సహజ వాయువు సరఫరా, పీఎన్‌జీ విస్తరణ కార్యక్రమాలు

డీ-పీఎన్‌జీ, సీఎన్‌జీ-రవాణాకు 100 శాతం సరఫరాతో వినియోగదారులకు ప్రాధాన్యమిస్తున్నారు.

పనిచేస్తున్న యూరియా ప్లాంట్లకు సరఫరా ఇప్పుడు వాటి గత 6 నెలల సగటు వినియోగంలో సుమారు 70-75 శాతం వద్ద స్థిరంగా ఉంది. అందుబాటులో ఉన్న నిల్వలు, షెడ్యూల్ చేసిన ఎల్ఎన్‌జీ కార్గో రాకను పరిగణనలోకి తీసుకుంటే... 06.04.2026 నుంచి అమలులోకి వచ్చేలా ఎరువుల ప్లాంట్‌లకు అందుబాటులో ఉండే మొత్తం గ్యాస్ సరఫరాను గత ఆరు నెలల సగటు వినియోగంలో సుమారు 90 శాతానికి పెంచుతున్నారు. 06.04.2026 నుంచి అమలులోకి వచ్చేలా సిటీ గ్యాస్ డిస్ట్రిబ్యూషన్ (సీజీడీ) నెట్‌వర్క్‌ల ద్వారా జరిగే సరఫరాలు సహా ఇతర పారిశ్రామిక, వాణిజ్య రంగాలకు గ్యాస్ సరఫరాను మరో 10 శాతం వరకు పెంచుతున్నారు.

వాణిజ్య ఎల్‌పీజీ లభ్యతకు సంబంధించిన ఆందోళనలను పరిష్కరించడం కోసం తమ భౌగోళిక ప్రాంతాలన్నింటిలో రెస్టారెంట్లు, హోటళ్లు, క్యాంటీన్ల వంటి వాణిజ్య సంస్థలకు పీఎన్‌జీ కనెక్షన్లకు ప్రాధాన్యమివ్వాలని సీజీడీ సంస్థలకు భారత ప్రభుత్వం సూచించింది.

ఐజీఎల్, ఎమ్‌జీఎల్, గెయిల్ గ్యాస్, బీపీసీఎల్ వంటి సీజీడీ కంపెనీలు గృహ, వాణిజ్య పీఎన్‌జీ కనెక్షన్లు తీసుకునే వారికి ప్రోత్సాహకాలను అందిస్తున్నాయి.

సీజీడీ నెట్‌వర్క్ విస్తరణకు అవసరమైన దరఖాస్తుల ఆమోదాన్ని వేగవంతం చేయాలని రాష్ట్రాలు, కేంద్రపాలిత ప్రాంతాల ప్రభుత్వాలను, కేంద్ర మంత్రిత్వ శాఖలను భారత ప్రభుత్వం కోరింది.

భారత ప్రభుత్వం 18.03.2026 తేదీ నాటి లేఖ ద్వారా ఎల్‌పీజీ నుంచి పీఎన్‌జీకి దీర్ఘకాలిక పరివర్తనలో సహాయపడే అన్ని రాష్ట్రాలు, కేంద్రపాలిత ప్రాంతాలకు వాణిజ్య ఎల్‌పీజీ కోటాలో అదనంగా 10 శాతం కేటాయింపును ప్రతిపాదించింది. పీఎన్‌జీ విస్తరణ సంస్కరణ చర్యల కింద 12 రాష్ట్రాలు అదనపు వాణిజ్య ఎల్‌పీజీ కేటాయింపును పొందుతున్నాయి. ఒక కేంద్రపాలిత ప్రాంత దరఖాస్తు పరిశీలనలో ఉంది.

సమీపంలో పైప్‌లైన్ మౌలిక సదుపాయాలు అందుబాటులో ఉన్న రెసిడెన్షియల్ పాఠశాలలు, కళాశాలలు, హాస్టళ్లు, కమ్యూనిటీ కిచెన్‌లు, అంగన్‌వాడీ కిచెన్‌లు మొదలైనవాటిని 5 రోజుల్లోగా పీఎన్‌జీతో అనుసంధానించడానికి అన్ని సీజీడీ సంస్థలు పూర్తిస్థాయి ప్రయత్నాలు చేయాలని తేదీ 23.03.2026 నాటి తన ఉత్తర్వుల ద్వారా పీఎన్‌జీఆర్‌బీ ఆదేశించింది.

సీజీడీ మౌలిక సదుపాయాలకు సంబంధించిన దరఖాస్తులను ప్రాధాన్య ప్రాతిపదికన ప్రాసెస్ చేసేందుకు, "తగ్గించిన కాలపరిమితులతో సీజీడీ మౌలిక సదుపాయాల కోసం వేగవంతమైన ఆమోద విధాన ప్రణాళిక"ను 3 నెలల పాటు ఒక ప్రత్యేక చర్యగా అమలు చేస్తున్నట్లు రహదారి రవాణా, జాతీయ రహదారుల మంత్రిత్వ శాఖ 24.03.2026 తేదీ నాటి లేఖ ద్వారా తెలిపింది.

భారత ప్రభుత్వం, 24.03.2026 తేదీ నాటి గెజిట్ ద్వారా, నిత్యావసర వస్తువుల చట్టం-1955 కింద సహజ వాయువు, పెట్రోలియం ఉత్పత్తుల పంపిణీ (పైప్‌లైన్‌లు, ఇతర సౌకర్యాల ఏర్పాటు, నిర్మాణం, నిర్వహణ, విస్తరణ ద్వారా) ఉత్తర్వులు-2026ను జారీ చేసింది. ఈ ఉత్తర్వులు దేశవ్యాప్తంగా పైప్‌లైన్‌లను వేయడానికి, విస్తరించడానికి ఒక క్రమబద్ధమైన, కాలపరిమితితో కూడిన విధానాన్ని అందిస్తాయి. ఇది అనుమతులు, భూమి లభ్యతలో జాప్యాలను పరిష్కరించి, నివాస ప్రాంతాలు సహా సహజ వాయువు మౌలిక సదుపాయాల వేగవంతమైన అభివృద్ధికి వీలు కల్పిస్తుంది. ఇది పీఎన్‌జీ నెట్‌వర్క్ వృద్ధిని వేగవంతం చేస్తుందని, మూరుమూల ప్రాంతాల కనెక్టివిటీని మెరుగుపరుస్తుందని, పరిశుద్ధ ఇంధనాలకు మారడానికి మద్దతునిస్తుందని, తద్వారా ఇంధన భద్రతను బలోపేతం చేయడంతో పాటు భారత గ్యాస్ ఆధారిత ఆర్థిక వ్యవస్థను ముందుకు నడిపిస్తుందని భావిస్తున్నారు.

రక్షణ మంత్రిత్వ శాఖ 27.03.2026 తేదీ నాటి లేఖ ద్వారా అన్ని నివాస ప్రాంతాలు, యూనిట్ లైన్ల రక్షణలో పీఎన్‌జీ మౌలిక సదుపాయాల ఏర్పాటును వేగవంతం చేటయడం లక్ష్యంగా 30 జూన్ 2026 వరకు అమలులో ఉండే ఒక స్వల్పకాలిక విధాన సవరణను జారీ చేసింది.

డీ-పీఎన్‌జీ కనెక్షన్‌లను వేగవంతం చేయాలని సీజీడి సంస్థలను పీఎన్‌జీఆర్‌బీ ఆదేశించింది. పీఎన్‌జీ విస్తరణలో వేగాన్ని కొనసాగించడానికి జాతీయ పీఎన్‌జీ డ్రైవ్ 2.0 (01.01.2026 నుంచి 31.03.2026 వరకు)ను తాజాగా 30.06.2026 వరకు పొడిగించారు.

2026 మార్చి నెల నుంచి సుమారు 3.6 లక్షల పీఎన్‌జీ కనెక్షన్‌ల గ్యాసిఫికేషన్ పూర్తయింది. కొత్త కనెక్షన్‌ల కోసం 3.9 లక్షలకు పైగా వినియోగదారులు నమోదు చేసుకున్నారు.

ముడి చమురు స్థితి, రిఫైనరీ కార్యకలాపాలు

తగినంత ముడి చమురు నిల్వలు అందుబాటులో ఉండటంతో, అన్ని రిఫైనరీలు పూర్తిస్థాయి సామర్థ్యంతో పనిచేస్తున్నాయి. దేశంలో తగినంత పెట్రోల్, డీజిల్ నిల్వలు కొనసాగుతున్నాయి.

దేశీయ వినియోగానికి మద్దతుగా రిఫైనరీల ద్వారా దేశీయ ఎల్‌పీజీ ఉత్పత్తిని పెంచారు.

రిటైల్ ఇంధన లభ్యత, ధర సంబంధిత చర్యలు

దేశవ్యాప్తంగా అన్ని రిటైల్ అవుట్‌లెట్‌లు యధావిధిగా పనిచేస్తున్నాయి.

మధ్యప్రాచ్య సంక్షోభం కారణంగా ముడి చమురు ధరలు అసాధారణంగా పెరిగాయి. ఈ ప్రభావం నుంచి వినియోగదారులను కాపాడటం లక్ష్యంగా భారత ప్రభుత్వం పెట్రోల్, డీజిల్‌పై లీటరుకు రూ. 10 చొప్పున ఎక్సైజ్ సుంకాలను తగ్గించడం ద్వారా ఈ భారాన్ని పాక్షికంగా భరించాలని నిర్ణయించింది.

దేశీయ మార్కెట్లో ఈ ఉత్పత్తుల లభ్యతను నిర్ధారించడానికి భారత ప్రభుత్వం డీజిల్‌పై లీటరుకు రూ. 21.5, ఏవియేషన్ టర్బైన్ ఫ్యూయల్ (ఏటీఎఫ్)పై లీటరుకు రూ. 29.5 ఎగుమతి సుంకాన్ని విధించింది.

పెట్రోల్, డీజిల్ సాధారణ చిల్లర ధరల్లో ఎలాంటి మార్పు లేదు.

వదంతులను నమ్మవద్దని ప్రభుత్వం మరోసారి సూచనలు జారీ చేసింది. వదంతులను అరికట్టేందుకు, పత్రికా సమావేశాల ద్వారా సరైన సమాచారాన్ని ప్రచారం చేయాలని రాష్ట్ర ప్రభుత్వాలను కోరింది.

కిరోసిన్ లభ్యత, పంపిణీ చర్యలు

అన్ని రాష్ట్రాలు, కేంద్రపాలిత ప్రాంతాలకు సాధారణ కేటాయింపులకు అదనంగా 48,000 కిలోలీటర్ల కిరోసిన్‌ను కేటాయించారు.

భారత ప్రభుత్వం 29.03.2026 తేదీ నాటి గెజిట్ నోటిఫికేషన్ ద్వారా, పీడీఎస్ ఎస్‌కేవో రహిత రాష్ట్రాలు, కేంద్రపాలిత ప్రాంతాల్లో కేవలం వంట, దీపాలు వెలిగించే ప్రయోజనం కోసం పీడీఎస్ ఎస్‌కేవో పంపిణీని సులభతరం చేసింది.

ప్రతి జిల్లాకు గరిష్టంగా రెండు ప్రభుత్వ రంగ సంస్థల ఓఎమ్‌సీ సర్వీస్ స్టేషన్లు (ప్రాధాన్యంగా కంపెనీ యాజమాన్యంలోనివి లేదా కంపెనీ నిర్వహించేవి) 5,000 లీటర్ల వరకు పీడీఎస్ ఎస్‌కేవోను నిల్వ చేయడానికి అనుమతి ఉంటుంది.

ఈ పీఎస్‌యూ ఓఎమ్‌సీ సర్వీస్ స్టేషన్లను ప్రతి జిల్లాలో రాష్ట్ర ప్రభుత్వం, కేంద్రపాలిత ప్రాంత పరిపాలన విభాగం నియమిస్తుంది.

18 రాష్ట్రాలు, కేంద్రపాలిత ప్రాంతాలు ఎస్‌కేవో కేటాయింపు ఉత్తర్వులను జారీ చేశాయి. హిమాచల్ ప్రదేశ్, లదాఖ్ రాష్ట్రాలు, కేంద్రపాలిత ప్రాంతాలు ఎస్‌కేవో అవసరం లేదని తెలియజేశాయి.

నౌకా వాణిజ్య భద్రత, నాకాయాన కార్యకలాపాలు

ఈ ప్రాంతంలో పనిచేస్తున్న భారతీయ నౌకలు, నావికులను రక్షించేందుకు నౌకాశ్రయాలు, నౌకాయానం, జల రవాణా మంత్రిత్వ శాఖ చర్యలు చేపట్టింది. ఆ మంత్రిత్వ శాఖ కింది సమాచారాన్ని తెలియజేసింది:

నౌకా వాణిజ్యం నిరంతరాయంగా కొనసాగేలా చూస్తూనే... నౌకాయాన కార్యకలాపాలు, నౌకాశ్రయ కార్యకలాపాలు, భారతీయ నావికుల భద్రతను నౌకాశ్రయాలు, నౌకాయానం, జల రవాణా మంత్రిత్వ శాఖ నిశితంగా పర్యవేక్షిస్తోంది.

ఈ ప్రాంతంలోని భారతీయ నావికులందరూ సురక్షితంగా ఉన్నారు. గత 24 గంటల్లో భారత జెండా ఉన్న నౌకలకు సంబంధించి ఎలాంటి ఘటన నమోదు కాలేదు.

పశ్చిమ పర్షియన్ గల్ఫ్ ప్రాంతంలో 460 మంది భారతీయ నావికులతో కూడిన మొత్తం 17 భారత జెండా గల నౌకలు ఉండగా... నౌకా యజమానులు, ఆర్‌పీఎస్‌ఎల్ ఏజెన్సీలు, భారత మిషన్ల సమన్వయంతో డీజీ షిప్పింగ్ పరిస్థితిని ఎప్పటికప్పుడు పర్యవేక్షిస్తోంది.

డీజీ షిప్పింగ్ కంట్రోల్ రూమ్ 24x7 పనిచేస్తూనే ఉంది. యాక్టివేషన్ అయినప్పటి నుంచి 5088 కాల్‌లు, 10547 ఈమెయిళ్లను నిర్వహించింది. గత 24 గంటల్లో 73 కాల్‌లు, 122 ఈమెయిళ్లూ అందాయి.

డీజీ షిప్పింగ్ ఇప్పటివరకు 1479 మందికి పైగా భారతీయ నావికులను సురక్షితంగా స్వదేశానికి రప్పించడంలో సహాయపడింది. వీరిలో గత 24 గంటల్లో గల్ఫ్‌లోని విమానాశ్రయాలు, వివిధ ప్రాంతీయ ప్రదేశాల నుంచి 159 మందిని భారత్‌కు తరలించింది.

గుజరాత్, మహారాష్ట్ర, గోవా, కేరళం, ఆంధ్రప్రదేశ్, పుదుచ్చేరి రాష్ట్ర మారిటైమ్ బోర్డులు ధ్రువీకరించిన ప్రకారం... దేశవ్యాప్తంగా ఓడరేవు కార్యకలాపాలు సాధారణంగానే కొనసాగుతున్నాయి. ఎటువంటి రద్దీ నమోదు కాలేదు.

సముద్రయాన సిబ్బంది సంక్షేమం, నిరంతరాయ నౌకా వాణిజ్య కార్యకలాపాలను నిర్ధారించడానికి... విదేశీ వ్యవహారాల మంత్రిత్వ శాఖ, భారత మిషన్లు, నౌకా వాణిజ్య రంగ భాగస్వాములతో ఈ మంత్రిత్వ శాఖ సమన్వయం కొనసాగిస్తోంది.

ఈ ప్రాంతంలో భారతీయ పౌరుల భద్రత

ఈ ప్రాంతమంతటా భారత మిషన్లు, పోస్టులు భారతీయ పౌరులతో సన్నిహిత సంబంధాలను కొనసాగిస్తున్నాయి. వారి భద్రత, శ్రేయస్సు కోసం సహాయాన్ని అందిస్తున్నాయి. అవసరమైన సూచనలనూ జారీ చేస్తున్నాయి. విదేశీ వ్యవహారాల మంత్రిత్వ శాఖ ఈ సమాచారాన్ని తెలియజేసింది:

ఇరాన్‌లో చిక్కుకుపోయిన మొత్తం 345 మంది భారతీయ మత్స్యకారులు నిన్న స్వదేశానికి తిరిగి వచ్చారు. టెహ్రాన్‌లోని రాయబార కార్యాలయం వారిని దక్షిణ ఇరాన్ నుంచి అర్మేనియాకు తరలించడానికి సహకరించగా... అక్కడి నుంచి వారు విమానాల్లో చెన్నైకి బయలుదేరారు.

భారత పౌరుల భద్రత, రక్షణ, సంక్షేమానికి అత్యధిక ప్రాధాన్యమిస్తూ... గల్ఫ్, పశ్చిమాసియా ప్రాంతంలో మారుతున్న పరిస్థితులను విదేశీ వ్యవహారాల మంత్రిత్వ శాఖ నిశితంగా పర్యవేక్షిస్తోంది. రాష్ట్రాలు, కేంద్రపాలిత ప్రాంతాలు, భారత మిషన్లతో నిరంతర సమన్వయంతో ఒక ప్రత్యేక కంట్రోల్ రూమ్ పనిచేస్తోంది.

మిషన్లు, పోస్టులు ఇరవై నాలుగు గంటలూ హెల్ప్‌లైన్‌లను నిర్వహిస్తూ... సూచనలు జారీ చేస్తూ... భారతీయ కమ్యూనిటీ సంఘాలు, కంపెనీలు, స్థానిక అధికారులతో సంప్రదింపులు జరుపుతున్నాయి. వీసాలు, కాన్సులర్ సేవలు, రవాణా సౌకర్యం, లాజిస్టికల్ మద్దతు వంటివీ ఈ సహాయంలో ఉన్నాయి.

భారతీయ విద్యార్థుల సంక్షేమం ఒక ప్రాధాన్యతగా కొనసాగుతోంది. విద్యా సంబంధిత సమస్యలను పరిష్కరించడానికి స్థానిక అధికారులు, భారతీయ పాఠశాలలు, బోర్డులు, జాతీయ పరీక్షా సంస్థలతో మిషన్లు సమన్వయం చేసుకుంటున్నాయి.

మిషన్లు నౌకలలోని భారతీయ సిబ్బందితో నిరంతరం సంప్రదింపులు జరుపుతూ, కాన్సులర్ మద్దతును అందిస్తూ, కుటుంబ సభ్యులతో సంభాషణలను సులభతరం చేస్తూ, తిరిగి వచ్చే అభ్యర్థనల్లో సహాయం చేస్తున్నాయి.

విమాన ప్రయాణ పరిస్థితి మెరుగుపడుతూనే ఉంది. ఫిబ్రవరి 28 నుంచి ఇప్పటివరకు ఈ ప్రాంతం నుంచి సుమారు 7,02,000 మంది ప్రయాణికులు భారత్‌కు ప్రయాణించారు.

యూఏఈ: పరిమిత సంఖ్యలో షెడ్యూల్ చేయని విమాన సర్వీసులు కొనసాగుతున్నాయి. భారత్‌కు సుమారు 90 విమానాలు వస్తాయని అంచనా.

సౌదీ అరేబియా, ఒమన్: పలు విమానాశ్రయాల నుంచి భారత్‌కు విమానాలు నడుస్తున్నాయి.

ఖతార్: గగనతలం పాక్షికంగా తెరుచుకుంది. ఈ రోజు సుమారు 8–10 విమానాలు వస్తాయని అంచనా.

కువైట్, బహ్రెయిన్: గగనతలం మూసి ఉంది. విమానాలు దమ్మమ్ (సౌదీ అరేబియా) మీదుగా భారత్‌కు నడుస్తున్నాయి.

ఇరాన్: అర్మేనియా, అజర్‌బైజాన్ మీదుగా ప్రయాణానికి సౌకర్యం కల్పిస్తున్నారు.

ఇజ్రాయెల్: ఈజిప్ట్, జోర్డాన్ మీదుగా ప్రయాణానికి సౌకర్యం కల్పిస్తున్నారు.

ఇరాక్: జోర్డాన్, సౌదీ అరేబియా మీదుగా ప్రయాణానికి సౌకర్యం కల్పిస్తున్నారు.

ఒమన్ తీరంలో ఓడపై జరిగిన దాడిలో ప్రాణాలు కోల్పోయిన భారత పౌరుడి మృత దేహాన్ని భారత్ తీసుకువచ్చారు. మృతుని కుటుంబానికి అవసరమైన అన్ని సహాయ సహకారాలు అందిస్తున్నారు.

***