இதைச் சொல்பவர் ஆசீர்வதிக்கப்படுவார், காலத்தால் அழியாத கடவுள் சத்தியமானவர்!!

ஹரியானா ஆளுநர் ஆஷிம் கோஷ் அவர்களே, முதலமைச்சர் நயப் சிங் சைனி அவர்களே, மத்திய அமைச்சரவையில் உள்ள எனது சகாக்களான மனோகர் லால் அவர்களே, ராவ் இந்திரஜித் சிங் அவர்களே, கிருஷன் பால் அவர்களே, ஹரியானா எஸ்ஜிபிசி தலைவர் ஜகதீஷ் சிங் ஜிந்தா அவர்களே, மற்ற மதிப்பிற்குரிய பிரமுகர்களே, தாய்மார்களே, பெரியோர்களே!

இன்று, பாரதத்தின் பாரம்பரியத்தின் குறிப்பிடத்தக்க சங்கமம். காலையில் ராமாயணத்தின் நகரமான அயோத்தியில் இருந்தேன், இப்போது கீதையின் பூமியான குருக்ஷேத்ராவில் இருக்கிறேன். இங்கே, ஸ்ரீ குரு தேக் பகதூர் ஜியின் 350வது தியாக தினத்தை முன்னிட்டு நாம் அனைவரும் அவருக்கு அஞ்சலி செலுத்தி வருகிறோம். இங்கே குழுமியுள்ள அனைத்து மதிப்புமிக்க துறவிகள் மற்றும் மரியாதைக்குரிய சங்கத் (பக்தர்கள்) அனைவருக்கும் நான் வணக்கத்துடன் தலை வணங்குகிறேன்.

நண்பர்களே,

சுமார் 5-6 ஆண்டுகளுக்கு முன்பு நடந்த மற்றொரு அற்புதமான தற்செயல் நிகழ்வையும் நான் குறிப்பிட வேண்டும். கர்தார்பூர் வழித்தடத்தின் திறப்பு விழாவிற்காக நான் தேரா பாபா நானக்கில் இருந்தபோது, 2019ஆம் ஆண்டு நவம்பர் 9ஆம் தேதி ராமர் கோயில் தொடர்பான தீர்ப்பை உச்ச நீதிமன்றம் வழங்கியது. அன்றைய தினம், ராமர் கோயில் கட்டும் பாதை தெளிவடைய வேண்டும் என்றும், கோடிக்கணக்கான ராம் பக்தர்களின் விருப்பங்கள் நிறைவேற வேண்டும் என்றும் நான் பிரார்த்தனை செய்தேன். அன்றைய தினமே ராமர் கோயிலுக்கு ஆதரவாக தீர்ப்பு வந்ததால், எங்கள் பிரார்த்தனைகள் நிறைவேறின. இன்று, அயோத்தியில் 'தர்ம துவஜம்' (தர்மத்தின் கொடி) ஏற்றப்பட்டிருக்கும்போது, நான் மீண்டும் சீக்கிய சமூகத்தின் ஆசிகளைப் பெற்று வருகிறேன்.

நண்பர்களே,

சிறிது நேரத்திற்கு முன், குருக்ஷேத்ரா மண்ணில் பஞ்சஜன்ய நினைவகமும் இங்கே திறந்து வைக்கப்பட்டது. இந்த மண்ணிலிருந்தே, உண்மையையும் நீதியையும் பாதுகாப்பதே மிக உயர்ந்த தர்மம் என்று பகவான் ஸ்ரீ கிருஷ்ணர் போதித்தார். அவர், "ஸ்வதர்மே நிதனம் ஸ்ரேய:" (स्वधर्मे निधनं श्रेयः) என்று கூறினார். அதாவது, ஒருவரின் கடமைக்காகவும் உண்மைக்காகவும் உயிரைத் தியாகம் செய்வது உன்னதமானது. ஸ்ரீ குரு தேக் பகதூர் ஜியும் கூட, உண்மையையும், நீதியையும், நம்பிக்கையையும் பாதுகாப்பதைக் கடமையாகக் கருதினார், மேலும் இந்தக் கடமையை அவர் தம் உயிரைத் தியாகம் செய்து நிலைநாட்டினார். இந்த வரலாற்றுச் சிறப்புமிக்க நாளில், ஸ்ரீ குரு தேக் பகதூர் ஜிக்காக ஒரு நினைவுத் தபால் தலை மற்றும் ஒரு சிறப்பு நாணயத்தை அர்ப்பணிக்கும் பாக்கியத்தை பாரத அரசு பெற்றுள்ளது. எமது அரசு, இந்தத் தூய குரு பாரம்பரியத்திற்குத் தொடர்ந்து இதுபோன்ற சேவைகளைச் செய்ய வேண்டும் என்பதே எனது விருப்பம்.

நண்பர்களே,

குருக்ஷேத்திராவின் இந்தப் புனித பூமி சீக்கிய பாரம்பரியத்தின் ஒரு முக்கிய மையமாகும். இந்தப் பூமியின் அதிர்ஷ்டத்தைப் பாருங்கள்! சீக்கியப் பாரம்பரியத்தின் மரியாதைக்குரிய குருக்கள் அனைவரும் தங்களின் புனிதப் பயணத்தின்போது இந்த இடத்திற்கு வந்துள்ளனர். ஒன்பதாவது குருவான ஸ்ரீ குரு தேக் பகதூர் ஜி இந்தப் புனித பூமிக்கு வந்தபோது, தனது ஆழ்ந்த தவத்தின் மற்றும் அச்சமற்ற தைரியத்தின் முத்திரையை இங்கே விட்டுச் சென்றார்.

நண்பர்களே,

ஸ்ரீ குரு தேக் பகதூர் ஜி போன்ற ஆளுமைகள் வரலாற்றில் மிகவும் அரிதானவர்கள். அவருடைய வாழ்க்கை, அவருடைய தியாகம் மற்றும் அவருடைய குணம் ஆகியவை பெரும் உத்வேகத்தின் மூலங்களாக இருக்கின்றன. முகலாய ஆதிக்கத்தின் அந்தக் காலகட்டத்தில் குரு சாஹிப் வீரத்தின் மிக உயர்ந்த உதாரணத்தை நிலைநாட்டினார். ஸ்ரீ குரு தேக் பகதூர் ஜியின் தியாகத்திற்கு முன் என்ன நடந்தது என்பது நம் அனைவருக்கும் தெரியும். முகலாயர்களின் அட்டூழியங்கள் நிறைந்த அந்தக் காலகட்டத்தில் காஷ்மீரி இந்துக்கள் கட்டாய மதமாற்றத்திற்கு ஆளாகி வந்தனர். அந்தக் காலகட்டத்தின் நெருக்கடியில், பாதிக்கப்பட்ட மக்கள் ஒரு குழுவாக குரு சாஹிப்பின் ஆதரவை நாடினர். அப்போது குரு சாஹிப் அவர்களிடம் கூறினார்: "உங்களில் உள்ளவர்கள் அனைவரும் அவுரங்கசீப்பிடம், ஸ்ரீ குரு தேக் பகதூர் இஸ்லாமை ஏற்றுக் கொண்டால், நாங்களும் இஸ்லாமை ஏற்றுக் கொள்வோம் என்று தெளிவாகச் சொல்லுங்கள்."

நண்பர்களே,

இந்த வார்த்தைகள் ஸ்ரீ குரு தேக் பகதூர் ஜியின் அச்சமின்மையின் உச்சத்தை பிரதிபலித்தன. அதன்பின், என்ன பயந்தார்களோ அதுவே நடந்தது. கொடூரமான அவுரங்கசீப் குரு சாஹிப்பை கைது செய்ய உத்தரவிட்டார், ஆனால் குரு சாஹிப் தானே டெல்லிக்குச் செல்வதாக அறிவித்தார். முகலாய ஆட்சியாளர்கள் அவரை ஆசைகாட்டிக் கவர முயன்றனர், ஆனால் ஸ்ரீ குரு தேக் பகதூர் அசைக்க முடியாதவராக இருந்தார். அவர் மதம் அல்லது கொள்கை விஷயத்தில் சமரசம் செய்து கொள்ளவில்லை. மேலும், அவரது மன உறுதியைக் குலைக்க, அவரது உறுதிப்பாட்டைக் கலையச் செய்ய, அவரது மூன்று தோழர்களான பாய் தயாலா ஜி, பாய் சதி தாஸ் ஜி, மற்றும் பாய் மதி தாஸ் ஜி ஆகியோர் அவரது கண் முன்னாலேயே கொடூரமாகக் கொல்லப்பட்டனர். இருப்பினும், குரு சாஹிப் உறுதியாக இருந்தார், அவரது உறுதி தளரவில்லை. அவர் தர்மத்தின் பாதையை விட்டு விலகவில்லை; ஆழ்ந்த தியான நிலையில், நம்பிக்கையைப் பாதுகாப்பதற்காக குரு சாஹிப் தனது தலையைத் தியாகம் செய்தார்.

நண்பர்களே,

அதுமட்டுமன்றி, முகலாயர்களுக்கு அதுவும் போதவில்லை. குரு மகாராஜின் புனிதத் தலைக்கும் அவர்கள் அவமரியாதை செய்ய முயன்றனர். ஆனால், பாய் ஜைதா ஜி பெரும் வீரத்துடன், குருவின் தலையை ஆனந்த்பூர் சாஹிப்பிற்குப் பத்திரமாகக் கொண்டு சென்றார். அதனால்தான் ஸ்ரீ குரு கோபிந்த் சிங் ஜி இவ்வாறு எழுதினார்:

“तिल्कजन्जू राखा प्रभ ता का, तेग बहादुर सी क्रिया, करी न किन्हुं आन।”

இதன் பொருள், நம்பிக்கையின் மாண்பைக் காக்கவும், மக்களின் நம்பிக்கைகள் மீது நிகழும் அட்டூழியங்களைத் தடுக்கவும், குரு சாஹிப் எல்லாவற்றையும் விட்டுக் கொடுத்தார் என்பதாகும்.

நண்பர்களே,

இன்று தில்லியில் உள்ள சிஸ் கஞ்ச் குருத்வாரா, அந்தத் தியாகத்தின் நில வடிவத்தில், நமக்கு வாழும் உத்வேகத்தின் ஆதாரமாக நிற்கிறது. ஆனந்த்பூர் சாஹிப் நமது தேசிய உணர்வின் புனித பூமியாகும். இன்று பாரதம் எந்த வடிவத்தில் இருக்கிறதோ, அது குரு சாஹிப் போன்ற மகான்களின் தியாகத்தையும் அர்ப்பணிப்பையும் தன்னகத்தே கொண்டுள்ளது. இந்த இணையற்ற தியாகத்தின் காரணமாகவே, ஸ்ரீ குரு தேக் பகதூர் ஜி, 'ஹிந்த் தி சாதர்' (இந்தியாவுக்கான பாதுகாவலராக) என்று போற்றப்படுகிறார்.

நண்பர்களே,

நமது குருமார்களின் பாரம்பரியமே நமது தேசத்தின் குணம், நமது கலாச்சாரம் மற்றும் நமது அடிப்படை ஆன்மாவின் அடித்தளமாகும். கடந்த 11 ஆண்டுகளில், நமது அரசாங்கம் இந்தப் புனித மரபுகளையும், சீக்கியப் பாரம்பரியத்தின் ஒவ்வொரு கொண்டாட்டத்தையும், தேசிய கொண்டாட்டங்களாக நிலைநிறுத்தியுள்ளது என்பதில் நான் திருப்தி அடைகிறேன்.

ஸ்ரீ குருநானக் தேவ் ஜியின் 550வது பிறந்தநாள், ஸ்ரீ குரு தேக் பகதூர் சாஹிப் ஜியின் 400வது பிறந்தநாள், மற்றும் ஸ்ரீ குரு கோபிந்த் சிங் ஜியின் 350வது பிறந்தநாள் ஆகியவற்றை பாரதத்தின் ஒற்றுமை மற்றும் ஒருமைப்பாட்டின் திருவிழாக்களாகக் கொண்டாடும் பாக்கியம் நமது அரசாங்கத்திற்குக் கிடைத்தது. பாரதம் முழுவதும் உள்ள மக்கள் தங்கள் சொந்த நம்பிக்கைகள், மரபுகள் மற்றும் பழக்கவழக்கங்களுக்கு அப்பாற்பட்டு இந்தப் பொது நிகழ்வுகளில் பங்கேற்றுள்ளனர்.

நண்பர்களே,

குருமார்களுடன் தொடர்புடைய புனிதத் தலங்களுக்கு ஒரு பிரம்மாண்டமான மற்றும் தெய்வீக வடிவத்தை அளிக்கும் பாக்கியத்தையும் நமது அரசாங்கம் பெற்றுள்ளது. கடந்த பத்தாண்டுகளில், குரு பாரம்பரியம் தொடர்பான நிகழ்வுகளில் நான் தனிப்பட்ட முறையில் பங்கேற்ற பல சந்தர்ப்பங்கள் உள்ளன. சமீபத்தில், குரு கிரந்த் சாஹிப்பின் மூன்று மூலப் பிரதிகள் ஆப்கானிஸ்தானில் இருந்து பாரதத்திற்கு வந்தபோது, அது ஒவ்வொரு இந்தியருக்கும் பெருமைமிக்க தருணமானது.

நண்பர்களே,

நமது அரசாங்கம் குருமார்களின் ஒவ்வொரு புனித யாத்திரை ஸ்தலத்தையும் நவீன பாரதத்தின் உணர்வுடன் இணைக்க முயன்றுள்ளது. கர்தார்பூர் வழித்தடத்தின் பணியை நிறைவு செய்வதாக இருந்தாலும், ஹேம்குண்ட் சாஹிப்பில் ரோப்வே திட்டத்தைக் கட்டமைப்பதாக இருந்தாலும், அல்லது ஆனந்த்பூர் சாஹிப்பில் உள்ள விரசத்-இ-கல்சா அருங்காட்சியகத்தை விரிவுபடுத்துவதாக இருந்தாலும், நாங்கள் புகழ்பெற்ற குரு பாரம்பரியத்திலிருந்து உத்வேகம் பெற்று இந்த வேலைகள் அனைத்தையும் முழு பக்தியுடன் முடித்துள்ளோம்.

நண்பர்களே,

முகலாயர்கள் தைரியமிக்க சாஹிப்சாதாக்களிடம் கூட எப்படிப்பட்ட கொடூரத்தின் உச்சத்தை காட்டினார்கள் என்பது நம் அனைவருக்கும் தெரியும். அந்தத் துணிச்சலான சாஹிப்சாதாக்கள் உயிருடன் செங்கல் சுவர் எழுப்பி அடைக்கப்படுவதை ஏற்றுக் கொண்டார்கள், ஆனால் கடமை மற்றும் தர்மத்தின் பாதையை கைவிடவில்லை. இந்தக் கொள்கைகளை கௌரவிக்கும் விதமாக, இப்போது நாங்கள் ஒவ்வொரு ஆண்டும் டிசம்பர் 26ஆம் தேதியை வீர் பால் திவாஸ் (வீரச் சிறுவர் தினமாக) கடைப்பிடிக்கிறோம்.

நண்பர்களே,

சேவை, தைரியம் மற்றும் உண்மை ஆகிய இலட்சியங்கள் நமது புதிய தலைமுறையின் சிந்தனைக்கு அடித்தளமாக அமைய வேண்டும் என்பதற்காக, சீக்கிய பாரம்பரியத்தின் வரலாறு மற்றும் குருமார்களின் போதனைகளையும் நாங்கள் தேசிய பாடத்திட்டத்தின் ஒரு பகுதியாக ஆக்கியுள்ளோம்

நண்பர்களே,

நீங்கள் அனைவரும் 'ஜோடா சாஹிப்'பைத் தரிசித்திருப்பீர்கள் என்று நம்புகிறேன். எனது அமைச்சரவை சகா ஹர்தீப் சிங் பூரி அவர்கள், இந்த முக்கியமான நினைவுச்சின்னங்களைப் பற்றி முதன்முதலில் என்னுடன் விவாதித்தபோது எனக்கு நினைவிருக்கிறது. குரு கோபிந்த் சிங்  மற்றும் மாதா சாஹிப் கவுர்  ஆகியோரின் புனித 'ஜோடா சாஹிப்'பை (பாதணிகளை) அவரது குடும்பத்தினர் கிட்டத்தட்ட முந்நூறு ஆண்டுகளாகப் பாதுகாத்து வந்துள்ளனர் என்று அவர் என்னிடம் கூறினார். மேலும், இந்த புனித பாரம்பரியத்தை நாடு முழுவதும் மற்றும் உலகெங்கிலும் உள்ள சீக்கிய சமூகத்திற்காக அர்ப்பணிக்க அவர்கள் இப்போது விரும்புவதாகவும் தெரிவித்தார்.

நண்பர்களே,

இந்த புனித ஜோடா சாஹிப், எதிர்கால சந்ததியினருக்காகப் பாதுகாக்கப்படும் பொருட்டு, முழு மரியாதை மற்றும் கண்ணியத்துடன் அறிவியல் சோதனைக்கு உட்படுத்தப்பட்டது. அனைத்து உண்மைகளையும் பரிசீலித்த பின்னர், இந்த புனித ஜோடா சாஹிப்பை தக்த் ஸ்ரீ பட்னா சாஹிப்புக்கு அர்ப்பணிக்கலாம் என்று நாங்கள் கூட்டாகத் தீர்மானித்தோம். அங்கேதான் குரு மஹாராஜ் தனது குழந்தைப் பருவத்தின் குறிப்பிடத்தக்க பகுதியைச் செலவிட்டார். கடந்த மாதம், இந்த புனித ஜோடா சாஹிப் புனிதப் பயணத்தின் ஒரு பகுதியாக டெல்லியிலிருந்து பட்னா சாஹிப்பிற்கு எடுத்துச் செல்லப்பட்டது. அங்கு, நானும் ஜோடா சாஹிப் முன்பு தலை வணங்கும் வாய்ப்பைப் பெற்றேன். இந்த சேவை, இந்த அர்ப்பணிப்பு மற்றும் இந்த புனித பாரம்பரியத்துடன் இணைந்திருக்கும் பாக்கியத்தை எனக்கு வழங்கியதற்காக, இதை நான் குருமார்களின் சிறப்பு அருளாகக் கருதுகிறேன்.

நண்பர்களே,

குரு தேக் பகதூர் சாஹிப் ஜியின் நினைவுகள், பாரதத்தின் கலாச்சாரம் எவ்வளவு பன்முகத்தன்மையுடனும், எவ்வளவு தாராள மனப்பான்மை கொண்டதாகவும், மனிதர்களை மையமாகக் கொண்டதாகவும் இருந்துள்ளது என்பதை நமக்குக் கற்பிக்கின்றன. அவர் 'சர்பத் தா பலா' (அனைவருக்கும் நன்மை) என்ற கொள்கையைத் தன் வாழ்வின் மூலம் நிரூபித்தார். இன்றைய நிகழ்வு இந்த நினைவுகளையும் போதனைகளையும் மதிக்கும் ஒரு தருணம் மட்டுமல்ல, நமது நிகழ்காலத்திற்கும் எதிர்காலத்திற்கும் ஒரு முக்கியமான உத்வேகமாகும்.

குரு சாஹிப் இவ்வாறு போதித்தார்: "ஜோ நர் துக் மை துக் நஹி மானை, சோயி பூரன் க்யானி" (जो नर दुख मै दुख नहीं मानै, सोई पूरन ज्ञानी)। இதன் பொருள், கடினமான சூழ்நிலைகளிலும் கலங்காமல் இருப்பவரே உண்மையான ஞானி, உண்மையான தேடுபவர் என்பதாகும். இந்த உத்வேகத்துடன், நாம் ஒவ்வொரு சவாலையும் கடந்து, நமது நாட்டை முன்னோக்கி எடுத்துச் செல்ல வேண்டும், பாரதத்தை ஒரு வளர்ந்த நாடாக மாற்ற வேண்டும்.

நண்பர்களே,

நாம் யாருக்கும் பயம் காட்டக் கூடாது, யாரைக் கண்டும் பயந்து வாழவும் கூடாது என்று நமக்குக் கற்றுக் கொடுத்தது குரு சாஹிப்தான். இந்த அச்சமின்மை சமூகத்தையும் நாட்டையும் பலப்படுத்துகிறது. இன்று, பாரதமும் இந்தக் கொள்கையைப் பின்பற்றுகிறது. நாங்கள் உலகிற்குச் சகோதரத்துவத்தைப் பற்றிப் பேசுகிறோம், அதே நேரத்தில் எங்கள் எல்லைகளையும் பாதுகாக்கிறோம். நாங்கள் அமைதியை விரும்புகிறோம், ஆனால் எங்கள் பாதுகாப்பில் சமரசம் செய்து கொள்வதில்லை. ஆபரேஷன் சிந்தூர் இதற்கு மிகச் சிறந்த எடுத்துக்காட்டு. புதிய பாரதம் பயங்கரவாதத்தைக் கண்டு அஞ்சுவதுமில்லை, நிற்பதுமில்லை, அதன் முன் குனிவதுமில்லை என்பதை உலகம் முழுவதும் பார்த்திருக்கிறது. இன்றைய பாரதம் முழு பலம், துணிச்சல் மற்றும் தெளிவுடன் முன்னேறிச் செல்கிறது.

நண்பர்களே,

இந்த முக்கியமான தருணத்தில், நமது சமூகம் மற்றும் இளைஞர்கள் பற்றிய ஒரு பிரச்சனையைக் குறித்தும் நான் பேச விரும்புகிறேன். இந்தப் பிரச்சனை குரு சாஹிப் கூட கவலை கொண்ட ஒன்றாகும். அது போதைப் பழக்கம் குறித்த பிரச்சனை. போதைப் பழக்கம் நமது இளைஞர்கள் பலரின் கனவுகளை ஆழ்ந்த நெருக்கடிக்குள் தள்ளிவிட்டது. இந்தப் பிரச்சனையை வேரிலிருந்து அகற்ற அரசாங்கம் எல்லா முயற்சிகளையும் மேற்கொண்டு வருகிறது. ஆனால் இது சமூகம் மற்றும் குடும்பங்களுக்கான போராட்டமும் கூட. இத்தகைய நேரத்தில், ஸ்ரீ குரு தேக் பகதூர் சாஹிப்பின் போதனைகள் உத்வேகத்தையும் தீர்வுகளையும் வழங்குகின்றன.

குரு சாஹிப் ஆனந்த்பூர் சாஹிப்பில் இருந்து தனது பயணத்தைத் தொடங்கியபோது, ஏராளமான கிராமங்களைச் சேர்ந்த சமூகத்தினருடன் இணைந்தார் என்பதை நாம் அனைவரும் அறிவோம். அவர் அவர்களின் பக்தியையும் நம்பிக்கையையும் பலப்படுத்தியது மட்டுமல்லாமல், இந்த பிராந்தியங்களில் வாழும் சமூகத்தின் நடத்தையையும் மாற்றினார். இந்தக் கிராம மக்கள் எல்லா வகையான போதைப்பொருட்களின் சாகுபடியையும் கைவிட்டு, தங்கள் எதிர்காலத்தை குரு சாஹிப்பின் பாதங்களில் அர்ப்பணித்தனர்.

சமூகம், குடும்பங்கள் மற்றும் இளைஞர்கள் குரு மகாராஜ் காட்டிய பாதையில் ஒன்றாக நடந்து, போதைப்பொருட்களுக்கு எதிராக ஒரு தீர்க்கமான போரை நடத்தினால், இந்தப் பிரச்சனையை முழுமையாக ஒழிக்க முடியும்.

நண்பர்களே,

ஸ்ரீ குரு தேக் பகதூர் சாஹிப்பின் போதனைகள் நமது நடத்தையில் அமைதியாகவும், நமது கொள்கைகளில் சமநிலையாகவும், நமது சமூகத்திற்குள் நம்பிக்கையாகவும் அமையட்டும். இதுவே இன்றைய நிகழ்வின் சாராம்சம். ஸ்ரீ குரு தேக் பகதூர் ஜியின் தியாக தினத்தை நாடு முழுவதும் கொண்டாடும் விதம், குருமார்களின் போதனைகள் நமது சமூக உணர்வில் இன்னும் எவ்வளவு உயிர்ப்புடன் உள்ளன என்பதைக் காட்டுகிறது. இந்தப் பெரிய கொண்டாட்டங்கள் நமது இளைய தலைமுறையினர் பாரதத்தை முன்னோக்கி எடுத்துச் செல்ல அர்த்தமுள்ள உத்வேகமாக மாறும் என்ற நம்பிக்கையுடன், உங்கள் அனைவருக்கும் எனது மனமார்ந்த வாழ்த்துகளை மீண்டும் ஒருமுறை தெரிவித்துக் கொள்கிறேன்.

கல்சா இறைவனுக்கே உரியது., வெற்றி இறைவனுக்கே உரியது..

***

(Release ID: 2194290) 

AD/VK/KR