পরম পূজ্য জগদগুরু শ্রী শ্রী শ্রী দা. নির্মলানন্দনাথ মহাস্বামীজী, হান্নগী প্রধান মন্ত্রী ইকাইখুম্নজরবা ঐচ.দি. দেবে গৌরা জী, স্তেত অসিগী গভর্নর শ্রী থাবর চান্দ গেহলোত জী, পরম পূজ্য জগদগুরু স্বামী পরমাত্মানন্দ সরস্বতী জী, কেন্দ্রদা লৈবা ঐহাক্কী মরুপ ঐচ.দি. কুমারস্বামী জী, শোভা করন্দলাজে জী, কর্নাতকাগী ওপোজিসন  লুচিংবা আর. অশোকা জী, স্তেত মিনিস্তর এন. চেলুবারায়স্বামী জী, লাাইগী মশক ওইরবা লম্বোইবা পুম্নমক, অতৈ শকনাইরবা মীথুংশিং অমসুং মফম অসিদা মশিং য়াম্না পুনবীরিবা ইচিল-ইনাও পুম্নমক।

মরূপশিং,

ঙসি ঐহাক্কী থম্মোয় অসি ৱাহৈনা ফোংদোকপা ঙম্লরোইদবা ইহুল অমনা থল্লে। শ্রী কাল ভৈরব মন্দিরদা দর্শন অমসুং খুরুম্বা ফংজবা, শ্রী গুরু ভৈরবৈক্য মন্দির অসি শঙ্গাবগী থৌরম ইমিৎমক্না উবা ফংজবা, পুৱারী ওইরবা জ্বালা পীথতা মতম ঙাইহাক লেনবা, লাইনীংগী অৱাংবা থাক য়ৌরবা লম্বোইবশিংগা লোয়নবা ফংজবা অমসুং হৌজিক্না মফম অসিদা পুনবীরিবা মীয়াম অসি উবা—অসিগুম্বাশিং অসি ঐহাক্কা লোয়ননা লেঙদনা লৈহৌরগনি। অদোমগী মরক্তা তিনবগী খুদোংচাবা ফংজবা অসি ঐহাক্কী লাইবক ফবনি হায়না লৌই। থৌরম অসিদা ময়াম পুম্নমক্কী মফমদা নুংঙাইবা ফোংদোকচরি।

মরূপশিং,

কর্নাতকাদা লাকপা অসি ঐহাক্কী ওইনা মতম পুম্নমক্তা অপেনবা অমা ওই। মফম অসিদা লাকপা খুদিং ঐঙোন্দা অনৌবা ইহুল পোকই। অদুবু ঙসি মান্দ্যা দিস্ত্রিক্তকী সাক্কারে নাগারাদা চৎপা অসি মরম কয়াগীদমক মরু ওই। লমদম অসি চুগী মহাওগীদমক মমিং চৎলি, অমসুং মসিগা মান্নবা মহাও অসি মফম অসিগী মীয়ামগী ৱাহৈ-ৱাতাশিংদা উবা ফংই। মখোয়গী মীনুংশি অমসুং তরাম্না ওকপগী মওংনা থম্মোয় পেনহল্লি। ঐহাক্না পুম্নমক্তা হায়না লৈ, কর্নাতকা অসি ৱাংউলোন অমসুং তেক্নোলোজী অনিমক্তা ইনাক খুল্লি। হায়বদি, ৱাংউলোনগী অরুবা ৱাখল্লোনশিং অমসুং তেক্নোলোজীগী পাঙ্গল অনিমক মফম অসিদা লৈ। শ্রী আদি চুঞ্চনগিরি মহাসমস্থান মথগুম্বা লাইনীংগী মফমশিং অসি লমদম অসিগী অচৌবা খুদোলনি। ইন্সতিত্যুসন অসিনা ৱাংউলোন, লাইনীংলোন অমসুং লীচৎ-শাজৎকী ৱাফমশিংগী খুত্থাংদা খুন্নাইবু লম্বী তাক্লি।

মরূপশিং,

ভারত অসি চহি লিশিং কয়াগী মমাঙদগী হিংদুনা লাক্লবা খুন্থোক্লোন অমনি। মালেম অসিদা অসিগুম্বা মতম কুইরবা চৎনবী মখা তানা চত্থরকপগী খুদম অসি য়াম্না তাঙনা থোকই। ঐখোয়না শ্রী আদি চুঞ্চনগিরি মহাসমস্থান মথ অসি উবা মতমদা, মসিগী মতম কুইনা চত্থরকপগী হিংলিবা মওং অদু উবা ফংই। শেংলবা মথ অসিগী পুৱারী অসি চহি লিশিং অনি রোম শুরে। মসিগী গুরুগী চৎনবী, লাইনীংগী ৱাংউলোন অমসুং থৌগলগী চৎনবীনা মীরোল কয়া লমদম অসিবু হেন্না ইনাক খুনহল্লি। চৎনবী অসিদা জগদগুরু শ্রী শ্রী শ্রী দা. বালগঙ্গাধরনাথ মহাস্বামীজীগুম্বা অথোইবা লম্বোইবশিং থোক্লক্তুনা পারী পুরীগী লন অসিবু অনৌবা থাক অমদা পুখৎখি। ঙসি জগদগুরু শ্রী শ্রী শ্রী দা. নির্মলানন্দনাথ মহাস্বামীজীনা অনৌবা পাঙ্গল, খোঙজেল অমসুং কত্থোকপগা লোয়ননা পুম্নমক পুদুনা ইচেল অসিবু মাঙলোমদা পুখৎলি।

মরূপশিং,

ঐখোয়গী খুন্নাইদা মতম মতমগী মতুং ইন্না অসিগুম্বা অথোইবা মীশকশিং লাকখি, মখোয় অসি লাইনীংগী লম্বী তাকপক্তা নত্তে। মখোয় মীয়ামগী মরক্তা হিংখি, মখোয়গী নুংঙাইবা অমসুং অৱাবা খঙখি, মখোয়না থেংনখিবা শিংনবশিং ফাওখি অমসুং অৱা-না অমসুং অয়েৎ-অপন্দগী নান্থোক্নবা লম্বী খুন্নাইদা উৎখি। জগদগুরু শ্রী শ্রী শ্রী দা. বালগঙ্গাধরনাথ মহাস্বামীজী অসি অসিগুম্বা লাইগী মগুন চেনবা মীশক অমনি। মহাক হৌজিক ঐখোয়গী ইরক্তা লৈত্রে, অদুবু মহাক মফম অসিদা লৈরি। মহাক্না মীয়ামগী পুন্সি ফগৎহন্নবা থাক কয়াদা থবক তৌখি। মহাক অচেৎপা লাইনীংগী মতিক ময়াই চেল্লম্মি, অদুবু মহাক্কী পুন্সি অসি ধ্যান তৌবখক্তদা লোইশিনখিদে। খুঙ্গংগী লমদমগী লাকপা ওইবনা, মহাক্না খুঙ্গংগী নহারোলশিংগী মঙলান খঙখি, মীচম মীয়াম্না থেংনরিবা শীংনবশিং খঙখি। মরম অদুনা, মহাক্কী মফমদদি থৌগল হায়বসি খুন্নাইদগী লাপ্না লৈবদু নত্তে, খুন্নাইগী থৌদাং পুদুনা চৎপনা ওইখি।

মরূপশিং,

মহাস্বামীজীনা মহৈ-মশিংগী লমদা ইন্সতিত্যুসন চা কয়া লিংখৎখি, মফম অদুদা প্রাইমারী থাক্তগী হৌরগা মেদিকেল অমসুং ইঞ্জিনীয়রিংগুম্বা প্রোফেসনেল কোর্স ফাওবগী মহৈ-মশিং পীখি। মসিগী খ্বাইদগী চাউবা কান্নবা অসি লায়রবা অমসুং খুঙ্গংগী ইমুংদগী লাকপা অঙাংশিংনা ফংখি। হকশেলগী লমদা মহাক্কী মঙলান অসি মান্নবা মওংদা অহোংবা পুরকপনি। মহাক্না হকশেলগী ইন্সতিত্যুসনশিং লিংখৎখি, মফম অদুদা ঙসি ফাওবা থৌগলগী ইথিলগা লোয়ননা থবক তৌরি। মতিং লৈবা হকশেলগী খুদোংচাবা অসি মী খরগী অখন্নবা মঙম ওইহন্দনা মীচম খুদিংমক্তা য়ৌহনগদবনি হায়না মহাক্না থাজখি।

মরূপশিং,

ঙসি ঐখোয়গী লৈঙাকসু মান্নবা মঙলান অসিগা লোয়ননা থবক তৌরি। আয়ুষ্মান ভারত য়োজনাগী মখাদা, লায়রবা মীওই করোর কয়ানা লায়েংশঙশিংদা লেম্না লায়েংবা ফংখ্রে। ঐখোয়না স্কীম অসি চহি ৭০ গী মথক্কী সেনিয়র সিতিজন পুম্নমক্তা ফংহনখ্রে, মরমদি মখোয়না ইকাইখুম্নবগা লোয়ননা হেন্না ফবা হকশেলগী খুদোংচাবশিং ফংহন্নবনি।

মরূপশিং,

ঙসি শ্রী গুরু ভৈরবৈক্য মন্দির অসিদা লৈবা অমসুং জগদগুরু শ্রী শ্রী শ্রী দা. বালগঙ্গাধরনাথ মহাস্বামীজীগী থৌজাল ফংজবা অসি ঐহাক্কীদমক লাইবক ফবনি। মহাস্বামীজী অসি মীনুংশি চাউবগী মশকনি হায়বা ঐখোয় পুম্নমক খঙই। মহাক্কী মীনুংশি চাউবা অসি মীওইবদা খক নত্তনা, থৱায় পানবা পুম্নমক্তা শন্দোকখি। ৱাহোং ঙাক-শেন্নবা মহাক্না হৌদোকখিবা খুন্নাইগী ইহৌ অসি মসিগী খুদম অমনি। অমসুং ঙসি স্বামীজীনা ঐহাক্কী মেমেন্তো ওইনা ৱাহোং অমা পীবীরকখি। মসি অকোয়বগী ফীভম ঙাক-শেনবখক নত্তে, মসি ঐখোয়গী নাৎকী ৱাখল্লোনগা মরী লৈনৈ, মরমদি ৱাহোং অসি ঐখোয়গী নেসনেল বর্দনি অমসুং মসি প্রভু সুব্রহ্মন্যগী শাদোংসু ওই। দিল্লীদা, ভারত লৈঙাক্না মীয়ামগী থৌজালদগী ঐহাক্না লৈনবা পীবীবা ওফিসিএল রেসিদেন্স অদুদা ৱাহোং কয়া লৈরি। অমসুং খরগদি ঐহাক্কী মরুপ ওইখ্রে। ৱাহোং অসি কয়াদা নিংথিজবগে অমসুং ইং-তপ্পগে হায়বদু ঐহাক্না হকথেংননা উরে।

মরূপশিং,

ঙসি জগদগুরু শ্রী শ্রী শ্রী দা. নির্মলানন্দনাথ মহাস্বামীজীনা মহাক্কী গুরুগী চৎনবী অসি মাঙলোমদা পুখৎলি। মহাক্কী গুরুনা তাকপীখিবা লম্বীদা চৎতুনা, মহাক্না মীয়ামগী পুন্সিদা অফবা অহোংবা পুরক্লি। মহাক্কী গুরুগী ইকাইখুম্নবা ওইনা শ্রী গুরু ভৈরবৈক্য মন্দির শাবা অসি বিল্দিং অমা শাবা খক নত্তে, মসি পুক্নিংদা ফাওবা ইহুল অমবু থবক্তা ওন্থোকপনি। তুংদা, মফম অসি থৌগল, হীরী কোনবা অমসুং পুক্নিং থৌগৎনফমগী মফম অমা ওইরক্কনি হায়না থাজৈ।

মরূপশিং,

শ্রী আদি চুঞ্চনগিরি মহাসমস্থান মথ অসি প্রিন্সিপল মাপন্দা থবক তৌরি- অন্ন, অক্ষর, আরোগ্য, আধ্যাত্ম, আশ্রয়, অরন্য, আকালু, অনুকম্পা, অমসুং অনুবন্ধ। ৱাখল্লোন অসিগা লোয়ননা, ঐহাক্না অদোমগী মাঙদা ঐখোয় পুম্নমক্না ফিরেপ লৌমিন্নবা য়াবা হীরম মাপন থমজগে। ঐহাক্না ময়ামগী মফমগী ৱাফম মাপন হায়জগে।

মরূপশিং,

মান্দ্যা অসিনা ঈশিংগী মরু ওইবা খঙই। লমদম অসি পুম্নমক মা কাবেরীগী থৌজালদগী চাউখৎলকপনি। মরম অদুনা, ঐহাক্কী অহানবা হায়জগদবা অসি ঐখোয় পুম্নমক ঈশিং করম্না কনগনি অমসুং ঈশিং করম্না হেন্না নীংথিনা শিন-লাংগনি হায়বগী ফিরেপ লৌমিন্নসি। ঐহাক্কী অনিশুবা হায়জগদবা অসি পাম্বী অমসুং মহৌশাগা মরী লৈনৈ। ‘এক পের মা কে নাম’ কেম্পেনগী মখাদা, মীওই করোর কয়ানা মখোয়গী মমাগী মমিংদা পাম্বী থাখ্রে। ঐখোয়সু ঐখোয়গী ইমাশিংগী ইকাইখুম্নবা ওইনা পাম্বী থাগদবনি অমসুং ইমা লৈবাকপু ঙাক-শেন্নবা ফিরেপ লৌগদবনি। ঐহাক্কী অহুমশুবা হায়জগদবা অসি লু-নানবগী মরমদনি। লাইনীং খুভম, মীয়াম পুনফম মফম, খুঙ্গং নত্রগা ওইরবসু, মফম খুদিংমক লুনা-নান্না লৈহন্নবা হোৎনবা অসি ঐখোয় পুম্নমক্কী থৌদাংনি, মসি ঐখোয়গী থবকনি। ঐহাক্কী মরিশুবা হায়জগদবা অসি স্বদেশী অমসুং মরোমদোম লেপচবগা মরী লৈনৈ। ঐখোয়না ভারতকী পোত্থোকশিং শীজিন্নগদবনি, ভারতকী পোত্থোক পুথোকপশিং অমসুং ইন্দস্ত্রীশিংবু মপাঙ্গল কনখৎহনগদবনি। ভোকেল ফোর লোকেলগী লাইৱাগা লোয়ননা হিংগদবনি। ঐহাক্কী মঙাশুবা হায়জগদবা অসি লৈবাক অসিগী উরিবা ফজবশিংগা মরী লৈনৈ। ঐখোয়গী লৈবাক অসি খঙগদবনি, লৈবাক অসিগী তোঙান-তোঙানবা মফমশিংদা চৎকদবনি, অমসুং দোমেস্তিক তুরিজমবু য়োকখৎগদবনি।

মরূপশিং,

মান্দ্যা অসি থবক শুবা লৌমীশিংগী লমদমনি। ঐহাক্কী তরুকশুবা হায়জগদবা অসি লৌমীশিংদা, মখোয়না কেমিকেল শীজিন্নদবা মহৌশাগী লৌউ-শিংউদা চঙশিনগদবনি। ঐহাক্কী তরেৎশুবা হায়জগদবা অসি অফবা চিঞ্জাক চাবগা মরী লৈনৈ। হৌজিক ইকাইখুম্নজরবা শ্রী দেবে গৌরা জী ঐখোয়গী মরক্তা লৈরি। মহাক ‘রাগী মুদ্দে’ মীয়ামদা পাম্নহনবগীদমক মমিং চৎলি। লমদম পুম্বা অসিনা রাগীগী মরু ওইবা খঙই। নহা মীরোলসু মখোয়গী চিঞ্জাক্কী মচলদা চনান হাপচিনগদবনি। ঐখোয়গী লৈবাক অসিদা মশা নোয়বা অসি অচৌবা শীংনবা অমা ওইরক্লে। মসিগা লান্থেংননবা, চিঞ্জাক্কী মচলদা থাউ চাবগী চাং অসি ১০% হন্থহন্নবা হোৎনৌ। ঐহাক্কী নিপালশুবা হায়জগদবা অসি য়োগ, শান্ন-খোৎনবা, অমসুং ফিৎনেসকা মরী লৈনৈ। ঐখোয় পুম্নমক্না মখোয়বু পুন্সিগী শরুক অমা ওইহনসি। ঐহাক্কী মপালশুবা হায়জগদবা অসি অদোম্না লেপ্তনা অদোমগী থবকশিংগী খুত্থাংদা খুদম ওইনা উৎলিবা থৌগলগী ইথিলগা মরী লৈনৈ।

মরূপশিং,

অৱাবা নংলবা মীওইশিংগী থৌগল তৌবনা খুন্নাইবু মপাঙ্গল কনখৎহনগনি, মসি অদোমগী পুন্সিদা অচৌবা পান্দম অমা শম্নহনগনি। ঐখোয় পুম্নমক অচুম্বা মওংদা অমসুং অচেৎপা ফিরেপকা লোয়ননা থমজরিবা ৱাফম মাপন অসিদা মাঙলোমদা চংশিল্লবদি, ঐখোয়না চাউখৎলবা কর্নাতকা অমসুং চাউখৎলবা ভারত অমগী মায়কৈদা খোঙজেল য়াংনা চংশিনবা য়াই। অমুক্কা হন্না, থৌরম অসিদা ময়াম পুম্নমক্কী মফমদা নুংঙাইবা ফোংদোকচরি। ঐহাক্না জগদগুরু শ্রী শ্রী শ্রী দা. নির্মলানন্দনাথ মহাস্বামীজী অমসুং শ্রী আদি চুঞ্চনগিরি মহাসমস্থান মথপু থাগৎপা ফোংদোকচরি, মরমদি শেংলবা থৌরম অসিদা, শেংলবা লমদম অসিদা, তপস্যগী লমদম অসিদা, অদোম্না ঐহাকপু কৌবিরকখি, অদোমগা লোয়ননা মতম খরা লেনমিন্নবগী খুদোংচাবা পীবিরকখি। ঐহাক্না ময়াম পুম্নমকপু থম্মোয়দগী থাগৎচরি, পুম্নমকপু থাগৎচরি। নুংঙাইবা ফোংদোকচরি। থাগৎচরি।

দিসক্লেমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি। অশেঙবা ৱারোলদি হিন্দীদা পীখিবনি।

***