న్యూఢిల్లీ డిక్లరేషన్ ఆమోదంతో ముగిసిన ఏఐ ఇంపాక్ట్ సదస్సు-2026

ఈ నెల 18–19 తేదీల్లో న్యూఢిల్లీలో జరిగిన ఏఐ ఇంపాక్ట్ సదస్సు-2026... కృత్రిమ మేధ రంగంలో ప్రపంచ సహకారాన్ని సాధించడంలో కీలక విజయాన్ని సూచిస్తూ, ఏఐ ప్రభావంపై న్యూఢిల్లీ డిక్లరేషన్‌ను ఆమోదించడంతో ముగిసింది.

ఆర్థిక వృద్ధి, సామాజిక శ్రేయస్సు కోసం ఏఐని ఉపయోగించడంపై అనేక దేశాలు, సంస్థల ఏకాభిప్రాయాన్ని ప్రతిబింబిస్తూ ఈ డిక్లరేషన్‌ను 88 దేశాలు, అంతర్జాతీయ సంస్థలు ఆమోదించాయి.

ఏఐ కోసం ప్రపంచస్థాయి ఉమ్మడి దార్శనికత

“సర్వజన హితాయ, సర్వజన సుఖాయ” (అందరికీ సంక్షేమం, అందరికీ ఆనందం) సూత్రం మార్గనిర్దేశంలో రూపొందించిన ఈ డిక్లరేషన్ ఏఐ ప్రయోజనాలు మానవాళికి సమానంగా అందాలని పిలుపునిస్తుంది.

ఇది వీటిని స్పష్టం చేస్తుంది:

• అంతర్జాతీయ సహకారం, బహుళ వాటాదారుల భాగస్వామ్యాన్ని బలోపేతం చేయడం

• జాతీయ సార్వభౌమత్వాన్ని గౌరవించడం

• అందుబాటులో ఉండే, విశ్వసనీయమైన విధాన ప్రణాళికల ద్వారా ఏఐని అభివృద్ధి చేయడం

ఏడు స్తంభాల (చక్రాల) కార్యాచరణ

ఏఐ రంగం కోసం ప్రపంచస్థాయి సహకారానికి పునాది వేస్తూ, ఏడు కీలక కార్యాచరణ లక్ష్యాల ఆధారంగా ఈ ప్రకటనను రూపొందించారు:

1. ఏఐ వనరుల ప్రజాస్వామీకరణ

2. ఆర్థిక వృద్ధి, సామాజిక శ్రేయస్సు

3. సురక్షితమైన, విశ్వసనీయమైన ఏఐ

4. సైన్స్ కోసం ఏఐ

5. సామాజిక సాధికారతను సాధించుట

6. మానవ మూలధన అభివృద్ధి

7. సౌలభ్యమైన, సమర్థమైన, వినూత్న ఏఐ వ్యవస్థలు

ప్రధాన ప్రపంచస్థాయి ఫలితాల ప్రకటన

ఈ సదస్సు స్వచ్ఛంద, సహకారాత్మక ప్రపంచస్థాయి కార్యక్రమాలను అందించింది, అవి:

1. ఏఐ ప్రజాస్వామ్యిక విస్తరణ కోసం చార్టర్

• ప్రాథమిక ఏఐ వనరులు సరసమైన ధరకు అందుబాటులో ఉంచుటను ప్రోత్సహిస్తుంది

• స్థానికంగా సంబంధితమైన ఆవిష్కరణ వ్యవస్థలకు మద్దతునిస్తుంది

2. ప్రపంచస్థాయిలో ఏఐ వినియోగ సందర్భాలు, వనరుల ఏకీకరణ వేదిక

• ఏఐ వినియోగ సందర్భాలను విస్తరిస్తూ, ప్రపంచవ్యాప్తంగా వాటిని పునరుత్పత్తి చేసే ఒక వేదిక

• అభివృద్ధి ప్రభావం కోసం ప్రపంచస్థాయి సహకారానికి వీలు కల్పిస్తుంది

3. విశ్వసనీయ ఏఐ కామన్స్

• సాధనాలు, ప్రమాణాలు, అత్యుత్తమ విధానాల కేంద్ర స్థానం

• సురక్షితమైన, విశ్వసనీయ ఏఐ వ్యవస్థల అభివృద్ధికి మద్దతునిస్తుంది

4. సైన్స్ సంస్థల కోసం అంతర్జాతీయ ఏఐ నెట్‌వర్క్

• ప్రపంచస్థాయిలో శాస్త్రీయ సహకారాన్ని సులభతరం చేస్తుంది

• ఏఐ-ఆధారిత పరిశోధన సామర్థ్యాలను మెరుగుపరుస్తుంది

5. సామాజిక సాధికారత వేదిక కోసం ఏఐ

• జ్ఞానాన్ని పరస్పరం ఉపయోగించుకోవడం, సమర్థ పరిష్కారాలను రూపొందించుటకు వీలు కల్పిస్తుంది

• ఏఐ ప్రయోజనాలు అందరికీ సమానంగా అందించడంపై దృష్టి పెడుతుంది

6. ఉద్యోగులపై ఏఐ ప్రభావాన్ని నావిగేట్ చేసేందుకు ఉపయోగించే మార్గదర్శి, కొత్త నైపుణ్యాలను నేర్పించే సూత్రాలు

• ఏఐ నైపుణ్యాల శిక్షణ, కొత్త నైపుణ్యాలపై శిక్షణ, అవగాహనకు మద్దతునిస్తుంది

• ఏఐ-ఆధారిత ఆర్థిక వ్యవస్థ కోసం దేశాలను సిద్ధం చేస్తుంది

7. సౌలభ్యమైన, సమర్థవంతమైన ఏఐ కోసం మార్గదర్శక సూత్రాలు

• ఇంధన-సమర్థత గల ఏఐ వ్యవస్థలపై దృష్టి పెట్టడం

• ఏఐ మౌలిక సదుపాయాల సౌలభ్యం కోసం ప్లేబుక్ ద్వారా మద్దతునివ్వడం

ఆర్థిక వృద్ధి, సామర్థ్యంపై దృష్టి సారించడం

డిక్లరేషన్ వీటిని ప్రధానంగా ప్రస్తావిస్తుంది:

• ఆర్థిక పరివర్తనను కొనసాగించడంలో ఏఐ పాత్ర

• ఓపెన్-సోర్స్, అందుబాటులో గల ఏఐ వ్యవస్థల ప్రాముఖ్యత

• ఇంధన-సమర్థత గల ఏఐ మౌలిక సదుపాయాల అవసరం

• సైన్స్, పాలన, ప్రజా సేవల పంపిణీలో ఏఐ పాత్రను విస్తరించడం

ప్రపంచ సహకారాన్ని బలోపేతం చేయడం

సదస్సులో పాల్గొన్న దేశాలు, సంస్థలు కింది లక్ష్యాల పట్ల తమ నిబద్ధతను పునరుద్ఘాటించాయి:

• ఏఐ పాలనలో ఉమ్మడి ప్రపంచ ప్రాధాన్యాలను మెరుగుపరచడం

• స్వచ్ఛందమైన, చట్టపరమైన బాధ్యతలు లేని విధాన ప్రణాళికలను ప్రోత్సహించడం

• నిరంతర సహకారం ద్వారా దార్శనికత కార్యరూపం దాల్చేలా చేయడం

ఈ సదస్సు దీర్ఘకాలిక అంతర్జాతీయ భాగస్వామ్యాలను ప్రోత్సహిస్తూ, ఆర్థిక వృద్ధి కోసం ఏఐని కీలక చోదక శక్తిగా నిలుపుతుందని అంచనా వేసింది.

88 దేశాలు,అంతర్జాతీయ సంస్థలు ఆమోదించిన సదస్సు డిక్లరేషన్ ఇక్కడ ఉంది.

అనుబంధం

ఏఐ ఇంపాక్ట్ సదస్సు డిక్లరేషన్

న్యూఢిల్లీ 18-19 ఫిబ్రవరి 2026

ప్రవేశిక

“సర్వజన హితాయ, సర్వజన సుఖాయ” (అందరి సంక్షేమం, అందరి ఆనందం) సూత్రం స్ఫూర్తిగా ఏఐ ప్రయోజనాలు మానవాళి అంతటికీ సమానంగా అందినప్పుడే ఏఐ వాగ్దానం ఉత్తమంగా సాకారం అవుతుందని మేం విశ్వసిస్తున్నాం.

దేశాలు, అంతర్జాతీయ సంస్థల భాగస్వామ్యంతో ఫిబ్రవరి 19, 2026న న్యూఢిల్లీలో ఏఐ ఇంపాక్ట్ సదస్సును నిర్వహించడానికి మేం సమావేశమయ్యాం. సాంకేతికత పరిణామ పథంలో ఏఐ ఆగమనం ఒక కీలక మలుపును సూచిస్తుంది. ఈ రోజు మనం చేసే ఎంపికలు భవిష్యత్ తరాలు వారసత్వంగా పొందే ఏఐ-ఆధారిత ప్రపంచాన్ని రూపొందిస్తాయి.

మానవ మూలధన అభివృద్ధి సూత్రాలు కేంద్రంగా సామాజిక సాధికారతను మరింత అందుబాటులో ఉండేలా చేయడం... ఏఐ వ్యవస్థల విశ్వసనీయత... ఏఐ వ్యవస్థల ఇంధన సామర్థ్యం... సైన్స్ రంగంలో ఏఐ వినియోగం... ఏఐ వనరుల ప్రజాస్వామీకరణ... ఆర్థిక వృద్ధి, సామాజిక శ్రేయస్సు కోసం ఏఐ వాడకం అనే ఏడు చక్రాల (మూలస్తంభాల) కోసం మరింత మెరుగైన అంతర్జాతీయ సహకారం, బహుళ వాటాదారుల భాగస్వామ్యం అవసరమని ఏఐ ఇంపాక్ట్ సదస్సు ఆయా దేశాలు, అంతర్జాతీయ సంస్థలకు పిలుపునిచ్చింది. ప్రస్తుతం కొనసాగుతున్న అంతర్జాతీయ, ఇతర కార్యక్రమాలకు అనుబంధంగా... జాతీయ సార్వభౌమత్వాన్ని గౌరవిస్తూ ఏడు చక్రాల (స్తంభాలు) వ్యాప్తంగా అమలవుతున్న కార్యక్రమాలను గమనిస్తూ, మానవాళికి సేవ చేసేలా ఏఐని ఎలా తయారు చేయవచ్చనే విషయంగా ఉమ్మడి అవగాహనను పెంపొందించడానికి మేం కృషి చేస్తాం.

ఏఐ వనరుల ప్రజాస్వామీకరణ

ఏఐ విస్తరణ కోసం, దాని పూర్తి సామర్థ్యాన్ని సద్వినియోగం చేసుకోవడం కోసం బలమైన డిజిటల్ మౌలిక సదుపాయాలు, అర్థవంతమైన, సరసమైన కనెక్టివిటీలు ముందస్తు అవసరాలు. “వసుధైక కుటుంబం” (ప్రపంచమంతా ఒకే కుటుంబం) సూత్రం స్ఫూర్తిగా అన్ని దేశాలు తమ పౌరుల ప్రయోజనం కోసం ఏఐని అభివృద్ధి చేయడానికి, స్వీకరించడానికి, అమలు చేయడానికి కీలకమైన ఏఐ వనరులను పొందే స్తోమతను మెరుగుపరచడం, వాటిని అందరికీ అందుబాటులో ఉంచాల్సిన ప్రాముఖ్యాన్ని మేం గుర్తించాం.

దీని కోసం జాతీయ చట్టాలను గౌరవిస్తూనే ప్రాథమిక ఏఐ వనరులను మరింత అందుబాటులో ఉంచేందుకు, స్థానికంగా సంబంధితమైన ఆవిష్కరణలకు మద్దతునివ్వడానికి, సమర్థ ఏఐ వ్యవస్థల బలోపేతం కోసం స్వచ్ఛందమైన, చట్టబద్ధ నిబంధనల బాధ్యతలు లేని విధాన ప్రణాళికగా ఏఐ ప్రజాస్వామిక విస్తరణ కోసం చార్టర్‌ను మేం రూపొందించాం.

ఆర్థిక వృద్ధి, సామాజిక శ్రేయస్సు

ఏఐని, ఏఐ-ఆధారిత అప్లికేషన్‌లను విస్తృతంగా స్వీకరించడం అనేది ఆర్థిక, సామాజిక అభివృద్ధిని నడిపించే అపూర్వ సామర్థ్యం కలిగిఉంది. ఓపెన్-సోర్స్ ఏఐ అప్లికేషన్‌లు, అందుబాటులో గల ఏఐ విధానాలు, సముచితమైన చోట ఏఐ వినియోగ సందర్భాల విస్తృత-స్థాయి విస్తరణ రంగాల్లో ఏఐ వ్యవస్థల గణనీయ ఉపయోగం, ప్రతిరూపత, అనువర్తన యోగ్యతలకు దోహదపడతాయి.

గ్లోబల్ ఏఐ ఇంపాక్ట్ కామన్స్‌ను స్వచ్ఛంద కార్యక్రమంగా మేం గుర్తించాం. ఇది అన్ని ప్రాంతాల్లో విజయవంతమైన ఏఐ వినియోగ సందర్భాలను స్వీకరించడం, పునరుత్పత్తి చేయడం, స్థాయిని పెంపొందించుటను ప్రోత్సహించడానికి, ప్రారంభించడానికి ఒక ఆచరణాత్మక వేదికను అందిస్తుంది.

సురక్షితమైన, విశ్వసనీయమైన ఏఐ

నమ్మకాన్ని కలిగించడానికి, సామాజిక-ఆర్థిక ప్రయోజనాలను పెంపొందించడానికి సురక్షితమైన, విశ్వసనీయమైన, దృఢమైన ఏఐని అభివృద్ధి చేయడం పునాది అవుతుంది. సంభావ్య భద్రతా అంశాలపై మన అవగాహనను మరింతగా పెంచుకోవడం ముఖ్యమైనదని గమనించడం సహా... ఏఐ వ్యవస్థల్లో భద్రత, పరిశ్రమ ఆధారిత స్వచ్ఛంద చర్యలు, సాంకేతిక పరిష్కారాల అమలు, ఏఐ జీవితచక్రం అంతటా ప్రజా ప్రయోజనాలను ప్రోత్సహిస్తూ ఆవిష్కరణలకు వీలు కల్పించే తగిన విధాన ప్రణాళికల ప్రాముఖ్యాన్నీ మేం గుర్తించాం.

అందరూ తమ సందర్భాలకు అలాగే దాని స్వచ్ఛంద మార్గదర్శక నోట్‌కు అనుగుణంగా వినియోగించగల, స్వీకరించగల సాంకేతిక వనరులు, సాధనాలు, ప్రమాణాలు, ఉత్తమ పద్ధతులను ఏకీకృతం చేసే సహకార వేదికగా స్వచ్ఛందమైన, చట్టబద్ధ నిబంధనల బాధ్యత లేని విశ్వసనీయమైన ఏఐ కామన్స్ అభివృద్ధినీ మేం గుర్తించాం.

సైన్స్

ఏఐ పరిశోధన మౌలిక సదుపాయాలకు నిర్మాణాత్మక అడ్డంకులను తొలగించడం, లభ్యతను పెంచడం వల్ల ఆయా దేశాల్లో శాస్త్రీయ పరిశోధన, అభివృద్ధిలో ఏఐ వినియోగాన్ని ప్రోత్సహించవచ్చని మేం గుర్తించాం. అంతర్జాతీయ శాస్త్రీయ సహకారాలు ప్రత్యేకమైన నైపుణ్యం, దృక్పథాలు, వనరులను అందుబాటులో ఉండేలా చేయగల సామర్థ్యం కలిగి ఉండడం ద్వారా పరిశోధన, అభివృద్ధిలో ఏఐ సామర్థ్యాన్ని పూర్తి స్థాయిలో సద్వినియోగం చేసుకోగలవు.

ప్రభావవంతమైన ఏఐ స్వీకరణను వేగవంతం చేయడానికి, భాగస్వామ్య సంస్థలు ఉన్న ప్రాంతాల్లో శాస్త్రీయ సంఘాలను అనుసంధానించడానికి, సైన్స్ సంస్థలు ఏఐ పరిశోధన సామర్థ్యాలను సమీకరించడానికి ఒక వేదికగా స్వచ్ఛంద, సహకార అంతర్జాతీయ ఏఐ నెట్‌వర్క్‌నూ మేం గమనించాం.

సామాజిక సాధికారత కోసం వినియోగం

జ్ఞానాన్ని, వివిధ దేశాల పరిష్కారాలు, సమాచారం, సేవలు, అవకాశాలను ప్రజలందరూ సమానంగా వినియోగించుకునేలా చేయడం ద్వారా, సామాజిక-ఆర్థిక కార్యకలాపాల్లో భాగస్వామ్యాన్ని పెంపొందించడం ద్వారా సమాజంలోని అన్ని వర్గాలను అభివృద్ధి చేయగల సామర్థ్యాన్ని ఏఐ కలిగి ఉంది. సామాజిక సాధికారత కోసం ఏఐ స్వీకరణను సులభతరం చేసే సహకారాల ప్రాముఖ్యాన్నీ మేం గుర్తించాం.

సామాజిక సాధికారత కోసం ఏఐ స్వీకరణను ముందుకు తీసుకెళ్లడానికి అభ్యసనం, జ్ఞానం, గణనీయ ప్రభావం గల పద్ధతులను పరస్పరం పంచుకోవడాన్ని సులభతరం చేయడానికి స్వచ్ఛంద, సహకార వేదికను అభివృద్ధి చేయడం అవసరమని మేం గమనించాం.

మానవ మూలధనం

ఏఐ పూర్తిస్థాయి వాగ్దానాన్ని గ్రహించడం కోసం ఏఐ మానవ వనరుల అభివృద్ధిని విస్తరించడం, విద్య విషయంలో నిర్దిష్ట కార్యక్రమాలను, ఏఐ శ్రామిక శక్తిని అభివృద్ధి చేయడం, ప్రభుత్వ అధికారులకు శిక్షణనివ్వడం, ఏఐ సామర్థ్యాల గురించి ప్రజల్లో అవగాహనను పెంపొందించడం, ఏఐ అవగాహనను విస్తరించడం, అలాగే వృత్తి, శిక్షణ వ్యవస్థలను అప్‌గ్రేడ్ చేయడం ద్వారా వ్యక్తులను సంబంధిత నైపుణ్యాలతో సన్నద్ధం చేయడం అవసరం.

అర్థవంతమైన నైపుణ్యాభివృద్ధి, కొత్త నైపుణ్యాలపై శిక్షణనిచ్చే ఏఐ కార్యక్రమాల విషయంలో అంతర్జాతీయ సహకారాన్ని ప్రోత్సహిస్తూనే, ఏఐ యుగంలో నూతన నైపుణ్యాల అభ్యసనం కోసం స్వచ్ఛంద మార్గదర్శక సూత్రాలను, భవిష్యత్ ఏఐ ఆధారిత ఆర్థిక వ్యవస్థ కోసం సన్నద్ధమయ్యే భాగస్వాములకు మద్దతునిచ్చే ఏఐ శ్రామిక శక్తి అభివృద్ధిపై ప్లేబుక్‌ను మేం రూపొందించాం.

సౌలభ్యం, ఆవిష్కరణ, సామర్థ్యం

ఇంధనం, మౌలిక సదుపాయాలు, సహజ వనరులపై పెరుగుతున్న ఏఐ డిమాండ్లను గుర్తిస్తూ... ఇంధన సామర్థ్యం గల ఏఐ వ్యవస్థలను అభివృద్ధి చేయాల్సిన ప్రాముఖ్యాన్ని మేం స్పష్టం చేశాం. సరసమైన ఏఐ వ్యవస్థలు ఏఐని మరింత అందుబాటులోకి తీసుకువస్తాయి. ఉమ్మడి అభివృద్ధి ఆకాంక్షలను ముందుకు తీసుకెళ్లే స్థానిక ఆవిష్కరణలను వేగవంతం చేస్తాయి.

సౌలభ్యం గల, వినూత్నమైన, సమర్థవంతమైన కృత్రిమ మేధ గురించిన స్వచ్ఛంద మార్గదర్శక సూత్రాలు సౌలభ్యం గల, సమర్థమైన ఏఐ వ్యవస్థల అభివృద్ధి దిశగా మనకు మార్గనిర్దేశం చేస్తాయని మేం గుర్తించాం. సౌలభ్యంతో కూడిన ఏఐ మౌలికవసతుల అభివృద్ధి గురించిన ప్లేబుక్‌ను మేం జ్ఞానాభివృద్ధికి ఫలితంగా గుర్తించాం. ఇది సౌలభ్యంతో కూడిన ఏఐ అభివృద్ధికి మద్దతునిచ్చే సూచనాత్మక వనరు.

ముగింపు                                                                                                       

ఏఐ ఇంపాక్ట్ సదస్సు... అంతర్జాతీయ సహకారాన్ని బలోపేతం చేయడానికి, భాగస్వామ్య ప్రాధాన్యాలను ముందుకు తీసుకెళ్లడానికి బహుళ వాటాదారుల విధానాన్ని అలాగే స్వచ్ఛందమైన, చట్టబద్ధమైన నిబంధనల బాధ్యతలేని మార్గదర్శకాలు, సూత్రాలను బలోపేతం చేయడానికి దోహదపడుతుందని మేం గుర్తించాం. ఇది మానవాళికి సుసంపన్న భవిష్యత్తును నిర్ధారించడానికి ఏఐని ప్రోత్సహించగలదు.

ఏఐ ప్రయోజనాలను సాకారం చేసుకోవాలనే మా ఉమ్మడి ఆకాంక్షలను ముందుకు తీసుకెళ్లడానికి మేం కట్టుబడి ఉన్నాం. ఈ ఆకాంక్షలను ఇండియా ఏఐ ఇంపాక్ట్ సదస్సు-2026 మూడు సూత్రాల కోసం ధృడమైన చర్యలుగా అనువదించడానికి నిరంతర సహకారం కోసం మేం ఎదురుచూస్తున్నాం.

ఆమోదం తెలుపుతున్న దేశాలు/అంతర్జాతీయ సంస్థలు:

***