تجارت اور صنعت کی وزارت کے تحت زرعی اور پروسیسڈ فوڈ پروڈکٹس ایکسپورٹ ڈیولپمنٹ اتھارٹی (اے پی ای ڈی اے- اپیڈا) نے نئی دہلی کے بھارت منڈپم میں 10سے14 مارچ 2026 تک منعقدہ آہار 2026 کے 40 ویں ایڈیشن میں شرکت کی ۔ اے پی ای ڈی اے نے ایک پویلین پیش کیا جس میں بھارت کی زرعی اور پروسیسڈ خوراک کی برآمدی صلاحیتوں کو اجاگر کیا گیا ، جس میں برآمد کنندگان ، ریاستی نمائندوں اور صنعت کے متعلقین کو ایک مشترکہ پلیٹ فارم پر اکٹھا کیا گیا ۔

آہار-دی انٹرنیشنل فوڈ اینڈ ہاسپیٹیلیٹی میلے کے 40 ویں ایڈیشن کا افتتاح تجارت اور صنعت کے مرکزی وزیر جناب پیوش گوئل نے کیا ۔ انڈیا ٹریڈ پروموشن آرگنائزیشن (آئی ٹی پی او) کے زیر اہتمام اس تقریب کے تاریخی ایڈیشن میں اٹلی کو کنٹری پارٹنر کے طور پر پیش کیا گیا ہے ۔ افتتاحی تقریب میں اٹلی کے سفارت خانے کے سینئر عہدیداروں ، آئی ٹی پی او کے نمائندوں ، سرکاری عہدیداروں ، صنعت کے رہنماؤں ، نمائش کنندگان ،ہندوستان اور بیرون ملک کے نمائندوں نے شرکت کی ۔

اپنے کلیدی خطاب میں، تجارت و صنعت کے مرکزی وزیر جناب پیوش گوئل نے کہا کہ بھارت کا خوراک اور زراعت کا شعبہ عالمی مواقع کے ایک نئے مرحلے میں داخل ہو رہا ہے۔ انہوں نے نوٹ کیا کہ زرعی اور پروسیسڈ فوڈ مصنوعات کی برآمدات سالانہ 5 لاکھ کروڑ روپے سے تجاوز کر جانے کی بدولت بھارت آج دنیا کے سرکردہ برآمد کنندگان میں شامل ہے۔ گزشتہ ایک دہائی کے دوران، پروسیسڈ فوڈ، پھلوں، دالوں اور سبزیوں کی برآمدات میں نمایاں اضافہ ہوا ہے، جو ملک بھر کے کسانوں، ماہی گیروں اور فوڈ پروسیسرز کی طاقت اور تنوع کی عکاسی کرتا ہے۔

وزیر موصوف نے مزید کہا کہ بھارت کے آزادانہ تجارتی معاہدوں (ایف ٹی اے) کے پھیلتے ہوئے نیٹ ورک نے ملک کی غذائی اور زرعی برآمدات کے لیے اہم مواقع پیدا کیے ہیں۔ حالیہ برسوں میں، بھارت نے متحدہ عرب امارات، آسٹریلیا، سوئٹزرلینڈ اور دیگر ای ایف ٹی اے ممالک سمیت دیگر خطوں کے ساتھ تجارتی معاہدے کیے ہیں، جبکہ جاپان، کوریا، برطانیہ، عمان اور ماریشس جیسے شراکت داروں کے ساتھ روابط کو مضبوط کیا ہےاور کینیڈا اور یورپی یونین کے ساتھ بات چیت کو آگے بڑھایا ہے۔ انہوں نے نوٹ کیا کہ یہ معاہدے عالمی تجارت کے تقریباً دو تہائی حصے میں بھارتی مصنوعات کے لیے ترجیحی مارکیٹ تک رسائی کو ممکن بنا رہے ہیں، جس سے کسانوں، ایم ایس ایم ایزاور فوڈ پروسیسرز کے لیے برآمدات بڑھانے اور زیادہ قیمت والی منڈیوں تک رسائی کے نئے مواقع پیدا ہو رہے ہیں۔

اپیڈا پویلین کا افتتاح ایڈیشنل سکریٹری، محکمہ تجارت جناب نتن کمار یادو نے چیئرمین اپیڈا جناب ابھیشیک دیو اور منیجنگ ڈائریکٹر آئی ٹی پی او  جناب نیرج کھروال کے ہمراہ حکومتِ ہند، اپیڈا، شریک ریاستی حکومتوں کے سینئر حکام، برآمد کنندگان اور صنعت کے نمائندوں کی موجودگی میں کیا۔ یہ پویلین بھارت کے متنوع زرعی برآمدی ذخیرے کی نمائش اور گھریلو و بین الاقوامی منڈیوں کے برآمد کنندگان اور خریداروں کے درمیان بات چیت کی سہولت فراہم کرنے کے لیے ایک اہم پلیٹ فارم کے طور پر کام کرتا ہے۔

اس موقع پر کھیرے، کاجو، انناس اور انار کے بارے میں تحقیقی رپورٹیں بھی جاری کی گئیں جو اپیڈا نے آئی سی آر آئی ای آر کے تعاون سے بطور نالج پارٹنر تیار کی تھیں۔ یہ رپورٹیں سپلائی چین، برآمدی صلاحیت اور عالمی منڈیوں میں بھارت کی مسابقت کو بڑھانے کی حکمت عملیوں کے بارے میں بصیرت فراہم کرتی ہیں۔

اپیڈا نے انڈین انسٹی ٹیوٹ آف پیکیجنگ (آئی آئی پی) کے تعاون سے تیار کردہ منتخب علاقائی زرعی مصنوعات کے لیے پیکیجنگ ڈیزائن سلوشنز اور تکنیکی معیارات کے آغاز کا بھی اعلان کیا۔ اس اقدام کی توجہ خاص طور پر جی آئی ٹیگ شدہ اور نامیاتی مصنوعات پر ہے اور اس کا مقصد برآمدات کے لیے مصنوعات کے تحفظ، شیلف لائف اور مارکیٹ پریزنٹیشن کو بہتر بنانا ہے۔ اس اقدام کے تحت شامل مصنوعات میں کاربی آنگلونگ ادرک (آسام)، جی فور  مرچ اور جلگاؤں کا کیلا (مہاراشٹر)، آسام کاجی نیمو (آسام) اور پریاگ راج سرخا امرود (اتر پردیش) شامل ہیں۔

دو ہزار500 مربع میٹر کے نمائشی رقبے پر محیط، اپیڈا پویلین نے ملک بھر سے برآمد کنندگان، پیدا واری تنظیموں، اسٹارٹ اپس اور فوڈ پروسیسنگ کے اداروں کی نمائندگی کرنے والے 100 سے زائد نمائش کنندگان کی میزبانی کی۔ اس نمائش نے صنعت سے وابستہ افراد کو باہمی تعاون کے مواقع تلاش کرنے، مارکیٹ کے روابط کو وسعت دینے اور ویلیو ایڈڈ زرعی مصنوعات کو فروغ دینے کے مواقع فراہم کیے۔

پویلین میں باسمتی چاول، غیر باسمتی چاول، نامیاتی مصنوعات اور ابھرتی ہوئی نباتیاتی خوراک سمیت اہم برآمدی شعبوں کو نمایاں کیا گیا، جو عالمی زرعی خوراک کی منڈیوں میں بھارت کے بڑھتے ہوئے پورٹ فولیو کی عکاسی کرتے ہیں۔ نباتیاتی مصنوعات پر مبنی ایک خصوصی فیچر میں اختراعی اور پائیدار غذائی متبادلات کی نمائش کی گئی جو بین الاقوامی منڈیوں میں مقبولیت حاصل کر رہے ہیں۔

اپیڈا کے رقبے کے اندر کئی ریاستی پویلین بھی نمایاں تھے جن میں آندھرا پردیش، آسام، بہار، دہلی، گجرات، ہریانہ، کرناٹک، کیرالہ، مدھیہ پردیش، مہاراشٹر، میگھالیہ، پنجاب، راجستھان، تمل ناڈو، تلنگانہ، اتر پردیش، اتراکھنڈ اور مغربی بنگال کی شرکت شامل تھی۔ ان پویلینز نے علاقائی مخصوص مصنوعات، روایتی اشیائے خوردونوش اور برآمد کے لیے تیار زرعی پیداوار کی نمائش کی، جو بھارت کے زرعی خوراک کے شعبے کے تنوع اور طاقت کی عکاسی کرتی ہے۔

آہار 2026 میں اپیڈا  کی شرکت نے صنعت کی بڑے پیمانے پر توجہ حاصل کی، جہاں پانچ روزہ تقریب کے دوران ایک لاکھ سے زائد زائرین آئے۔ اس نمائش نے برآمد کنندگان، فوڈ پروسیسرز اور زرعی کاروباری افرادکے لیے بھارت اور بیرون ملک کے خریداروں، تقسیم کاروں اور ادارہ جاتی شراکت داروں کے ساتھ بات چیت کے مواقع پیدا کیے۔

اپیڈا پویلین کی ایک اہم خاصیت ایک مشہور شیف کی جانب سے لائیو سیمپلنگ سیشنز کا انعقاد تھا، جس میں بھارتی زرعی اور پروسیسڈ فوڈ مصنوعات کا استعمال کرتے ہوئے جدید ترکیبیں اور ان کے استعمال کے طریقے پیش کیے گئے۔ پویلین میں باسمتی چاول، غیر باسمتی چاول، نامیاتی مصنوعات اور نباتیاتی خوراک کی مصنوعات کی خصوصی نمائش بھی کی گئی، جس سے خریداروں اور زائرین کو بھارت کی برآمد کے لیے تیار مصنوعات کو جاننے کا موقع ملا۔

آہار جنوبی ایشیا میں فوڈ اور ہاسپیٹلٹی انڈسٹری کے لیے سب سے بڑے ’بی ٹو بی ‘پلیٹ فارمز میں سے ایک ہے، جو زرعی خوراک کی ویلیو چین میں بزنس نیٹ ورکنگ، مصنوعات کی تشہیر اور معلومات کے تبادلے کے لیے ایک اہم ذریعہ فراہم کرتا ہے۔

آہار 2026 میں اپنی شرکت کے ذریعے، اپیڈا نے اعلیٰ معیار کی زرعی پیداوار، ویلیو ایڈیشن اور برآمدی بنیادوں پر قائم سپلائی چینز میں بھارت کی بڑھتی ہوئی صلاحیتوں کا مظاہرہ کیا۔ اس پویلین نے برآمد کنندگان، اسٹارٹ اپس، ریاستی ایجنسیوں اور پیدا واری تنظیموں کو ایک جگہ جمع کیااور بین الاقوامی منڈیوں میں بھارت کی موجودگی کو وسعت دینے کے مواقع کو اجاگر کیا۔

********

ش ح۔م م۔ص ج

U. No. 3752