গ্লোবেল বিজিনেস সম্মিৎ অসিদা ময়াম পুম্নমকপু তরাম্না ওকচরি। ঐহাক্না অদোম খুদিংমকপু য়াইফ-পাউজেল পীজরি। ঐখোয়না “এ দিকেদ ওফ দিসরপ্সন, এ সেঞ্চুরি ওফ চেঞ্জ” হায়বা থীম অসিদা খন্ন-নৈননবা মফম অসিদা লৈরে। ভিনিৎ জীগী ৱারোলগী মতুংদা, ঐহাক্কী থবক অসি য়াম্না লায়থোক্লে হায়না ঐহাক্না ফাওই। অদুম ওইনমক ঐহাক্না অপীকপা ৱাফম অমা হায়জগে- অদোম্না য়াম্না খঙবনিনা, করিগুম্বা মতমদা মসি ই.তি.দসু উবা ফংগনি।

মরুপশিং,

২১শুবা চহিচাগী হৌখিবা চহি তরাগী খুজিং অসি মমাংদা অমুক্তা ওইখিদ্রিবা অহোংবা কয়া অমা লাকখি। মালেম অসিনা মালেমগী ওইবা লাইনা-লাইচৎ অমা, তোঙান-তোঙানবা লমদমশিংদা তংদু লৈতবা অমসুং লান কয়া অমা, অমসুং মালেমগী থাক্তা শোকহল্লিবা সপ্লাই চেনগী অপনবা কয়া অমা চহি তরাগী মনুংদা থেংনখি। অদুবু মরুপশিং, লৈবাক অমগী অশেংবা শক্তি অসি খুদোংচাদবা মতমদা ফোংদোকই হায়না হায়নৈ। অমসুং ঐহাক্না চাউথোকচবা পোকই মদুদি অৱাবা কয়াগী মরক্তা, চহি তরাসি ভারতকীদমক্তা মমাংদা অমুক্তা ওইখিদ্রিবা চাউখৎপগী চহি তরানি, মসিদা মশক থোকপা দেলিভর অমসুং দেমোক্রেসীগী মপাঙ্গল কনখৎহনবগী মমি তারি। মমাংগী দিকেদ হৌরকপা মতমদা, ভারত অসি মালেমগী খ্বাইদগী চাউবা ইকোনোমীগী ১১শুবা মফমদা লৈরম্মি। অসিগুম্বা অৱা-অনাগী মরক্তা, ভারতনা মখা তানা মাংলোমদা চঙশিল্লকপা য়াবগী অকিবা য়াম্না লৈখি। অদুবু ঙসিদি, ভারত অসি মালেমগী খ্বাইদগী চাউবা ইকোনোমীগী অহুমশুবা মফমদা লৈনবগী মায়কৈদা খোঙজেল য়াংনা চংশিল্লি। অমসুং অদোম্না হায়রিবা "সেঞ্চুরি ওফ চেঞ্জ" অসি, ঐহাক্না অচৌবা থৌদাংগা লোয়ননা হায়জরি, ভারতনা মরুওইবা থৌদাং লৌগনি। ঙসিদি, ভারতনা মালেমগী চাউখৎ-থৌরাংদা চাদা ১৬ হেন্না শরুক তম্মি অমসুং চহিচা অসিগী লাক্কদৌরিবা চহি খুদিংদা ঐখোয়গী থৌদাং অসি লেপ্পা লৈতনা হেনগৎলগনি হায়না ঐহাক্না থাজবা থম্লি। ঐহাক্না মফমসিদা এস্ত্রোলোজর অমগুম্না মাংজৌননা ফোংদোক্নবগীদমক লাকখিবা নত্তে। ভারতনা মালেমগী চাউখৎপা পুরক্কনি। মসিনা মালেমগী শেন্মিৎলোনগী অনৌবা ইঞ্জিন অমা ওইরক্লগনি।

মরুপশিং,

মালেমগী অনিশুবা লাঞ্জাওগী মতুংদা, অনৌবা মালেমগী ওইবা ওর্দর অমা শেমখি। অদুবু চহি তরেৎকী মতুংদা, সিস্তেম অসি কায়থরক্লি। মালেম অসি অনৌবা মালেমগী ওইবা কাংলোন অমগী মায়কৈদা চংশিল্লি। মসি করিগীদমক থোক্লিবনো? মসিনা মরম ওইদুনা হান্নগী সিস্তেম অসিগী য়ুম্ফম অসি "ৱান সাইজ ফিৎস ওল" এপ্রোচতা য়ুম্ফম ওইবনা ওইখি। মালেমগী শেন্মিৎলোন অসি কোরদা য়ুম্ফম ওইগনি অমসুং সপ্লাই চেনশিং অসি মপাঙ্গল কনখৎলগনি অমসুং থাজবা লৈগনি হায়না থাজনরম্মি। লৈবাকশিং অসি ফ্রেমৱার্ক অদুগী মনুংদা কন্ত্রিব্যুতরশিং ওইনা খক্তা উনরম্মি। অদুবু ঙসিদি, মোদেল অসি চেলেঞ্জ তৌরি অমসুং মসিগা মরী লৈনবশিং মাঙশিল্লক্লি। লৈবাক খুদিংমক্না হৌজিক মশাগী রেসিলিয়েন্স শেমগৎকদবনি হায়বসি খঙলে।

মরুপশিং,

ঙসি মালেম্না খন্ন-নৈনরিবা অসি, ভারতনা চহি তরাগী মমাংদা, ২০১৫গী মমাংদা, মসিগী পোলিসীগী শরুক অমা ওইহনখি। নীতি আয়োগ লিংখৎপা মতমদা, মসিগী ফাউন্দেসন দোক্যুমেন্ত অসিনা ভারতকী মিৎয়েং অদু ময়েক শেংনা ফোংদোকখি: ভারতনা অতোপ্পা লৈবাক অমদগী চাউখৎপগী মোদেল অমত্তা ইমপোর্ত তৌরোই। ঐখোয়না ভারতকী চাউখৎ-থৌরাংগীদমক ভারতকী ওইবা এপ্রোচ অমা চঙশিনগনি। মসিগী পোলিসী অসিনা ভারতপু মশাগী মথৌ তাবশিং অমসুং মশাগী নেস্নেল ইন্তরেস্ততা য়ুম্ফম ওইদুনা ৱারেপ লৌবগী থাজবা পীখি। মসিনা মরুওইবা মরম অমা ওইদুনা, চহি তরাগী খুজিং কয়াগী মনুংদা, ভারতকী শেন্মিৎলোন অসি হন্থরকখিদে অদুবু মখা তানা মপাঙ্গল কনখৎলকখি।

মরুপশিং,

২১শুবা চহিচাগী চহি তরাগী খুজিং অসিদা, ভারতনা রিফোর্ম এক্সপ্রেস অমদা চৎলি। রিফোর্ম এক্সপ্রেস অসিগী খ্বাইদগী চাউবা মগুন অসিদি ঐখোয়না মসিবু তঙাইফদনা নত্তনা থাজবগা লোয়ননা অমসুং রিফোর্মগীদমক অচেৎপা থাজবা অমগা লোয়ননা খোংজেল য়াংশিনবা হায়বসিনি। শেল-থুমগী লমদা মমিং লৈরবা অখঙ-অহৈ অমসুং শক্নাইরবা মীওই কয়া মফম অসিদা লৈরি। অদোম্না ২০১৪গী মমাংগী মতম অদু উবা ফংলে। রিফোর্মশিং অসি করিগুম্বা ফিভম্না মথৌ তারকপা মতমদা, ক্রাইসিস অমা থোকপা মতমদা, অতোপ্পা পাম্বৈ অমত্তা লৈতবা মতমদা পাংথোকই। ১৯৯১গী রিফোর্মশিং অসি লৈবাক অসিনা শেঞ্জা-থুমজাগী খুদোংথীবা মায়োক্নরকপা মতমদা পাংথোকখি অমসুং লৈবাক অসিনা মসিগী সনাগী পোৎলমশিং থাদোকপা মথৌ তাখি। মসি মমাংগী সরকারশিংগী থৌওংনি- মখোয়না রিফোর্মশিং অসি তঙাইফদনা তৌখি। ২৬/১১গী তেরোরিস্ত এতেক্তকী মতুংদা, কংগ্রেস সরকারগী মপাঙ্গল হন্থরকপা উবা ফংলবা মতমদা, এন.আই.এ. শেমখি। পাৱর সেক্তর কাইথরকপা অমসুং গ্রিদশিং নীংখাইবা হৌবা মতমদা, দরকার ওইবদগী পাৱর সেক্তরদা রিফোর্মশিং পাংথোকখি।

মরুপশিং,

করিগুম্বা রিফোর্মশিং অসি তঙাইফদনা তৌরবদি, অচুম্বা ফলশিং অদু ফংদে অমসুং অপাম্বা নেস্নেলগী মহৈশিং অদু ফংদে হায়বা ঐখোয়দা নীংশিংহল্লিবা খুদম কয়া অমা লৈরি।

মরুপশিং,

হৌখিবা চহি ১১ অসিদা ঐখোয়না পোলিসী, প্রোসেস, দেলিভরী অমসুং মাইন্দসেৎকী মপুং ফাবা কনভেন্সনগা লোয়ননা রিফোর্মশিং পাংথোকখিবা অসিদা ঐহাক চাউথোকচরি। মরমদি, পোলিসীশিং হোংলবসু থৌওংশিংদি মান্নৈ, ৱাখল্লোনশিংদি মান্নৈ, অমসুং থবকশিংদি ফগৎলক্ত্রবদি, রিফোর্মশিং অসি পেপরগী খরা খক্তমক ওইগনি। মরম অদুনা, ঐখোয়না সিস্তেম পুম্নমক অসি শেমদোক্নবা কন্না হোৎনখি।

মরুপশিং,

ঐহাক্না থৌওংশিংগী মরমদা ঙাংগনি। অচম্বা অদুবু মরুওইবা থৌওং অমা হায়রগদি কেবিনেৎ নোৎশিং অসিনি। মফম অসিদা লৈরিবা মীওই কয়ানা খঙলমগনি মদুদি মমাংদদি কেবিনেৎ নোৎ অমা শেম্বা খক্তদা থা কয়া চঙই। লৈবাক অমনা মতৌ করম্না অসুম্না খোঙজেল য়াংনা চাউখৎপা ঙমগনি? মরম অদুনা ঐখোয়না থৌওং অসিবু হোংদোকখি। ঐখোয়না ৱারেপ লৌবদা মতম চানা অমসুং তেক্নোলোজীনা লমজিংবা ওইহল্লি। কেবিনেৎ নোৎ অমবু অখন্নবা পুং মশিং অমদগী হেন্না ওফিসর অমগী দেস্কতা লেংদনা লৈহন্দনবা, মদু রিজেক্ত তৌরো নত্রগা ৱারেপ লৌবা ওইরো ঐখোয়না খুদোংচাবা পীখি। ঙসি লৈবাক অসিনা মসিগী মহৈ অদু উবা ফংলি।

মরুপশিং,

রেলৱে ওভরব্রিজশিংগী অয়াবা পীনবগী খুদমসু ঐনা পীজরি। মমাংদা, দিজাইন অমা খক্তবু অয়াবা পীনবা চহি কয়া অমা চঙলম্মি। তোঙান তোঙানবা অয়াবা কয়া অমা মথৌ তাখি, অমসুং তোঙান তোঙানবা থাকশিংদা অইবা চেরোলশিং ইবা তাখি - অমসুং ঐহাক্না প্রাইবেৎ সেক্তরগী মতাংদা নত্তে, লৈঙাক্কী মরমদা ঙাংলি। ঐখোয়না মসিসু হোংদোক্লে। ঙসি, লম্বী অমসুং রেলৱে ইনফ্রাস্ত্রকচর শেমগৎপগী খোঙজেল অসি য়েংসি। ভিনিৎ জীনা মসিগী মতাংদা কুপ্না শন্দোক্না তাকখি।

মরুপশিং,

অতোপ্পা শিংথানিংঙাই ওইরবা খুদম অমনা নেস্নেল সেক্যুরিতীগা হকথেংননা মরী লৈনবা ঙমখৈগী ইনফ্রাস্ত্রকচরনি। মতম অমা লৈরম্মি মদুদা ঙমখৈগী মফমশিংদা অচম্বা লম্বী অমা শাবদা দিল্লীদগী অয়াবা লৌবা মথৌ তারম্মি। দিস্ত্রিক্তকী থাক্তা, ৱারেপ লৌনবগী শক্তি লৈবা ওথোরিতী অমত্তা লৈতে; ফক্লাং অমগী মথং ফক্লাং অমা লৈ, অমসুং কনাগুম্বা অমত্তনা থৌদাং লৌবা ঙমদে। মসিনা মরম ওইদুনা, দিকেদ কয়াগী মতুংদা ফাওবা, ঙমখৈগী ইনফ্রাস্ত্রকচর অসি ফত্তবা ফীভমদা লৈরি। ২০১৪গী মতুংদা, ঐখোয়না থৌওং অসি শেমদোকখি, লোকেল এদমিনিস্ত্রেসনদা শক্তি পীখি, অমসুং ঙসিদি ঐখোয়না ঙমখৈগী ইনফ্রাস্ত্রকচরদা খোঙজেল য়াংনা চাউখৎপা উবা ফংলি।

মরুপশিং,

হৌখিবা দিকেদ অমদা মালেম শীনবা থুংনা পুক্নিং চিংশিনখিবা রিফোর্ম অমা হায়রগদি, ভারতকী দিজিতেল পেমেন্ত সিস্তেম, য়ু.পি.আই.নি। মসি এপ অমা খক্তা নত্তে, মসি পোলিসী, প্রোসেস অমসুং দেলিভরীগী অখন্নবা কনভর্জেন্স অমনি। বেঙ্কিং অমসুং ফাইনান্সিএল সর্ভিসশিং ফংলগনি হায়না খল্লমদবা মীওইশিং অদু হৌজিক্তি য়ু.পি.আই. দিজিতেল ইন্দিয়া, দিজিতেল পেমেন্ত সিস্তেম, জনধন-আধার-মোবাইল ত্রিনিতী অসিগুম্বা রিফোর্মশিং অসি কমপলজন নত্তে, কনভিক্সননি। ঐখোয়গী থাজবা অসি মমাংগী সরকারশিংনা য়ৌশিল্লমদ্রবা নাগরিকশিংবু য়াওহন্নবনি। কনাগুম্বা অমত্তনা য়েংশিনখিদবশিংবু মোদীনা ইকায় খুম্নবা উৎলি অমসুং শক্তি পীরি। মরম অসিনা রিফোর্মশিং অসি পায়খৎলি, অমসুং ঐখোয়গী সরকার অসিনা হায়রিবা ৱাখল্লোন অসিগা লোয়ননা মাংলোমদা চংশিল্লি।

মরুপশিং,

ভারতকী অনৌবা ৱাখল্লোন অসি ঐখোয়গী বজেৎ অসিদা উৎলি। মমাংদা, বজেৎ অদু খন্ন-নৈনখিবা মতমদা, মীৎয়েং অসি শেল থাদবগী মতাংদা খক্তদা ওইরম্মি। শেল কয়া লেম্না থাদখি, করম্বা শেল হন্থরকখি, করম্বা শেল হেন্না চংখি। তেলিভিজনদা, বজেৎকী মতাংদা খন্ন-নৈনবদা লৈবাক অসিদা মসিগী মথক্তা করিগুম্বা অমত্তা লৈতবগুম্না, ইনকম তেক্স হেনগৎলক্কদ্রা নত্ত্রগা হন্থরক্কদ্রা হায়বদুগী মতাংদা খন্ন-নৈনখি। অনৌবা ত্রেন কয়া লাউথোকখিবা অদুগী মশিংনা হেদলাইনশিংদা মকোক থোংখি, অমসুং তুংদা লাউথোকখিবা অদুদা করি থোকখিবগে হায়না কনা অমত্তনা হংখিদে। মরম অদুনা, ঐখোয়না বজেৎ অসি শেল থাদবদা য়ুম্ফম ওইবা অদুদগী ফলদা য়ুম্ফম ওইবা অমদা ওন্থোকখি।

মরুপশিং,

বজেৎকী ৱাখৈদা অতোপ্পা মশক থোকপা অহোংবা অমা লৈরি: ২০১৪গী মমাংদা, বজেৎকী মপান্দা লোন লৌবগী মতাংদা পাক-শন্না খন্ন-নৈনখি। হৌজিক, বজেৎকী মপান্দা শেমদোক-শাদোকপগী মতাংদা খন্ন-নৈনবা অমা লৈরি। বজেৎকী ফ্রেমৱার্ক্কী ৱাংমদা, ঐখোয়না নেক্স জেনরেসনগী জি.এস.তি.গী রিফোর্মশিং পায়খৎখি, প্লানিং কম্মিসনবু নীতি আয়োগনা মহুৎ শিনখি, আর্তিকল ৩৭০ লৌথোকখি, ত্রিপল তলাক্কী মায়োক্তা আইন শেমখি, অমসুং নারী শক্তি ভন্দন এক্ত পাস তৌখি।

মরুপশিং,

বজেৎকী মনুংদা নৎত্রগা মসিগী মথক্তা লাউথোক্লবসু রিফোর্ম এক্সপ্রেস অসি লেপ্তনা খোঙজেল য়াংখৎলক্লি। হৌখিবা চহি খক্তদা, ঐখোয়না পোর্তশিং অমসুং মেরিতাইম সেক্তরদা রিফোর্মশিং পাংথোকখ্রে, শিপ বিল্দিং ইন্দস্ত্রীগীদমক থৌরাং কয়া পায়খৎলে, জন বিশ্বাস এক্তকী মখাদা রিফোর্মশিং পায়খৎলে, ইনর্জী সিক্যুরিতীগীদমক শান্তি এক্ত চৎনহনখি, লেবর লো রিফোর্মশিং চৎনহনখি, ভারতীয় ন্যায় সনহিতা হৌদোকখি, ৱাকফ আইন শেমদোকখি, অমসুং খুঙ্গংগী থবক ফংহন্নবা অনৌবা জি.আর.এ.এম. জি. এক্ত হৌদোকখি। চহি অসিদা অসিগুম্বা রিফোর্ম কয়া অমা পায়খৎলে।

মরুপশিং,

চহি অসিগী বজেৎ অসিনা রিফোর্ম এক্সপ্রেস অসি হেন্না খুমাং চাউশিলহল্লে। বজেৎ অসিদা মাইকৈ কয়া অমা লৈরবসু, মরুওইবা মরম অনি- কেপেক্স অমসুং তেক্নোলোজীগী মতাংদা ঐহাক্না ঙাংগনি। মমাংগী চহিশিংগুম্না, ইনফ্রাস্ত্রকচরদা চাদিং অসি চাউরাক্না লুপা করোর লাখ ১৭দা হেনগৎহনখ্রে। কেপেক্সকী মল্তিপ্লাইয়র ইফেক্ত য়াম্না লৈ হায়বা অদোম্না খঙই। মসিনা লৈবাক অসিগী কেপাসিতী অমসুং প্রদক্তিবিতী হেনগৎহল্লি অমসুং সেক্তর কয়াদা পাক-শন্না থবক ফংহল্লি। য়ুনিভর্সিতী তাউনশিপ মঙা শাগৎপা, তিয়র-২ অমসুং তিয়র-৩গী শহরশিংদা সিতী ইকোনোমিক রিজনশিং শেমগৎপা, অমসুং অনৌবা হাই-স্পিদ রেল কোরিদোর তরেৎ শেমগৎপা, অসিগুম্বা বজেৎকী লাউথোকশিং অসি ঐখোয়গী নহাশিং অমসুং লৈবাক অসিগী তুংলমচৎতা থাদোকপা শেনফমশিংনি।

মরুপশিং,

হৌখিবা চহি তরা অসিদা, ঐখোয়না তেক্নোলোজী অমসুং ইন্নোবেসনবু চাউখৎপগী মরুওইবা দ্রাইভরশিং ওইনা লৌরক্লি। মসিগী ৱাখল্লোন অসিগা লোয়ননা, ঐখোয়না স্তার্ত-অপ কলচর অমসুং হেক্কাথোন কলচর লৈবাক শিনবা থুংনা প্রমোৎ তৌখি। ঙসি, ভারতনা তোঙান তোঙানবা সেক্তরশিংদা থবক তৌরিবা রেজিস্তর তৌরবা স্তার্ত-অপ লাখ অনি হেন্না লৈরে। ঐখোয়না ঐখোয়গী নহাশিংবু পুক্নিং থৌগৎখি অমসুং রিস্ক লৌবগী মগুন অদু মগুন হাপচিনখি। মসিগী মহৈশিং অসি ঐখোয়গী মাংদা উবা ফংই। চহি অসিগী বজেৎ অসিনা মসিগী প্রাইওরিতি অসিবু মখা তানা মপাঙ্গল কনখৎহল্লি। মরুওইবা পাউজেলশিং, মরুওইনা বাইওফার্মা, সেমিকন্দক্তরশিং অমসুং এ.আই.গুম্বা সেক্তরশিংগীদমক পীখ্রে।

মরুপশিং,

লৈবাক অসিগী শেন্মিৎলোনগী মপাঙ্গল হেনগৎলকপগা লোয়ননা ঐখোয়না রাজ্যশিংবুসু মতিক চাবা মওংদা শক্তি পীরি। ঐহাক্না অতোপ্পা ফিগর অমগা পনবা পাম্মি। চহি তরাগী মনুংদা, ২০০৪ অমসুং ২০১৪গী মরক্তা, রাজ্যশিংনা তেক্স দিভোলুসন ওইনা চাউরাক্না লুপা করোর লাখ ১৮ ফংখি। মসিগী ওন্ন-তৈনবদা, ২০১৪দগী ২০২৫ ফাওবদা, রাজ্যশিংদা লুপা করোর লাখ ৮৪ পীখ্রে। চহি অসিগী বজেৎতা প্রপোজ তৌরিবা চাউরাক্না লুপা করোর লাখ ১৪ অসি ঐহাক্না হাপচিল্লবদি, ঐখোয়গী সরকারগী মখাদা অপুনবা রাজ্যশিংদা তেক্স দিভোলুসন অসি লুপা করোর লাখ ১০০ য়ৌগনি। হায়রিবা শেনফম অসি কেন্দ্র সরকারনা তোঙান তোঙানবা রাজ্য সরকারশিংদা মখোয়গী লমশিংদা চাউখৎ থৌরাংগী থবকশিং পায়খৎনবা ত্রান্সফর তৌখ্রে।

মরুপশিং,

ঙসিদি, ভারতকী এফ.তি.এ.শিং-ফ্রী ত্রেদ এগ্রীমেন্তশিংগী মতাংদা কন্না খন্ন-নৈনরি। ঐহাক্না মফম অসিদা লাকপা মতমদা, ৱারী শানবশিং অসি হান্ননা হৌখ্রে, অমসুং মালেম শীনবা থুংনা নৈনবশিং অসি পাংথোক্লি। ঙসিদি, ঐহাক্না অতোপ্পা নুংঙাইবা মীৎয়েং অমা উৎচরি- করিগুম্বা মেদিয়ানা পাম্লিবা মীৎয়েং অদু ওইরবসু, অদুবু কান্নবা অমা ওইবা য়াই। ঐহাক্না থাজৈ মদুদি ঐহাক্না হৌজিক হায়গদৌরিবা অসি অদোমগী ৱাখল্লোনদসু লাক্লোই। চাউখৎলবা লৈবাকশিংগা অসিগুম্বা পাক-চাউবা ফ্রী ত্রেদ এগ্রীমেন্তশিং অসি ২০১৪গী মমাংদা করিগীদমক তৌদবনো হায়না অদোম্না হংলকপরা? লৈবাক অসি চপ মান্নখি, নহা ওইবগী ইনর্জী অসি চপ মান্নখি, লৈঙাক্কী পথাপ অসি চপ মান্নখি-অদোম্না করি হোংদোকপা পাম্বিবগে? অহোংবা অসি সরকারগী মিৎয়েং, মসিগী পোলিসী অমসুং পান্দম অমসুং ভারতকী তৌবা ঙম্বদা লাকখি।

মরুপশিং,

খজিক্তং খল্লু-ভারতপু 'ফ্রেজাইল ফাইভ' ইকোনোমীশিংগী মরক্তা লেবেল তৌরকপা মতমদা, ঐখোয়গা কনানা থবক তৌগনি? খুঙ্গং অমদা, লায়রবা ইমুং অমদা মখোয়গী মচানুপী লুহোংহনবদা ইনাক খুনবা ইমুং অমনা য়াগদ্রা? মখোয়বু হন্থনা য়েংগনি। মসি মালেম অসিদা ঐখোয়গী ফিভমনি। লৈবাক অসি পোলিসী পেরালাইসিসনা শোকহল্লবা, স্কেম অমসুং করপ্সননা কোইশিনবা মতমদা, ভারত্তা কনানা থাজবা থম্বা ঙমগনি? ২০১৪গী মমাংদা, ভারতকী মেন্যুফেকচরিং বেজ অসি য়াম্না শোল্লম্মি। মমাংগী সরকারশিং অসি খল্লমদে; কনাগুম্বা অমত্তনা ভারতকা নকশিন্নখিদে, অমসুং হোৎনবা য়াবদি হোৎনরবসু, মখোয়না চাউখৎলবা লৈবাকশিংগা ৱারী শানবনা লৈবাকশিং অসিনা ঐখোয়গী কৈথেলশিংদা ঈশিং তুরক্লগনি অমসুং মখোয়বু লৌশিনবা ঙম্লগনি হায়না মখোয়না অকিবা ফাওখি। অৱাবা তারিবা ফিভম অদুদা, ২০১৪গী মমাংদা, য়ু.পি.এ. সরকারনা লৈবাক মরি খক্তগা লোয়ননা মপুং ফাবা ললোন-ইতিক্কী এগ্রীমেন্তশিং পায়খৎখি। মসিগী ওন্ন-তৈনবদা, হৌখিবা চহি তরা অসিদা ভারতনা লোইশিনখিবা ত্রেদ এগ্রীমেন্তশিংনা মালেমগী তোঙান তোঙানবা মফমশিংদা লৈবা লৈবাক ৩৮দা কোনশিল্লি। ঙসি ঐখোয়না ত্রেদ এগ্রীমেন্ত তৌরি মরমদি ভারতনা থাজবা থম্লি। ঙসিগী ভারত অসি মালেমগী থাক্তা চাংদম্নবা শেম-শারি। হৌখিবা চহি ১১ অসিদা, ভারতনা মপাঙ্গল কনবা মেন্যুফেকচরিং ইকোসিস্তেম অমা শেমগৎলে। মরম অদুনা, ঙসি ভারত অসি তৌবা ঙম্বা ওইরে অমসুং শক্তি লৈ, অমসুং মরম অসিনা মালেম অসিনা ঐখোয়দা থাজবা থম্লি। অসিগুম্বা অহোংবা অসিনা ঐখোয়গী ত্রেদ পোলিসীদা পেরাদাইম শিফকী য়ুম্ফম ওইরি। অমসুং মসিগী পেরাদাইম শিফ অসি ভিক্সিৎ ভারত অমগী মায়কৈদা ঐখোয়না চংশিল্লিবা খোঙচৎ অসিদা মরুওইবা য়ুম্ফম অমা ওইরে।

মরুপশিং,

ঐখোয়গী সরকারনা মীপুম খুদিংমক চাউখৎ-থৌরাং অসিদা শরুক য়াহনবদা মপুং ফানা পুক্নিং চিংশিন্না থবক তৌরি। প্রোগ্রেসকী লমদা মাংজিল থারিবা মীওইশিংবু মরুওইনা লৌরি। মমাংগী সরকারশিংনা দিসএবল ওইরবা মীওইশিংগীদমক খোংথাংশিং খক্তমক লাউথোকখি। ঐখোয়নসু মসিগী লম্বী অসিদা মখা চত্থবা ঙমগনি। অদুবু সেন্সিতিবিতীনা গবর্নান্সকী মশক তাকই। ঐহাক্না পীগদৌরিবা খুদম অসি অদোমগী মরক্তগী খরদা অপীকপা অমা ওইনা খল্লকপা য়াই। ঐখোয়গী লৈবাক অসিদা লোলগী ওইবা মখল-মখা কয়া লৈবগুম্না, সাইন লেঙ্গুয়েজসু মখল-মখা কয়া লৈরম্মি- তামিল নাদুদা মখল অমা, উত্তর প্রদেশতা অতোপ্পা মখল অমা, গুজরাত্তা অহুমশুবা মখল অমা, আসামদা মরিশুবা মখল অমা। করিগুম্বা রাজ্য অমদগী অতোপ্পা রাজ্য অমদা লৈবা দিসএবল ওইবা মীওই অমা চৎলবদি, কম্ম্যুনিকেসন তৌবদা অৱাবা ওই। মসি অচৌবা থবক অমা ওইনা উবা য়ারোই, অদুবু সেন্সিতিব ওইবা সরকারনা অসিগুম্বা হীরমশিং অসি য়াম্না মরু ওই হায়না লৌদে। ভারতনা ইহান হানবা ওইনা ইন্দিয়ন সাইন লেঙ্গুয়েজবু ইন্সতিত্যুস্নেল অমসুং স্তেন্দর্দাইজ তৌখ্রে। অসিগুম্বা মওংদা, ত্রান্সজেন্দর কম্ম্যুনিতীনা মখোয়গী হকশিংগীদমক মতম শাংনা লান্থেংনখি। ঐখোয়না মখোয়দা ইকায় খুম্নবা অমসুং ঙাক-শেনবগী আইন শেমখি। হৌখিবা দিকেদ অমদা, নুপী মিলিয়ন কয়া ত্রিপল তলাক্কী রিগ্রেসিভ ওইবা চৎনবীদগী কনবা ঙমখ্রে, অমসুং লোক সভা অমসুং রাজ্য বিধান সভাশিংদা নুপীশিংগী রিজার্বেসন ফংহনখ্রে।

মরুপশিং,

সরকারগী মেকানিজমগী মনুংগী ৱাখল্লোনসু অহোংবা লাক্লি, হেন্না সেন্সিতিব ওইরক্লি। ৱাখল্লোনগী খেন্নবসি মথৌ তাবশিংদা লেম্না চিঞ্জাক পীবগী থৌরাংশিংদা উবা ফংই। ওপোজিসনগী মীওই খরনা ঐখোয়বু ইকায় খুম্নৈ; অখন্নবা পাউচে খরনা অসিগুম্বা ইকায় খুম্নবশিং অসিবু ময়েক শেংহল্লি। মীওই মিলিয়ন ২৫০না লায়রবা ফিভমদগী ফগৎলে হায়না লৌনরিঙৈদা মখোয়না করিগীদমক লেম্না রসন পীবগে হায়না হংই। মসি অখন্নবা ৱাহং অমনি। অনাবা অমনা হোস্পিতালদগী দিসচার্জ তৌরবা মতুংদা, দোক্তর অদুনা নুমিৎ খরনিগী ওইনা চেকশিন থৌরাংশিং লৌখৎনবা খঙহনগদ্রা? হোয়, মীওই অদু লায়রবা ওইরম্বদগী কোকহল্লে, অদুবু মসিনা তাক্লিবদি মতেং পীবা অসি মদু খুদক্তা লেপলোইদবনি। চাউনা য়েংবা ঙমদবা মীওইশিংনা খঙবা ঙমদে মদুদি কনাগুম্বা অমবু লায়রবা কোকহনবসি খক্তনা লোইদে। ঐখোয়না নিও-মিদল ক্লাসতা চঙলবা মীওইশিং অদু লায়রবা অমুক চংহন্দনবা হোৎনগদবনি। মরম অসিনা লেপ্পা লৈতনা লেম্না চিঞ্জাক ফংহনবগী মওংদা মতেং পীবা অসি মথৌ তাই। হৌখিবা চহিশিংদা, কেন্দ্র সরকারনা মসিগী স্কিম অসিদা লুপা করোর লাখ কয়া চাদিং তৌদুনা লায়রবশিং অমসুং নিও-মিদ্দল ক্লাসতা চাউনা মতেং পাংখি।

মরুপশিং,

ঐখোয়না অতোপ্পা মফম অমদা ৱাখল্লোনগী খেন্নবা অমা উবা ফংই। মীওই খরনা ঐনা ২০৪৭গী মরমদা করিগীদমক্তা ঙাংলি হায়না হংলকই। মতম অদুগী মনুংদা ভিক্সিৎ ভারত অসি তশেংনা ওইরকপা ঙমগদ্রা অমসুং মতম অদুদা ঐখোয় ইশামক্না লৈখিদ্রবদি করিবু কান্নগনি হংই। মসিসু মীয়াম্না খনবা ৱাখল্লোন অমনি।

মরুপশিং,

ভারতকী নীংতম্বা ফংনবগীদমক লান্থেংনখিবা মীওইশিংনা লাথিগী চার্জশিং, সেলুলর জেলদা থম্বা, অমসুং ফাশি ফাওবা য়ানখি। করিগুম্বা মখোয়না নীংতম্বা অসি মখোয়গী পুন্সিদা লাক্লরোই হায়না খল্লম্লবদি অমসুং মসিগীদমক মখোয়না করিগীদমক অৱা-নুংঙাই কয়া মায়োক্নরক্কদগে হায়না হংলম্লবদি, ভারতনা নীংতম্বা ফংলমগদ্রা? লৈবাক অসিনা অহানবদা লাকপা মতমদা, লৈবাক্কী কান্নবা অসিনা খ্বাইদগী মরু ওইরকপা মতমদা, ৱারেপ খুদিংমক অমসুং পোলিসী খুদিংমক লৈবাক অসিগীদমক্তা শেম্মী। ঐখোয়গী মীৎয়েং অসি ময়েক শেংই - ঐখোয়না চাউখৎলবা ভারত অমা শেমগৎনবা লেপ্পা লৈতনা থবক তৌগদবনি। ঐখোয়না ২০৪৭দা লৈরবসু লৈত্রবসু, লৈবাক অসিনা হিংদুনা লৈগনি, অমসুং তুংগী মীরোলনা হিংদুনা লৈগনি। মরম অদুনা, ঐখোয়না মখোয়গী তুংলমচৎ অসি শাফবা অমসুং মঙাল লৈবা ওইরসনু হায়বগীদমক ঐখোয়গী হৌজিক্কী মতম অসি কৎথোক্কদবনি। হয়েংগী জেনরেসনশিংনা মহৈ ফংবা ঙম্নবগীদমক্তা ঐনা ঙসি মরু হুনবা তাই।

মরুপশিং,

মালেম অসিনা হৌজিক্তি অপনবা মরক্তা হিংনবা শেম-শাবা তাই। মসিগী মহৌশা অসি মতমগী মতুং ইন্না হোংলকপা য়াই, অদুবু সিস্তেমশিংদা য়াম্না থুনা হোংলকপা হায়বসিদি ঙাকথোকপা ঙমদে। নহাক্না এ.আই.না পুরক্লিবা শীংনবশিং অদু উবা ফংলে। লাক্কদৌরিবা চহিশিংদা, এ.আই.না অহোংবা কয়া পুরক্কনি, অমসুং ভারতনা শেম-শারি। নুমিৎ খরনিগী মতুংদা, ভারতনা গ্লোবেল এ.আই. ইম্পেক্ত সম্মিৎ পাংথোক্কনি। মালেমগী লৈবাকশিং অমসুং তেক্নোলোজীগী লুচিংবশিং মফম অসিদা পুনগনি। মখোয় পুম্নমক্কা লোয়ননা, ঐখোয়না হেন্না ফবা মালেম অমা শেমগৎনবা হোৎনবা মখা চত্থখিগনি। থাজবা অসিগা লোয়ননা, ঐহাক্না অমুক্কা হন্না ময়াম পুম্নমকপু সম্মিৎ অসিগীদমক্তা য়াইফ-পাউজেল পীজরি।

হন্না-হন্না থাগৎচরি।

ভন্দে মাতরম!

***