وزیراعظم جناب نریندر مودی 31 مارچ 2026 کو گجرات کا دورہ کریں گے۔ صبح تقریباً 10 بجے، وزیراعظم گاندھی نگر میں 'سمراٹ سمپْرتی میوزیم' کا افتتاح کریں گے۔ وہ اس موقع پر اجتماع سے بھی خطاب کریں گے۔دوپہر تقریباً 12:45 بجے، وزیراعظم سانند، احمد آباد میں 'کینز سیمی کون پلانٹ'  کا افتتاح کریں گے اور ایک عوامی اجتماع سے بھی خطاب کریں گے۔اس کے بعد، وزیراعظم واؤ-تھراد روانہ ہوں گے جہاں وہ شام تقریباً 4 بجے 20,000 کروڑ روپے سے زائد مالیت کے متعدد ترقیاتی منصوبوں کا سنگ بنیاد رکھیں گے، افتتاح کریں گے اور قوم کے نام وقف کریں گے۔ وہ اس موقع پر اجتماع سے بھی خطاب کریں گے۔

گاندھی نگر میں وزیرِ اعظم

مہاویر جینتی کے موقع پر، وزیرِ اعظم گاندھی نگر کے کوبا تیرتھ میں 'سمراٹ سمپرتی میوزیم' کا افتتاح کریں گے۔ یہ عجائب گھر سمراٹ سمپرتی کے نام سے منسوب ہے، جو اشوک کے پوتے اور جین روایت کی ایک محترم شخصیت ہیں اور عدم تشدد کے تئیں اپنی وابستگی اور جین مذہب کی اشاعت کے لیے جانے جاتے ہیں۔ یہ عجائب گھر جین مذہب کے بھرپور تاریخی، ثقافتی اور روحانی ورثے کی عکاسی کرتا ہے۔

مہاویر جین ارادھنا کیندر کے احاطے میں واقع اس عجائب گھر کے سات مختلف حصے ہیں، جن میں سے ہر ایک بھارت کی تہذیبی روایات کے منفرد پہلوؤں کے لیے وقف ہے۔ یہ زائرین کو صدیوں پر محیط علم اور ورثے کا ایک جامع سفر فراہم کرتا ہے۔ عجائب گھر روایتی نمائشوں کو جدید ڈیجیٹل اور آڈیو ویژول تنصیبات کے ساتھ جوڑتا ہے، جس سے زائرین، محققین اور ماہرین کے لیے ایک مسحور کن تجربہ تخلیق ہوتا ہے۔

یہ عجائب گھر صدیوں پرانے نایاب نوادرات، جین فن پارے اور روایتی ورثے کے مجموعوں کو محفوظ اور نمائش کے لیے پیش کرتا ہے۔ ان میں باریک بینی سے تراشے گئے پتھر اور دھات کے بت، بڑے تیرتھ پٹ اور ینتر پٹ، چھوٹی تصویریں چاندی کے رتھ، سکے اور قدیم نسخے شامل ہیں، جو سات عظیم گیلریوں میں نمائش کے لیے رکھے گئے ہیں۔ وسیع ہالوں میں ترتیب دیے گئے دو ہزار سے زیادہ نایاب خزانوں کے ساتھ، یہ عجائب گھر زائرین کو جین مذہب کے ارتقاء اور اس کے گہرے ثقافتی اثرات کو تاریخی ترتیب سے سمجھنے کے قابل بناتا ہے۔

سانند میں وزیر اعظم

وزیر اعظم احمد آباد کے سانند جی آئی ڈی سی  میں ’کینز سیمیکون پلانٹ‘ کا افتتاح کریں گے۔ یہ اس تنصیب میں تجارتی پیداوار کے آغاز کی علامت ہوگا، جو بھارت کے سیمیکونڈکٹر سفر میں ایک اہم سنگ میل  کی حیثیت رکھتا ہے۔

تجارتی پیداوار کا آغاز جدید انٹیلیجنٹ پاور ماڈیولز  کی تیاری سے ہوگا، جو ایسی آٹو موٹیو اور صنعتی ایپلی کیشنز کے لیے کلیدی اجزاء ہیں جنہیں مختصر، موثر اور قابل بھروسہ پاور سوئچنگ سسٹم کی ضرورت ہوتی ہے۔ ہر ماڈیول 17 چپس پر مشتمل ہے اور یہ کیلیفورنیا میں قائم الفا اینڈ اومیگا سیمیکونڈکٹر (اے او ایس) کو فراہم کیے جائیں گے۔ جب پلانٹ کے تمام مراحل مکمل ہو جائیں گے، تو اس میں روزانہ 63.3 لاکھ یونٹس تیار کرنے کی صلاحیت ہوگی۔

کینز سیمیکون پلانٹ کا افتتاح انڈیا سیمیکونڈکٹر مشن(آئی ایس ایم) کے تحت ایک بڑا قدم ہے۔ یہ پروگرام کے تحت منظور شدہ منصوبوں میں مائیکرون ٹیکنالوجی کے بعد تجارتی پیداوار شروع کرنے والی دوسری سیمیکونڈکٹر تنصیب ہوگی۔

یہ منصوبہ خاص اہمیت کا حامل ہے کیونکہ یہ بھارت کے دوسرے او سی اے ٹی/ اے ٹی ایم پی یونٹ کے پیداواری مرحلے میں داخل ہونے کی نشاندہی کرتا ہے۔ یہ سیمیکونڈکٹر مینوفیکچرنگ میں بھارتی نژاد الیکٹرانکس مینوفیکچرنگ سروسز (ای ایم ایس) کے شامل ہونے عکاسی کرتا ہے ، جس سے گھریلوصلاحیتوں کو تقویت ملے گی۔

یہ تنصیب مقامی سیمیکونڈکٹر پیکیجنگ کی گنجائش پیدا کرنے میں مدد دے گی، جو بھارت کے چپ ایکو سسٹم میں ایک اہم خلا کو پُر کرے گی اور اعلیٰ ٹیکنالوجی کی مینوفیکچرنگ میں خود انحصاری کے وژن کو فروغ دے گی۔

واؤ-تھراد میں وزیرِ اعظم

وزیرِ اعظم 20,000 کروڑ روپے سے زائد مالیت کے متعدد ترقیاتی منصوبوں کا سنگِ بنیاد رکھیں گے، افتتاح کریں گے اور قوم کے نام وقف کریں گے۔ یہ منصوبے بجلی، ریلوے، سڑک کی نقل و حمل اور شاہراہوں، صحت، شہری ترقی، قبائلی ترقی اور دیہی ترقی سمیت اہم شعبوں پر محیط ہیں۔

وزیرِ اعظم احمد آباد-دھولیرا ایکسپریس وے کا افتتاح کریں گے، جو 5,100 کروڑ روپے سے زائد کی لاگت سے تیار کردہ ایک رسائی کنٹرولڈ شاہراہ ہے۔ یہ ایکسپریس وے علاقائی رابطوں کو بہتر بنائے گا، دھولیرا اسپیشل انویسٹمنٹ ریجن (ڈی ایس آئی آر) میں صنعتی ترقی میں معاون ثابت ہوگا اور معاشی ترقی کو فروغ دے گا۔

وزیرِ اعظم ’ایڈر-باڈولی‘ بائی پاس سیکشن کو پکی پٹریوں کے ساتھ 4 لین میں تعمیر کرنے کا سنگِ بنیاد رکھیں گے۔ وہ قومی شاہراہ کے 754 کے 'دھولاویرا-ماؤوانا-واؤوا-سانت پور' سیکشن (پیکیج-II) کو دو لین والی پکی پٹریوں کی سڑک میں تبدیل کرنے کا سنگِ بنیاد بھی رکھیں گے۔ یہ منصوبے شاہراہوں کے بنیادی ڈھانچے کو مضبوط بنائیں گے، دھولاویرا جیسے سیاحتی مقامات سمیت اہم علاقوں تک رسائی کو بہتر بنائیں گے، رسد  کی ترسیل کو بہتر کریں  گے اور سماجی و اقتصادی ترقی میں مددگار ثابت ہوں گے۔

وزیرِ اعظم سڑک کے بنیادی ڈھانچے کے اہم منصوبوں کا سنگِ بنیاد بھی رکھیں گے، جس میں گاندھی نگر-کوبا-ایئرپورٹ روڈ پر بھائی جی پورہ جنکشن پر فلائی اوور شامل ہے، جو ٹریفک کے ہجوم کو کم کرے گا اور ڈھانچے کے نیچے پارکنگ کے لیے منظم جگہ فراہم کرے گا۔ گاندھی نگر-کوبا-ایروڈرم روڈ پر پی ڈی پی یو (پی ڈی پی یو) جنکشن پر فلائی اوور برج کا بھی افتتاح کیا جائے گا۔ گاندھی نگر کو ہوائی اڈے سے جوڑنے والی سڑک پر روزانہ 1,40,000 سے زیادہ گاڑیوں کی آمد و رفت ہوتی ہے۔ یہ فلائی اوور احمد آباد اور گاندھی نگر کے درمیان سی ایچ -0 جنکشن سے ہوائی اڈے تک ٹریفک کے ہموار اور بلا تعطل بہاؤ کو یقینی بنائے گا۔

وزیرِ اعظم بجلی کی ترسیل کے اہم منصوبوں کا افتتاح کریں گے جن میں کھاوڑا پولنگ اسٹیشن-2 اور 4.5 گیگا واٹ قابلِ تجدید توانائی کے اخراج کے لیے متعلقہ ٹرانسمیشن سسٹم شامل ہیں، جن کی مجموعی لاگت تقریباً 3,650 کروڑ روپے ہے۔ یہ منصوبے قابلِ تجدید توانائی کے انضمام اور ترسیل کی صلاحیت کو مضبوط بنائیں گے۔

ریلوے کے شعبے میں، وزیرِ اعظم کنالوس-جام نگر ڈبلنگ پروجیکٹ (28 کلومیٹر)، جو کہ راجکوٹ-کنالوس ڈبلنگ پروجیکٹ (111.20 کلومیٹر) کا حصہ ہے، اور گاندھی دھام-آدی پور سیکشن (10.69 کلومیٹر) کی کواڈرپلنگ (چار گنا توسیع) قوم کے نام وقف کریں گے۔ یہ منصوبے ریلوے کی گنجائش میں اضافہ کریں گے، بھیڑ کو کم کریں گے، آپریشنل کارکردگی کو بہتر بنائیں گے اور مسافروں و مال برداری کی تیز تر نقل و حرکت کو ممکن بنائیں گے۔

وزیرِ اعظم ہمت نگر-کھیڈ برہما گیج تبدیلی کے منصوبے (54.83 کلومیٹر) کا بھی افتتاح کریں گے، جس سے خطے میں ریل رابطوں اور مسافروں کی آمد و رفت میں بہتری آئے گی۔ وہ کھیڈ برہما-ہمت نگر-اساروا ٹرین سروس کو ہری جھنڈی دکھا کر روانہ بھی کریں گے۔

وزیرِ اعظم پورے گجرات میں تقریباً 5,300 کروڑ روپے مالیت کے 44 شہری ترقی کے منصوبوں کا افتتاح اور سنگِ بنیاد رکھیں گے، جن کا مقصد شہری بنیادی ڈھانچے کو بہتر بنانا اور معیارِ زندگی کو بلند کرنا ہے۔ وزیرِ اعظم صحت اور خاندانی بہبود کے مختلف اقدامات کا افتتاح کریں گے، جن میں سول اسپتال، اساروا، احمد آباد میں 858 بستروں والے رین بسیرام کا افتتاح، اور گاندھی نگر سول اسپتال اور جی ایم ای آر ایس (جی ایم ای آر ایس) میڈیکل کالج، گاندھی نگر میں ایسی ہی یونٹ کا افتتاح شامل ہے۔

وزیرِ اعظم سیاحتی منصوبوں کا افتتاح کریں گے جن میں رانی کی واؤ، پٹن میں لائٹ اینڈ ساؤنڈ شو، شرمشٹھا جھیل، وڈنگر میں واٹر اسکرین پروجیکشن شو شامل ہیں، اور بناس کانٹھا میں بالارام مہادیو اور وشویشور مہادیو میں سیاحتی بنیادی ڈھانچے کے کاموں کا سنگِ بنیاد رکھیں گے، جن کا مقصد سیاحت کو بہتر بنانا اور ثقافتی ورثے کو فروغ دینا ہے۔

وزیرِ اعظم تقریباً 1,780 کروڑ روپے مالیت کے پانی کی پائپ لائن کے دو بڑے منصوبے قوم کے نام وقف کریں گے جن میں بناس کانٹھا میں کسارا-دانی واڑہ پائپ لائن اور پاٹن و بناس کانٹھا میں دنڈرول-مکتیشور پائپ لائن شامل ہیں۔ وزیرِ اعظم امباجی اور آس پاس کے دیہی علاقوں کے لیے پانی کی فراہمی کی اسکیم کا سنگِ بنیاد رکھیں گے۔ یہ اسکیم 34 گاؤں اور امباجی قصبے کو پینے کا صاف پانی فراہم کرے گی، جس سے ضلع بناس کانٹھا کے دانتا اور امیر گڑھ تعلقہ کے تقریباً 1.5 لاکھ لوگ مستفید ہوں گے۔ وزیرِ اعظم ضلع گاندھی نگر میں سابرمتی  دریا کے کنارے  کی توسیع کے تین منصوبوں کا بھی سنگِ بنیاد رکھیں گے، جن پر تقریباً 1000 کروڑ روپے کی مجموعی سرمایہ کاری کی جائے گی۔

وزیرِ اعظم ویجل پور، احمد آباد میں گورنمنٹ بوائز ہاسٹل کا افتتاح کریں گے۔ یہ ہاسٹل اعلیٰ تعلیم حاصل کرنے والے قبائلی طلباء کے لئے کافی فائدہ مند ثابت ہوگا۔

********

ش ح۔ ع و ۔ص ج

U. No.5107