ମୋର କ୍ୟାବିନେଟ ସହଯୋଗୀ ଶ୍ରୀ ପୀୟୁଷ ଗୋୟଲ ଜୀ, ସାରା ଦେଶରୁ ଆସିଥିବା ଷ୍ଟାର୍ଟଅପ୍ ଇକୋସିଷ୍ଟମର ବନ୍ଧୁମାନେ, ଅନ୍ୟ ସମ୍ମାନିତ ଅତିଥିଗଣ, ମହିଳା ଏବଂ ସଜ୍ଜନମଣ୍ଡଳୀ !

ଆଜି, ଆମେ ସମସ୍ତେ ଏକ ବିଶେଷ ଅବସରରେ ଏଠାରେ ଏକତ୍ରିତ ହୋଇଛୁ। ଜାତୀୟ ଷ୍ଟାର୍ଟଅପ୍ ଦିବସର ଏହି ଅବସରରେ, ଷ୍ଟାର୍ଟଅପ୍ ପ୍ରତିଷ୍ଠାତାମାନଙ୍କର ଏବଂ ନବସୃଜନକାରୀଙ୍କର ଏହି ସମାବେଶ ସହିତ, ମୁଁ ମୋ ସାମନାରେ ଏକ ନୂତନ ଏବଂ ବିକଶିତ ଭାରତର ଭବିଷ୍ୟତ ଦେଖୁଛି।

ଏବେ, ମୁଁ ଷ୍ଟାର୍ଟଅପ୍ ଜଗତର କିଛି ଲୋକଙ୍କୁ ଭେଟିବାର, ସେମାନଙ୍କର ସଫଳତା ଏବଂ ପରୀକ୍ଷଣ ଦେଖିବାର ଏବଂ ସେମାନଙ୍କ ମଧ୍ୟରୁ କିଛିବ୍ୟକ୍ତିଙ୍କ କଥା ଶୁଣିବାର ସୁଯୋଗ ପାଇଲି। କୃଷି, ଫିନଟେକ୍, ଗତିଶୀଳତା, ସ୍ୱାସ୍ଥ୍ୟ ଏବଂ ସ୍ଥାୟୀତ୍ୱ କ୍ଷେତ୍ରରେ କାମ କରୁଥିବା ଷ୍ଟାର୍ଟଅପ୍ ଗୁଡିକର ଚିନ୍ତାଧାରା କେବଳ ମୋ ପାଇଁ ନୁହେଁ, ବରଂ ସମସ୍ତଙ୍କ ପାଇଁ ପ୍ରଭାବଶାଳୀ। ତଥାପି, ଯାହା ମୋତେ ସବୁଠାରୁ ଅଧିକ ପ୍ରଭାବିତ କରିଥିଲା, ତାହା ଥିଲା ଆପଣଙ୍କର ଆତ୍ମବିଶ୍ୱାସ ଏବଂ ଆପଣ ମାନଙ୍କ ମଧ୍ୟରେ ରହିଥିବା ମହତ୍ୱାକାଂକ୍ଷା।

ଦଶ ବର୍ଷ ପୂର୍ବେ, ବିଜ୍ଞାନ ଭବନରେ, ଏହି କାର୍ଯ୍ୟକ୍ରମ ୫୦୦ - ୭୦୦ ଯୁବକଙ୍କୁ ନେଇ ଆରମ୍ଭ ହୋଇଥିଲା। ରିତେଶ ଆଜି ଏଠାରେ ବସିଛନ୍ତି - ତାଙ୍କ ଯାତ୍ରା ସେଠାରୁ ଆରମ୍ଭ ହୋଇଥିଲା। ସେହି ସମୟରେ, ମୁଁ ଷ୍ଟାର୍ଟଅପ୍ ଜଗତରେ ପ୍ରବେଶ କରୁଥିବା ଲୋକଙ୍କ ଅଭିଜ୍ଞତା ଶୁଣୁଥିଲି। ମୋର ଜଣେ ଯୁବତୀଙ୍କ କଥା ମନେ ଅଛି, ଯିଏ ସେ ସେହି ଦିନ ବିଜ୍ଞାନ ଭବନରେ ଷ୍ଟାଟଅପ୍ କ୍ଷେତ୍ରରେ ପ୍ରବେଶ କରିବା ନେଇ ତାଙ୍କ ଅଭିଜ୍ଞତା ସମ୍ପର୍କରେ କହିଥିଲେ। ଏହି କ୍ଷେତ୍ରରେ ପ୍ରବେଶ କରିବା ପାଇଁ ତାଙ୍କର କର୍ପୋରେଟ୍ ଚାକିରି ଛାଡ଼ି ଦେଇଥିଲେ। ସେ ତାଙ୍କ ମାଆଙ୍କୁ ଭେଟିବାକୁ କୋଲକାତା ଯାଇଥିଲେ ଏବଂ ତାଙ୍କୁ କହିଥିଲେ, "ମୁଁ ମୋର ଚାକିରି ଛାଡ଼ି ଦେଇଛି।" ତାଙ୍କ ମାଆ ପଚାରିଲେ, "କାହିଁକି?" ସେ କହିଥିଲେ, "ମୁଁ ଏବେ ଏକ ଷ୍ଟାର୍ଟଅପ୍ କରିବାକୁ ଚାହୁଁଛି।" ଏବଂ ତାଙ୍କ ମାଆ ଉତ୍ତର ଦେଇଥିଲେ, "ଏହା ଧ୍ୱଂସ ପଥରେ ତୁମକୁ ନେଇଯିବ - ତୁମେ କାହିଁକି ବିନାଶର ରାସ୍ତାରେ ଯାଉଛ?"

ସେତେବେଳେ ଷ୍ଟାର୍ଟଅପ୍ ସମ୍ପର୍କରେ ଆମ ଦେଶରେ ଏହି ମାନସିକତା ଥିଲା। ଏବଂ ଆଜି ଦେଖନ୍ତୁ, ଆମେ କେତେ ଦୂର ଆସିଛୁ - ବିଜ୍ଞାନ ଭବନରୁ ଭାରତ ମଣ୍ଡପମ ପର୍ଯ୍ୟନ୍ତ, ଆଉ କୌଣସି ସ୍ଥାନ ଖାଲି ନାହିଁ! ଏହା ମୋର ସୌଭାଗ୍ୟ ଯେ , ମାତ୍ର ଗୋଟିଏ ସପ୍ତାହ ମଧ୍ୟରେ, ମୁଁ ଦେଶର ଯୁବକମାନଙ୍କୁ ଦୁଇଥର ଭେଟିବାର ସୁଯୋଗ ପାଇଛି। ଜାନୁଆରୀ ୧୨ ତାରିଖରେ ଜାତୀୟ ଯୁବ ଦିବସରେ, ମୁଁ ସାରା ଦେଶର ପ୍ରାୟ ୩,୦୦୦ ଯୁବକଙ୍କୁ ଶୁଣିବା ଏବଂ ସେମାନଙ୍କ ସହିତ ବସିବା ଆଲୋଚନା କରିବାରେ ଅଢ଼େଇ ଘଣ୍ଟା ବିତାଇଲି। ଏବଂ ଆଜି, ମୁଁ ଆପଣ ସମସ୍ତଙ୍କ କଥା ଶୁଣିବା ଏବଂ ମୋ ଦେଶର ଯୁବକମାନଙ୍କର ଶକ୍ତି ଦେଖିବାର ସୌଭାଗ୍ୟ ପାଇଛି।

ବନ୍ଧୁଗଣ,

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେ ପ୍ରକୃତ ସମସ୍ୟାର ସମାଧାନ ଉପରେ ଭାରତର ଯୁବପିଢ଼ିର ଧ୍ୟାନ ରହିଛି। ଆମର ଯୁବ ଉଦ୍ଭାବକ, ଯେଉଁମାନେ ନୂତନ ସ୍ୱପ୍ନ ଦେଖିବାର ସାହସ କରିଛନ୍ତି - ମୁଁ ସେମାନଙ୍କ ପ୍ରତ୍ୟେକଙ୍କୁ ଗଭୀର ଭାବରେ ପ୍ରଶଂସା କରୁଛି।

ବନ୍ଧୁଗଣ,

ଆଜି ଆମେ ଷ୍ଟାର୍ଟଅପ୍ ଇଣ୍ଡିଆର ଦଶ ବର୍ଷର ମାଇଲଖୁଣ୍ଟ ପାଳନ କରୁଛୁ। ଏହି ଦଶ ବର୍ଷର ଯାତ୍ରା କେବଳ ଏକ ସରକାରୀ ଯୋଜନାର ସଫଳତାର କାହାଣୀ ନୁହେଁ। ଏହା ଆପଣଙ୍କ ପରି ହଜାର ହଜାର ଏବଂ ଲକ୍ଷ ଲକ୍ଷ ଲୋକଙ୍କର ସ୍ୱପ୍ନର ଯାତ୍ରା। ଏହା ଅଗଣିତ କଳ୍ପନାକୁ ବାସ୍ତବରେ ପରିଣତ କରିବାର କାହାଣୀ। ଦଶ ବର୍ଷ ପୂର୍ବେ ପରିସ୍ଥିତି କ'ଣ ଥିଲା ତାହା ମନେ ପକାନ୍ତୁ - ବ୍ୟକ୍ତିଗତ ପ୍ରୟାସ ଏବଂ ନବସୃଜନ ପାଇଁ କ୍ୱଚିତ୍ କୌଣସି ସୁଯୋଗ ଥିଲା। ଆମେ ସେହି ପରିସ୍ଥିତିକୁ ଚ୍ୟାଲେଞ୍ଜ କରିଥିଲୁ, ଆମେ ଷ୍ଟାର୍ଟଅପ୍ ଇଣ୍ଡିଆ କାର୍ଯ୍ୟକ୍ରମ ଆରମ୍ଭ କରିଥିଲୁ। ଆମେ ଆମର ଯୁବପିଢ଼ିଙ୍କୁ ଏକ ଖୋଲା ଆକାଶ ଦେଇଥିଲୁ, ଏବଂ ଆଜି ଫଳାଫଳ ଆମ ସାମନାରେ ଅଛି। ମାତ୍ର ଦଶ ବର୍ଷ ମଧ୍ୟରେ, ଷ୍ଟାର୍ଟଅପ୍ ଇଣ୍ଡିଆ ମିଶନ ଏକ ବିପ୍ଳବରେ ପରିଣତ ହୋଇଛି। ଭାରତ ଆଜି ବିଶ୍ୱର ତୃତୀୟ ବୃହତ୍ତମ ଷ୍ଟାର୍ଟଅପ୍ ଇକୋସିଷ୍ଟମ। ଦଶ ବର୍ଷ ପୂର୍ବେ, ଦେଶରେ ୫୦୦ ରୁ କମ୍ ଷ୍ଟାର୍ଟଅପ୍ ଥିଲା; ଆଜି, ଏହି ସଂଖ୍ୟା ୨୦୦,୦୦୦ ରୁ ଅଧିକ ହୋଇଛି। ୨୦୧୪ ରେ, ଭାରତରେ କେବଳ ଚାରୋଟି ୟୁନିକର୍ଣ୍ଣ ଥିଲା; ଆଜି, ଭାରତରେ ପ୍ରାୟ ୧୨୫ ସକ୍ରିୟ ୟୁନିକର୍ଣ୍ଣ ଅଛି। ବିଶ୍ୱ ଏହି ସଫଳତାର କାହାଣୀକୁ ଆଶ୍ଚର୍ଯ୍ୟର ସହିତ ଦେଖୁଛି। ଆଗାମୀ ସମୟରେ, ଯେତେବେଳେ ଭାରତର ଷ୍ଟାର୍ଟଅପ୍‌ ଗୁଡ଼ିକର ଯାତ୍ରା ବିଷୟରେ ଆଲୋଚନା କରାଯିବ, ଏହି ହଲରେ ବସିଥିବା ଅନେକ ଯୁବକ ନିଜେ ଜଣେ ଜଣେ ଚମତ୍କାର କେସ୍ ଷ୍ଟଡି ହୋଇଯିବେ।

ବନ୍ଧୁଗଣ,

ଷ୍ଟାର୍ଟଅପ୍ ଇଣ୍ଡିଆର ଗତି ନିରନ୍ତର ଦ୍ରୁତ ଗତିରେ ବୃଦ୍ଧି ପାଉଥିବା ଦେଖି ମୁଁ ବହୁତ ଖୁସି। ଆଜିର ଷ୍ଟାର୍ଟଅପ୍‌ଗୁଡ଼ିକ ୟୁନିକର୍ଣ୍ଣ ହେବାରେ ଲାଗିଛି, ୟୁନିକର୍ଣ୍ଣଗୁଡ଼ିକ ସେମାନଙ୍କର ଆଇପିଓ ଲଞ୍ଚ କରୁଛନ୍ତି, ଏବଂ ଅଧିକରୁ ଅଧିକ ନିଯୁକ୍ତି ସୃଷ୍ଟି ହେଉଛି। ଗତ ବର୍ଷ, ୨୦୨୫ ମସିହାରେ, ପ୍ରାୟ ୪୪,୦୦୦ ନୂତନ ଷ୍ଟାର୍ଟଅପ୍ ପଞ୍ଜିକୃତ ହୋଇଥିଲେ। ଷ୍ଟାର୍ଟଅପ୍ ଇଣ୍ଡିଆ ଆରମ୍ଭ ହେବା ପରଠାରୁ ଏହା କୌଣସି ଏକ ବର୍ଷରେ ସବୁଠାରୁ ବଡ଼ ଲମ୍ଫ। ଏହି ସଂଖ୍ୟାଗୁଡ଼ିକ ପ୍ରମାଣିତ କରୁଛି ଯେ ଆମର ଷ୍ଟାର୍ଟଅପ୍ ଇକୋସିଷ୍ଟମ୍ କିପରି ନବସୃଜନ ଏବଂ ଅଭିବୃଦ୍ଧିକୁ ଆଗେଇ ନେଉଛି।

ବନ୍ଧୁଗଣ,

ମୁଁ ଖୁସି ଯେ ଷ୍ଟାର୍ଟଅପ୍ ଇଣ୍ଡିଆ ଦେଶରେ ଏକ ନୂତନ ସଂସ୍କୃତିକୁ ଜନ୍ମ ଦେଇଛି। ପୂର୍ବରୁ, ନୂତନ ବ୍ୟବସାୟ ଏବଂ ଉଦ୍ୟମ ମୁଖ୍ୟତଃ ବଡ଼ ଶିଳ୍ପ ପରିବାରର ପିଲାମାନଙ୍କ ଦ୍ୱାରା ଆରମ୍ଭ କରାଯାଉଥିଲା, କାରଣ କେବଳ ସେମାନଙ୍କୁ ପାଣ୍ଠି ଏବଂ ସହାୟତା ସହଜରେ ମିଳୁଥିଲା। ମଧ୍ୟବିତ୍ତ ଏବଂ ଗରିବ ପରିବାରର ଅଧିକାଂଶ ପିଲା କେବଳ ଚାକିରିର ସ୍ୱପ୍ନ ଦେଖିପାରୁଥିଲେ। କିନ୍ତୁ ଷ୍ଟାର୍ଟଅପ୍ ଇଣ୍ଡିଆ କାର୍ଯ୍ୟକ୍ରମ ଏହି ମାନସିକତାକୁ ବଦଳାଇ ଦେଇଛି। ଏବେ, ଟାୟାର - ୨ ଏବଂ ଟାୟାର - ୩ ସହରରୁ ଯୁବକମାନେ, ଏପରିକି ଗାଁରୁ ମଧ୍ୟ, ନିଜର ଷ୍ଟାର୍ଟଅପ୍ ଖୋଲୁଛନ୍ତି। ଏବଂ ଏହି ଯୁବକମାନେ ସବୁଠାରୁ ଗୁରୁତ୍ୱପୂର୍ଣ୍ଣ ତୃଣମୂଳ ସ୍ତରର ସମସ୍ୟାର ସମାଧାନ ପାଇଁ ପ୍ରୟାସ କରୁଛନ୍ତି। ସମାଜ ଏବଂ ଦେଶ ପାଇଁ କିଛି କରିବାର ଏହି ମନୋଭାବ ମୋ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।

ବନ୍ଧୁଗଣ,

ଏହି ପରିବର୍ତ୍ତନରେ, ଦେଶର ଝିଅମାନେ ଏକ ପ୍ରମୁଖ ଭୂମିକା ଗ୍ରହଣ କରିଛନ୍ତି। ଆଜି, ୪୫ ପ୍ରତିଶତରୁ ଅଧିକ ସ୍ୱୀକୃତିପ୍ରାପ୍ତ ଷ୍ଟାର୍ଟଅପ୍‌ରେ, ଅତି କମରେ ଜଣେ ମହିଳା ନିର୍ଦ୍ଦେଶକ କିମ୍ବା ଅଂଶୀଦାର ଅଛନ୍ତି। ମହିଳାମାନଙ୍କ ନେତୃତ୍ୱରେ ଷ୍ଟାର୍ଟଅପ୍ ପାଣ୍ଠି ଦୃଷ୍ଟିରୁ, ଭାରତ ବିଶ୍ୱର ଦ୍ୱିତୀୟ ବୃହତ୍ତମ ଇକୋସିଷ୍ଟମରେ ପରିଣତ ହୋଇଛି। ଷ୍ଟାର୍ଟଅପ୍‌ଗୁଡ଼ିକର ଏହି ଅନ୍ତର୍ଭୁକ୍ତ ଗତି ଭାରତର କ୍ଷମତାକୁ ଆହୁରି ସୁଦୃଢ଼ କରୁଛି।

ବନ୍ଧୁଗଣ,

ଆଜି, ଦେଶ ଷ୍ଟାର୍ଟଅପ୍ ବିପ୍ଳବରେ ନିଜର ଭବିଷ୍ୟତ ଦେଖୁଛି। ଯଦି ମୁଁ ଆପଣଙ୍କୁ ପଚାରେ ଯେ, ଷ୍ଟାର୍ଟଅପ୍‌ଗୁଡ଼ିକ ଏତେ ଗୁରୁତ୍ୱପୂର୍ଣ୍ଣ କାହିଁକି, ତେବେ ହୁଏତ ଆପଣମାନଙ୍କ ସମସ୍ତଙ୍କର ଉତ୍ତର ଭିନ୍ନ ଭିନ୍ନ ହେବ। କେତେକ କହିବେ ଯେ ଭାରତ ବିଶ୍ୱର ସବୁଠାରୁ ଯୁବ ଦେଶ, ଏବଂ ତେଣୁ ଷ୍ଟାର୍ଟଅପ୍‌ଗୁଡ଼ିକ ପାଇଁ ସୁଯୋଗ ରହିଛି। ଅନ୍ୟମାନେ କହିବେ ଯେ ଭାରତ ହେଉଛି ସବୁଠାରୁ ଦ୍ରୁତ ଗତିରେ ବୃଦ୍ଧି ପାଉଥିବା ପ୍ରମୁଖ ଅର୍ଥନୀତି, ଏବଂ ତେଣୁ ଷ୍ଟାର୍ଟଅପ୍‌ଗୁଡ଼ିକ ପାଇଁ ନୂତନ ସୁଯୋଗ ରହିଛି। କେତେକ କହିବେ ଯେ ଭାରତ ବିଶ୍ୱସ୍ତରୀୟ ଭିତ୍ତିଭୂମି ନିର୍ମାଣ କରୁଛି, ନୂତନ କ୍ଷେତ୍ର ଉଭା ହେଉଛି, ଏବଂ ତେଣୁ ଷ୍ଟାର୍ଟଅପ୍‌ ବ୍ୟବସ୍ଥା ଆଗକୁ ବଢ଼ୁଛି। ଏହି ସମସ୍ତ ଉତ୍ତର, ଏହି ସମସ୍ତ ତଥ୍ୟ ଠିକ୍। କିନ୍ତୁ ଯାହା ମୋ ହୃଦୟକୁ ସ୍ପର୍ଶ କରେ ତାହା ହେଉଛି ଷ୍ଟାର୍ଟଅପ୍କୁ ନେଇ ଭାବନା। ମୋ ଦେଶର ଯୁବପିଢ଼ି ଆଜି ଏକ ଆରାମଦାୟକ କ୍ଷେତ୍ରରେ ଜୀବନ ବିତାଇବାକୁ ପ୍ରସ୍ତୁତ ନୁହଁନ୍ତି। ସେମାନେ ଏକ ଚିରାଚରିତ ପଥରେ ଚାଲିବାକୁ ଗ୍ରହଣ କରନ୍ତି ନାହିଁ। ସେମାନେ ନିଜ ପାଇଁ ନୂତନ ରାସ୍ତା ତିଆରି କରିବାକୁ ଚାହାଁନ୍ତି, କାରଣ ସେମାନେ ନୂତନ ଗନ୍ତବ୍ୟସ୍ଥଳ, ନୂତନ ମାଇଲଖୁଣ୍ଟ ଖୋଜନ୍ତି।

ବନ୍ଧୁଗଣ,

ଏବଂ ନୂତନ ଲକ୍ଷ୍ୟସ୍ଥଳ କିପରି ହାସଲ କରାଯିବ ? ସେଥିପାଇଁ, ଆମକୁ କଠିନ ପରିଶ୍ରମର ପରାକାଷ୍ଠା ପ୍ରଦର୍ଶନ କରିବାକୁ ପଡିବ। ସେଥିପାଇଁ କୁହାଯାଏ: ଉଦ୍ୟମେନ ହି ସିଦ୍ଧ୍ୟନ୍ତି , କାର୍ଯ୍ୟାଣି ନ ମନୋରଥୈଃ । କେବଳ ଇଚ୍ଛାପୂର୍ଣ୍ଣ ଚିନ୍ତାଧାରା ଦ୍ୱାରା ନୁହେଁ, ଉଦ୍ୟୋଗ ମାଧ୍ୟମରେ କାମ ସମ୍ପନ୍ନ ହୁଏ। ଏବଂ ଉଦ୍ୟୋଗର ପ୍ରଥମ ସର୍ତ୍ତ ହେଉଛି ସାହସ। ଆଜି ଆପଣ ଯେଉଁଠାରେ ଅଛନ୍ତି ସେଠାରେ ପହଞ୍ଚିବା ପାଇଁ, ଆପଣ ନିଶ୍ଚିତ ଭାବରେ ଅପାର ସାହସ ଦେଖାଇଥିବେ, ଆପଣ ନିଶ୍ଚିତ ଭାବରେ ବହୁତ କିଛି ବାଜି ଲଗାଇଥିବେ। ପୂର୍ବରୁ, ଦେଶରେ ଆହ୍ଵାନକୁ ଗ୍ରହଣ କରିବାକୁ ନିରୁତ୍ସାହିତ କରାଯାଉଥିଲା, କିନ୍ତୁ ଆଜି ଆହ୍ଵାନକୁ ଗ୍ରହଣ କରିବା ମୁଖ୍ୟଧାରାରେ ପରିଣତ ହୋଇଛି। ଯେଉଁମାନେ ମାସିକ ଦରମା ବାହାରେ ଚିନ୍ତା କରନ୍ତି ସେମାନଙ୍କୁ କେବଳ ଗ୍ରହଣ କରାଯାଏ ନାହିଁ ବରଂ ସମ୍ମାନ କରାଯାଏ। ଯେଉଁ ଧାରଣାଗୁଡ଼ିକୁ ପୂର୍ବରୁ ସୀମିତ ବୋଲି ବିବେଚନା କରାଯାଉଥିଲା ତାହା ଏବେ ଫ୍ୟାଶନେବଲ୍ ହୋଇଯାଉଛି।

ବନ୍ଧୁଗଣ,

ମୁଁ ସର୍ବଦା ଆହ୍ଵାନ ଗ୍ରହଣ କରିବା ଉପରେ ବିଶେଷ ଗୁରୁତ୍ୱ ଦେଇଆସିଛି, କାରଣ ଏହା ମୋର ବହୁ ଦିନ ଧରି ଅଭ୍ୟାସ ହୋଇଆସିଛି। ଯେଉଁ କାର୍ଯ୍ୟଗୁଡ଼ିକୁ କେହି ଗ୍ରହଣ କରିବାକୁ ପ୍ରସ୍ତୁତ ନୁହଁନ୍ତି, ଯେଉଁ କାର୍ଯ୍ୟକୁ ସରକାରମାନେ ଦଶନ୍ଧି ଧରି ନିର୍ବାଚନ କିମ୍ବା କ୍ଷମତା ହାରିବା ଭୟରେ ଏଡ଼ାଇ ଦେଇଆସିଥିଲେ - ସେହି କାର୍ଯ୍ୟଗୁଡ଼ିକୁ, ଯାହାକୁ ଲୋକମାନେ "ଅତ୍ୟଧିକ ରାଜନୈତିକ ବିପଦ" ବୋଲି କହିଥାନ୍ତି, ମୁଁ ସର୍ବଦା ମୋର ଦାୟିତ୍ୱ ଭାବେ ଗ୍ରହଣ କରିବାକୁ ବିଚାର କରିଛି। ଠିକ୍ ଆପଣଙ୍କ ପରି, ମୁଁ ବିଶ୍ୱାସ କରେ ଯେ ଦେଶ ପାଇଁ ଯେଉଁ କାର୍ଯ୍ୟ ଆବଶ୍ୟକ ତାହା କେହି ଜଣେ କରିବା ଉଚିତ, ଏବଂ କେହି ଜଣେ ଆହ୍ଵାନକୁ ଗ୍ରହଣ କରିବା ଉଚିତ। ଯଦି କ୍ଷତି ହୁଏ, ତେବେ ତାହା ମୋର ହେବ; କିନ୍ତୁ ଯଦି ଲାଭ ହୁଏ, ତେବେ ମୋ ଦେଶର ଲକ୍ଷ ଲକ୍ଷ ପରିବାର ଲାଭବାନ ହେବେ।

ବନ୍ଧୁଗଣ,

ଗତ ଦଶ ବର୍ଷ ମଧ୍ୟରେ, ଦେଶ ଏକ ଏପରି ଇକୋସିଷ୍ଟମ ନିର୍ମାଣ କରିଛି ଯାହା ନବସୃଜନକୁ ପ୍ରୋତ୍ସାହିତ କରେ। ଆମେ ସ୍କୁଲଗୁଡ଼ିକରେ ଅଟଳ ଟିଙ୍କରିଂ ଲ୍ୟାବ୍ ପ୍ରତିଷ୍ଠା କରିଥିଲୁ ଯାହା ଦ୍ୱାରା ପିଲାମାନେ ନବସୃଜନର ମନୋଭାବ ବିକଶିତ କରିପାରିବେ। ଆମେ ହାକାଥନ୍ ଆରମ୍ଭ କରିଥିଲୁ, ଯାହା ଦ୍ୱାରା ଆମର ଯୁବପିଢ଼ି ଦେଶର ସମସ୍ୟାର ସମାଧାନ ପ୍ରଦାନ କରିପାରିବେ। ଆମେ ଇନକ୍ୟୁବେସନ୍ କେନ୍ଦ୍ର ସୃଷ୍ଟି କରିଥିଲୁ ଯାହା ଦ୍ୱାରା ସମ୍ବଳ ଅଭାବରୁ ଚିନ୍ତାଧାରା ମରି ନଯାଏ।

ବନ୍ଧୁଗଣ,

ଗୋଟିଏ ସମୟରେ, ଜଟିଳ ଅନୁପାଳନ, ଦୀର୍ଘ ଅନୁମୋଦନ ଚକ୍ର ଏବଂ ଇନ୍ସପେକ୍ଟର ରାଜର ଭୟ ନବସୃଜନ ପାଇଁ ସବୁଠାରୁ ବଡ଼ ପ୍ରତିବନ୍ଧକ ଥିଲା। ସେଥିପାଇଁ ଆମେ ବିଶ୍ୱାସ ଏବଂ ସ୍ୱଚ୍ଛତାର ଏକ ପରିବେଶ ସୃଷ୍ଟି କରିଥିଲୁ। ଜନ ବିଶ୍ୱାସ ଆଇନ ଅଧୀନରେ, ୧୮୦ ରୁ ଅଧିକ ବ୍ୟବସ୍ଥାକୁ ଅପରାଧମୁକ୍ତ କରାଯାଇଛି। ଆମେ ଆପଣଙ୍କର ସମୟ ବଞ୍ଚାଇଛୁ ଯାହା ଦ୍ୱାରା ଆପଣ ନବସୃଜନ ଉପରେ ଧ୍ୟାନ ଦେଇପାରିବେ, ଏବଂ ମୋକଦ୍ଦମାରେ ଏହାକୁ ନଷ୍ଟ କରିପାରିବେ ନାହିଁ। ବିଶେଷ କରି ଷ୍ଟାର୍ଟଅପ୍ ପାଇଁ, ଆମେ ଅନେକ ଆଇନରେ ସ୍ୱ-ପ୍ରମାଣପତ୍ର ପ୍ରଚଳନ କରିଛୁ। ଆମେ ମିଶ୍ରଣ ଏବଂ ପ୍ରସ୍ଥାନକୁ ସହଜ କରିଦେଇଛୁ।

ବନ୍ଧୁଗଣ,

ଷ୍ଟାର୍ଟଅପ୍ ଇଣ୍ଡିଆ କେବଳ ଏକ ଯୋଜନା ନୁହେଁ, ବରଂ ଏକ "ଇନ୍ଦ୍ରଧନୁ ଦୃଷ୍ଟି"। ଏହା ବିଭିନ୍ନ କ୍ଷେତ୍ରକୁ ନୂତନ ସୁଯୋଗ ସହିତ ଯୋଡ଼ିବାର ଏକ ମାଧ୍ୟମ। ପ୍ରତିରକ୍ଷା ଉତ୍ପାଦନକୁ ଦେଖନ୍ତୁ - ପୂର୍ବରୁ, ଷ୍ଟାର୍ଟଅପ୍ ଗୁଡିକ ପ୍ରତିଷ୍ଠିତ ଖେଳାଳିମାନଙ୍କ ସହିତ ପ୍ରତିଯୋଗିତା କରିବାର କଳ୍ପନା ମଧ୍ୟ କରିପାରୁଥିଲେ କି? ଆଇଡେକ୍ସ ମାଧ୍ୟମରେ , ଆମେ ରଣନୈତିକ କ୍ଷେତ୍ରରେ ଷ୍ଟାର୍ଟଅପ୍ ପାଇଁ କ୍ରୟର ନୂତନ ରାସ୍ତା ଖୋଲିଛୁ। ମହାକାଶ କ୍ଷେତ୍ର, ଯାହା ପୂର୍ବରୁ ବ୍ୟକ୍ତିଗତ ଅଂଶଗ୍ରହଣ ପାଇଁ ସମ୍ପୂର୍ଣ୍ଣ ବନ୍ଦ ଥିଲା, ଏବେ ଖୋଲାଯାଇଛି। ଆଜି, ପ୍ରାୟ ୨୦୦ ଷ୍ଟାର୍ଟଅପ୍ ମହାକାଶ କ୍ଷେତ୍ରରେ କାମ କରୁଛନ୍ତି, ଏବଂ ସେମାନେ ବିଶ୍ୱସ୍ତରୀୟ ସ୍ୱୀକୃତି ଲାଭ କରୁଛନ୍ତି। ସେହିପରି, ଡ୍ରୋନ୍ କ୍ଷେତ୍ରକୁ ଦେଖନ୍ତୁ - ଏକ ସକ୍ଷମ ଢାଞ୍ଚା ଅଭାବରୁ ଭାରତ ବର୍ଷ ବର୍ଷ ଧରି ପଛରେ ପଡ଼ି ରହିଥିଲା। ଆମେ ପୁରୁଣା ନିୟମକୁ ହଟାଇ ଦେଇଛୁ ଏବଂ ନବସୃଜନକାରୀଙ୍କ ଉପରେ ବିଶ୍ୱାସ ରଖିଛୁ।

ବନ୍ଧୁଗଣ,

ସାର୍ବଜନୀନ କ୍ରୟ କ୍ଷେତ୍ରରେ, ଆମେ ଜିଇଏମ୍ , ସରକାରୀ ଇ - ମାର୍କେଟପ୍ଲେସ୍ ମାଧ୍ୟମରେ ବଜାର ପ୍ରବେଶକୁ ବିସ୍ତାର କରିଛୁ। ଆଜି, ପ୍ରାୟ ୩୫,୦୦୦ ଷ୍ଟାର୍ଟଅପ୍ ଏବଂ ଛୋଟ ବ୍ୟବସାୟ ଜିଇଏମ୍ରେ ସାମିଲ ହୋଇଛନ୍ତି । ସେମାନେ ପ୍ରାୟ ୫୦,୦୦୦ କୋଟି ଟଙ୍କାର ପ୍ରାୟ ୫୦୦,୦୦୦ ଅର୍ଡର ପାଇଛନ୍ତି। ଏମିତି ଦେଖିବାକୁ ଗଲେ ଷ୍ଟାଟଅପ୍ ଗୁଡିକ ସେମାନଙ୍କର ସଫଳତା ଦ୍ୱାରା, ପ୍ରତ୍ୟେକ କ୍ଷେତ୍ର ପାଇଁ ଅଭିବୃଦ୍ଧିର ନୂତନ ରାସ୍ତା ଖୋଲି ଦେଉଛନ୍ତି।

ବନ୍ଧୁଗଣ,

ଆମେ ସମସ୍ତେ ଜାଣୁ ଯେ ପୁଞ୍ଜି ବିନା, ସର୍ବୋତ୍ତମ ଚିନ୍ତାଧାରା ମଧ୍ୟ ବଜାରରେ ପହଞ୍ଚିପାରିବ ନାହିଁ। ସେଥିପାଇଁ ଆମେ ନବସୃଜନକାରୀଙ୍କ ପାଇଁ ଆର୍ଥିକ ସୁବିଧା ସୁନିଶ୍ଚିତ କରିବା ଉପରେ ଧ୍ୟାନ ଦେଇଛୁ। ଷ୍ଟାର୍ଟଅପ୍ସ ପାଇଁ ଅର୍ଥ ପାଣ୍ଠି ମାଧ୍ୟମରେ, ୨୫,୦୦୦ କୋଟି ଟଙ୍କାରୁ ଅଧିକ ନିବେଶ କରାଯାଇଛି। ଷ୍ଟାର୍ଟଅପ୍ ଇଣ୍ଡିଆ ସିଡ୍ ଫଣ୍ଡ, ଇନ୍ - ସ୍ପେସ୍ ସିଡ୍ ଫଣ୍ଡ ଏବଂ ନିଧି ସିଡ୍ ସପୋର୍ଟ ପ୍ରୋଗ୍ରାମ ଭଳି ଯୋଜନାଗୁଡ଼ିକ ଷ୍ଟାର୍ଟଅପ୍ସକୁ ସିଡ୍ ଫଣ୍ଡିଂ ପ୍ରଦାନ କରୁଛନ୍ତି। ଋଣ ଉପଲବ୍ଧତାକୁ ଉନ୍ନତ କରିବା ପାଇଁ, ଆମେ କ୍ରେଡିଟ୍ ଗ୍ୟାରେଣ୍ଟି ଯୋଜନା ମଧ୍ୟ ଆରମ୍ଭ କରିଛୁ, ଯାହା ଦ୍ଵାରା ସୃଜନଶୀଳତାର ରାସ୍ତାରେ ବନ୍ଧକ ସୃଷ୍ଟି ନହୁଏ।

ବନ୍ଧୁଗଣ,

ଆଜିର ଗବେଷଣା କାଲିର ବୌଦ୍ଧିକ ସମ୍ପତ୍ତିରେ ପରିଣତ ହୁଏ। ଏହାକୁ ପ୍ରୋତ୍ସାହିତ କରିବା ପାଇଁ, ଆମେ ଏକ ଲକ୍ଷ କୋଟି ଟଙ୍କା ବ୍ୟୟ ସହିତ ଗବେଷଣା, ବିକାଶ ଏବଂ ନବସୃଜନ ଯୋଜନା ଆରମ୍ଭ କରିଛୁ। ଉଦୀୟମାନ କ୍ଷେତ୍ରଗୁଡ଼ିକରେ ଦୀର୍ଘକାଳୀନ ନିବେଶକୁ ସମର୍ଥନ କରିବା ପାଇଁ, ଆମେ ଏକ ଡିପ୍ ଟେକ୍ ଫଣ୍ଡ ଅଫ୍ ଫଣ୍ଡ ମଧ୍ୟ ସୃଷ୍ଟି କରିଛୁ।

ବନ୍ଧୁଗଣ,

ଏବେ ଆମକୁ ଭବିଷ୍ୟତ ପାଇଁ ପ୍ରସ୍ତୁତ ହେବାକୁ ପଡିବ। ଆମକୁ ନୂତନ ଚିନ୍ତାଧାରା ଉପରେ କାମ କରିବାକୁ ପଡିବ। ଆଜି ଏମିତି ଅନେକ କ୍ଷେତ୍ର ମୁଣ୍ଡ ଟେକୁଛି ଯାହା କାଲି ଦେଶର ଆର୍ଥିକ ସୁରକ୍ଷା ଏବଂ ରଣନୈତିକ ସ୍ୱାୟତ୍ତତାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ।  ଏଆଇ ଆମ ଆଗରେ ଏକ ସ୍ପଷ୍ଟ ଉଦାହରଣ। ଯେଉଁ ଦେଶ ଏଆଇ ବିପ୍ଳବରେ ସବୁଠାରୁ ଆଗକୁ ବଢ଼ିବ, ସେହି ଦେଶ ସବୁଠାରୁ ଅଧିକ ଲାଭ ପାଇବ। ଭାରତ ପାଇଁ, ଏହି କାର୍ଯ୍ୟକୁ ଆମର ଷ୍ଟାର୍ଟଅପ୍ ଦ୍ୱାରା ଆଗକୁ ବଢ଼ାଯିବା ଉଚିତ। ଏବଂ ଆପଣ ସମସ୍ତେ ଜାଣନ୍ତି, ଫେବୃଆରୀରେ, ବିଶ୍ୱ ଏଆଇ ସମ୍ମିଳନୀ - ଏଆଇ ପ୍ରଭାବ ସମ୍ମିଳନୀ - ଏଠାରେ ଆୟୋଜନ କରାଯାଉଛି। ଏହା ଆପଣଙ୍କ ସମସ୍ତଙ୍କ ପାଇଁ ଏକ ମହାନ ସୁଯୋଗ। ମୁଁ ଏହି କ୍ଷେତ୍ରରେ ଉଚ୍ଚ କମ୍ପ୍ୟୁଟିଂ ଖର୍ଚ୍ଚ ଭଳି ଚ୍ୟାଲେଞ୍ଜ ବିଷୟରେ ଅବଗତ। ଭାରତ ଏଆଇ ମିଶନ ମାଧ୍ୟମରେ, ଆମେ ସମାଧାନ ପ୍ରଦାନ କରୁଛୁ। ଆମେ ୩୮,୦୦୦ରୁ ଅଧିକ ଜିପିୟୁ ସାମିଲ କରିଛୁ। ଆମର ପ୍ରୟାସ ହେଉଛି ଛୋଟ ଷ୍ଟାର୍ଟଅପ୍ ପାଇଁ ମଧ୍ୟ ବଡ଼ ପ୍ରଯୁକ୍ତିବିଦ୍ୟା ସହଜରେ ଉପଲବ୍ଧ କରାଇବା। ଆମେ ଏହା ମଧ୍ୟ ସୁନିଶ୍ଚିତ କରୁଛୁ ଯେ ସ୍ୱଦେଶୀ ଏଆଇ ଭାରତୀୟ ପ୍ରତିଭାଙ୍କ ଦ୍ୱାରା ଭାରତୀୟ ସର୍ଭରରେ ବିକଶିତ ହେଉ। ସେମିକଣ୍ଡକ୍ଟର, ଡାଟା ସେଣ୍ଟର, ସବୁଜ ହାଇଡ୍ରୋଜେନ୍ ଏବଂ ଅନ୍ୟାନ୍ୟ ଅନେକ କ୍ଷେତ୍ରରେ ସମାନ ପ୍ରୟାସ କରାଯାଉଛି।

ବନ୍ଧୁଗଣ,

ଆମେ ଆଗକୁ ବଢ଼ିବା ସହିତ, ଆମର ମହତ୍ତ୍ୱାକାଂକ୍ଷା କେବଳ ସହଭାଗୀତା ପର୍ଯ୍ୟନ୍ତ ସୀମିତ ହେବା ଉଚିତ୍ ନୁହେଁ। ଆମକୁ ବିଶ୍ୱ ନେତୃତ୍ୱ ପାଇଁ ଲକ୍ଷ୍ୟ ରଖିବାକୁ ପଡିବ। ନୂତନ ଚିନ୍ତାଧାରା ଉପରେ କାମ କରନ୍ତୁ, ସମସ୍ୟାର ସମାଧାନ କରନ୍ତୁ। ବିଗତ ଦଶନ୍ଧିଗୁଡ଼ିକରେ, ଆମେ ଡିଜିଟାଲ୍ ଷ୍ଟାର୍ଟଅପ୍ ଏବଂ ସେବା କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରିଛୁ। ଏବେ ସମୟ ଆସିଛି ଯେ ଆମର ଷ୍ଟାର୍ଟଅପ୍ ଉତ୍ପାଦନ ଉପରେ ଅଧିକ ଧ୍ୟାନ ଦେବେ। ଆମକୁ ନୂତନ ଉତ୍ପାଦ ସୃଷ୍ଟି କରିବାକୁ ପଡିବ। ଆମକୁ ବିଶ୍ୱର ସର୍ବୋତ୍ତମ ଗୁଣବତ୍ତାପୂର୍ଣ୍ଣ ସାମଗ୍ରୀ ଉତ୍ପାଦନ କରିବାକୁ ପଡିବ। ଅନନ୍ୟ ଚିନ୍ତାଧାରା ଉପରେ କାମ କରି ଆମକୁ ପ୍ରଯୁକ୍ତିବିଦ୍ୟାରେ ନେତୃତ୍ୱ ନେବାକୁ ପଡିବ। ଭବିଷ୍ୟତ ହେଉଛି ପ୍ରଯୁକ୍ତି ବିଦ୍ୟାର। ମୁଁ ଆପଣଙ୍କୁ ବିଶ୍ୱାସ ଦେଉଛି, ପ୍ରତ୍ୟେକ ପ୍ରୟାସରେ ସରକାର ଆପଣଙ୍କ ସହିତ ଠିଆ ହୋଇଛନ୍ତି। ମୋର ଆପଣଙ୍କ କ୍ଷମତା ଉପରେ ଗଭୀର ବିଶ୍ୱାସ ଅଛି। ଭାରତର ଭବିଷ୍ୟତ ଆପଣଙ୍କ ସାହସ, ଆତ୍ମବିଶ୍ୱାସ ଏବଂ ନବସୃଜନ ଦ୍ୱାରା ଗଢ଼ି ଉଠୁଛି। ଗତ ଦଶ ବର୍ଷ ଦେଶର କ୍ଷମତାକୁ ପ୍ରମାଣିତ କରିଛି। ଆଗାମୀ ଦଶ ବର୍ଷରେ ନୂତନ ଷ୍ଟାର୍ଟଅପ୍ ଧାରା ଏବଂ ପ୍ରଯୁକ୍ତିବିଦ୍ୟାରେ ଭାରତ ବିଶ୍ୱର ନେତୃତ୍ୱ ନେବା ଆମର ଲକ୍ଷ୍ୟ ହେବା ଉଚିତ୍।

ପୁଣିଥରେ, ମୁଁ ଆପଣମାନଙ୍କୁ ସମସ୍ତଙ୍କୁ ହୃଦୟର ସହିତ ଅଭିନନ୍ଦନ ଜଣାଉଛି। ଆପଣ ସମସ୍ତଙ୍କୁ ବହୁତ ବହୁତ ଧନ୍ୟବାଦ।

***

SSP