மேன்மைதங்கிய பூடான் மன்னர் அவர்களே,

மேன்மைதங்கிய நான்காம் மன்னர் அவர்களே,

ராஜ குடும்பத்தின்  கவுரவமிக்க உறுப்பினர்களே,

பூடான் நாட்டின் பிரதமர் அவர்களே,

மற்ற இதர முக்கியப் பிரமுகர்களே,

மற்றும் எனது பூடான் சகோதர சகோதரிகளே!

குஸுஸாங்போ லா! (வணக்கம்!)

பூடான் நாட்டிற்கும், பூடான் ராஜ குடும்பத்திற்கும் மற்றும் உலக அமைதியில் நம்பிக்கை கொண்ட அனைவருக்கும் இன்று மிக முக்கியமான நாளாகும்.

இந்தியா மற்றும் பூடான் ஆகிய நாடுகள் பல நூற்றாண்டுகளாக ஆழமான ஆன்மீக மற்றும் கலாச்சார பிணைப்பைப் பகிர்ந்து கொள்கின்றன. எனவே, இந்த முக்கியமான நிகழ்வில் பங்கேற்பது இந்தியாவின் மற்றும் எனது கடமையாகும்.

ஆனால் இன்று நான் மிகுந்த கனத்த இதயத்துடன் இங்கு வந்துள்ளேன். நேற்று மாலை தில்லியில் நடந்த அந்த பயங்கரமான சம்பவம் நம் அனைவரையும் ஆழ்ந்த மனவேதனையில் ஆழ்த்தியுள்ளது. இந்த இழப்பைச் சந்தித்த குடும்பங்களின் வேதனையை நான் உணர்கிறேன். துயரத்திலும் ஆதரவிலும் இந்த தேசம் அவர்களுடன் ஒற்றுமையாக நிற்கிறது.

நேற்று இரவு முழுவதும் இந்த வழக்கு தொடர்பான அனைத்து முகமைகள் மற்றும் முக்கிய அதிகாரிகளுடன் நான் தொடர்பில் இருந்தேன். ஆலோசனைகள் தொடர்ந்து நடைபெற்றன, தகவல்கள் அனைத்தும் சேகரிக்கப்பட்டு வருகின்றன. எங்கள் விசாரணை முகமைகள் இந்தச் சதியின் ஆழம் வரை சென்று உண்மையை வெளிக்கொண்டு வரும். இதற்குப் பின்னால் இருப்பவர்கள் எவரும் தப்ப முடியாது.

இதற்குப் பொறுப்பான அனைவரும் நீதியின் முன் நிறுத்தப்படுவார்கள்.

நண்பர்களே,

இன்று ஒருபுறம், குரு பத்மசம்பவரின் ஆசிகளுடன் உலக அமைதிப் பிரார்த்தனை விழாவிற்காக நாம் இங்கு கூடியிருக்கிறோம்; மறுபுறம், கவுதம புத்தரின் புனிதமான பிப்ரவா (Piprahwa) சின்னங்கள் இங்கே காட்சிப்படுத்தப்பட்டுள்ளன. இவற்றுடன் இணைந்து, மேன்மைதங்கிய நான்காம் மன்னரின் 70-வது பிறந்தநாளையும் நாம் கொண்டாடுகிறோம்.

இந்த நிகழ்வும், உங்கள் பலரின் கண்ணியமான முன்னிலையும் இந்தியா மற்றும் பூடான் இடையிலான வலுவான பிணைப்பைப் பிரதிபலிக்கிறது.

நண்பர்களே,

இந்தியாவில், நமது முன்னோர்கள் நமக்கு "வசுதைவ குடும்பகம்" என்று போதித்தார்கள், அதாவது இந்த உலகம் முழுவதும் ஒரே குடும்பம்.

"சர்வே பவந்து சுகின:" என்று நாம் கூறுகிறோம், அதாவது இந்த பூமியில் அனைவரும் மகிழ்ச்சியாக இருக்க வேண்டும் என்பதே அதன் பொருள்.

நாங்கள் கூறுகிறோம்-

த்யௌ: ஷாந்தி: (விண்ணில் அமைதி நிலவட்டும்)

அந்தரிக்ஷம் ஷாந்தி: (வெளியில் அமைதி நிலவட்டும்)

ப்ருதிவீ ஷாந்தி: (மண்ணில் அமைதி நிலவட்டும்)

ஆப: ஷாந்தி: (நீரில் அமைதி நிலவட்டும்)

ஓஷதய: ஷாந்தி: (மருத்துவ குணமுள்ள தாவரங்களில் அமைதி நிலவட்டும்)

அதாவது, அண்டம் முழுவதும், வானில், விண்வெளியில், பூமியில், நீரில், மருந்துகளில், தாவரங்களில் மற்றும் அனைத்து உயிரினங்களிடையேயும் அமைதி நிலவட்டும். இதே உணர்வுடன், இன்று பூடானில் நடைபெறும் உலக அமைதிப் பிரார்த்தனை விழாவில் இந்தியாவும் இணைந்துள்ளது.

இன்று, உலகெங்கிலும் உள்ள துறவிகள் உலக அமைதிக்காக ஒன்றிணைந்து பிரார்த்தனை செய்கிறார்கள். இதில் 140 கோடி இந்தியர்களின் பிரார்த்தனைகளும் அடங்கும்.

பலருக்குத் தெரியாமல் இருக்கலாம், ஆனால் எனது பிறந்த இடமான வட்நகர் நீண்ட காலமாக பௌத்த பாரம்பரியத்தின் புனித மையமாக இருந்து வருகிறது. எனது பணித்தலமான வாரணாசியும் பௌத்த வழிபாட்டின் மதிப்பிற்குரிய இடமாகும். அதனால்தான் இந்த விழாவின் ஒரு பகுதியாக இருப்பது எனக்குச் சிறப்பு வாய்ந்ததாக அமைகிறது. இந்த அமைதி விளக்கு பூடானின் ஒவ்வொரு வீட்டிலும் மற்றும் உலகம் முழுவதிலும் தனது ஒளியைப் பரப்ப வேண்டும் என்று நான் பிரார்த்திக்கிறேன்.

நண்பர்களே,

பூடானின் மேன்மைதங்கிய நான்காம் மன்னரின் வாழ்க்கை என்பது ஞானம், எளிமை, தைரியம் மற்றும் தேசத்திற்கான தன்னலமற்ற சேவை ஆகியவற்றின் சங்கமமாகும்.

அவர் தனது 16-வது வயதிலேயே ஒரு பெரிய பொறுப்பை ஏற்றுக்கொண்டார். அவர் தனது நாட்டிற்குத் தந்தைக்குரிய அன்பை வழங்கினார் மற்றும் ஒரு தொலைநோக்குப் பார்வையுடன் நாட்டை முன்னோக்கி வழிநடத்தினார். தனது 34 ஆண்டு கால ஆட்சியில், பூடானின் பாரம்பரியம் மற்றும் வளர்ச்சி ஆகிய இரண்டையும் அவர் முன்னெடுத்துச் சென்றார்.

பூடானில் ஜனநாயக அமைப்புகளை நிறுவுவதிலும், எல்லைப் பகுதிகளில் அமைதியை நிலைநாட்டுவதிலும் மன்னர் அவர்கள் தீர்க்கமான பங்காற்றினார்.

நீங்கள் அறிமுகப்படுத்திய "மொத்த நாட்டு மகிழ்ச்சி" என்ற கருத்து, இன்று உலகம் முழுவதும் வளர்ச்சியின் முக்கியமான அளவுகோலாக மாறியுள்ளது. தேசக் கட்டமைப்பு என்பது வெறும் மொத்த உள்நாட்டு உற்பத்தி மட்டுமல்ல, அது மனிதகுலத்தின் நல்வாழ்வைப் பற்றியது என்பதையும் நீங்கள் நிரூபித்துள்ளீர்கள்.

நண்பர்களே,

இந்தியா மற்றும் பூடான் இடையிலான நட்புறவை வலுப்படுத்துவதில் மன்னர் அவர்கள் முக்கியப் பங்காற்றியுள்ளார். அவர் அமைத்த அடித்தளத்தின் மீதுதான் இரு நாடுகளுக்கும் இடையிலான பிணைப்பு தொடர்ந்து வளர்ந்து வருகிறது.

அனைத்து இந்தியர்களின் சார்பாக, மேன்மைதங்கிய மன்னர் அவர்களுக்கு எனது மனமார்ந்த வாழ்த்துகளைத் தெரிவித்துக் கொள்கிறேன். அவர் நல்ல ஆரோக்கியத்துடனும் நீண்ட ஆயுளுடனும் வாழப் பிரார்த்திக்கிறேன்.

நண்பர்களே,

இந்தியா மற்றும் பூடான் நாடுகள் வெறும் எல்லைகளால் மட்டுமல்ல, கலாச்சாரங்களாலும் பிணைக்கப்பட்டுள்ளன. நமது உறவு என்பது பண்பாட்டு நெறிகள், உணர்வுகள், அமைதி மற்றும் முன்னேற்றம் ஆகியவற்றால் ஆனது.

2014-ல் நான் பிரதமராகப் பொறுப்பேற்ற போது, எனது முதல் வெளிநாட்டுப் பயணம் பூடானுக்கு அமைந்தது. இப்போதும் கூட, அந்த நினைவுகள் எனது இதயத்தைத் தொடுகின்றன. இந்தியா மற்றும் பூடான் இடையிலான நட்பு மிகுந்த ஆழமும் வலிமையும் கொண்டது. கடினமான காலங்களில் நாம் ஒருவருக்கொருவர் ஆதரவாக இருந்தோம், சவால்களை ஒன்றிணைந்து எதிர்கொண்டோம். இன்று, நாம் வளர்ச்சியை நோக்கியும் செழிப்பை நோக்கியும் முன்னேறும்போது, இந்தப் பிணைப்பு இன்னும் வலிமையாகத் தொடர்கிறது.

மேன்மைதங்கிய மன்னர் அவர்கள் பூடானைப் புதிய உயரத்திற்கு இட்டுச் செல்கிறார். இந்தியா மற்றும் பூடான் இடையிலான நம்பிக்கை மற்றும் வளர்ச்சிக்கான கூட்டாண்மை, ஒட்டுமொத்த பிராந்தியத்திற்கும் ஒரு முன்மாதிரியாகத் திகழ்கிறது.

நண்பர்களே,

இன்று நமது இரு நாடுகளும் வேகமாக முன்னேறி வரும் நிலையில், நமது எரிசக்தி கூட்டாண்மை இந்த வளர்ச்சியை மேலும் துரிதப்படுத்துகிறது. இந்தியா-பூடான் நீர்மின் கூட்டாண்மைக்கான அடித்தளமும் மேன்மைதங்கிய நான்காம் மன்னரின் தலைமையின் கீழ் தான் அமைக்கப்பட்டது.

மேன்மைதங்கிய நான்காம் மன்னர் மற்றும் மேன்மைதங்கிய ஐந்தாம் மன்னர் ஆகிய இருவரும் நிலையான வளர்ச்சி மற்றும் சுற்றுச்சூழலைப் பாதுகாத்தல் என்ற கருத்தை ஊக்குவித்துள்ளனர். இந்தத் தொலைநோக்குப் பார்வையால் தான், பூடான் உலகின் முதல் 'கார்பன்-நெகட்டிவ்'  நாடாக மாறியுள்ளது - இது ஒரு வியக்கத்தக்க சாதனையாகும். இன்று, தனிநபர் புதுப்பிக்கத்தக்க எரிசக்தி உற்பத்தியில் உலகின் முன்னணி நாடுகளுள் பூடானும் ஒன்றாகத் திகழ்கிறது.

நண்பர்களே,

பூடான் தற்போது தனது மின்சாரத்தில் 100 சதவீதத்தை புதுப்பிக்கத்தக்க எரிசக்தி மூலமாகவே உற்பத்தி செய்கிறது. இந்த முன்னேற்றத்தை இன்னும் முன்னெடுத்துச் செல்லும் வகையில், இன்று மற்றொரு முக்கிய நடவடிக்கை எடுக்கப்படுகிறது. 1,000 மெகாவாட்டிற்கும் அதிகமான திறன் கொண்ட புதிய நீர்மின் திட்டம் இன்று தொடங்கப்படுகிறது, இது பூடானின் நீர்மின் திறனை கிட்டத்தட்ட 40 சதவீதம் அதிகரிக்கும். அத்துடன், நீண்ட காலமாகத் தடைப்பட்டிருந்த மற்றொரு நீர்மின் திட்டப் பணிகளும் மீண்டும் தொடங்கப்படுகின்றன.

நமது கூட்டாண்மை வெறும் நீர்மின்சாரத்துடன் மட்டும் நின்றுவிடவில்லை. நாம் இப்போது சூரிய எரிசக்தியிலும் இணைந்து முக்கிய படிகளை எடுத்து வருகிறோம். இது தொடர்பான முக்கியமான ஒப்பந்தங்களும் இன்று மேற்கொள்ளப்பட்டுள்ளன.

நண்பர்களே,

இன்று, எரிசக்தி ஒத்துழைப்புடன் சேர்த்து, இந்தியா மற்றும் பூடான் இடையிலான இணைப்பை  மேம்படுத்துவதிலும் எங்களது கவனம் உள்ளது.

நாம் அனைவரும் அறிவோம்:

இணைப்பு வாய்ப்புகளை உருவாக்குகிறது  மற்றும் வாய்ப்புகள் செழிப்பை உருவாக்குகின்றன .

இந்த இலக்கை மனதில் கொண்டு, கெலிபு  மற்றும் சம்த்சே ஆகிய இடங்களை இந்தியாவின் விரிவான இரயில்வே வலையமைப்புடன் இணைக்க முடிவு எடுக்கப்பட்டுள்ளது. இந்தத் திட்டம் நிறைவடைந்தவுடன், பூடான் நாட்டுத் தொழில்துறையினருக்கும் விவசாயிகளுக்கும் இந்தியாவின் பெரிய சந்தைகளை எளிதில் அணுகும் வாய்ப்பு கிடைக்கும்.

நண்பர்களே,

ரயில் மற்றும் சாலை இணைப்புகளுடன் சேர்த்து, எல்லைக் கட்டமைப்பு வசதிகளிலும் நாம் வேகமாக முன்னேறி வருகிறோம்.

மேன்மைதங்கிய மன்னரின் மொத்த நாட்டு மகிழ்ச்சி'  என்ற தொலைநோக்குப் பார்வைக்கு இந்தியாவும் முழு ஆதரவை அளித்து வருகிறது. இன்று, நான் மற்றொரு முக்கியமான அறிவிப்பை வெளியிட விரும்புகிறேன். எதிர்காலத்தில், இங்கு வரும் பார்வையாளர்கள் மற்றும் முதலீட்டாளர்களுக்கு மேலும் வசதி அளிக்கும் வகையில், கெலிபு அருகே குடிமை சோதனைச் சாவடி ஒன்றை இந்தியா அமைக்கும்.

நண்பர்களே,

இந்தியா மற்றும் பூடானின் முன்னேற்றமும் செழிப்பும் நெருங்கிய தொடர்புடையவை. இந்த உணர்வின் அடிப்படையில், பூடானின் ஐந்தாண்டுத் திட்டத்திற்கு ஆதரவாக 10 ஆயிரம் கோடி ரூபாய் பங்களிப்பை கடந்த ஆண்டு இந்திய அரசு அறிவித்தது. இந்த நிதி சாலைகள் முதல் விவசாயம் வரை, நிதித்துறை முதல் சுகாதாரம் வரை அனைத்து துறைகளிலும் பயன்படுத்தப்பட்டு வருகிறது, இது பூடான் மக்களின் மேம்பாட்டுக்கு உதவுகிறது.

கடந்த காலங்களில், பூடான் மக்களுக்கு அத்தியாவசியப் பொருட்கள் தடையின்றி கிடைப்பதை உறுதி செய்ய இந்தியா பல நடவடிக்கைகளை எடுத்துள்ளது.

இப்போது, யுபிஐ பணப்பரிவர்த்தனை வசதி இங்கும் விரிவடைந்து வருகிறது. பூடான் குடிமக்கள் இந்தியா வரும்போது அவர்களுக்கும் யுபிஐ வசதி கிடைப்பதை உறுதி செய்ய நாங்கள் பணியாற்றி வருகிறோம்.

நண்பர்களே,

இந்தியா மற்றும் பூடான் இடையிலான வலுவான கூட்டாண்மையால் அதிகம் பயனடைபவர்களில் நமது இளைஞர்களும் அடங்குவர். தேசிய சேவை, தன்னார்வத் திட்டங்கள் மற்றும் புத்தாக்கம் ஆகியவற்றில் மேன்மைதங்கிய மன்னர் அவர்கள் சிறந்த பல முயற்சிகளை எடுத்துள்ளார். இளைஞர்களுக்கு அதிகாரம் அளிப்பதும், அவர்களைத் தொழில்நுட்ப ரீதியாகத் தயார் படுத்துவதும் பூடான் இளைஞர்களுக்குப் பெரும் ஊக்கமளிப்பதாக உள்ளது.

இந்தியா மற்றும் பூடான் இளைஞர்களிடையேயான ஒத்துழைப்பு கல்வி, புத்தாக்கம், திறன் மேம்பாடு, விளையாட்டு, விண்வெளி மற்றும் கலாச்சாரம் எனப் பல துறைகளில் விரிவடைந்து வருகிறது. இன்று, நமது இளைஞர்கள் இணைந்து ஒரு செயற்கைக்கோளைக் கூட உருவாக்கி வருகிறார்கள். இது நமது இரு நாடுகளுக்கும் பெருமைக்குரிய சாதனையாகும்.

நண்பர்களே,

இந்தியா - பூடான் நட்புறவின் மிகப்பெரிய தூண்களில் ஒன்று நமது பகிரப்பட்ட ஆன்மீக பாரம்பரியம் ஆகும். சரியாக இரண்டு மாதங்களுக்கு முன்பு, ராஜ்கிரில் அரச பூடான் அரச  கோயில் திறக்கப்பட்டது. இப்போது இந்த முயற்சி இந்தியாவின் பிற பகுதிகளுக்கும் விரிவடைந்து வருகிறது.

வாரணாசியில் ஒரு பூடான் கோயிலும், விருந்தினர் மாளிகையும் அமைக்க வேண்டும் என்று பூடான் மக்கள் தங்கள் விருப்பத்தை வெளிப்படுத்தியுள்ளனர். இதற்காகத் தேவையான நிலத்தை இந்திய அரசு வழங்கி வருகிறது. இந்தக் கோயில்கள் நமது இரு நாடுகளுக்கும் இடையே உள்ள கலாச்சாரப் பிணைப்பைத் தொடர்ந்து வலுப்படுத்தும்.

நண்பர்களே,

இந்தியா மற்றும் பூடான் ஆகிய இரு நாடுகளும் அமைதி, செழிப்பு மற்றும் பரஸ்பர வளர்ச்சியில் இணைந்து முன்னேற வேண்டும் என்று நான் பிரார்த்திக்கிறேன். கௌதம புத்தர் மற்றும் குரு ரின்போச்சியின் ஆசிகள் நமது இரு நாடுகளையும் வழிநடத்திப் பாதுகாக்கட்டும்.

உங்கள் அனைவருக்கும் எனது மனமார்ந்த நன்றிகள்.

நன்றி!!!

பொறுப்புத் துறப்பு: இது பிரதமரின் உரையின் தோராயமான மொழிபெயர்ப்பாகும். அசல் உரை இந்தியில் நிகழ்த்தப்பட்டது.

----

(Release ID: 2188710)

AD/VK/KR