மத்திய உள்துறை மற்றும் கூட்டுறவுத் துறை அமைச்சர் திரு. அமித் ஷா, ஜம்மு மற்றும் காஷ்மீர் யூனியன் பிரதேசத்தில் வளர்ச்சித் திட்டங்களின் முன்னேற்றத்தை மதிப்பிடுவதற்காக இன்று ஜம்முவில் ஒரு ஆய்வுக் கூட்டத்திற்குத் தலைமை தாங்கினார். இக்கூட்டத்தின் போது, மத்திய உள்துறை அமைச்சர் திரு. அமித் ஷா, சாலை உள்கட்டமைப்பு, மின்சாரம், தொழில், சுற்றுலா, 4ஜி மற்றும் ஆப்டிகல் ஃபைபர் இணைப்பு போன்ற முக்கிய துறைகள் குறித்து விரிவான ஆய்வு மேற்கொண்டார். இந்த கூட்டத்தில் ஜம்மு மற்றும் காஷ்மீர் துணைநிலை ஆளுநர் திரு. மனோஜ் சின்ஹா, முதலமைச்சர் திரு. உமர் அப்துல்லா, மத்திய உள்துறைச் செயலாளர் மற்றும் மத்திய அரசு மற்றும் ஜம்மு மற்றும் காஷ்மீர் அரசின் மூத்த அதிகாரிகள் கலந்துகொண்டனர்.

ஒரு வளர்ந்த மற்றும் வளமான ஜம்மு, காஷ்மீரை உருவாக்கும் தொலைநோக்குப் பார்வையில் இந்திய அரசு உறுதியாக உள்ளது என்று மத்திய உள்துறை அமைச்சர் கூறினார். வளர்ச்சியை விரைவுபடுத்துவதற்காக மோடி அரசு மேற்கொண்டு வரும் தொடர்ச்சியான மற்றும் அர்ப்பணிப்புள்ள முயற்சிகளின் காரணமாக, ஜம்மு மற்றும் காஷ்மீரில் வளர்ச்சித் திட்டங்கள் முன்பில்லாத வகையில் முன்னேற்றத்தை அடைந்துள்ளன என்று அவர் கூறினார்.

நாடு முழுவதிலுமிருந்து ஜம்மு மற்றும் காஷ்மீருக்கு வருகை தரும் சுற்றுலாப் பயணிகளின் ஆர்வம் குறையவில்லை என்று திரு. அமித் ஷா கூறினார். இங்குள்ள சுற்றுலாத் திறனை ஆராய்வதற்காக, நாட்டின் மற்ற மாநிலங்களில் ஜம்மு, காஷ்மீரின் சுற்றுலாத் தலங்களை தீவிரமாக சந்தைப்படுத்த வேண்டிய அவசியம் உள்ளது என்று அவர் கூறினார். ஜம்மு காஷ்மீரில் புதிய சுற்றுலாத் தலங்களை மேம்படுத்தும் திட்டத்திற்கு இந்திய அரசு அனைத்து உதவிகளையும் வழங்கும் என்று அவர் கூறினார்.

இளைஞர்களை வளர்ச்சியுடன் இணைப்பதற்காக, விளையாட்டு உள்கட்டமைப்பை மேம்படுத்துவதிலும், விளையாட்டு அகாடமிகளை நிறுவுவதிலும் கவனம் செலுத்த வேண்டும் என்று மத்திய உள்துறை மற்றும் கூட்டுறவுத் துறை அமைச்சர் கூறினார். இது தொடர்பாக, பல்வேறு விளையாட்டு அமைப்புகளுடன் இணைந்து சுமார் ரூ 200 கோடி முதலீட்டைப் பெறுவதற்கான முயற்சிகள் மேற்கொள்ளப்படும் என்று அவர் கூறினார்.

***

(Release ID: 2224895)

TV/PKV/RK