ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ಕಾರ್ಯದರ್ಶಿ ಶ್ರೀ ಸಂಜಯ್ ಜಾಜು ಅವರು ಮುಂಬೈನ ಎನ್‌ ಎಫ್‌ ಡಿ ಸಿ ಸಂಕೀರ್ಣದಲ್ಲಿರುವ ಭಾರತೀಯ ಸೃಜನಶೀಲ ತಂತ್ರಜ್ಞಾನ ಸಂಸ್ಥೆಗೆ (ಐಐಸಿಟಿ) ಇಂದು ಭೇಟಿ ನೀಡಿ, ಸಂಸ್ಥೆಯ ಬೆಳವಣಿಗೆಯ ಪಥ ಮತ್ತು ವಿಸ್ತರಣಾ ಯೋಜನೆಗಳನ್ನು ಪರಿಶೀಲಿಸಿದರು.

ಶ್ರೀ ಜಾಜು ಅವರ ಅಧ್ಯಕ್ಷತೆಯಲ್ಲಿ ನಡೆದ ಈ ಪರಿಶೀಲನಾ ಸಭೆಯಲ್ಲಿ ಮಂಡಳಿಯ ಎಲ್ಲಾ ಸದಸ್ಯರು ಮತ್ತು ಉದ್ಯಮದ ಪ್ರತಿನಿಧಿಗಳು ಭಾಗವಹಿಸಿದ್ದರು. ಶ್ರೀ ಜಾಜು ಅವರು ಸಂಸ್ಥೆಯ ನಾಯಕತ್ವ ತಂಡದೊಂದಿಗೆ ಅದರ ಕಾರ್ಯತಂತ್ರದ ಮಾರ್ಗಸೂಚಿಯ ಬಗ್ಗೆ ವಿವರವಾದ ಚರ್ಚೆ ನಡೆಸಿದರು. ಸೃಜನಶೀಲ ಮತ್ತು ಡಿಜಿಟಲ್ ಆರ್ಥಿಕತೆಯ ವಿಕಸನಗೊಳ್ಳುತ್ತಿರುವ ಬೇಡಿಕೆಗಳನ್ನು ಪೂರೈಸಲು ಐಐಸಿಟಿಯ ಶೈಕ್ಷಣಿಕ ಕಾರ್ಯಕ್ರಮಗಳು ಮತ್ತು ಮೂಲಸೌಕರ್ಯಗಳನ್ನು ವಿಸ್ತರಿಸುವ ಬಗ್ಗೆ ಚರ್ಚೆಗಳು ಕೇಂದ್ರೀಕೃತವಾಗಿದ್ದವು. ಉದ್ಯಮ ಮತ್ತು ಶೈಕ್ಷಣಿಕ ವಲಯದ ನಡುವಿನ ಸಹಯೋಗವನ್ನು ಬಲಪಡಿಸುವ ಉದ್ದೇಶದ ಪ್ರಸ್ತುತ ಉಪಕ್ರಮಗಳನ್ನು ಸಹ ಅವರು ಪರಿಶೀಲಿಸಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಶ್ರೀ ಜಾಜು ಅವರು, “ಮೂಲಸೌಕರ್ಯ ಸಿದ್ಧವಾಗಿದೆ ಮತ್ತು ಸುಮಾರು 150 ವಿದ್ಯಾರ್ಥಿಗಳು ಈಗಾಗಲೇ ಐಐಸಿಟಿಯಲ್ಲಿ ತಮ್ಮ ಅಧ್ಯಯನ ಕಾರ್ಯಕ್ರಮಗಳನ್ನು ಪ್ರಾರಂಭಿಸಿದ್ದಾರೆ. ಜುಲೈ ವೇಳೆಗೆ 400 ವಿದ್ಯಾರ್ಥಿಗಳು, ಭೌತಿಕವಾಗಿ 20 ನವೋದ್ಯಮಗಳು ಮತ್ತು ವರ್ಚುವಲ್ ಮೋಡ್‌ ನಲ್ಲಿ ಇನ್ನೂ ಹೆಚ್ಚಿನ ಸಂಖ್ಯೆಯ ನವೋದ್ಯಮಗಳನ್ನು ಹೊಂದುವ ಗುರಿ ಹೊಂದಲಾಗಿದೆ. ಈ ಸಂಸ್ಥೆಯು ಚಲನಚಿತ್ರ ನಿರ್ಮಾಣ ಮತ್ತು ನಿರ್ಮಾಣೋತ್ತರ ಕೆಲಸಗಳಿಗಾಗಿ ಉನ್ನತ ಗುಣಮಟ್ಟದ ಮೂಲಸೌಕರ್ಯಗಳನ್ನು ಒದಗಿಸುತ್ತದೆ” ಎಂದು ತಿಳಿಸಿದರು. ಪ್ರಸ್ತುತ 11 ನವೋದ್ಯಮಗಳು ಐಐಸಿಟಿಯಲ್ಲಿ ಇನ್ಕ್ಯುಬೇಷನ್‌ ಗೆ ಒಳಪಟ್ಟಿವೆ ಎಂದು ಅವರು ಹೇಳಿದರು. ಗೋರೆಗಾಂವ್‌ ನ ಫಿಲ್ಮ್ ಸಿಟಿಯಲ್ಲಿ ಶೀಘ್ರದಲ್ಲೇ ಬೃಹತ್ ಕ್ಯಾಂಪಸ್ ಅಭಿವೃದ್ಧಿಪಡಿಸಲಾಗುವುದು ಮತ್ತು ಅಲ್ಲಿ 2028 ರಲ್ಲಿ ತರಗತಿಗಳು ಪ್ರಾರಂಭವಾಗುವ ನಿರೀಕ್ಷೆಯಿದೆ ಎಂದು ಶ್ರೀ ಜಾಜು ಹೇಳಿದರು.

ಸಭೆಯ ಚರ್ಚೆಗಳನ್ನು ಉಲ್ಲೇಖಿಸಿದ ಕಾರ್ಯದರ್ಶಿಯವರು, ಕೇಂದ್ರ ಬಜೆಟ್‌ ನಲ್ಲಿ ಘೋಷಿಸಲಾದ ವಿಷುವಲ್ ಗೇಮಿಂಗ್, ವಿ ಎಫ್‌ ಎಕ್ಸ್ ಮತ್ತು ಕಂಟೆಂಟ್ ಕ್ರಿಯೇಷನ್ ಲ್ಯಾಬ್‌ ಗಳ ಬಗ್ಗೆ ಉದ್ಯಮದೊಂದಿಗೆ ಚರ್ಚೆ ನಡೆಸಲಾಗಿದೆ ಎಂದು ತಿಳಿಸಿದರು. ಸೃಜನಶೀಲ ಆರ್ಥಿಕತೆಯನ್ನು ಮತ್ತಷ್ಟು ಬಲಪಡಿಸುವ ಬಗ್ಗೆ ಹೆಚ್ಚಿನ ಗಮನ ಹರಿಸಲಾಗಿದೆ ಎಂದು ಶ್ರೀ ಜಾಜು ಹೇಳಿದರು. ಕಳೆದ ವರ್ಷ, 'ವೇವ್ಸ್' ಶೃಂಗಸಭೆಯಲ್ಲಿ “ಆರೆಂಜ್ ಎಕಾನಮಿ” ಉಪಕ್ರಮದ ಅಡಿಯಲ್ಲಿ 2 ಮಿಲಿಯನ್ ಜನರನ್ನು ಕಂಟೆಂಟ್ ಕ್ರಿಯೇಷನ್ ಮತ್ತು ಸೃಜನಶೀಲ ಕ್ಷೇತ್ರಗಳೊಂದಿಗೆ ಜೋಡಿಸುವ ಗುರಿಯನ್ನು ನಿಗದಿಪಡಿಸಲಾಗಿತ್ತು. ಈ ಗುರಿಯನ್ನು ಸಾಧಿಸಲು ಅಗತ್ಯವಾದ ಕ್ರಮಗಳ ಬಗ್ಗೆಯೂ ಇಂದಿನ ಚರ್ಚೆಗಳು ಗಮನಹರಿಸಿದವು ಎಂದು ಶ್ರೀ ಜಾಜು ತಿಳಿಸಿದರು.

ದೇಶಾದ್ಯಂತ 15,000 ಪ್ರೌಢಶಾಲೆಗಳು ಮತ್ತು 500 ಕಾಲೇಜುಗಳಲ್ಲಿ ಕಂಟೆಂಟ್ ಕ್ರಿಯೇಟರ್‌ ಗಳ ಲ್ಯಾಬ್‌ ಗಳನ್ನು ಸ್ಥಾಪಿಸುವ ಪ್ರಸ್ತಾವನೆಯ ಕುರಿತಾದ ಚರ್ಚೆಯು ಈ ಭೇಟಿಯ ಪ್ರಮುಖ ಅಂಶವಾಗಿತ್ತು. ಈ ಉಪಕ್ರಮವು ಡಿಜಿಟಲ್ ಸೃಜನಶೀಲತೆಯನ್ನು ಉತ್ತೇಜಿಸುವ, ಮಾಧ್ಯಮ ಸಾಕ್ಷರತೆಯನ್ನು ಹೆಚ್ಚಿಸುವ ಮತ್ತು ಸೃಜನಶೀಲ ಆರ್ಥಿಕತೆಯಲ್ಲಿ ಉದಯೋನ್ಮುಖ ಅವಕಾಶಗಳಿಗೆ ಅನುಗುಣವಾಗಿ ವಿದ್ಯಾರ್ಥಿಗಳಿಗೆ ವಿಷಯ ನಿರ್ಮಾಣ ಕೌಶಲ್ಯಗಳನ್ನು ಒದಗಿಸುವ ಗುರಿಯನ್ನು ಹೊಂದಿದೆ.

ಶ್ರೀ ಜಾಜು ಅವರು ಸಂಸ್ಥೆಯ ತರಬೇತಿ ಕಾರ್ಯಕ್ರಮಗಳು, ನಿರ್ಮಾಣ ಮೂಲಸೌಕರ್ಯ ಮತ್ತು ನಾವೀನ್ಯತೆ ಕೇಂದ್ರಗಳು ಸೇರಿದಂತೆ ಅತ್ಯಾಧುನಿಕ ಸೌಲಭ್ಯಗಳನ್ನು ವೀಕ್ಷಿಸಿದರು. ಅವರು ಮಂಡಳಿಯ ಸದಸ್ಯರೊಂದಿಗೆ ಸಂವಾದ ನಡೆಸಿದರು ಮತ್ತು ಭಾರತದ ಸೃಜನಶೀಲ ಪ್ರತಿಭಾ ಪರಿಸರ ವ್ಯವಸ್ಥೆಯನ್ನು ಪೋಷಿಸುವಲ್ಲಿ ಐಐಸಿಟಿಯ ಪಾತ್ರದ ಬಗ್ಗೆ ಅಭಿಪ್ರಾಯಗಳನ್ನು ವಿನಿಮಯ ಮಾಡಿಕೊಂಡರು.

ಈ ಸಂಸ್ಥೆಯು ಪ್ರಸ್ತುತ ಅನಿಮೇಷನ್, ಗೇಮಿಂಗ್, ಪೋಸ್ಟ್-ಪ್ರೊಡಕ್ಷನ್ ಮತ್ತು ವಿಸ್ತೃತ ರಿಯಾಲಿಟಿ ಕ್ಷೇತ್ರಗಳಲ್ಲಿ 18 ವಿಶೇಷ ಕೋರ್ಸ್‌ ಗಳನ್ನು ನೀಡುತ್ತಿದೆ. ಇವುಗಳಲ್ಲಿ ಗೇಮಿಂಗ್‌ ನಲ್ಲಿ ಆರು ಕೋರ್ಸ್‌ ಗಳು, ಪೋಸ್ಟ್-ಪ್ರೊಡಕ್ಷನ್‌ ನಲ್ಲಿ ನಾಲ್ಕು ಮತ್ತು ಅನಿಮೇಷನ್, ಕಾಮಿಕ್ಸ್ ಮತ್ತು ಎಕ್ಸ್-ಆರ್ ನಲ್ಲಿ ಎಂಟು ಕೋರ್ಸ್‌ ಗಳು ಸೇರಿವೆ. ಪ್ರಮುಖ ಕಾರ್ಯಕ್ರಮಗಳಲ್ಲಿ ಅನಿಮೇಷನ್ ಫಿಲ್ಮ್ ಡಿಸೈನ್, ಇಂಟರ್ಯಾಕ್ಟಿವ್ ವಿಡಿಯೋ ಗೇಮ್ ವಿನ್ಯಾಸ ಮತ್ತು ಅಭಿವೃದ್ಧಿ ಹಾಗೂ ಆರ್ಟ್ ಅಂಡ್ ಸೈನ್ಸ್ ಆಫ್ ಪೋಸ್ಟ್ ಪ್ರೊಡಕ್ಷನ್ ಮತ್ತು ವಿಷುವಲ್ ಎಫೆಕ್ಟ್‌ ನಲ್ಲಿ 24 ತಿಂಗಳ ಪದವಿ ಡಿಪ್ಲೊಮಾಗಳು ಸೇರಿವೆ.

ಹೆಚ್ಚುವರಿಯಾಗಿ, ಐಐಸಿಟಿಯು 3ಡಿ ಕ್ಯಾರೆಕ್ಟರ್ ಡಿಸೈನ್, ವಿಷುವಲ್ ಎಫೆಕ್ಟ್ಸ್, ಸಿನಿಮ್ಯಾಟಿಕ್ ವರ್ಚುವಲ್ ರಿಯಾಲಿಟಿ ಫಿಲ್ಮ್ ಮೇಕಿಂಗ್, ಇ-ಸ್ಪೋರ್ಟ್ಸ್ ಮ್ಯಾನೇಜ್‌ಮೆಂಟ್ ಮತ್ತು ಚಲನಚಿತ್ರ ನಿರ್ಮಾಣದಲ್ಲಿ ಕೃತಕ ಬುದ್ಧಿಮತ್ತೆಯಂತಹ ಕ್ಷೇತ್ರಗಳಲ್ಲಿ ಮೂರರಿಂದ ಆರು ತಿಂಗಳ ಅವಧಿಯ ಅಲ್ಪಾವಧಿ ಡಿಪ್ಲೊಮಾ ಮತ್ತು ಪ್ರಮಾಣಪತ್ರ ಕೋರ್ಸ್‌ ಗಳನ್ನು ನೀಡುತ್ತದೆ.

ಡಿಜಿಟಲ್ ಸೃಜನಶೀಲತೆಯನ್ನು ಉತ್ತೇಜಿಸಲು ಮತ್ತು ಭಾರತದ ವೇಗವಾಗಿ ಬೆಳೆಯುತ್ತಿರುವ ಮಾಧ್ಯಮ ಮತ್ತು ಮನರಂಜನಾ ವಲಯವನ್ನು ಬೆಂಬಲಿಸಲು ಸಾಂಸ್ಥಿಕ ಚೌಕಟ್ಟುಗಳನ್ನು ಬಲಪಡಿಸಲು ಕೇಂದ್ರ ವಾರ್ತಾ ಮತ್ತು ಪ್ರಸಾರ ಸಚಿವಾಲಯವು ನೀಡುತ್ತಿರುವ ನಿರಂತರ ಒತ್ತು ಈ ಭೇಟಿಯಿಂದ ವ್ಯಕ್ತವಾಗಿದೆ.

ಎನ್‌ ಎಫ್‌ ಡಿ ಸಿ ಸಂಕೀರ್ಣದಲ್ಲಿ ಐಐಸಿಟಿಗೆ ಭೇಟಿ ನೀಡಿದ ಸಂದರ್ಭದಲ್ಲಿ, ಕೇಂದ್ರ ವಾರ್ತಾ ಮತ್ತು ಪ್ರಸಾರ ಕಾರ್ಯದರ್ಶಿಯವರು ನ್ಯಾಷನಲ್ ಮ್ಯೂಸಿಯಂ ಆಫ್ ಇಂಡಿಯನ್ ಸಿನಿಮಾ (ಎನ್‌ ಎಂ ಐ ಸಿ) ಗೂ ಭೇಟಿ ನೀಡಿದರು, ಶ್ರೀ ಜಾಜು ಅವರು ಅಲ್ಲಿಗೆ ಭೇಟಿ ನೀಡಿದ್ದ ಶಾಲಾ ಮಕ್ಕಳ ತಂಡದೊಂದಿಗೆ ಸಂವಾದ ನಡೆಸಿದರು.

*****