• ମହାବୀର ଜୟନ୍ତୀ ଅବସରରେ ଗାନ୍ଧୀନଗରର କୋବା ତୀର୍ଥରେ ସମ୍ରାଟ ସମ୍ପ୍ରତି ସଂଗ୍ରହାଳୟର ଉଦ୍‌ଘାଟନ କରିବେ ପ୍ରଧାନମନ୍ତ୍ରୀ
• ସଂଗ୍ରହାଳୟ ଜୈନ ଧର୍ମର ସମୃଦ୍ଧ ଐତିହାସିକ, ସାଂସ୍କୃତିକ ଏବଂ ଆଧ୍ୟାତ୍ମିକ ଐତିହ୍ୟକୁ ପ୍ରଦର୍ଶନ କରେ ଏବଂ ପରିଦର୍ଶକମାନଙ୍କୁ ଜୈନ ଧର୍ମର ବିବର୍ତ୍ତନ ଏବଂ ଏହାର ଗଭୀର ସାଂସ୍କୃତିକ ପ୍ରଭାବର କାଳକ୍ରମିକ ବୁଝାମଣା ପାଇବାରେ ସାହାଯ୍ୟ କରିବ
• ଭାରତର ସେମିକଣ୍ଡକ୍ଟର କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ଉପଲବ୍ଧି ଭାବରେ ସାନନ୍ଦରେ କେୟନ୍ସ ସେମିକନ୍ ପ୍ଲାଣ୍ଟର ଉଦ୍‌ଘାଟନ କରିବେ ପ୍ରଧାନମନ୍ତ୍ରୀ
• ଭାରତରେ ବାଣିଜ୍ୟିକ ଉତ୍ପାଦନ ଆରମ୍ଭ କରିବା କ୍ଷେତ୍ରରେ ଏହା ଦ୍ୱିତୀୟ ସେମିକଣ୍ଡକ୍ଟର ପ୍ଲାଣ୍ଟ ହେବ
• ଏହି ପ୍ଲାଣ୍ଟ ସ୍ୱଦେଶୀ ସେମିକଣ୍ଡକ୍ଟର ପ୍ୟାକେଜିଂ କ୍ଷମତା ନିର୍ମାଣରେ ଯୋଗଦାନ, ଭାରତର ଚିପ୍ ଇକୋସିଷ୍ଟମ୍‌ରେ ଗୁରୁତ୍ୱପୂର୍ଣ୍ଣ ବ୍ୟବଧାନକୁ ଦୂର କରିବା ଏବଂ ଆତ୍ମନିର୍ଭରଶୀଳତାର ଦୃଷ୍ଟିକୋଣକୁ ତ୍ୱରାନ୍ୱିତ କରିବ
• ଭାଭ-ଥାରଡରେ ୨୦,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ବହୁବିଧ ବିକାଶ ପ୍ରକଳ୍ପର ଶିଳାନ୍ୟାସ, ଉଦ୍‌ଘାଟନ ଏବଂ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ ପ୍ରଧାନମନ୍ତ୍ରୀ
• ପ୍ରକଳ୍ପଗୁଡିକରେ ବିଦ୍ୟୁତ, ରେଳବାଇ, ସଡ଼କ ପରିବହନ ଏବଂ ରାଜପଥ, ସ୍ୱାସ୍ଥ୍ୟ, ସହରାଞ୍ଚଳ ବିକାଶ, ଆଦିବାସୀ ଏବଂ ଗ୍ରାମୀଣ ବିକାଶ ସମେତ ପ୍ରମୁଖ କ୍ଷେତ୍ରଗୁଡିକ ଅନ୍ତର୍ଭୁକ୍ତ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୩୧ ମାର୍ଚ୍ଚ ୨୦୨୬ରେ ଗୁଜରାଟ ଗସ୍ତ କରିବେ । ସକାଳ ପ୍ରାୟ ୧୦ଟା ସମୟରେ ପ୍ରଧାନମନ୍ତ୍ରୀ ଗାନ୍ଧୀନଗରରେ ସମ୍ରାଟ ସମ୍ପ୍ରତି ସଂଗ୍ରହାଳୟର ଉଦ୍‌ଘାଟନ କରିବେ । ଏହି ଅବସରରେ ସମାବେଶକୁ ମଧ୍ୟ ସେ ସମ୍ବୋଧିତ କରିବେ । ପ୍ରାୟ ୧୨:୪୫ଟା ସମୟରେ ପ୍ରଧାନମନ୍ତ୍ରୀ ଅହମ୍ମଦାବାଦର ସାନନ୍ଦରେ କେୟନ୍ସ ସେମିକନ୍ ପ୍ଲାଣ୍ଟର ଉଦ୍‌ଘାଟନ କରିବେ ଏବଂ ଏକ ସାଧାରଣ ସମାବେଶକୁ ମଧ୍ୟ ସମ୍ବୋଧିତ କରିବେ । ଏହା ପରେ, ପ୍ରଧାନମନ୍ତ୍ରୀ ଭାଭ-ଥରାଡ ଯାତ୍ରା କରିବେ, ଯେଉଁଠାରେ ଅପରାହ୍ନ ୪ଟା ସମୟରେ ସେ ୨୦,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଶିଳାନ୍ୟାସ, ଉଦ୍‌ଘାଟନ ଏବଂ ଲୋକାର୍ପଣ କରିବେ । ଏହି ଅବସରରେ ସେ ସମାବେଶକୁ ମଧ୍ୟ ସମ୍ବୋଧିତ କରିବେ ।

ଗାନ୍ଧୀନଗରରେ ପ୍ରଧାନମନ୍ତ୍ରୀ

ମହାବୀର ଜୟନ୍ତୀ ଅବସରରେ, ପ୍ରଧାନମନ୍ତ୍ରୀ ଗାନ୍ଧୀନଗରର କୋବା ତୀର୍ଥରେ ସମ୍ରାଟ ସମ୍ପ୍ରତି ସଂଗ୍ରହାଳୟର ଉଦ୍‌ଘାଟନ କରିବେ । ଅଶୋକଙ୍କ ନାତି ଏବଂ ଜୈନ ପରମ୍ପରା ପ୍ରତି ସମର୍ପଣ ତଥା ଜୈନ ଧର୍ମର ପ୍ରଚାର-ପ୍ରସାର ପାଇଁ ପ୍ରସିଦ୍ଧ ସମ୍ରାଟ ସମ୍ପ୍ରତିଙ୍କ ନାମରେ ନାମିତ ଏହି ସଂଗ୍ରହାଳୟ ଜୈନ ଧର୍ମର ସମୃଦ୍ଧ ଐତିହାସିକ, ସାଂସ୍କୃତିକ ଏବଂ ଆଧ୍ୟାତ୍ମିକ ଐତିହ୍ୟକୁ ପ୍ରଦର୍ଶନ କରେ ।

ମହାବୀର ଜୈନ ଆରାଧନା କେନ୍ଦ୍ର ପରିସରରେ ଅବସ୍ଥିତ, ସଂଗ୍ରହାଳୟରେ ସାତୋଟି ଭିନ୍ନ ଭିନ୍ନ ଖଣ୍ଡ ରହିଛି, ପ୍ରତ୍ୟେକଟି ଭାରତର ସଭ୍ୟତା ପରମ୍ପରାର ଅନନ୍ୟ ଦିଗ ପ୍ରତି ସମ୍ପର୍ପିତ । ଏହା ପରିଦର୍ଶକଙ୍କୁ ଶତାବ୍ଦୀର ଜ୍ଞାନ ଏବଂ ଐତିହ୍ୟ ମାଧ୍ୟମରେ ଏକ ବ୍ୟାପକ ଯାତ୍ରାର ଦର୍ଶନ କରାଇଥାଏ। ସଂଗ୍ରହାଳୟ ପାରମ୍ପରିକ ପ୍ରଦର୍ଶନୀକୁ ଆଧୁନିକ ଡିଜିଟାଲ ଏବଂ ଅଡିଓ-ଭିଜୁଆଲ ଉପକରଣର ସହିତ ସମନ୍ୱିତ କରିଥାଏ, ଯାହା ପରିଦର୍ଶକ, ଗବେଷକ ଏବଂ ବିଦ୍ୱାନମାନଙ୍କ ପାଇଁ ଏକ ଗହନ ଏବଂ ଆକର୍ଷଣୀୟ ଅନୁଭୂତି ସୃଷ୍ଟି କରେ ।

ଏହି ସଂଗ୍ରହାଳୟ ଶତାବ୍ଦୀ ପୁରୁଣା ବିରଳ ଅବଶେଷ, ଜୈନ କାଳକୃତି ଏବଂ ପାରମ୍ପରିକ ଐତିହ୍ୟ ସଂଗ୍ରହକୁ ସଂରକ୍ଷଣ ଏବଂ ପ୍ରଦର୍ଶନ କରିଥାଏ । ଏଥିରେ ଜଟିଳ ଭାବରେ କାରୁକାର୍ଯ୍ୟ କରାଯାଇଥିବା ପଥର ଏବଂ ଧାତୁ ମୂର୍ତ୍ତି, ବିଶାଳ ତୀର୍ଥ ପଟ୍ଟା ଏବଂ ଯନ୍ତ୍ର ପଟ୍ଟା, କ୍ଷୁଦ୍ର ଚିତକଳା, ରୂପା ରଥ, ମୁଦ୍ରା ଏବଂ ପ୍ରାଚୀନ ପାଣ୍ଡୁଲିପି ଅନ୍ତର୍ଭୁକ୍ତ, ଯାହା ସମସ୍ତ ୭ଟି ବିଶାଳ ଗ୍ୟାଲେରୀରେ ପ୍ରଦର୍ଶିତ । ବିସ୍ତୃତ ହଲରେ ସଜ୍ଜିତ ଦୁଇ ହଜାରରୁ ଅଧିକ ବିରଳ ଧନଭଣ୍ଡାର ସହିତ, ଏହି ସଂଗ୍ରହାଳୟ ପରିଦର୍ଶକମାନଙ୍କୁ ଜୈନ ଧର୍ମର ବିବର୍ତ୍ତନ ଏବଂ ଏହାର ଗଭୀର ସାଂସ୍କୃତିକ ପ୍ରଭାବ କାଳକ୍ରମିକ ବୁଝାମଣା ପାଇବାକୁ ସକ୍ଷମ କରିଥାଏ ।

ସାନନ୍ଦରେ ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ଅହମ୍ମଦାବାଦର ସାନନ୍ଦ ଜିଆଇଡିସିରେ କେୟନ୍ସ ସେମିକନ୍ ପ୍ଲାଣ୍ଟର ଉଦ୍‌ଘାଟନ କରିବେ । ଏଥିସହ ଏହି ପ୍ଲାଣ୍ଟରେ ବାଣିଜ୍ୟିକ ଉତ୍ପାଦନ ଆରମ୍ଭ ହେବ, ଯାହା ଭାରତର ସେମିକଣ୍ଡକ୍ଟର କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ଉପଲବ୍ଧି ହେବ ।

ଉନ୍ନତ ଇଣ୍ଟେଲିଜେଣ୍ଟ ପାୱାର ମଡ୍ୟୁଲ (ଆଇପିଏମ୍‌)ର ନିର୍ମାଣ ସହିତ ବାଣିଜ୍ୟିକ ଉତ୍ପାଦନ କମ୍ପାକ୍ଟ, ଦକ୍ଷ ଏବଂ ନିର୍ଭରଯୋଗ୍ୟ ପାୱାର ସୁଇଚିଂ ସିଷ୍ଟମ୍ ଆବଶ୍ୟକ କରୁଥିବା ଅଟୋମେଟିଭ୍ ଏବଂ ଶିଳ୍ପ ପ୍ରୟୋଗ ପାଇଁ ଗୁରୁତ୍ୱପୂର୍ଣ୍ଣ ଉପାଦାନ ହେବ । ପ୍ରତ୍ୟେକ ମଡ୍ୟୁଲରେ ୧୭ଟି ଚିପ୍ ରହିଛି ଏବଂ ଏହାକୁ କାଲିଫର୍ଣ୍ଣିଆ-ଭିତ୍ତିକ ଆଲଫା ଏବଂ ଓମେଗା ସେମିକଣ୍ଡକ୍ଟର (ଏଓଏସ୍‌)କୁ ଯୋଗାଣ କରାଯିବ । ପ୍ଲାଣ୍ଟର ସମସ୍ତ ପର୍ଯ୍ୟାୟ ସମାପ୍ତ ହେଲେ, ଏହାର ପ୍ରତିଦିନ ୬.୩୩ ନିୟୁତ ୟୁନିଟ ଉତ୍ପାଦନ କରିବାର କ୍ଷମତା ରହିବ ।

କେୟନ୍ସ ସେମିକନ୍ ପ୍ଲାଣ୍ଟର ଉଦ୍‌ଘାଟନ ଇଣ୍ଡିଆ ସେମିକଣ୍ଡକ୍ଟର ମିଶନ (ଆଇଏସ୍‌ଏମ୍‌) ଅଧୀନରେ ଏକ ପ୍ରମୁଖ ପଦକ୍ଷେପ । ବାଣିଜ୍ୟିକ ଉତ୍ପାଦନ ଆରମ୍ଭ କରିବା ପାଇଁ ଏହି କାର୍ଯ୍ୟକ୍ରମ ଅଧୀନରେ ଅନୁମୋଦିତ ପ୍ରକଳ୍ପଗୁଡିକ ମଧ୍ୟରେ ମାଇକ୍ରୋନ୍ ଟେକ୍ନୋଲୋଜି ପରେ ଏହା ଦ୍ୱିତୀୟ ସେମିକଣ୍ଡକ୍ଟର ସୁବିଧା ହେବ ।

ଏହି ପ୍ରକଳ୍ପଟି ବିଶେଷ ଗୁରୁତ୍ୱ ବହନ କରେ କାରଣ ଏହା ଭାରତର ଦ୍ୱିତୀୟ ଓଏସ୍‌ଏଟି/ଏଟିଏମ୍‌ପି (ଆଉଟ୍‌ସୋର୍ସଡ୍ ସେମିକଣ୍ଡକ୍ଟର ଆସେମ୍ବଲି ଏବଂ ଟେଷ୍ଟ / ଆସେମ୍ବ୍ଲି, ପରୀକ୍ଷଣ, ମାର୍କିଂ ଏବଂ ପ୍ୟାକିଂ) ୟୁନିଟ୍ ସ୍ଥାପନ କରୁଛି ଯାହା ଉତ୍ପାଦନ ପର୍ଯ୍ୟାୟରେ ପ୍ରବେଶ କରୁଛି । ଏହା ଏକ ଭାରତୀୟ ମୂଳ ଇଲେକ୍ଟ୍ରୋନିକ୍ସ ଉତ୍ପାଦନ ସେବା (ଇଏମ୍‌ଏସ୍‌) ଖେଳାଳୀଙ୍କ ଅର୍ଦ୍ଧସେମିକଣ୍ଡକ୍ଟର ଉତ୍ପାଦନ କ୍ଷେତ୍ରରେ ପ୍ରବେଶକୁ ମଧ୍ୟ ଚିହ୍ନିତ କରେ, ଯାହା ଦ୍ୱାରା ଘରୋଇ କ୍ଷମତାକୁ ସୁଦୃଢ଼ କରିଥାଏ ।

ଏହି ସୁବିଧା ସ୍ୱଦେଶୀ ସେମିକଣ୍ଡକ୍ଟର ପ୍ୟାକେଜିଂ କ୍ଷମତା ନିର୍ମାଣ, ଭାରତର ଚିପ୍ ଇକୋସିଷ୍ଟମ୍‌ରେ ଏକ ଗୁରୁତ୍ୱପୂର୍ଣ୍ଣ ବ୍ୟବଧାନକୁ ଦୂର କରିବା ଏବଂ ଉଚ୍ଚ ପ୍ରଯୁକ୍ତିବିଦ୍ୟା ଉତ୍ପାଦନରେ ଆତ୍ମନିର୍ଭରଶୀଳତାର ଦୃଷ୍ଟିକୋଣକୁ ଆଗକୁ ବଢ଼ାଇବାରେ ଯୋଗଦାନ ଦେବ ।

ଭାଭ-ଥାରଡରେ ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ୨୦,୦୦୦ କୋଟିରୁ ଅଧିକ ମୂଲ୍ୟର ବହୁବିଧ ଉନ୍ନୟନମୂଳକ ପ୍ରକଳ୍ପର ଶିଳାନ୍ୟାସ, ଉଦ୍‌ଘାଟନ ଏବଂ ରାଷ୍ଟ୍ରର ଉଦ୍ଦେଶ୍ୟରେ ଉତ୍ସର୍ଗ କରିବେ । ଏହି ପ୍ରକଳ୍ପଗୁଡିକ ବିଦ୍ୟୁତ, ରେଳବାଇ, ସଡ଼କ ପରିବହନ ଏବଂ ରାଜପଥ, ସ୍ୱାସ୍ଥ୍ୟ, ନଗର ଉନ୍ନୟନ, ଆଦିବାସୀ ବିକାଶ ଏବଂ ଗ୍ରାମୀଣ ବିକାଶ ସମେତ ପ୍ରମୁଖ କ୍ଷେତ୍ରକୁ ଅନ୍ତର୍ଭୁକ୍ତ କରେ ।

ପ୍ରଧାନମନ୍ତ୍ରୀ ୫,୧୦୦ କୋଟିରୁ ଅଧିକ ମୂଲ୍ୟରେ ନିର୍ମିତ ଏକ ପ୍ରବେଶ-ନିୟନ୍ତ୍ରିତ ରାଜପଥ, ଅହମ୍ମଦାବାଦ-ଧୋଲେରା ଏକ୍ସପ୍ରେସ୍‌ୱେର ଉଦ୍‌ଘାଟନ କରିବେ । ଏହି ଏକ୍ସପ୍ରେସୱେ ଆଞ୍ଚଳିକ ସଂଯୋଗୀକରଣକୁ ବୃଦ୍ଧି କରିବ, ଧୋଲେରା ସ୍ୱତନ୍ତ୍ର ନିବେଶ କ୍ଷେତ୍ର (ଡିଏସ୍‌ଆଇଆର୍‌)ରେ ଶିଳ୍ପ ବିକାଶକୁ ସମର୍ଥନ କରିବ ଏବଂ ଆର୍ଥିକ ଅଭିବୃଦ୍ଧିକୁ ତ୍ୱରାନ୍ୱିତ କରିବ ।

ପ୍ରଧାନମନ୍ତ୍ରୀ ପେଭ୍‌ଡ ସୋଲ୍‌ଡର୍ ବିଶିଷ୍ଟ ୪ ଲେନ୍‌ର ଇଦର-ବଡୋଲି ବାଇପାସ୍ ସଡ଼କ ପାଇଁ ଶିଳାନ୍ୟାସ କରିବେ । ସେ ଏନ୍‌ଏଚ୍‌-୭୫୪କେ ର ଧୋଲାଭିରା-ମୌଭାନା-ଭାଉଭା-ସାନ୍ତାଲପୁର ସେକ୍ସନ (ପ୍ୟାକେଜ୍‌-୨)କୁ ଦୁଇ-ଲେନ୍‌ର ପେଭ୍‌ଡ୍ ସୋଲ୍‌ଡର୍ ବିଶିଷ୍ଟ ସଡ଼କରେ ପରିବର୍ତ୍ତନ କରିବା ପାଇଁ ମଧ୍ୟ ଶିଳାନ୍ୟାସ କରିବେ । ଏହି ପରିଯୋଜନା ରାଜପଥ ଭିତ୍ତିଭୂମିକୁ ସୁଦଢ଼ କରିବ, ଧୋଲାଭିରା ଭଳି ପର୍ଯ୍ୟଟନ ସ୍ଥଳ ସମେତ ପ୍ରମୁଖ ଅଞ୍ଚଳଗୁଡିକୁ ସଂଯୋଗୀକରଣ ତ୍ୱରାନ୍ୱିତ କରିବ, ଲଜିଷ୍ଟିକ୍ସ ଦକ୍ଷତା ବୃଦ୍ଧି କରିବ ଏବଂ ସାମାଜିକ-ଆର୍ଥିକ ବିକାଶକୁ ସମର୍ଥନ କରିବ ।

ପ୍ରଧାନମନ୍ତ୍ରୀ ଗାନ୍ଧୀନଗର-କୋବା-ବିମାନବନ୍ଦର ରାସ୍ତାରେ ଭାଇଜିପୁରା ଜଙ୍କସନ୍‌ରେ ଫ୍ଲାଏଓଭର ସମେତ ପ୍ରମୁଖ ସଡ଼କ ଭିତ୍ତିଭୂମି ପ୍ରକଳ୍ପଗୁଡିକର ଶିଳାନ୍ୟାସ ମଧ୍ୟ କରିବେ । ଏହି ଫ୍ଲାଏଓଭର ଫଳରେ ଟ୍ରାଫିକ ଭିଡ଼ ହ୍ରାସ ପାଇବ ଏବଂ ଏହା ତଳେ ସଂଗଠିତ ପାର୍କିଂ ସୁବିଧା ଉପଲବ୍ଧ ହେବ । ଗାନ୍ଧୀନଗର-କୋବା-ଆରୋଦ୍ରାମ ରୋଡରେ ସ୍ଥିତ ପିଡିପିୟୁ ଜଙ୍କସନ୍‌ରେ ଫ୍ଲାଏଓଭର ମଧ୍ୟ ଉଦ୍‌ଘାଟନ କରାଯିବ । ଗାନ୍ଧୀନଗରକୁ ବିମାନବନ୍ଦର ସହ ସଂଯୋଗ କରୁଥିବା ରାସ୍ତାରେ ଦୈନିକ ୧୪୦,୦୦୦ରୁ ଅଧିକ ଯାନବାହାନର ଯାତାୟାତ କରେ । ଏହି ଫ୍ଲାଏଓଭର ସିଏଚ୍‌-୦ ଜଙ୍କସନ୍‌ରୁ ଅହମ୍ମଦାବାଦ ଏବଂ ଗାନ୍ଧୀନଗର ମଧ୍ୟରେ ବିମାନବନ୍ଦରକୁ ସୁଗମ ଏବଂ ନିରବଚ୍ଛିନ୍ନ ଟ୍ରାଫିକ ପ୍ରବାହ ସୁନିଶ୍ଚିତ କରିବ ।

ପ୍ରଧାନମନ୍ତ୍ରୀ ଖାଭଡା ପୁଲିଂ ଷ୍ଟେସନ-୨ ଏବଂ ୪.୫ ଗିଗାୱାଟ ନବୀକରଣୀୟ ଶକ୍ତି ନିଷ୍କାସନ ପାଇଁ ସମ୍ପୃକ୍ତ ପରିବହନ ପ୍ରଣାଳୀ ସମେତ ପ୍ରମୁଖ ବିଦ୍ୟୁତ ପରିବହନ ପ୍ରକଳ୍ପଗୁଡିକର ଉଦ୍‌ଘାଟନ କରିବେ, ଯାହାର ମିଳିତ ମୂଲ୍ୟ ପ୍ରାୟ ୩,୬୫୦ କୋଟି ଟଙ୍କା ହେବ । ଏହି ପ୍ରକଳ୍ପଗୁଡିକ ନବୀକରଣୀୟ ଶକ୍ତି ସମନ୍ୱୟ ଏବଂ ପରିବହନ କ୍ଷମତାକୁ ସୁଦୃଢ଼ କରିବ ।

ରେଳ କ୍ଷେତ୍ରରେ, ପ୍ରଧାନମନ୍ତ୍ରୀ କାନାଲସ-ଜାମନଗର ଦୋହରୀକରଣ ପ୍ରକଳ୍ପ (୨୮ କିଲୋମିଟର), ରାଜକୋଟ-କାନାଲୁସ ଦୋହରୀକରଣ ପ୍ରକଳ୍ପର ଅଂଶ (୧୧୧.୨୦ କିଲୋମିଟର) ଏବଂ ଗାନ୍ଧୀଧାମ-ଆଦିପୁର ସେକ୍ସନ (୧୦.୬୯ କିଲୋମିଟର)କୁ ଚାରି ଗୁଣ ସମ୍ପ୍ରସାରଣକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ । ଏହି ପ୍ରକଳ୍ପଗୁଡିକ ରେଳ କ୍ଷମତା ବୃଦ୍ଧି କରିବ, ଭିଡ଼ ହ୍ରାସ କରିବ, ପରିଚାଳନା ଦକ୍ଷତା ଉନ୍ନତ କରିବ ଏବଂ ଯାତ୍ରୀ ଏବଂ ମାଲ ପରିବହନ ଦ୍ରୁତ ଗତିରେ ବୃଦ୍ଧି ପାଇବ ।

ପ୍ରଧାନମନ୍ତ୍ରୀ ହିମ୍ମତନଗର-ଖେଡ଼ବ୍ରହମା ଗେଜ୍ ରୂପାନ୍ତରଣ ପ୍ରକଳ୍ପ (୫୪.୮୩ କିଲୋମିଟର) ମଧ୍ୟ ଉଦ୍‌ଘାଟନ କରିବେ, ଯାହା ଏହି ଅଞ୍ଚଳରେ ରେଳ ସଂଯୋଗୀକରଣ ଏବଂ ଯାତ୍ରୀ ପରିବହନକୁ ଉନ୍ନତ କରିବ । ସେ ଖେଡ଼ବ୍ରହମା-ହିମ୍ମତନଗର-ଅସରୱା ଟ୍ରେନ ସେବାକୁ ମଧ୍ୟ ପତାକା ଦେଖାଇ ଶୁଭାରମ୍ଭ କରିବେ ।

ପ୍ରଧାନମନ୍ତ୍ରୀ ଗୁଜରାଟରେ ପ୍ରାୟ ୫,୩୦୦ କୋଟି ମୂଲ୍ୟର ୪୪ଟି ସହରାଞ୍ଚଳ ବିକାଶ ପ୍ରକଳ୍ପର ଉଦ୍‌ଘାଟନ ଏବଂ ଶିଳାନ୍ୟାସ କରିବେ, ଯାହାର ଲକ୍ଷ୍ୟ ସହରାଞ୍ଚଳ ଭିତ୍ତଭୂମିକୁ ବୃଦ୍ଧି କରିବା ଏବଂ ଜୀବନଧାରଣର ଗୁଣବତ୍ତା ଉନ୍ନତ କରିବା । ପ୍ରଧାନମନ୍ତ୍ରୀ ଅହମ୍ମଦାବାଦର ଅସରୱା ସ୍ଥିତ ସିଭିଲ ହସ୍ପିଟାଲରେ ୮୫୮ ଶଯ୍ୟା ବିଶିଷ୍ଟ ରେନ୍ ବସେରା ଏବଂ ଗାନ୍ଧୀନଗରର ସିଭିଲ ହସ୍ପିଟାଲ ଏବଂ ଜିଏମ୍‌ଇଆର୍‌ଏସ୍ ମେଡିକାଲ କଲେଜରେ ସମାନ ସୁବିଧା ସମେତ ବିଭିନ୍ନ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ପଦକ୍ଷେପର ଉଦ୍‌ଘାଟନ କରିବେ ।

ପ୍ରଧାନମନ୍ତ୍ରୀ ପାଟନ ସ୍ଥିତ ରାଣୀ କି ଭାଭରେ ଆଲୋକ ଏବଂ ଶବ୍ଦ ପ୍ରଦର୍ଶନ, ଭାଡ଼ନଗରର ଶର୍ମିଷ୍ଠା ହ୍ରଦରେ ୱାଟର ସ୍କ୍ରିନ ପ୍ରୋଜେକ୍ସନ୍ ପ୍ରଦର୍ଶନ ସମେତ ପର୍ଯ୍ୟଟନ ପ୍ରକଳ୍ପଗୁଡିକର ଉଦ୍‌ଘାଟନ କରିବେ ଏବଂ ବନାସକାଣ୍ଠାରେ ବଳରାମ ମହାଦେବ ଏବଂ ବିଶ୍ୱେଶ୍ୱର ମହାଦେବରେ ପର୍ଯ୍ୟଟନ ଭିତ୍ତିଭୂମି କାର୍ଯ୍ୟର ଭିତ୍ତିପ୍ରସ୍ତର ସ୍ଥାପନ କରିବେ, ଯାହାର ଲକ୍ଷ୍ୟ ପର୍ଯ୍ୟଟନ ଅଭିଜ୍ଞତାକୁ ବୃଦ୍ଧି କରିବା ଏବଂ ସାଂସ୍କୃତିକ ଐତିହ୍ୟର ପ୍ରଚାର କରିବା ।

ପ୍ରଧାନମନ୍ତ୍ରୀ ପ୍ରାୟ ୧୭୮୦ କୋଟି ଟଙ୍କାର ଦୁଇଟି ପ୍ରମୁଖ ଜଳ ପାଇପଲାଇନ ପ୍ରକଳ୍ପ ଦେଶକୁ ଉତ୍ସର୍ଗ କରିବେ, ଯେଉଁଥିରେ ବନାସକାଣ୍ଠାର କସାରା-ଦନ୍ତିୱାଡା ପାଇପଲାଇନ ଏବଂ ପାଟନ ଏବଂ ବନାସକାଣ୍ଠାର ଦିନ୍ଦ୍ରୋଲ-ମୁକ୍ତେଶ୍ୱର ପାଇପଲାଇନ ଅନ୍ତର୍ଭୁକ୍ତ । ପ୍ରଧାନମନ୍ତ୍ରୀ ଅମ୍ବାଜୀ ଏବଂ ଆଖପାଖ ଗ୍ରାମାଞ୍ଚଳ ପାଇଁ ଜଳ ଯୋଗାଣ ଯୋଜନାର ଶିଳାନ୍ୟାସ କରିବେ । ଏହା ୩୪ଟି ଗ୍ରାମ ଏବଂ ଅମ୍ବାଜୀ ସହରକୁ ପାନୀୟ ଜଳ ଯୋଗାଇବ, ଯାହା ଦ୍ୱାରା ବନାସକାଣ୍ଠା ଜିଲ୍ଲାର ଦନ୍ତା ଏବଂ ଅମିରଗଡ଼ ତାଲୁକାର ପ୍ରାୟ ୧.୫ ଲକ୍ଷ ଲୋକ ଉପକୃତ ହେବ । ପ୍ରଧାନମନ୍ତ୍ରୀ ଗାନ୍ଧୀନଗର ଜିଲ୍ଲାରେ ପ୍ରାୟ ୧୦୦୦ କୋଟି ଟଙ୍କାର ମିଳିତ ନିବେଶରେ ନିର୍ମିତ ତିନିଟି ସାବରମତୀ ନଦୀକୂଳ ସମ୍ପ୍ରସାରଣ ପ୍ରକଳ୍ପର ଶିଳାନ୍ୟାସ କରିବେ ।

ପ୍ରଧାନମନ୍ତ୍ରୀ ଅହମ୍ମଦାବାଦର ଭେଜଲପୁରରେ ସରକାରୀ ବାଳକ ଛାତ୍ରାବାସର ଉଦ୍‌ଘାଟନ କରିବେ । ଏହି ସୁବିଧା ଉଚ୍ଚଶିକ୍ଷା ଗ୍ରହଣ କରୁଥିବା ଆଦିବାସୀ ଛାତ୍ରଛାତ୍ରୀଙ୍କୁ ସହାୟତା ପ୍ରଦାନ କରିବ ।

SR