કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે આજે કેન્દ્રશાસિત પ્રદેશ જમ્મુ અને કાશ્મીરમાં વિકાસ યોજનાઓની પ્રગતિની સમીક્ષા કરવા માટે જમ્મુમાં એક સમીક્ષા બેઠકની અધ્યક્ષતા કરી હતી. બેઠક દરમિયાન, કેન્દ્રીય ગૃહ મંત્રી શ્રી અમિત શાહે રોડ ઇન્ફ્રાસ્ટ્રક્ચર, પાવર, ઉદ્યોગ, પ્રવાસન, 4G અને ઓપ્ટિકલ ફાઈબર કનેક્ટિવિટી જેવા મુખ્ય ક્ષેત્રોની વ્યાપક સમીક્ષા કરી હતી. આ બેઠકમાં જમ્મુ અને કાશ્મીરના ઉપરાજ્યપાલ શ્રી મનોજ સિન્હા, મુખ્યમંત્રી શ્રી ઓમર અબ્દુલ્લા, કેન્દ્રીય ગૃહ સચિવ અને કેન્દ્ર સરકાર તથા જમ્મુ અને કાશ્મીર સરકાર બંનેના વરિષ્ઠ અધિકારીઓ હાજર રહ્યા હતા.

કેન્દ્રીય ગૃહ મંત્રીએ કહ્યું કે પ્રધાનમંત્રી શ્રી નરેન્દ્ર મોદીના નેતૃત્વમાં ભારત સરકાર વિકસિત અને સમૃદ્ધ જમ્મુ અને કાશ્મીરના નિર્માણના વિઝન માટે મજબૂત રીતે પ્રતિબદ્ધ છે. તેમણે કહ્યું કે વિકાસને વેગ આપવા માટે મોદી સરકાર દ્વારા કરવામાં આવી રહેલા સતત અને સમર્પિત પ્રયાસોને કારણે જમ્મુ અને કાશ્મીરમાં વિકાસ યોજનાઓએ અભૂતપૂર્વ પ્રગતિ કરી છે. તેમણે કહ્યું કે જમ્મુ અને કાશ્મીરે તેના હાઇડ્રોપાવર પ્રોજેક્ટ્સની સંપૂર્ણ ક્ષમતા વિકસાવવાની જરૂર છે. તેમણે કહ્યું કે સરકારની કલ્યાણકારી યોજનાઓના 100% સેચ્યુરેશન (સંતૃપ્તિ) હાંસલ કરવા અને તમામ વિકાસ પ્રોજેક્ટ્સના લાભો લક્ષિત લાભાર્થીઓ સુધી પહોંચે તે સુનિશ્ચિત કરવા પર વિશેષ ધ્યાન આપવું જોઈએ.

શ્રી અમિત શાહે કહ્યું કે દેશભરના પ્રવાસીઓનો જમ્મુ-કાશ્મીરની મુલાકાત લેવાનો ઉત્સાહ ઓછો થયો નથી. તેમણે કહ્યું કે અહીં ઉપલબ્ધ પ્રવાસન ક્ષમતાનો ઉપયોગ કરવા માટે દેશના અન્ય રાજ્યોમાં જમ્મુ-કાશ્મીરના પ્રવાસન સ્થળોનું આક્રમક માર્કેટિંગ કરવાની જરૂર છે. તેમણે કહ્યું કે ભારત સરકાર જમ્મુ-કાશ્મીરમાં નવા પ્રવાસન સ્થળો વિકસાવવાની યોજનામાં શક્ય તમામ મદદ પૂરી પાડશે.

કેન્દ્રીય ગૃહ મંત્રી અને સહકારિતા મંત્રીએ કહ્યું કે યુવાનોને વિકાસ સાથે જોડવા માટે રમતગમતનું માળખું વિકસાવવા અને સ્પોર્ટ્સ એકેડમી સ્થાપવા પર ધ્યાન આપવું જોઈએ. આ સંબંધમાં, વિવિધ રમતગમત સંસ્થાઓ સાથે જોડાઈને લગભગ ₹ 200 કરોડનું રોકાણ સુરક્ષિત કરવાના પ્રયાસો કરવામાં આવશે. શ્રી શાહે એમ પણ કહ્યું હતું કે નેશનલ ડેરી ડેવલપમેન્ટ બોર્ડ (NDDB) દ્વારા જમ્મુ અને કાશ્મીરમાં ડેરી ક્ષેત્રને પ્રોત્સાહન આપવા માટે પ્રયત્નો કરવા જોઈએ.

એક મહત્વપૂર્ણ પગલા તરીકે, જમ્મુ અને કાશ્મીરને નાણાકીય વર્ષ 2025-26 માં પ્રથમ વખત રાજ્યોને મૂડી રોકાણ માટે વિશેષ સહાય (SASCI) યોજના હેઠળ લાવવામાં આવ્યું છે, જે મૂડી પ્રોજેક્ટ્સ માટે 50 વર્ષની વ્યાજમુક્ત લોન મેળવવામાં સક્ષમ બનાવે છે. ગૃહ મંત્રીએ ભારપૂર્વક જણાવ્યું હતું કે મજબૂત નાણાકીય શિસ્ત સમય જતાં કેન્દ્રશાસિત પ્રદેશની નાણાકીય ખાધને સ્થિર કરવામાં મદદ કરશે.

શ્રી અમિત શાહે કહ્યું કે ભારત આઝાદીના 100 વર્ષ પૂર્ણ કરીને 2047 સુધીમાં વિકસિત ભારતના લક્ષ્ય તરફ સતત આગળ વધી રહ્યું છે અને ભારત સરકાર આ લક્ષ્યની પ્રાપ્તિમાં જમ્મુ અને કાશ્મીરને પૂરા દિલથી સમર્થન આપવાનું ચાલુ રાખશે. કેન્દ્રીય ગૃહ મંત્રી શ્રી અમિત શાહની મુલાકાત જમ્મુ અને કાશ્મીરના વિકાસ, શાંતિ અને સુરક્ષાને સર્વોચ્ચ રાષ્ટ્રીય અગ્રતા બનાવવાની ભારત સરકારની મક્કમ સંકલ્પશક્તિને રેખાંકિત કરે છે.

SM/DK/GP/JD